Mimmitu Ledo Lubbora Baxamme

1. Yesuusi rosaanosi mayyee hajajino? (Aaniidi qoolira noo misile lai.)

YESUUSI reyara albaanni noo hashsha rosaanosi mitte baxxitino hajajo hajajino. Isi togo yiinonsa: “Ani baxummoꞌnente gede kiꞌne kiꞌneneewa baxamme.” Isi lede togo yiinonsa: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.”—Yoh. 13:34, 35.

2. Mimmitu ledo baxama hasiissannonkehu mayiraati?

² Yesuusi rosaanosi isi baxinonsa garinni woloota baxxannoha ikkiro isi harunsaano ikkitinota mannu bade afannota coyiꞌrino. Umi xibbi dirono ikko xaa yannara tini halaale ikkitinoti leeltino. Guficho ikkannori heeꞌriro nafa mimmitu ledo lubbora baxamate sharrama lowo geeshsha hasiissannote.

3. Konni birxichira maa ronseemmo?

³ Guuntete xeꞌne noonkere ikkinoommo daafira, mimmito lubbora baxa qarra ikkitannonke. Ikkirono, Kiristoosi lawishsha harunsate sharrama hasiissannonke. Konni birxichira, baxillu keere kalanqeemmore, mallaandeemmokkirenna wosina adhineemmore ikkineemmo gede kaaꞌlannonkehu hiittoonniitiro ronseemmo. Konne birxicho xiinxallatto woyite, ateneeto togo yite xaꞌmi: ‘Guficho ikkannori heeꞌriro nafa mimmitoho baxille leellisha agurtukkinni heedhino roduuwi lawishshinni maa roseemmo?’

KEERE KALAQQINANNIRE IKKE

4. Maatewoosi 5:23, 24, kultanno garinni koffi assinonke rodii ledo araarama hasiissannonkehu mayiraati?

⁴ Yesuusi koffi assinonke rodii ledo araarama hasiissannonketa rosiisinonke. (Maatewoosi 5: 23, 24 nabbawi.) Isi Magano hagiirsiisa hasiꞌnummoro, wolootu ledo dancha aante heedhannonke gede assiꞌra hasiissannonketa luphi asse xawisino. Yihowa roduuwinke ledo keere kalaqate dandiinummore baala assinummoro hagiidhanno. Isi roduuwaho koma amandeemmohanna keere kalaqate sharrammeemmokkiha ikkiro magansiꞌranke diadhanno.—1 Yoh. 4:20.

5. Mittu rodiira keere kalaqa qarra ikkitannosi gede assinori maati?

⁵ Mito woyite kayinni keere kalaqa qarra ikkitankera dandiitanno. Mayira? Hanni Maarki yinanni rodiira iillinosire laꞌno.b Isi mittu rodii bushiishinosinna songote giddo isi daafira gara ikkinokkire coyiꞌrino daafira hanqino. Hakkiinni Maarki maa assiyya? Isi hatte yannara “Hanqe gobba gudoommo” yiino. Gedensoonni isi coyiꞌrinorira lowo geeshsha gaabbe roduu ledo araaramatenna wirro keere kalaqate sharramino. Roduu kayinni isi ledo araarama dihasiꞌrino. Umo Maarki ‘Isi araarama giwina ani mayi qarriseennae huucciꞌreemmosi?’ yee hedino. Ikkollana woradu aliidi laꞌꞌaanchi Maarki hexxo mudhe agurannokki gede jawaachishinosi. Maarki maa assiyya?

6. (a) Maarki keere kalaqate sharraminohu hiittoonniiti? (b) Maarki Qolasiyaasi Sokka 3:13, 14 noo amaale harunsinohu hiittoonniiti?

