Olu Abbanno Shetto
Olunna gaancu geeshsha, mannu heeshsho umo lekkicho soorrannori dino yaa dandiinanni. Kalqete aana keeraano qansootino ikko bagadaano olu bunshe illensanni laꞌino.
BAGADAANO
“Olunni lowo manni madiꞌranna woy abbalamanna laꞌꞌatto. Woꞌmanka woyte massanninna jajjartanni heeꞌratto.”—Geery, Biritaaniya.
“Xiyyiitu badhenna alba ganinoe; qaaqquullenna geerrano lendanna lowo manni xoqolamanna laoommo. Olu godowa kaajjado assannohe.”—Welmaar, Kolombiya.
“Mittu manchi albakkiinni xiyyiituy ganneenna uwiro, hatti wodanunni horo dibaꞌannohe. Uwi woyte raarino raarenna urino uratto qaagantannohe. Hakku manchi ikkita horo dihawatto.”—Zaafraa, Ameerika.
KEERAANO QANSOOTA
“Xaate hagiirru noo heeshsho diheeꞌreemma yee hedoomma. Heeshshoꞌyara yaadoomma; roorenka kay, maateꞌyanna jaallaꞌya heeshshora yaadoomma.”—Oliksaandira, Yukireene.
“Sagalete diramme mite 20 saate uurrineemmo daafira, woleho tokkonsoonni xiyyiiti ganaekka yine mansanni uurrineemmo.”—Daaler, Taajikistaane.
“Olunni annanna ama shiiꞌroomma. Olunni kainohunni, jawaachishannoehu woy towaatannoehu nookkita buxo ikkoomma.”—Maary, Ruwaanda.
Aleenni qummi assini manni olu baasa gawajjinonsaha ikkirono, xa sheshifatino. Hattee callano ikkikkinni, insa olunna kipho baalanti muli yannara uurritannota addaxxanno. Tini Agarooshshu Shae ittime, kuni ikkannohu hiittoonniitiro Qullaawu Maxaafinni kultanno.