Mannu Giwiherono Hagiirraamo Ikka Dandaatto

1. Yesuusi mayno? Tini dhagge ikkitannonkehu mayraati?

YESUUSI ilaalaho heeꞌre sabbaki woyte, ‘Mannu giwiꞌnerono . . . kiꞌne kayinni hagiirraammaho’ yiino. (Luq. 6:22) Isi hatto yiita mannu dhagge assiꞌrikkinni digatino. Hige mannu giwasira hasiꞌrannohu ay no! Yesuusi hatto yiinohu mayraati? Xaa yannara Yesuusi haꞌrunsaano lowo manni giwannonsahura hatto yee heda garankolla. Konni birxichira, mannu giwannonkehu mayraatironna gimbinkerono hagiirraamma ikka dandiineemmo yineemmohu mayraatiro ronseemmo.

MANNU GIWANNONKEHU MAYRAATI?

2-3. Addu Kiristaana xiimbannihu mayraati? Tenne afanke gibbannonkere ma garinni laꞌneemmo gede assitannonke? (Yohaannisi 16:2, 3)

² Gimbanninkehu Yihowa magansiꞌneemmo daafiraati. Yesuusi haꞌrunsaanosi giddo mito xiibbannore wole agurina shitannore lainohunni, ‘Insa . . . Annaꞌyano aneno diaffino’ yiino. (Yohaannisi 16:2, 3 nabbawi.) Maganu manna gimbanni gede assannohu ayeti? Sheexaaneho. Isi ‘tenne alame maganooti.’ (2 Qo. 4:3, 4) Isi mannu Yihowa daafira halaale rosannokki gede surrensa ballisino; qoleno Sheexaanu, kuni manni Yihowa affinorenna baxxannore giwanno gede assanno. (Yoh. 8:42-44) Tenne afanke gibbannonkere ma garinni laꞌneemmo gede assitannonke? Insa Sheexaanu doginota afanke, gimbeemmonsakki gede kaaꞌlitannonke.

³ Hanni loosonke agamboonni gobbara heeꞌrannohu Paviyelia woꞌnaalsha laꞌno. Isi Yihowara ammaname soqqamannohura, usuru minira haaꞌne haꞌnoonnisi, ganate shinoonnisi hattono lowo agana callichosi usurroonnisi. Paviyeli togo yiino: “Mannu xiiwannonke gede assitanni noori Sheexaanenna durriissa ikkitinota seekke huwatoommo. Usuru mine loosannohu rooru manni ninke giwannoha diꞌꞌikkino. Insa loosonsalla loossanni no.” Yihowa Farciꞌraasine ikkinokki anninna amasi feexidhe gibbannosihu Kiroeshiyaho heeꞌrannohu mittu rodii togo yiino: “Anera diiniꞌya Sheexaaneho ikkinnina annaꞌyanna amaꞌya diꞌꞌikkitino.”—Efe. 6:12.

4. Yesuusinna rosaanchu Isxifaanoosi lawishshinni maa ronseemmo? (Misileno lai.)

⁴ Gibbannonkere digimbeemmo. Isinni, insara huuccatto assineemmo. (Mat. 5:44) Tennera Yesuusinna rosaanchu Isxifaanoosi kaajja lawishsha ikkitannonke. Yesuusi Roomu bagadaasine haqqaho qolte misimaaretenni gantusita, “Anna, . . . gatona yiinsa” yee huucciꞌrino. (Luq. 23:34) Konni qummeeshshira, Yesuusi iso shitanno gede hajanjoonni bagadaano Yihowa gatona yaanno gede huuccanni no. Qoleno Yesuusi hatto yiinohu diinnasi xixxiibbeennansa, ‘Iso shinona’ yiino manna hede ikkara dandaanno. Yesuusi kuni manni assanni noore afinokkita wodanchino. Rosaanchu Isxifaanoosino shitanni noosirira Magano huuccino. (Soq. 7:58-60) Yihowa Yesuusinna Isxifaanoosi huuccatto macciishshino? Ee macciishshino. Yesuusira qarra iillishshurinna shituri giddo batinyu gedensoonni maaro eꞌino, Yesuusa ammanantannota leellishshino hattono cuuantino. (Soq. 2:36-41) Qoleno Isxifaanoosi shaate sumuu yituri giddo mittu Xerseesi mancho Saaooliiti; isi gedensoonni Kiristaancho ikkino; hattono afa hoogatenni assinorira baasa gaabbino.—1 Xi. 1:13.

