Hedokki Bebbeehannore Gargadha Dandaattohu Hiittoonniiti?

1-2. Mitu coy hasiisannoha ikke heeꞌrenni hedonke bebbeehara dandaannohu hiittoonniiti?

MULI yannara hedokki bebbeehantinohu mamooteeti? Hanni mittu manchi makeena kadanni heeꞌreenna silke bilbilloonnisi yine hendo. Bilbilloonnisihu hasiissanno hajara ikkara dandaanno; ikkirono hedosi bebbeehantannokki gede wodanasi mitto assiꞌre makeena kada hasiissannosi. Hatteente gede ninkeno, assa hasiissannonkehu batinyu coy heeꞌranno woyte, roore hasiisannore assa hasiissannonkeha ikkara dandaanno.

² Ninke baalunkura lowo dilgo noonke. Ikkirono roore hasiissannoti ganyine ayyaanaamittete coyea assa ikkitinota anfoommo. (Mat. 6:33) Yihowa manni makeena qorophe kadanno manchi gede, alba hige haꞌrannokki gede hedonsa bebbeehannori maatiro bade afate woꞌnaalanno.—Law. 4:25; Mat. 6:22.

3. Konni birxichira maa xiinxallineemmo? Tini kaaꞌlitannonkehu hiittoonniiti?

³ Ninke baalunku ayyaanaamittete coye hedonke bebbeehantukkinni assa hasiꞌneemmo. Ikkirono shiimu coy hedonke bebbeehara dandaanno. (Luq. 21:34-36) Konni birxichira (1) hedonke bebbeehannori maatiro, (2) Yesuusi hedosi bebbeehara dandaannore gargadhinohu hiittoonniitironna (3) ninkeno hedonke bebbeehannore gargadha dandiineemmohu ma garinniitiro ronseemmo; tini Yihowara soqqammeemmo woyte hedonke bebbeehantannokki gede assiꞌrate kaaꞌlitannonke.

HEDONKE BEBBEEHANNORI MAATI?

4-6. Hedonke bebbeehara dandaannori maati?

⁴ Ninke baalunkura illacha tunge loosa hasiissannonkehu lowo loosi noonke. Lawishshaho, fayyimmate qarri heeꞌrankera hattono uminkera woy maatenkera assa hasiissannonke coy heeꞌrara dandaanno. Hige kuri coyibba hasiissannota ikkitino daafira illacha tuga hasiissannonke. Kayinni togoo coyibba hedonke bebbeekkara dandiitanno? Ee yannankenna wolqanke kuri coyibba calla hendanni gundeemmoha ikkiro, bebbeekkara dandiitanno.

⁵ Qoleno ninke giddo batinyu heeꞌneemmohu lowo jaddo, angate anje woy taraabbe guddanno fayya batidhinowa ikkara dandaanno. (2 Xi. 3:1) Hatto ikkiro, konne qarra calla hendanni lowo geeshsha yaandammora dandiineemmo.

⁶ Togoo qarri mitu manni heeshsho umo lekkicho huninota wodanchinoommoha ikkara dandaanno. Hige insa iillinonsari baasa xissiisansara dandaanno. Yihowa manna kalaqinohu xissiisiꞌranni heeꞌrara diꞌꞌikkino. Ikkirono togoo qarri iillinonsari mitootu heeshshonke hagiirru noota diꞌꞌikkitanno yite heddara dandiitanno. Hakko daafira mitootu yaaddonke hambeemmo yite boohaartanni lowo yanna sayissanno. Togoori iillinkero ninke maa assa dandiineemmo? Hanni Yihowa magansiꞌneemmo woyte hedonke bebbeehannore gargadhate Yesuusiwiinni maa ronseemmoro laꞌno.

YESUUSI HEDOSI BEBBEEHARA DANDAANNORE GARGADHINOHU HIITTOONNIITI?

7. Yesuusira hedosi bebbeehara dandaannori maati?

⁷ Yesuusira hedosi bebbeehara dandaannohu lowo coy no; konni coy giddo gamu dagoomittetenna poletiku hajooti. Isi waro batinye manna angate anjenna dhibbu waadannonsa. (Mat. 14:14; Maq. 14:7) Insa Roomunna Ayhudete manni miicannonsa. Mannu Yesuusira maalale loosate wolqanna dandoo noosita huwatiti, moohisasira hedino. (Yoh. 6:14, 15) Hatteeno agurranna Sheexaanu, Yesuusi lowo yanna agadha hasiissusikkinni alamete gashshaancho ikka dandaannota kule soꞌrisiisasira woꞌnaalino. (Mat. 4:8, 9) Qoleno Yesuusi rosaanosira albillitte iillannosi qarra baala kula hanafita soqqamaasinchu Pheexiroosi “Mooticha, ateneeto togoonta gadadissooti” yiino.—Mat. 16:21, 22.

