Woloota Ayirrissinannita Leellishshe

1. Mannu ayirrinsanninsata baxannohu mayiraati? (Lawishsha 22:1)

MANNU ayirrisannoheta baxatto? Baxattoti dihuluullissannote. Baalunku manni ayirrinsansara hasiꞌranno. Mannu ayirrisannonke woyite hagiidhineemmo. Qullaawu Maxaafi “Ayirrinyu . . . birrunninna culkunni rooranno” yaannohu iseraati!—Lawishsha 22:1 nabbawi.

2-3. Woloota ayirrisa woꞌmanka woyite shota ikkitannonkekkihu mayiraati? Konni birxichira maa ronseemmo?

² Woloota ayirrinseemmota leellisha woꞌmanka woyite shota ikka hooggankera dandiitanno. Korkaatuno wolootu laanfe laꞌꞌa rakkannonke. Qoleno heeꞌnoommohu mannu mimmito ayirrisannokki yannaraati. Kayinni ninke baxxinoommore ikka hasiissannonke. Mayira? Korkaatuno Yihowa “duuchunku gari manna” ayirrinsammora hasiꞌranno.—1 Ph. 2:17.

³ Konni birxichira woloota ayirrisate yaa mayyaatero ronseemmo; hattono (1) maatenke miilla, (2) ammanate roduuwankenna (3) Yihowa Farciꞌraasine ikkinokki manna ayirrinseemmota leellisha dandiineemmo gara xiinxallineemmo. Roorenkanni woloota ayirrisa shota ikkitannonkekki woyite tenne assa dandiineemmo gara ronseemmo.

WOLOOTA AYIRRISATE YAA MAYYAATE?

4. Woloota ayirrisate yaa mayyaate?

⁴ Woloota ayirrisa insara noonke laonna insa amandeemmo gara leellishshanno. Mittu manchira dancha akatta noosita woy isi danchare assinota wodanchinummoro woy ninke aana silxaane noosiha ikkiro iso ayirrinseemmota leellishanno garinni amandeemmo. Togoo ayirrinye goowi alinni ikkikkinni godowinta leellisha hasiissannonke.—Mat. 15:8.

5. Woloota ayirrinseemmota leellinsheemmo gede kaaꞌlannonkeri maati?

⁵ Yihowa woloota ayirrinseemmota leellinshammora hasiꞌranno; isinni “aliidi gashshaano” ayirrinseemmo gede hajajinonke. (Rom. 13:1, 7) Kayinni mitootu, “Gara ikkinore assanno manna ayirrisa qarra diꞌꞌikkitannoe” yitannoha ikkara dandaanno. Hatto yee heda garaho? Yihowa soqqamaano ikkinoommo daafira, mitto mancho ayirrinseemmohu assootesi calla laꞌne ikkinokkita anfoommo. Manna ayirrinseemmohu Yihowa banxeemmonna iso hagiirsiisa hasiꞌneemmo daafiraati.—Iya. 4:14; 1 Ph. 3:15.

6. Ayirrisannohekki mancho ayirrisa dandaatto? Xawisi. (Misileno lai.)

⁶ Mitu manni, ‘Ayirrisannonkekki mancho addinta ayirrisa dandiineemmo?’ yee hedannoha ikkara dandaanno. Ee dandiineemmo. Hanni mito lawishsha laꞌno. Moote Saaooli beettosi Yoonaataani wolootu albaanni shollishino. (1 Sa. 20:30-34) Ikkirono Yoonaataani, Saaooli reyi barri geeshsha olaho isira kaaꞌlame annasi ayirrisannota leellishino. (Ful. 20:12; 2 Sa. 1:23) Kakkalaanote Biili Eeli Haanna dimbitino yee bushiishinose. (1 Sa. 1:12-14) Eeli annano kakkalaanote Biilono ikke heeꞌrenni bunshe assitino oososi seejjikkinni gatinota Israeelete manni baalu afinoha ikkirono, Haanna iso ayirrinyunni hasaawissino. (1 Sa. 1:15-18; 2:22-24) Hattono Ateensi manni soqqamaasincho Phaawuloosi “coyiꞌrammichu” yee xonino. (Soq. 17:18) Ikkirono, Phaawuloosi insa ayirrinyunni hasaawisino. (Soq. 17:22) Kuni lawishshi leellishannonte gede, Yihowa lubbora baxanna iso dadillisannore assineemmokki gede qoropha, woloota ayirrisa shota ikkitannonke woyite calla ikkikkinni shota ikkitannonkekki woyiteno insa ayirrinseemmo gede kakkayissannonke. Hanni ayirrisa hasiissannonkeri ayeootironna insa ayirrisa hasiissannonkehu mayiraatiro laꞌno.