5. Siizer woꞌnaalshinni maa rosootto?

⁵ Yihowa xaa yannarano gibbannonkerira huuccineemmo huuccattora dawaro qolanno. Hanni Venizuweelaho heeꞌrannohu Siizer woꞌnaalsha laꞌno. Isi Yihowa Farciꞌraasincho ikkinohura annisi effire giwannosi. Siizer togo yiino: “Amaꞌya horo kullannire diafidhinote. Amaꞌya woꞌmanka woyte Maganu Gashshoote balaxisiissannoha ikkirono, annaꞌya horo lashshi diassitanno. Ise aninna roduuwiꞌya annanke ayirrinseemmo gede rosiissinonke. Qoleno anninke asse yaannonkeri Maganu fajjo ledo sumuu yaannoha ikki geeshsha hajajammeemmo gede rosiissinonke.” Gale hose Siizer anni wodani shaqqino. Isi togo yiino: “Mitto barra seekke huucciꞌrummohu gedensaanni annaꞌya, ‘Qullaawa Maxaafa xiinxallisohe?’ yuummosi. Isi maahoyye yiita hagiidhe ikkeemmota hoogummo.” Gedensoonni Siizer anni cuuamino. Hige gibbannonkerira baalaho wodaninsa shaqqanno yaa ikka hoogirono, insa ayirrinyunni coyiꞌneemmorenna dancha amanyootenke laꞌe soorrantara dandiitanno. Insa soorrantanno woyte hagiirrinke bae ikkanno! Maarannohu “gobba baalate gashshaanchi” Yihowa togoo manna isiwa abbanna laꞌꞌate quqquxammeemmo.—Kal. 18:25.

6. Maarqoosi 13:13 kultanno garinni gimbanninkehu wolu korkaati maati?

⁶ Gimbanninkehu Yesuusa ayirrinseemmohuraati. Yesuusi addu Kiristaana, “Suꞌmiꞌyara yitineenna mannu baalu giwannoꞌne” yiino. (Maarqoosi 13:13 nabbawi.) Yesuusi ‘suꞌmi’ maa leellishanno? Ayimmasinna Maganu Gashshooti Moote ikkasinni afiꞌrino biilloonye leellishanno. Yihowa gashshaancho asse shoominoha Yesuusi Kiristoosi agurte uullate gashshaano addaxxitannori dibaxxannonke. Yesuusi 1914 hanafe iima Maganu Gashshooti Moote ikke gashshanni no. Muli yannara isi gashshootesi gibbannore baala hunanno.

7-8. Mite Yihowa Farciꞌraasine mannu qacifatannonsahu mayraati? (Yohaannisi 15:18-20) (Misillano lai.)

⁷ Gimbanninkehu Sheexaanu alame gimbeemmo daafiraati. Yesuusi haꞌrunsaanosi “alamete wido” ikkitinokki daafira mannu giwannonsata xawise kulino. (Yohaannisi 15:18-20 nabbawi.) Hundi Kiristaaninte gede, tenne alamera heeꞌrannohu maganiweelu manni akata, amanyootenna coyiꞌrannore gimbeemmo. Konninni kainohunni batinye ammanate roduuwanke loosu baycho woy rosu mine qacifantanninsa. (1 Ph. 4:3, 4) Ikkirono gibbannonkerira mitootaho gale hose wodaninsa shaqqannohuranna kaajjine uurrinoommotera naaddannonke daafira tashshi yaannonke.

⁸ Hanni Mereerimi Ameerikira heeꞌrannohu Iginaasiyo woꞌnaalsha laꞌno. Rosu mine mittu rosiisaanchi Iginaasiyo Maganu biddissi garinni heeꞌranno daafira lowo diro qacifatinosi. Ikkirono Iginaasiyo maassamara kae heeꞌreenna kuni rosiisaanchi, iso lowo manni qacifatannasi Qullaawu Maxaafi biddissi garinni heeꞌra dandiinohu hiittoonniitiro xaꞌminosi. Iginaasiyo Maganu seeri garinni heeꞌra agarooshshe ikkitinosita xawisino. Hakkiinni isi rosiisaancho gambooshsheho koysi. Rosiisaanchu gambooshshe dayta Iginaasiyora yaannori baisi! Rosiisaanchu gambooshshunniwa laino baxilli dhagge ikkeennasi hatte yannanni kayse gambooshshe haꞌra diagurino. Gedensoonni kuni rosiisaanchi Qullaawa Maxaafa xiinxallinohura isono gimboonnisi. Ikkirono ayyaanaamittetenni lophe cuuamino.

9-10. (a) Kiristaana tenne Sheexaanu alamenni baxxanno gede assannonsari woluri maati? (b) Soqqamaasinchu Phaawuloosi lawishshinni maa ronseemmo?