8. Yesuusi hedosi bebbeehara dandaannore gargadhanno gede kaaꞌlinosiri maati?

⁸ Yesuusi hedosi bebbeehara dandaannore gargadhanno gede kaaꞌlinosiri maati? Sasu coy kaaꞌlinosi. Umihunni, isi Yihowa hedanno garinni heda rosino. (Yoh. 8:28; 14:9) Layinkihunni, woꞌmanka woyte ayyaanaamittete coye assanno. (Mat. 9:35) Sayikkihunni, roore hasiisanno coy maatiro seekke afino. (Yoh. 4:34) Yesuusi, Sheexaanu jifisi woyte diqeelamino hattono Pheexiroosi isira hede coyiꞌrinoha ikkirono hedosi Maganunnite gedeeta ikkitinokkihura didogamino. (Mat. 4:10; 16:23) Yesuusi mannu hedannori, coyiꞌrannori woy assannori Maganu fajjo wonshannokki gede assasira diwodhino. Hige Yesuusira iillinori ninkera iilla hoogankera dandaanno. Kayinni ninkeno hedonke bebbeehantanno gede assannore gargadhate Yesuusi assinore assa dandiineemmo.

HEDONKE BEBBEEHANNORE GARGADHA DANDIINEEMMOHU MAGARINNITI?

9. ‘Yihowa fajjo maatiro wodanchate’ ma assa dandiineemmo? (Efessooni 5:17)

⁹ Yihowa hedanno garinni heda rosi. Tenne assakki, ‘Yihowa fajjo maatiro wodanchatto’ gede kaaꞌlitannohe. (Efessooni 5:17 nabbawi.) Qaalesi nabbambeemmohanna hiincineemmoha ikkiro, Yihowa hagiirsiisannori maatiro rosa dandiineemmo. Qullaawu Maxaafi ninkera tuncu yiinonkeri daafira bade kulannokkiha ikkiro nafa, Yihowa hedo seekkine huwatate sharrammenna fajjosi ledo sumuu yaannore assine iso hagiirsiisannori maatiro afa dandiineemmo.

10. Yihowa hedanno garinni heda rosa dandiineemmohu hiittoonniiti?

¹⁰ Qullaawa Maxaafa xiinxalline hattono Yihowa mannu oosora assinore hende isi hedanno gara rosa dandiineemmo. (Erm. 45:5) Mitte xagge nabbambeemmo woyte ninkeneeto aante noo xaꞌmuwa xaꞌma dandiineemmo: ‘Tenne xaggenni Yihowa daafira maa roseemmo? Tini xagge hedoꞌya biddi assiꞌreemmo gede kaaꞌlitannoehu hiittoonniiti?’ Hige Yihowa hedo ninketa koꞌo hunte roortanno. (Isa. 55:9) Hakko daafira fajjosi rosate alba isiwa higanke garankolla. (Fa. 143:10) Qoleno albinni roore isi hedanno garinni hendeemmo gede kaaꞌlankera woꞌma giddonni huucciꞌra dandiineemmo.—1 Yo. 5:14.

11. Yihowa ma assinammora hasiꞌranno?

¹¹ Yihowa tini alame baꞌanno woytira qixxaawate hedonke bebbeehannore qorophinammora hasiꞌranno. (Mat. 24:44) Isi quwa saꞌne yaande wolqa baꞌnammora dihasiꞌranno. (Mat. 6:31, 32) Hakko daafira dhiwammeemmo, loosonke woy galleemmowa hoongeemmo yine yaandeemmoha ikkiro hattono wole uminketinna maatenke haja baasa yaachishshannonkeha ikkiro, Yihowa kaaꞌlannonke. Yihowa qarru amadannonke woyte hayyonna jawaante afiꞌrate iso addaxxineemmo gede kulinonke.—Fa. 55:22; Law. 3:5-7.

12. Alamete ikkannori yaachishannonketa dandee heeꞌrate kaaꞌlannonkehu mittu coy maati? (Maatewoosi 5:3)

¹² Ganyite ayyaanaamittete coye assi. Ninke baalanka alamete aana ikkannohu bushu coy yaachishannonke; kayinni togoori kalaqamannokki gede assa didandiineemmo. Hakko daafira assa dandiineemmokkiri hedonke bebbeehannota gargadhate ayyaanaamittete coye illachinsheemmo. Yihowa ayyaanaamittete coye assate hasatto wore kalaqinonke; tenne hasatto wonshiꞌrate sharrammeemmoha ikkiro, hagiirraamma ikkineemmo. (Maatewoosi 5:3 nabbawi.) Yihowa afate Qaalesi xiinxallineemmohanna iso magansiꞌrate dandiinummore baala assineemmoha ikkiro, tenne hasatto wonshiꞌra dandiineemmo. Hatto assineemmoha ikkiro, yannanke hayyotenni horoonsiꞌneemmo daafira Yihowano hagiidhanno.—Law. 23:15.