MAATENKE MIILLA AYIRRISA

7. Maatenke miilla ayirrisa qarra ikkitannonke gede assara dandaannori maati?

⁷ Qarra ikkannore. Maatenke ledo lowo yanna sayinseemmo. Hakko daafira jawaantensano laanfensano anfoommo. Mitoota insa towaata qarra ikkitannonke gede assanno dhibbi woy quwa saꞌino yaaddo amaddinonsaha ikkara dandaanno. Wolootu xissiisannonkere coyidhannoha woy assitannoha ikkara dandaanno. Mitootu mininsa keeru woꞌminoha ikkanno gede assate woꞌnaalantenni, maatensa miillara ayirrinye xeinore assite gibbo kalaqantanno gede assitanno. Hakko daafira insa mimmitu ledo sumuu diyitanno. Bisu kifilla garunni mitteenni loossannokki gede assannohu naatu dhibbi gede, mimmito ayirrisa hoogano maate mittimmatenni loossannokki gede assitanno. Hige naatu dhibba xaginse hursa didandiinanni; ikkirono maate mimmito ayirrinsanni gara rosa dandiitanno.

8. Maatenke miilla ayirrisa hasiissannonkehu mayiraati? (1 Ximootewoosi 5:4, 8)

⁸ Ayirrinseemmota leellisha hasiissannonkehu mayiraati? (1 Ximootewoosi 5:4, 8 nabbawi.) Phaawuloosi Ximootewoosira borreessinote umi sokkara maatete miilla mimmitoho hasiisannonsare assite towaata hasiissannonsata kulino. Isi, mininke manna ayirrinseemmo gede assannonkehu qaru coyi hatto assa hasiissannonke daafira calla ikkikkinni, ‘Maganoho galloommore’ ikkinoommo daafira ikkinota xawisino. Hatto yaa manna ayirrinseemmohu Yihowa banxeemmo daafiraatinna magansiꞌranke kifile ikkitinohuraati yaate. Maate xintinohu Yihowaati. (Efe. 3:14, 15) Hakko daafira maatenke miilla ayirrinseemmo woyite maate xintinoha Yihowa ayirrinsanni heeꞌnoommo. (1 Xi. 5:4) Maatenke miilla ayirrinseemmo gede assannonkehu ikkadu korkaati noonke!