⁶ Maarki isonooto layiꞌranno woyite naaxxate akati noositanna umosi bokkeessannoha ikkinota huwatino. Isi laosi biddi assiꞌra hasiissannosita wodanchino. (Qol. 3:8, 9, 12) Isi umosi heeshshi asse wirro roduuunniwa mare assinorira maaro xaꞌmiꞌrino. Qoleno, isi duucha hige sokkate borro borreesse, coyiꞌrinorira lowo geeshsha gaabbinotanna jaaloomansa haaroonsiꞌra hasiꞌrannota kulinosi. Maarki hakku rodii baxanno yee hedinoha shiima baraarsha nafa uyinosi. Hakku rodii kayinni koma amaxxe giwino. Ikkirono, Maarki Yesuusi hajajora hajajame, rodoosi baxanna iso gatona yaa diagurino. (Qolasiyaasi Sokka 3:13, 14 nabbawi.) Ninke keere kalaqate sharrammeenna wolootu gibburo nafa, insara noonke baxilli gatona yaankenna Maganu keere kalanqeemmo gede kaaꞌlankera huuccatto assa agurreemmokki gede kakkayisannonke.—Mat. 18:21, 22; Gal. 6:9.

7. (a) Yesuusi ma asse yiinonke? (b) Mitte rodoora mayi qarri tuncu yiinose?

⁷ Yesuusi ‘wolootu assitaꞌnera hasidhinannire kiꞌneno assensa’ yiinonke. Qoleno, isi baxxannonkere calla baxa hasiissannonkekkita coyiꞌrino. (Luq. 6:31-33) Duucha woyite tuncu yaannore ikka hoogiro nafa, songote giddo mittu rodii fiile hooꞌle keere haaꞌralla giwihe? Laara yinanni rodoora togoori tuncu yiinose. Ise togo yitino: “Mitte rodoo fiile hooꞌlitinoehu mayiraatiro diafoomma. Tini lowo geeshsha yaachishshinoe daafira gambooshshe haꞌra giwisinoe.” Laara umi qara ‘busha ane diꞌꞌikkoomma. Qoleno, songote giddo wolu roduuwino ikkitose dibaxxanno’ yite heddino.

8. Laara keere kalaqate maa assitino? Ninke ise lawishshinni maa ronseemmo?

⁸ Laara keere kalaqate sharrantino. Ise huuccatto assidhuhu gedensaanni hatte rodoo hasaawissino. Insa kalaqamino qarra hasaawihu gedensaanni araarame hanqafamino. Hakka woyitira, kawa kaꞌa higino coyi tidhaminoha lawirono, Laara kayinni togo yitino: “Hatti rodoo gedensoonni wirro anera albise gede ikka hanaffino. Tini lowo geeshsha dadillissinoe.” Laarara umi qara hagiirraame ikka dandiitannohu hatte rodoo akati woyyaawiro calla lawinose. Gedensoonni Laara hatte rodoora baxille leellishanna isera gatona yaa agura hasiissannosekkita huwattino. (Efe. 4:32–5:2) Laara addu Kiristaani baxilli ‘koma kiirannokkita, baalankare cincannota; baalankare addaxxannota; baalankare hexxannotanna dargasi agurannokkita’ qaaggino. (1 Qor. 13:5, 7) Laara wirro giddoyidi keere afidhino. Yannate gedensaanni hatte rodoo ledo noose aante woyyaabbino. Roduuwu ledo keerunni heeꞌneemmohanna woꞌmante yannara baxille leellinsheemmoha ikkiro, “baxillunna keeru Magani” ledonke ikkannota addaxxa dandiineemmo.—2 Qor. 13:11.

MALLAADDINANNIKKIRE IKKE

9. Soqqamaasinete Looso 10:34, 35, kultanno garinni mallaada hasiissannonkekkihu mayiraati?

⁹ Yihowa dimallaadanno. (Soqqamaasinete Looso 10:34, 35 nabbawi.) Ninkeno, mallaandeemmokkiha ikkiro, oososi ikkinoommota leellinsheemmo. Qoleno hatto assineemmoha ikkiro, Yesuusi ‘manna umiꞌne gede assitine baxxe’ yee hajajinonke hajajo agadhineemmo; hattono ayyaanaamittete maatenke keeri baikkinni heeꞌranno gede kaaꞌlineemmo.—Rom. 12:9, 10; Yai. 2:8, 9.