13. ‘Yannanke seekkine horoonsiꞌra’ dandiineemmohu hiittoonniiti?

¹³ Kiristaana ikkinoommo daafira, ‘yannanke seekkine horoonsiꞌrate’ murciꞌnoommo. (Efe. 5:15, 16) Kuni qummeeshshi, barru baali dilgonkera yannanke seekkine horoonsiꞌneemmo gede kulanni nooha diꞌꞌikkino. Hatteentenni Yihowa tenne busha alame hunara albaanni yannanke ma garinni horoonsiꞌneemmoro seekkine hendeemmo gede amaalanni noonke. Yannanke seekkine horoonsiꞌra dandiineemmohu hiittoonniiti? Barru baala fulannoha busha duduwo faana gannanni yannanke guxxineemmoha ikkiro, hedonke bebbeehantara, hexxo mudhinammoranna Yihowa magansiꞌrate laalanke ajjara dandiitanno. Odoo laꞌnanninna macciishshinanni sayinseemmo yanna ajisha lowo geeshsha danchate! Hatto assineemmoha ikkiro, dhaawannoha ayyaanaamittete coye assineemmo yannanna wolqa diguxxineemmo. Qoleno dandaami deerrinni albinni roore soqqamate lawishshaho manna galagalle hasaawisate mixo fushshiꞌra dandiineemmo. Afiꞌnummo faro baala horoonsiꞌne mannu “gatanno gedenna halaalunnita gara ikkitino egenno afiꞌranno gede” kaaꞌla hasiissannota anfoommo.—1 Xi. 2:4.

14. Ganyine ayyaanaamittete coye assa maaho kaaꞌlitannonke? (Misileno lai.)

¹⁴ Ganyine ayyaanaamittete coye assineemmoha ikkiro, heeꞌnoommo yanna daafira quwa saꞌne diyaandeemmo. Poletiku qarri, angate anjenna taraabbe guddanno fayya lexxitanni hadhurono horo beꞌe diyineemmo. Mayra yiniro, togoo qarri ikkanni noohu Qullaawu Maxaafi giddo masaalle worroonniri woꞌmanni noo daafira ikkinota anfoommo. Waajja hedonke bebbeekkara wodhantenni, Yihowa albillitte hedinonkere wonshannota addaxxineemmo. Hakka geeshsha kayinni, Yihowa iillannonke qarra dandiine heeꞌneemmo gede kaaꞌlannonketa addaxxine wodanaaꞌmine heeꞌra dandiineemmo.—Fa. 16:8; 112:1, 6-8.

15. “Fayyo hedo” heedhunkero ma assineemmo? (1 Pheexiroosi 4:7)

¹⁵ Roore hasiisannore deꞌinoonte. Xaa yannara noohu batinyu manni tini alame baꞌanno yanna gambissinota hedantenni, boohaarsha illachishanno. Boohaara qarra afidhinokkiha ikkirono, tini alame huntannonkekki gede “fayyo hedo” heedhannonke gede assiꞌra hasiissannonke. (1 Pheexiroosi 4:7 nabbawi.) Hatto yaa mayyaate? Boohaarshaho quwa saꞌneemmokki gedenna dancha doorsha doodhineemmo gede coye heeshshi gotti assine heda hasiissannonke yaate. Yannanke seekkine horoonsiꞌranke Yihowa hedo maatiro huwantoommotanna roore hasiisannore bande anfoommota leellishshanno.—2 Xi. 1:7.

16. Yesuusi reyanno yanna gambissuta maa illachishino?

¹⁶ Yesuusi roore hasiisanno coy maatiro horo dideino. Isi reyara albaanni noote hattenne qarrissanno yannara, ammaname heeꞌranna Maganu fajjo assa illachishino. Hakko daafira eeggifate huucciꞌrino. Rosaanosi kayinni isi gede baqqi yaa agurte goxxino. Insa ‘lowo geeshsha dadillitino daafira delecci’ yitino.—Luq. 22:39-46; Yoh. 19:30.