9. Minaanninna minaama mimmito ayirrisannota leellisha dandaannohu hiittoonniiti? (Misillano lai.)

⁹ Ayirrisannota leellisha dandaanno gara. Minaamasi ayirrisanno minaanni mannu noowano nookkiwano ise isira muxxe ikkitinota leellishanno. (Law. 31:28; 1 Ph. 3:7) Isi ise diganannose, dishollishannose woy waagu dinoe yite heddanno gede diassannose. Erieelia yinannihu Arjentiinaho heeꞌranno rodii togo yiino: “Minaamaꞌya dhiwannose daafira mito woyite xissiisannoere coyidhanno. Togoo woyite ise coyidhanni noori addu ayimmase leellishannore ikkinokkita qaagate woꞌnaaleemmo. Hanqisannori tuncu yaannoe woyite, 1 Qorontoosi 13:5 noo hedo qaagate woꞌnaaleemmo; tini hedo isera hanqantenni ayirriseemmoseta leellishanno garinni hasaawiseemmose gede kaaꞌlitannoe.” (Law. 19:11) Minaama minaannise daafira wolootaho danchare coyidhe iso ayirrissannota leellishshanno. (Efe. 5:33) Iso dimishshanno, woy isi daafira busha haariimo dihaariintanno hattono iso dixontanno; korkaatuno, togoo coyi adhamansa diigannota affino. (Law. 14:1) Minaannase yaaddo waaddannoti Ixaaliyaho heedhannoti mitte rodoo togo yitino: “Mito woyite minaanniꞌya mitu coyira haafa yee yaadannohu gede asse hedeemma. Konni albaanni, coyiꞌreemmarinna albiꞌya iso ayirriseemmakkita leellishanno. Kayinni woloota ayirrissannota leellishanno garinni coyidhannoriwa aanummati minaannaꞌya roore ayirriseemmata ikkoomma.”

10. Wedellu annansanna amansa ayirrissannota leellisha dandiitannohu hiittoonniiti?

¹⁰ Wedella, anniꞌnenna amaꞌne fushshitino seerira hajajamme. (Efe. 6:1-3) Annaꞌnenna amaꞌne ayirrinyunni hasaawisse. (Ful. 21:17) Insa geedhanni haꞌranno woyite albinni roore kiꞌne towaanyo hasiissannonsa. Insa towaatate dandiitinire baala asse. Hanni Yihowa Farciꞌraasincho ikkinokki anni noosete Maariya yinanni rodoo woꞌnaalsha laꞌno. Annise dhiwamita Maariyara iso towaata qarra ikkitinose; korkaatuno, isi isera ayirrinye xeinore assanno. Ise togo yitino: “Annaꞌya ayirriseemma gede calla ikkikkinni iso ayirriseemmata leellisheemma gede kaaꞌlaera Yihowa huucciꞌroomma. Yihowa annaꞌyanna amaꞌya ayirriseemma gede kulie geeshsha tenne assa dandeemma gede jawaante aannoeta huwatoomma. Gedensoonni, ani ayirriseemmasi gede anniꞌya soorrama hasiissannosikkita huwatoomma.” Laanfe heedhunsarono maatenke miilla ayirrinseemmo woyite, Yihowa qixxeessino qixxaawo ayirrinseemmota leellinshanni heeꞌnoommo.

AMMANATE RODUUWANKE AYIRRINSEEMMOTA LEELLISHA

11. Ammanate roduuwanke ayirrisa qarra ikkitannonke gede assara dandaannori maati?

¹¹ Qarra ikkannore. Ammanate roduuwinke Qullaawu Maxaafi biddishshi garinni heedhanno; ikkirono mito woyite ayirrinye xeinore assitankera, garimale yoo yitankera woy caacceessitankera dandiitanno. Mittu ammanate rodiinke ‘koffi assinkero’ iso ayirrinseemmota leellisha qarra ikkitankera dandiitanno. (Qol. 3:13) Togoo woyite kaaꞌlankera dandaannori maati?

