Hundi Wari Woshshaado

Qullaawu Maxaafi mite Yesuusi haꞌrunsaano qulxuꞌme woshshaaxxitannore ikkitinota kulanno. (Maq. 1:16-20) Insa Galiilu Baarira qulxuꞌme woshshaaxxate woshshaado horoonsidhanno.

Woshshaado qaanca woy shalaalate kirre gurdine seekkinanni. Xulluwase qulxuꞌmete deerri garinni babbaxxitanno. Shiimmaadda qulxuꞌme woshshaaxxate shiimmaadda xulluwata, jajjabba woshshaaxxate kayinni halaꞌlado xulluwata horoonsiꞌnanni. Hakkawaro qulxuꞌmete woshshaado lamu garite. Mite shiimmaaddatenna qunqumadote; togoo woshshaado way giddora lixisate kincho woy wole ayirrannore usurranni. Lixxanno woyte qulxuꞌme gamba assite amaddanno. Wole qolte halaꞌlado xulluwa afidhinotenna shooli-midaadote. Tenne woshshaado qulxuꞌme amadate baaru giddo goshoonshanni. Way giddora lixxanno gede woroonni ayirrannore usurranni; aliido kayinni way aana hadhanno gede haqqaho usurranni.

Hakkawaro qulxuꞌmete woshshaado hawa gede diafiꞌnanni. Ise baaru giddo noo kinna gawajjitara woy lowo qulxuꞌme amadduro tattaꞌara dandiitanno. (Luq. 5:6) Qullaawu Maxaafi Yaaqoobinna Yohaannisi ‘woshshaadonsa gophitinota’ kulanno; gophitinohu marfetenna shalaalate heqichinni ikkikki digatino. (Mat. 4:21) Gophitannohu woshshaaxxite kaꞌu kiirooti. Luqaasi woshshaaxxitannori sabba hoolate ‘woshshaadonsa hayishshidhannota’ kulino. (Luq. 5:2) Hakkiinni woshshaadonsa akkalte tattaꞌannokki gede mooshshitanno.—Hiz. 47:10.

Yesuusi qulxuꞌme woshshaaxxitanni noore ‘manna woshshaaddara’ koysinonsa.