Olunna Kipho Heedhurono Keere Afiꞌra
Bashshoora olamaancho ikkinohu Geery togo yiino: “Qullaawa Maxaafa xiinxallammora albaanni alamete aana mannu togo kakkacha ikkinohu hattono miiconna qarru batiꞌrinohu mayiraatiro diafoommo. Xa kayinni wodaniꞌya fooliishsho afiꞌrino. Maganu Yihowa kalqe woꞌma keere assannota afoommo.”
Togoo hedo galtinosihu Geery calla diꞌꞌikkino. Hanni Qullaawu Maxaafi wolootano kaaꞌlino gara laꞌno.
QULLAAWU MAXAAFI TOGO YAANNO: “[Yihowa,] ati shaqqadohonna cubbono agurattoho.”—Faarso 86:5.
TINI KAAꞌLITANNO GARA: “Kuni qummeeshshi Yihowa maaranno Magano ikkinota addaxxeemmo gede assinoe. Isi ola olameemmo waro assoommore baala gatona yaaera qixxaawinoha ikkinota afoommo.”—Welmaar, Kolombiya.
QULLAAWU MAXAAFI TOGO YAANNO: “Kune ani haaro gorduwanna haaro baatto kalaqeemmo; sainore baala hambanni; horonta diqaanganni.”—Isayaasi 65:17.
TINI KAAꞌLITANNO GARA: “Alba ola olameemma waro laoommarinni kainohunni, surrete xissonna quwa saꞌino yaaddo amaddinoe. Kuni qummeeshshi kayinni Yihowa muli yannara tenne yaachishshannoe hedo baalantanna bararraaqisannoere baalanka haweemma gede assannoeta qaagiissinoe. Albillitte togoo yaaddo surreꞌyara woy wodaniꞌyara horo diheedhanno. Tini kaajja eltooti!”—Zaafraa, Ameerika.
QULLAAWU MAXAAFI TOGO YAANNO: “Isi yannara keeraano lattanno; aganu noo geeshshano keeru woꞌmanno.”—Faarso 72:7, Haaro Alame Tiro.
TINI KAAꞌLITANNO GARA: “Duucha woyite konne qummeeshsha hiinceemma. Muli yannara olunna olu abbino shetto baala baꞌanno; hatte yannara miniꞌya manni woy jaallaꞌya mite ikkitakka yine horo diyaandeemmo.”—Oliksaandira, Yukireene.
QULLAAWU MAXAAFI TOGO YAANNO: “Mannikki reyinohu kae heeshshonniha ikkanno; . . . kiꞌne bushshu giddo heedhinanniri, kaꞌine hagiirru faarso faarse!”—Isayaasi 26:19.
TINI KAAꞌLITANNO GARA: “Tutisi sircho shakki assine gudate kaꞌni yannara, maateꞌya giddo rooriido shinoonni. Kuni qummeeshshi kayinni insanni wirro xaadeemmata huwateemma gede assinoe. Insa reyotenni kae coyiꞌranna macciishshate quqquxamoomma.”—Maary, Ruwaanda.
QULLAAWU MAXAAFI TOGO YAANNO: “Bushuullu shiima yannalla keeshshitanno. Shaqqaddu kayinni baatto ragidhanno; atootenna keere afidhe hagiidhitanno.”—Faarso 37:10, 11.
TINI KAAꞌLITANNO GARA: “Gobbankera olu uurrinoha ikkirono, miiconna bushu manni xaano noolla. Kuni qummeeshshi lowo geeshsha jawaachishinoe. Yihowa baalankare laꞌꞌanno; noommo garino leellannosi. Isi muli yannara qarru baalunku baꞌꞌanno hattono hawamanno yee hexxo uyinonke.”—Daaler, Taajikistaane.
Qullaawu Maxaafinni keere afidhinori lowo miliyoone ikkitannori Yihowa Farciꞌraasine giddo gamu, tenne metseetera kulli mannaati. Insa manna sirchonsa, heeꞌranno gobba, gaꞌrensa woy wole togoore kulte diallaggissanno. (Efessooni 4:31, 32) Yihowa Farciꞌraasine polotiku coyira dieꞌanno; qoleno olaho dikarsantanno.—Yohaannisi 18:36.
Hatteeno aguranna, Yihowa Farciꞌraasine mitte maate gede ikkite mimmito kaaꞌlitanno. (Yohaannisi 13:35) Lawishshaho, aleenni qummi assiniti Oliksaandira olu kaeenna rodoose ledo wole gobba xooqqino. Ise togo yitino: “Gobbate qasiiso tayinse saꞌnanni heeꞌnenni, ninke haadhara shiqqi yite noorinni Yihowa Farciꞌraasinenni xaandummo. Insa kaaꞌlo daramaasine ikkine manni gobbara heeꞌra ronseemmo gede kaaꞌlitinonke.”
Ninke mitteenni xaande Qullaawu Maxaafita keeru sokka macciishshineemmo; qoleno hattee sokka garinni heeꞌra dandiineemmo gara ronseemmo. Gambooshshenke dagge macciishshatto gede ayirrinyunni koyinsoommohe. Mulannohe darga layiꞌratenna mittu Yihowa Farciꞌraasinchi Hegerera Hagiidhitanni Heeꞌra Dandaatto! yaanno maxaafinni Qullaawa Maxaafa baatooshshiweelo xiinxallisannohe gede xaꞌmiꞌrate jw.org daaꞌꞌati.