12. Ammanate roduuwanke ayirrinseemmota leellisha hasiissannota ikkitinohu mayiraati? (2 Pheexiroosi 2:9-12)

¹² Ayirrinseemmota leellisha hasiissannonkehu mayiraati? (2 Pheexiroosi 2:9-12 nabbawi.) Pheexiroosi qullaawu ayyaani massageennasi borreessinote layinki sokkasira, umi xibbi diro heedhino songora noohu mitu Kiristaani “ayirradda” yaano songote cimeeyye ayirrisannokkita coyiꞌrino. Ikkanni noore laꞌanni noori ammanantino sokkaasine ma assituyya? Insa “Yihowara noonsa ayirrinyinni kainohunni” bunshe assinohu togoo mannira gara ikkinokkiha mitto qaale nafa dicoyidhino. Hanni tenne hedi! Guuta ikkitino sokkaasine kuri booꞌnaleeyye mannootira kaajjishshe dicoyidhino. Hatteentenni insa yoo yaanno gedenna insa rufanno gede coye Yihowara agurtino. (Rom. 14:10-12; Yihuda 9 ledo heewisiisi.) Sokkaasinetewiinni ronseemmori no. Gibbannonkere ayirrinseemmoha ikkiro, ammanate roduuwanke hakkiinni roore ayirrisa dihasiissannonke? Isinni insa ayirrisate ‘umire ikka’ hasiissannonke. (Rom. 12:10) Hatto assineemmoha ikkiro Yihowa ayirrinseemmota leellinsheemmo.

13-14. Songote giddo noore ayirrinseemmota leellisha dandiineemmohu hiittoonniiti? Lawishsha kuli. (Misillano lai.)

¹³ Ayirrinseemmota leellisha dandiineemmo gara. Songote cimeeyye baxillunni kaꞌe woloota rosiisate sharrantanno. (Flm. 8, 9) Mitto mancho amaala hasiissuhero shaqqillunni amaali; kayinni caaccaabbe heedhe amaaltooti. Kiꞌne meya roduuwi, heme woy suꞌma hunannore coyiꞌra qorophitine songote giddo noo roduuwi mimmito ayirrissanno gede kaaꞌla dandiitinanni. (Tit. 2:3-5) Ninke baalunku songote cimeeyye ledo kaaꞌlamme loonse, hattono gambooshshe massagate, sabbakate looso massagatenna ‘gara ikkitinokki doogora hadhinore’ kaaꞌlate diinaggaabbe loossannotera galante insa ayirrinseemmota leellisha dandiineemmo.—Gal. 6:1; 1 Xi. 5:17.

¹⁴ Roosiyo yinanni rodoora amaalinoseha songote cimeessa ayirrisa qarra ikkitinose. Ise togo yitino: “Isi shaqqillunni dihasaawisinoe yee hedoomma. Mine isi daafira gara ikkinokkire coyiꞌroomma. Tenne anfannikki gede assate woꞌnaaloommaha ikkirono, isi ane dancha giddonni kae amaalinoekkihu gede asse hedoomma daafira amaalesi dimacciishshoomma.” Roosiyo kaaꞌlinoseri maatiyya? Ise togo yitino: “Qullaawa Maxaafa nabbawanni 1 Teselonqe 5:12, 13 nabbawumma. Konne rodoo ayirrisanni noommakkita huwatummata tiiꞌꞌiꞌya bushiishinoe. Hakkiinni, Yihowa huucciꞌroomma; hattono akataꞌya biddi assiꞌreemma gede kaaꞌlitannoe mashalaqqe afiꞌrate borruwanke xiinxalloomma. Gedensoonni qarru noohu konni rodiiwa ikkikkinni ani naaxxanni noommata huwatoomma. Xa umoꞌya heeshshi assa woloota ayirrisate kaaꞌlitannoeta huwatoomma. Xaano woyyeessiꞌra hasiissannoe coyi no; ikkirono woloota ayirrisate sharrameemma woyite Yihowa aanno keere afiꞌreemma.”

YIHOWA FARCIꞌRAASINE IKKINOKKI MANNA AYIRRISSINANNITA LEELLISHSHE

15. Yihowa Farciꞌraasine ikkinokki manna ayirrisa qarra ikkitannonke gede assara dandaannori maati?

¹⁵ Qarra ikkannore. Duucha woyite soqqanshonniwa Qullaawu Maxaafi halaale baxannokki manninni xaandeemmo. (Efe. 4:18) Mitu manni anjensanni hanafe rosinori wolere ikkino daafira kulleemmo sokka macciishsha giwanno. Loosiisaanonke woy rosiisaanonke shiimurinni hagiidhitannokkire ikkitara hattono ledonke loossannori woy ledonke rossannori loosonke naaddannokkire ikkitara dandiitanno. Yannate gedensoonni, togoo mannira noonke ayirrinyi ajanni haꞌraranna ninke ayirrinsankera hasiꞌneemmo garinni insa ayirrisa hoongammora dandiineemmo.

