Woꞌmunkura Aliidi Gashshaancho Yihowa Addaxxi

1. Iyyoobira iillinosihu buutote qarri hiikkonneeti?

AMMANAMINO manchira Iyyoobira lowo qarri iillinosi; isi oososi, fayyimmasinna jirosi hoogino. Hatteeno agurranna suꞌnaadu suꞌmisi baino. Iyyoobiri suꞌmi jaallasi isi hexxo mudhanno gede assannoha lowo coye coydhino. Baxanno minaamasi nafa lowo geeshsha caaccaabbino daafira, “Magano xonte direyatto?” yitinosi. (Iyo. 2:9; 15:4, 5; 19:1-3) Iyyoobira iillinosihu buutote qarri isi halaalaancho Magano addaxxa aguranno gedenna Yihowa baxxannosirenna soqqantannosire agarannota huluullamanno gede assasira dandaanno.

2-3. Mayne huluullammammora dandiineemmo? Iyyoobi maxaafinni maa ronseemmo?

² Mito woyte ninkerano Yihowa addaxxa qarra ikkitannonke gede assannohu addi addi fonqoli iillankera dandaanno. Heeꞌnoommohu ‘dandee heeꞌrate qarrisanno diriraati.’ (2 Xi. 3:1) Gamete aana gamitokke yinannihu gede qarru aana aanaho iillannonke woyte wolqa baꞌnammoranna dandee saꞌꞌa qarra ikkitankera dandiitanno. Togoo qarri mitootu Yihowa insa daafira hedannota huluullantanno gede assinonsa.

³ Ateno tini huluullissannoheha ikkiro, hexxo mudhitooti. Iyyoobi Yihowa ammanantinosire gatisannota heeshshosinni laino. Ninkeno iimi Annanke woꞌmunni woꞌma addaxxa dandiineemmo. Hanni tennera kaaꞌlannonke gede Iyyoobi maxaafa xiinxalline lame qara hedo huwata dandiineemmo gara laꞌno: Umihunni, Woꞌmunkura Aliidi Gashshaanchi Yihowa callaati. Layinkihunni, woꞌmanka dandaanno Maganinkera hedinore wonshatenna mannisi ayyaanaamittenna fayyimma hegerera gawajjannorinni agarate wolqa noosi.

SHEEXAANUNO INSAWA SHIQI

4. Yihowanna sokkaasine iima gamba yite heedheenna may ikkino?

⁴ Mitto barra, “gordu sokkaasine” Yihowa albira shiqqino. Qullaawu Maxaafi, “Sheexaanuno ledonsa shiqi” yaanno. (Iyo. 1:6) Qullaawu Maxaafi giddo “Sheexaane” yinanni suꞌma mite yine kulloonnihu kowiichooti; iso hatto yinoonnihu Yihowa hettisinohuraati. Yihowa, Sheexaanu ammanaminoha ikka hoogirono, hakko gambooshshe marannota dihoolino. Isi Yihowaranna iimano ikko uulla noo maatesira diina ikkino. Isinni Yihowa Kalaqama 3:15 coyiꞌrinori, Sheexaanu xaate ‘manchotenni’ lawinsoonnite iimi maate miila ikkinokkita leellishanno.

5. Iima assinoonni gambooshshiwa ikkinore xiinxalline maa ronseemmo?

⁵ Yihowa iima assinoonni gambooshshiwa ikkinore Qullaawu Maxaafi giddo borreessinanni gede assino. Sheexaanu coyiꞌrinori isi suꞌma hunannoha ikkinota leellishanno. (Iyo. 1:9; Ajuuja 12:10 ledo heewisiisi.) Iima assinoonni gambooshshiwa ikkinore xiinxalline Yihowa biilloonyesi guutu garinni horoonsiꞌrannotanna woꞌmanka woyte taalo coye assannota ronseemmo. Qoleno isi Woꞌmanka Dandaanno Magano ikkinohura ayno isi worino danna saꞌꞌa dandaannokkita ronseemmo.