⁹ Poletikaho woy olaho karsammeemmokki daafira tenne Sheexaanu alamenni baxxinoommoreeti. (Yoh. 18:36) Rooma 13:1 noo amaale garinni gashshaano fushshitino seerira hajajamate sharrammeemmo. Ikkirono Kiristaana ikkinoommohura poletiku coyra dikarsammeemmo; konnira gashshoote diamandeemmo woy gashshitannore didoorreemmo. Mayra? Korkaatuno Yihowaranna Gashshootisira ammanammoommoreeti. Batinye Yihowa Farciꞌraasine ammanansanni kainohunni usurroonninsa. Ikkirono insa sabbaka diagurtino. Konni garinni insa lowo diro usuraminohu soqqamaasinchu Phaawuloosi lawishsha haꞌrunsitino. (Soq. 24:27; 28:16, 30) Phaawuloosi dancha duduwo macciishshanno mannira baalaho lawishshaho, usuru mini agaraanora, daanyootaho, gashshaanotenna mootoollate duduwino; isi Roomu Gashshaanchi Neerora nafa sabbakkinoha ikkara dandaanno.—Soq. 9:15.

¹⁰ Hatteente gede usurante noo roduuwinke macciishshanno mannira baalaho lawishshaho daanyootaho, gashshaanotenna usuru mini agaraanora sabbakkanno. Poletiku coyra karsama giweenna lee saꞌꞌanno diro usurroonnisihu mittu rodii, usuru mine keeshshino yanna qorichinshoonnisihu gede asse dilaino; hatteentenni Yihowa suwashshu wodani noonsare kaaꞌlate uynosi looso loosanni saysinohu gede asse hedino. Yihowa ninke kaxxe togoo manni dancha duduwo macciishshanno gede assanno woyte hagiirrinke bae ikkanno! (Qol. 4:3) Hanni xa Yihowara soqqammeemmo woyte mannu giwinkerono hagiirraamma ikka dandiineemmo yineemmo gede assannonkeha wole korkaata laꞌno.

GIMBINKERONO HAGIIRRAAMMA IKKA DANDIINEEMMO

11. Xiimbanninke woyte ammananke kaajjitannohu hiittoonniiti? Lawishsha kuli.

¹¹ Alame gibbannonkehu masaalo woꞌmitanni noo daafira ikkinota anfoommo. Yihowa umo masaalino masaalora, Sheexaanunna sirchisi yaano halesi Yihowa baxxannorenna isira soqqantannore gibbannota kulino. (Kal. 3:15) Yesuusi shoolunku Wongeellira kulloonninte gede, tini masaalo halaale ikkase duucha hige buuxisino. (Mat. 10:22; Maq. 13:9-12; Luq. 6:22, 23; Yoh. 15:20) Wole Qullaawu Maxaafi borreessaanono tenne daafira kultino. (2 Xi. 3:12; Yaq. 1:2; 1 Ph. 4:12-14; Yih. 3, 17-19) Hakko daafira mannu xiiwinkero manse sheke diyineemmo. Hatteentenni Qullaawu Maxaafi masaalo woꞌmitanni noo daafira hagiidhineemmo. Tini halaalaanchu Maganira soqqammanni heeꞌnoommota buuxissanno. Loosonke hoolloonni gobbara heedhannoti mitte rodoo togo yitino: “Heeshshoꞌya Yihowara sayse uumma woyte, dartu gatannokki coye ikkinota afoomma. Hakko daafira qarru iilliero diinowaajjeemma diinomaalaꞌleemma.” Ise giwanno manni giddo mittu minaannaseeti. Isi miicinose hattono Qullaawa Maxaafanna borruwase giire hunino. Ikkollana ise waajjite badhe higantenni ammanatenni jawaattino. (Ibi. 10:39) Ise togo yitino: “Dartu masaalle worroonnire ikkino daafira gatannokkire ikkinota afoomma. Konnira, dartu iillieta noommati addu ammaꞌno ikkitinota albinni roore huwatoomma.”

12. Mittu rodii darte dandee saꞌꞌanno gede kaaꞌlinosiri maati?

¹² Dartu iillannonketa anfoommoha ikkirono, dandee saꞌꞌa qarra ikkitankera dandiitanno. Mittu rodii usuru mine saysino yanna daafira coyiꞌranni, “Mito woyte, baasa yaadeemmo, dadilleemmo hattono wiꞌleemmo” yiino. Isi dandee heeꞌranno gede kaaꞌlinosiri maati? Togo yino: “Barru baala goxoommowiinni kaeemmo woyte huucciꞌreemmo. Barru giddo qarra ikkannori tuncu yaannoe yanna baalantera huucciꞌreemmo. Qoleno miinceennae giirameemmo woyte, biso hayishshiꞌnanni kifile eꞌꞌe cufiꞌre huuccatto assiꞌreemmo.” Hakkiinni saeno rodiinke hundi warono xaa yannarano minshe nookkire ikkite heedhinori lawishsha hiincino. Tini darte dandee saꞌꞌanno gedenna Yesuusi haꞌrunsaanosira aara qaale eino keere afiꞌranno gede kaaꞌlitinosi.—Yoh. 14:27; 16:33.