16. Yihowara soqqamannokki manna ayirrisa hasiissannota ikkitinohu mayiraati? (1 Pheexiroosi 2:12; 3:15)

¹⁶ Ayirrinseemmota leellisha hasiissannonkehu mayiraati? Yihowa isira soqqamannokki manna ayirrinseemmoronna teꞌee seekke laꞌꞌannota qaagi. Soqqamaasinchu Pheexiroosi Kiristaanu leellishannohu danchu akati mitootu ‘Magano ayirrissanno gede’ kakkayisansara dandaannota kulino. Hakko daafira isi ammanansara gaarantanno woyite “joongillunninna lowo ayirrinyinni” coyiꞌra hasiissannonsata kulinonsa. (1 Pheexiroosi 2:12; 3:15 nabbawi.) Kiristaanu yoote mine ammanansara gaaramanno woyite woy ammanansa daafira qooxeessinsa manni ledo hasaawanno woyite, ammantinokkire hasaawisannohu Maganu albaanni noohu gede ikkeeti. Yihowa maa coyiꞌneemmoronna ma garinni coyiꞌneemmoro laꞌꞌanno hattono macciishshanno. Yihowa Farciꞌraasine ikkinokki manna ayirrinseemmo gede assannonkehu kaajju korkaati noonke!

17. Yihowa Farciꞌraasine ikkinokki manna ayirrinseemmota leellisha dandiineemmohu hiittoonniiti?

¹⁷ Ayirrinseemmota leellisha dandiineemmo gara. Soqqammeemmo woyite Qullaawa Maxaafa hakkeeshsha affinokkire woy horonta Qullaawu Maxaafi daafira affinokkire woffi assa horo dihasiꞌneemmo. Hatteentenni insa Maganoho muxxe ikkitinohunna ninkenni roortannohu gede assine laꞌꞌa hasiꞌneemmo. (Hag. 2:7; Fil. 2:3) Mittu manchi ammanakkinni kainohunni xonihero, ati egennaamo ikkoottohunna isi afinori nookkihu gede asse hedanno gede assannore coyidhe rabbisiꞌrate woꞌnaaltooti. (1 Ph. 2:23) Gaabbisannohere coyiꞌrittoro bayichonkonni maaro xaꞌmiꞌri. Ledokki loossannore ayirrisattota leellisha dandaattohu hiittoonniiti? Diinaggaabbe loosattoha ikki; hattono ledokki loossannoriha woy loosiisaanchikkiha dancha akata illachishate woꞌnaali. (Tit. 2:9, 10) Ammanante, diinaggaabbenna woꞌma wolqakkinni loosattoha ikkirono, mannu duucha woyite hagiidhara woy hagiidha hoogara dandaanno; kayinni Yihowa woꞌmunni woꞌma hagiirsiisatto.—Qol. 3:22, 23.

18. Woloota ayirrisa dancha ikkitinohu mayiraati?

¹⁸ Woloota ayirrinseemmota leellinsheemmo gede assannonkehu batinyu ikkadu korkaati no! Ronsummonte gede maatenke miilla ayirrinseemmoha ikkiro maate xintinoha Yihowa ayirrinseemmo. Hatteente gede, ammanate roduuwanke ayirrinseemmoha ikkiro iimi Annanke ayirrinseemmo. Hattono Yihowa Farciꞌraasine ikkinokki manna ayirrinseemmoha ikkiro insara bayira Maganonke ayirrissanno faro fanneemmo. Mitu manni ayirrisannonkekkiha ikkiro nafa manna ayirrinseemmota leellisha kiissanno. Korkaatuno Yihowa maassiꞌrannonke. Isi, “Ayirrissannoere ayirriseemmo” yee qaale eino.—1 Sa. 2:30.