YIHOWA DANNA WORANNO

6. Yihowa Woꞌmanka Dandaanno Gashshaancho ikkinota leellishinohu hiittoonniiti? (Iyyoobi 1:7, 8)

⁶ Iyyoobi 1:7, 8 nabbawi. Yihowa iima assinoonni gambooshshiwa ikkannore baalankare afino. Isi Sheexaane, “Halaalinta soqqamaanchoꞌya Iyyoobi wodana assite laittoni?” yee xaꞌmino. Addanko, Yihowa Sheexaanu ammanamino mancho Iyyoobi sia hasiꞌrinota afino. Hanni Yihowa taalle nookki wolqasi Iyyoobi kaaꞌlate horoonsiꞌranno gara laꞌno.

7. Iyyoobi 1:10, 11 kultanno garinni Sheexaanu Yihowara soqqamanno manna lainohunni mayno?

⁷ Iyyoobi 1:10, 11 nabbawi. Yihowa Woꞌmunkura Aliidiha ikkirono, biilloonyesinna wolqasi garimale dihoroonsiꞌranno. (Erm. 32:17; Dan. 4:35) Sheexaanu kayinni Yihowa wolqasi garimale horoonsiꞌrannohu gede asse coyiꞌrino. Sheexaanu, Maganu mannu ooso soqqantasira yee gubbisino yiinohu gedeeti. Qoleno Sheexaanu mannu Yihowara soqqamannohu isiwiinni mitore afiꞌranno daafira calla ikkinohu gede asse coyiꞌrino. Yihowa ma assiyya?

8-9. Yihowa Sheexaaneho worino danni maati? Mayra? (Iyyoobi 1:12) (Misileno lai.)

⁸ Iyyoobi 1:12 nabbawi. Yihowa Daawuloosi yiinori halaale ikkinota leellishanno gede kaayyo uynosi; kayinni dannano worinosi. Maganu, “Iyyoobi aana kayinni mittoreno assitooti” yee xawise kulinosi. Yihowa Sheexaane hatto yee hajaji woyte sokkaasine baalanti macciishshitanni no. Sheexaanu hakkonne danna sae wolere mittoreno asse afannori dino. Xaa yannarano isi Yihowa worino danna sae asse afannori dino. Konni garinni Yihowa biilloonyesinna wolqasi horoonsiꞌre, Iyyoobira golamino hattono taashshannohanna shaqqado Magano ikkinota leellishino.

⁹ Sheexaanunnihu umi siꞌꞌi diqiniino. Mayra yiniro, Iyyoobi iimi Annisira ammanamino. (Iyo. 1:22) Ikkirono, Sheexaanu xaano Iyyoobi jife dikaino.

10. Yihowa Sheexaanu Iyyoobi lede jifara fajjinohu mayraati? (Iyyoobi 2:2-6)

¹⁰ Iyyoobi 2:2-6 nabbawi. Xa kayinni Sheexaanu Iyyoobi karate murciꞌre kaino. Sheexaanu, Iyyoobi lubbosi gatisiꞌrate yee Magano xonanno yee hettisino. Yihowa tennera tumo qolate, Daawuloosi konne ammanamino mancho buutote dhibbinni gananno gede fajjino. Ikkirono xaano Yihowa, ‘Lubbosilla kissooti!’ yee danna worino. Sheexaanu worroonnisi danna ayirrisa agurranna wolere ma asse afanno! Xaano, Sheexaanu worroonnisi danna sae haꞌra dandaannokki daafira Yihowa Woꞌmunkura Aliidiha ikkinoti leeltino.

YIHOWA IYYOOBI QARRA UURRISINO

11. Yihowa Iyyoobi qarra uurrisihu gedensaanni baꞌraasinosihu hiittoonniiti? (Iyyoobi 42:10-13)

¹¹ Iyyoobi 42:10-13 nabbawi. Iyyoobi Sheexaaneho anga diuyno; Yihowano Sheexaanu siꞌꞌi uurranno gede assino. Yihowa ammanamino soqqamaanchisi qarra uurrisate qaafo adhino. Addanko, Sheexaaneho Yihowa Iyyoobira golamannokkinna iso maassiꞌrannokki gede assate wolqa dinosi.