17. Batinyu manni dagoomittete miidiya horoonsiꞌrannohu mayraati? Kayinni gawajjannonsahu hiittoonniiti? (Misileno lai.)

¹⁷ Yesuusi rosaano gede ninkeno lowo geeshsha dadillineemmo woyti no. Heeꞌnoommohu goofimarchu yannara ikkino daafira togoori yaachishankera dandaanno. Xaa yannara batinyu manni qarranke hambeemmo yee dagoomittete miidiya horoonsiꞌranno. Insa dagoomittete miidiya horoonsidhannohu jaallansanna maatensa ledo xaadate, insara haarore kulate hattono fottanna wolere soyateeti. Qoleno insa dagoomittete miidiya horoonsidhannohu addi addi boohaarsha boohaarateeti. Ikkirono kuni manni barru baala interneetete aana haarore laꞌꞌanni yannansanna wolqansa beebba guxxanno. Dagoomittete miidiyra quwa saꞌneemmokki gede ninkeneeto togo yine xaꞌma dandiineemmo: ‘Dagoomittete miidiya horoonsiꞌraꞌya kaaꞌlitinoeri noonso roore hasiisannore deꞌꞌeemmo gede assitanni nooe?’

18. Boohaarsha doodhineemmo woyte heeshshi gotti assine heda hasiissannonkehu mayraati?

¹⁸ Filme, aante aantete fultannota televizhiinete pirogiraame hattono interneetete fultannota harammadda viidiyubba laꞌneemmoha woy viidiyote geeme godoꞌlineemmoha ikkiro, coye heeshshi gotti assine hedano hasiissannote. Togoo boohaarshi hagiidhineemmo gede kaaꞌlankera dandaanno. Ikkollana hiittoo boohaarsha boohaarreemmoronna mageeshshi yanna boohaarreemmoro doodhineemmo woyte, heeshshi gotti assine heda hasiissannonke. Viidiyo qixxeessitannori yannate kiiro haaro haarore fushshitannohura mannu quqquxame laꞌꞌanno; kuri viidiyubba giddo mite finqillenna amanyoote bainore assinanna leellishshannote. Iisiyaho heeꞌranno rodiinkera togoori tuncu yiinosi. Isi umo interneetete aana harammadda viidiyubba laꞌꞌa hanafi. Hakkiinni wole viidiyubbano lede laꞌꞌa hanafiti hedikkinni amanyoote bainore assinanna leellishshanno viidiyo lai. Gedensoonni isi teeda baꞌino misilla laꞌꞌa hanafi. Songote cimeeyyeranna muli jaallasira Maganu ikkonsana insa kaaꞌliteennasi mobaylesi giddonni mite appilikeeshiine hunino hattono mobayle horoonsiꞌranno yanna ajishino. Kuni woꞌnaalshi boohaarsha doodhineemmo woyte coye heeshshi gotti assine heda hasiissannohu mayraatiro leellishanno.

19. Boohaarranni lowo yanna gundeemmoha ikkiro may kalaqamara dandaanno?

¹⁹ Boohaarreemmo woytenna wolere assinanni yanna sayinseemmo woyteno coye heeshshi gotti assine heda hasiissannonke. Ninke baalunkura mito woyte fooliishsho hasiissannonke; tini ordu fayyimmankera danchate. Ikkollana boohaarsha calla illachinsheemmoha ikkiro, roore hasiisanno coyra yanna hoongammora dandiineemmo. (Fil. 1:10) Ninke baalunku maa assineemmoronna hakko coye assinanni mageeshshi yanna sayinseemmoro doodha hasiissannonke. Togoo doorsha doodhatto woyte ateneeto togo yite xaꞌmi: ‘Boohaaranni woy wolere assanni sayseemmo yanna coye heeshshi gotti asse hedeemmota leellishshanno? Roore hasiisannori maatiro huwatoommo? ‘Baalunku coyi goofimarchira’ qixxaawoommo?’

20. Hedonke bebbeehannore gargadhinummoro afiꞌneemmo horo maati?

²⁰ Ganyine ayyaanaamittete coye assineemmo woyte hedonke bebbeehannore gargadhanke kaaꞌlitannonke. (Isa. 48:17) Yihowa kaaꞌlannonke daafira, iillannonke qarra qeelle saꞌꞌa dandiineemmo. Tenne alame ikkito sheke diassitannonke. Qoleno boohaarranni calla lowo yanna diguxxineemmo. Hakko daafira Yihowa hedanno garinni hedate, ganyine ayyaanaamittete coye assatenna roore hasiisannore bade afate murciꞌno. Hatto assineemmoha ikkiro, hedonke bebbeehannore gargadhineemmoha calla ikkikkinni, “addu heeshsho [seekkine] cuꞌmiꞌra” dandiineemmo.—1 Xi. 6:19.