Beenaya Gede Worbuullenna Ammanantinoonnire Ikke

Beenaya Moote Daawitiranna Salamoonira kaaꞌlame olaminoho worba olamaanchooti. Beenaya kakkalaanchu beettooti; duucha woyte kakkalaanonna Leewaawootu olaho difultanno; Beenaya kayinni Yihowa mannira kaaꞌlame olamino. Isi lowo geeshsha worba ikkinota leellishino. Lawishshaho isi, balete giddora eꞌꞌe doobbiicho shiino hattono bagado qodhino olamaancho qasino. Daawiti Beenaya ammanaminoha ikkinohura agaraanosi roorricha assiꞌrino.—2 Sa. 23:20-23.

Abeseloominna Adooniyaasi Daawitira shittitu yannara Beenaya kayinni ammaname heeꞌrino. (2 Sa. 8:18; 15:18; 1 Mo. 1:8) Daawiti diru akkalle amadduta, Beenaya Salamooni moote ikkanno gede kaaꞌlino. (1 Mo. 1:32-40) Ee, wolootu ammanama hooggurono Beenaya Yihowaranna isi buudhinorira ammaname heeꞌrino.

Ninkeno diininke Sheexaanunna halesi ledo gaaramate worbuulle ikka hasiissannonke. Qoleno woꞌmanka woyte Yihowa biddissi garinni heeꞌrate murciꞌra hasiissannonke. (Efe. 6:11; 1 Ph. 5:8, 9) Mitootu Yihowara soqqama agurturo nafa, baꞌraasannonketa addaxxine isira ammanamme heeꞌno.—2 Sa. 22:26.