12. Yihowata gatisate wolqa addaxxitannori may guma afidhanno? Lawishsha kuli.

¹² Tenne goofimarchu yannara Yihowa wolqasi horoonsiꞌre mannasi kaaꞌlanni no. Lawishshaho, 1945 olanto 230 ikkitannore Yihowa Farciꞌraasine shitara yite Jarmanete noote usuru kaampenni baaru geeshsha seedanna waajjishshanno doogo haadhe hadhino. Insa hattenne waajjishshanno yanna qeelte saꞌuhu gedensaanni togo yite borreessitino: “Seeda yanna buutote qarri iillinkehu gedensaanni sasu Ibiraawooti gede wala yitanno giiranni fulloommohu gedeeti; insa wiliilete fooli nafa dikisinonsa. Yihowa jawaantenna wolqa uynonsa.” Insa ledde togo yitino: “Xa doobbiyu balenni gantoommo; konni gedensaanni hasattonke Yihowara hegerera soqqammanni heeꞌra callate. Ninkera baalanka rooranno baꞌraarshi konneeti.”—Daanieeli 3:27; 6:22 ledo heewisiisi.

13. Qarru iillannonke woyte maa addaxxa dandiineemmo? (Misillano lai.)

¹³ Ninkerano addi addi qarri iillannonke woyte doobbiyu balera tungoonninkeha lawankera dandaanno. (1 Ph. 5:8-10) Mito woyte qarrinke uurrannokkiha laweennanke buuto xissiisiꞌnammora dandiineemmo. Togoo woyte Iyyoobi xagge qaaganke kaaꞌlitannonke. Yihowara qarranke hoolate wolqa noosita woꞌmunni woꞌma addaxxa dandiineemmo; isi tenne assannohu xaa yannara woy daggannote haaro alamera ikkara dandaanno. Tini alame isi baꞌanno yee murino yannanni mitto barra nafa saꞌe dikeeshshitanno!

YIHOWA AMMANANTINO SOQQAMAANOSI BAXANNO

14-15. Yihowa ammanantino soqqamaanosira maa assanno? Mayra? (Iyyoobi 14:15) (Misileno lai.)

¹⁴ Iyyoobi 14:15 nabbawi. Iimi Anninke ammanantino soqqamaanosi lubbora baxanno. Hakko daafira insa reyturo nafa kaysannonsa. Isi reyo abbitino xisso dhaawanno.—Isa. 65:17.

¹⁵ Iyyoobi iillinosi fonqoli uurrihu gedensaannino heeꞌrinohu Sheexaanu gashshe noo alameraati. Ikkirono, Qullaawu Maxaafi Yihowa iso hursinositanna fonqolu iillasira albaanni noosirinni ero asse oye baꞌraasinosita kulanno. Kuni atooti Yihowa albillitte Iyyoobira hakkiinni sainore assannota leellishanno. Yihowa ammanantinosiri hagiirru noo heeshsho heedhara hasiꞌrannota leellishino. Isinni Yihowa ammanantinore ikkansa leellishshannorira baalaho gannate ikkitanno uullara hegerera heeꞌrate faro faninonsa. (Aju. 21:3, 4) Isi Woꞌmunkura Aliidi Gashshaancho ikkino daafira tenne assate hasatto noosi. Tenne afanke qarru iillannonke woyte lowo geeshsha sheshifachishshannonke!

16. Yihowa Woꞌmunkura Aliidi Gashshaancho ikkinota addaxxineemmo gede assannonkehu wolu korkaati hiikkonneeti?

¹⁶ Hige Iyyoobi gale hose reyno. Kayinni Yihowa Woꞌmunkura Aliidi Gashshaancho ikkinohura reytinore kaysate wolqa noosi. (Mar. 32:39) Hakko daafira isi murino yannara, soqqamaanosi reyotenni kaysannota hoolasira dandaannohu dino.—Rom. 8:38, 39.

