NABBAWAANO XAꞌMITANNO XAꞌMO

Galaatiya 4:24 Phaawuloosi hiikkunni lamu gondoori daafira coyiꞌrino?

Phaawuloosi, Abirihaamira Saaranna Aggaari ledo noosi aante daafira coyiꞌrihu gedensaanni togo yiino: “Kuri meenti lamu qaalu gondoorira lawishsha ikkino daafira, kuni coyi lawishshu tiro afiꞌrinoho.” (Gal. 4:22-24) Koye kulliha lame gondooro bashsho, Seeru gondoorootinna haaro gondoorooti yine huwantoommo. Ikkollana tenne hajo daafira lende xiinxallinummohu gedensaanni mitore biddi assa hasiissannota buunxoommo. Phaawuloosi xawisanni noohu haaru gondoori daafira ikkikkinni Abirihaami gondoori daafira ikkikki digatino. Hanni hatto yineemmo gede assannonkeha mito korkaata laꞌno.a

Phaawuloosi borojjitte mancho Aggaari Siina ilaali ledo xaadise coyꞌrino. (Gal. 4:25) Aggaari 1513 K.A. Siina Ilaalira uyinoonnihu Seeru gondoorira lawishshaho. (Ful. 19:5, 6) Guuntete xeꞌne noonsa manni konne Seera guutu garinni agadhe diafanno; hakko daafira tini Yihudu manni cubbu borojje ikkinota huwatanno gede assitannonsa. Kuni gondoori Israeelete manni konne Seera guutu garinni agadha dandaanno manchi Buuramino Moote calla ikkinota huwattano gede assinonsa. Buuramino Moote guuta heeshshosi kakkale guuta ikkinokkihu mannu sirchi cubbunna reyote borojjimmanni keeraaꞌma dandaanno gede assino. (Gal. 3:19, 24, 25) Yesuusi Maganu hedinori woꞌmanno gede assino daafira xaate Seeru dihasiisanno.—Rom. 10:4.

Phaawuloosi Aggaaranna “borojjicho ikkitinokki mancho” Saara mereero noo badooshshe coyꞌrino; Saara qaaqqo iltinohu ‘hexxote qaali garinniiti.’ (Gal. 4:23) Hakku hexxote qaali Abirihaami gondoorooti. (Gal. 3:29; 4:28, 30) Yihowa Kalaqama 22:18 Abirihaami gondoori daafira coyiꞌranni togo yiino: “Anera hajajamoottohura baattote aana noo manni baalunku [Abirihaami sirchinni] sirchikkinni maassamanno.”

Abirihaami ledo eꞌnoonni gondoori Yihowa Edenete eino gondoori daafira kulannonkeri no. (Kal. 3:15) Kuni gondoori daanno yini “sirchi” Abirihaami sirchi kalinni daannota xawo assino. Phaawuloosi daanno yini “sirchi” qari Yesuusi Kiristoosi ikkinota xawisino. Qoleno ‘Kiristoosire ikkitinori’ yaano Gashshootisira isi ledo gashshitannori 144,000 konni baxxino sirchi widooti. (Gal. 3:16, 29; Aju. 14:1-3.) Yesuusa ammantannorinna isira hajajantannori Maganu Abirihaamira eino qaale wonshanno woyte lowo atoote afidhanno.

Phaawuloosi konne lawishshu tiro afiꞌrinore horoonsiꞌrinohu maa rosiisankera hasiꞌreeti? Phaawuloosi yannasira heedhanno Yihudooti Seera calla cuꞌmidhe gibbannoha ikkiro, Aggaara gede borojje ikkite heedhannota kulanni no. Ikkollana, insa Abirihaami sirchira qara ikkinoha Yesuusi Kiristoosi adhitannoha ikkiro Saara gede wolaphitanno. Qoleno cubbunna reyote borojjimmanni addu wolapho afidhanno. (Yoh. 8:32-34) Yesuusa adhitannokkiha ikkiro kayinni, Seeru gondooro uyinoonnihu mayiraatiro huwattukkinni gattanno; Seeru gondooro uyinoonnihu insa Kiristoosi ledo xaadisateeti.

Phaawuloosi sokka borreessinonsahu Gelatiyaho heeꞌranno Kiristaani giddonni batinyu Yihudu wido ikkitinokki daafira insa horontanni Seeru hunda heedhe diegentino. Ikkollana Yihudu wido ikkitinori mitu, dagate giddonni dayino Kiristaana Seera agadhanna Seeru yaano garinni barcima hasiissannoꞌne yitanni wotto wortinonsa. Phaawuloosi Kiristoosire ikkite ‘wolaphite’ kaꞌinori galagalte Seeru ‘borojje’ ikkituro, tini gowwimma ikkitannonsata coyiꞌrino.—Gal. 5:1, 10-14.