13. Gimbanninketa dandiine saꞌneemmo gede may kaaꞌlannonke?

¹³ Yihowaranna mimmitoho noonke baxilli gimbanninketa dandiine saꞌneemmo gede kaaꞌlannonke. Yesuusi foolisi fuli yanna geeshsha Annasi woꞌmu wodaninni baxino. Yesuusi jaallasino baxino. (Yoh. 13:1; 15:13) Ninkeno Yihowanna ammanate roduuwanke konni garinni banxeemmoha ikkiro, gimbanninketa dandiine saꞌneemmo. Hiittoonni? Hanni tenne xaꞌmora dawaro afiꞌrate soqqamaasinchu Phaawuloosi lawishsha laꞌno.

14. Phaawuloosi reyote geeshsha kaajje uurranno gede kaaꞌlinosiri maati?

¹⁴ Phaawuloosi shinasira shiima yannara albaanni lubbote jaalisira Ximootewoosira, ‘Maganu wolqatenna baxillu ayyaana ikkinnina waajjillu ayyaana diuyinonke’ yee borreessino. (2 Xi. 1:7) Phaawuloosi hatto yiinohu mayyaateeti? Isi mittu Kiristaanchi Yihowalla lubbora baxannoha ikkiro, iillannosiha buutote qarra dandee saꞌꞌannota kulanni no. (2 Xi. 1:8) Phaawuloosi Yihowa baxanno daafira reya geeshsha worbimmatenni isira ammaname heeꞌrinoti egennantinote.—Soq. 20:22-24.

15. Xaa yannara ammanate roduuwinke aneti bushshu yitukkinni mimmitoho baxille leellishshanni noohu hiittoonniiti? (Misileno lai.)

¹⁵ Mannu xiiwinsarono kaajjite uurritinore ammanate roduuwanke godowinta banxeemmo. Aqiilanna Phirisqilla Phaawuloosira yite heeshshonsa qarru giddo tuggunte gede, xaa yannarano mitu roduuwi ammanate roduuwanke kaaꞌlate heeshshonsa qarru giddo tuggino. (Rom. 16:3, 4) Lawishshaho Ruusiyaho duuchu roduuwi usuru minira massinoonninsare jawaachishate yoote minira hadhino. Usuru minira haaꞌne haꞌnoonniti mitte rodoo yoote minira martinore batinye roduuwa laꞌuta hindiiddo qalxiteennase coyiꞌra nafa hooggino. Ammanate roduuwinke ninketi bushshu yitukkinni leellishshinose baxilli lowo geeshsha jawaachishinose. Addaho, Yihowaranna mimmitoho noonke baxilli gimbanninketa dandiine saꞌneemmo gede kaaꞌlannonke!

16. Soqqamaasinchu Pheexiroosi Maganoho soqqantanno daafira miincoonninsari hagiirraamma ikka dandiitannota coyiꞌrinohu mayraati? (1 Pheexiroosi 4:14)

¹⁶ Gimbinkerono kaajjine uurranke Magano hagiirsiissannota anfoommo. (1 Pheexiroosi 4:14 nabbawi.) Soqqamaasinchu Pheexiroosi Maganoho soqqantanno daafira miincinsarono kaajjite uurritannori hagiirraamma ikka dandiitannota coyiꞌrino. Hiittoonni? Tini ‘Maganu ayyaani aananke fooliishshiꞌrinota’ leellishshanno. Pheexiroosi Magano hagiirsiinsironna darte dandiine saꞌniro mageeshshi geeshsha hagiidhinanniro afino. Phenxeqosxete ayyaanira 33 M.D gedensaanni, Pheexiroosinna wole soqqamaasine sabbakkino daafira Ayhudenniri qullaawu mini agaraano insa amaddara sonkoonni. Ikkirono Pheexiroosi worbimmatenni ammanasira gaaramino. (Soq. 5:24-29) Isinna wole soqqamaasine ganninsahu gedensaanni nafa sabbaka diagurtino. Hatteentenni insa “Yesuusi suꞌmira yite shollinye adha ayirrinye ikkitinota huwattino daafira” lowo geeshsha hagiidhitino. Ninkeno qarra dandiine saꞌnummoro hagiidhineemmo.—Soq. 5:40-42.

17. Yesuusi reyara albaanni noo hashsha rosaanosira mayno?

¹⁷ Yesuusi reyara albaanni noo hashsha rosaanosira, “Ane baxannoha baala Anniꞌyano baxannosi; anino baxeemmosi” yiino. (Yoh. 14:21) Yihowara soqqammeemmo daafira gimbanninkekki yanna quqquxamme agadhineemmo! (2 Te. 1:6-8) Hakka geeshsha kayinni gimbanninke woyte hagiidhineemmo gede assannonkehu bacu korkaatino noonke daafira sheshonna jawaante afiꞌra dandiineemmo.