YIHOWA WOꞌMUNNI WOꞌMA ADDAXXI

17. Sheexaanu Yihowa manna gudate assinori qiniinosikkita leellishannori maati?

¹⁷ Iyyoobi xagge woꞌmunni woꞌma Yihowa addaxxineemmo gede assannonkehu ikkadu korkaati noonketa leellishshanno. Sheexaanu Yihowa manna gudate assinori qiniinosikki daafira lowo geeshsha tashshi yiinonke! Xaa yannara mite honse miliyoone ikkanno manni Yihowara ammaname soqqamanni no; tini Woꞌmunkura Aliidi Gashshaanchira Yihowara wolqa noosita leellishshanno. Yihowa manna gudate seekkinoonni bagadi shuffanna duucha hinge laꞌnoommo. (Isa. 54:17) Wolqaataamma gashshaanonna ammaꞌnote massagaano kaaꞌlannohu nookkiha lawannoha Yihowa manna huna didandiitino. Qoleno Yihowa daafira halaale dudumbeemmokki gedenna Sheexaanu kaphaanchonna lubbo shaannoha ikkinota xawo fushshineemmokki gede hoolankera dandaannori dino. Yihowa isira ammanante heedhe reytinore kaysanno daafira reyo nafa tenne assineemmota dihooltannonke.—Hos. 13:14.

18. Albillittete yanna waajjineemmokkihu mayraati?

¹⁸ Iyyoobi xagge hiincineemmoha ikkiro, albillittete yanna horo diwaajjineemmo. Quuxxote qarri yannara Maganu manni kaaꞌlannonsahu nookkiha lawanno daafira Sheexaanunna halesi insa angankera eessiꞌnoommo yite heddanno. Ikkirono, Iyyoobi warinte gede Yihowa wolqasi horoonsiꞌre Sheexaanu mannasi hegerera gawajjannokki gede assanno. Yihowa, Sheexaanu mannu oosora abbino qarra hoolanno yanna buubbe dagganni no. Daawuloosinna durriissa 1,000 diri geeshsha qilete tunganni. (Luq. 8:31; Aju. 20:1-3) Galte hosse Sheexaanunna halesi hegerera baꞌanno. (Aju. 20:10) Yihowa kulinonte gede Sheexaanu umo cancannanni. Isi hige higannokkita baꞌꞌanno.—Kal. 3:15; Rom. 16:20.

19. Yihowa addaxxitannori afidhanno baꞌraarshi maati? (Misileno lai.)

¹⁹ Yihowa halaalunni magansidhannori, haaro alamera guutanna hagiirru noo heeshsho heedhanno yanna quqquxante agadhitanno. Hatte yannara heeshsho hendoommohunni roore baxissanno. Yihowa “Kuneeti baalanka coye haaro assanni noommo” yee qaale eino. (Aju. 21:5) Hatto yaa mayyaate? Lowo kumi diri gedensaanni mannu ooso mite yite Sheexaanunna durriissate anganni keere fultanno. Tini lowo geeshsha hagiirsiissanno! Layinki sayikkita tenne akkala alame yaaddo goxicho dihoꞌlitannohe. Armagedooni gatte saꞌannori lowo maalale laꞌanno; insa guuta ordu fayyimma afidhanno. Hatteeno agurranna shiiꞌnoommo manni reyotenni kaꞌꞌanno. Hatte yannara umo iimi Anninke hedino heeshsho heeꞌneemmo!

20. Maa assate murciꞌrootto?

²⁰ Tenne goofimarchu yannara iillannonke qarra qeele saꞌꞌate sharrammeemmo woyte, Yihowa woꞌmunni woꞌma addaxxatenna aliidimmasira halamate murciꞌno. Iimi Annanke banxeemmota leellinsho hattono Sheexaanu kaphaancho ikkinoti leeltanno gede assino. Addanko, Woꞌmunkura Aliidihu Yihowa gashshanno yanna quqquxamme agadhineemmo; isi ammanantinosire duucha doogonni baꞌraasate quqquxamanno!