10-11. Mitte rodoo gara ikkitinokki hedose qeeꞌlitinohu hiittoonniiti?

¹⁰ Mitootaho mallaaddannokkire ikkite heeꞌra qarrissansara dandiitanno. Hanni Ruuti yinanni rodoora iillinosere laꞌno. Ise shiima heedheenna wole gobbanni daggino mancho miiccinose. Tini Ruuti mayite heddanno gede assitinose? Ise togo yitino: “Hatte gobbare baalankare giwisinoe. Hatte gobba manni baalu roduuwano ikkituro mittu garireeti yee hedoomma.” Ikkina ise gara ikkitinokki hedose qeeꞌlitinohu hiittoonniiti?

¹¹ Ruuti gara ikkitinokki hedose qeeꞌlate sharrama hasiissannoseta huwattino. Ise Diru Maxaafira hatte gobba lainohunni fultanno woꞌnaalshuwanna rippoorte nabbabbino. Ruuti togo yitino: “Hatte gobba mannira gara ikkitino lao heedhannoe gede assiꞌrate sharramoomma. Hakko heedhanno roduuwi Yihowara diinaggaabbe soqqantannore ikkitinota huwatoomma. Qoleno insano alamete doyichora noote roduuwu maamari wido ikkitinota wodanchoommo.” Gedensoonni Ruuti hakkiinni sainore assa hasiissannoseta huwattino. Ise togo yitino: “Hatte gobbanni daggino roduuwinni xaadummaro insa shiqe hasaawisate sharrameemma. Hattono, hasaawise insa ledo egennameemma.” Ikkina, tini kaaꞌlitinosehu hiittoonniiti? Ise “Galte hosse gara ikkitinokki hedoꞌya baꞌino” yitino.

12. Saara yinanni rodoora hiittoo lao noose?

¹² Mitootu mallaaddanni noota nafa affukki hatto assitara dandiitanno. Lawishshaho, Saara yinanni rodoo manna gaꞌrensanni, noonsa jironni woy dirijjitete giddo noonsa qoossonni babbadde laꞌannokki daafira dimallaadeemmate yite heddino. Ikkollana ise “Manna mallaadeemmata huwatoomma” yite noore maaxxukkinni coyidhino. Ise hatto yitinohu mayiraati? Saaranna maatese kaffi yiino roso rossinoreeti; hakko daafira ise insa gede rosino manni ledo calla hosa baxxanno. Ise mitte higge labbaa jaalisera togo yite kultino: “Ani kaffi yiino roso rossino roduuwi ledo calla hosa baxeemma. Kaffi yiino roso rossinokki roduuwiwa diaaneemma.” Ikkina Saara laose biddi assidhanno gede kaaꞌlinoseri maati?

13. Saara lawishshinni maa ronseemmo?

¹³ Woradu aliidi laꞌꞌaanchi Saara iseneeto layidhanno gede kaaꞌlinose. Ise togo yitino: “Ammaname soqqameemmata ikkoommahura, gambooshshunniwa dancha dawaro qoleemma daafiranna Qullaawa Borro egenno nooehura galatinoe. Hakkiinni isi egennonke lexxituro, albinni roore, umo heeshshi assa, quwa saꞌneemmokkirenna maarreemmore ikka hasiissannonketa kulinoe.” Saara woradu aliidi laꞌꞌaanchi amaalinose amaale loosu aana hosiissino. Ise togo yitino: “Roore hasiissannoti mannaho baxillenna shaqqille leellisha ikkitinota huwatoomma.” Hakko daafira ise roduuwaho noose lao biddi assidhino. Ise togo yitino: “Roduuwu Yihowara muxxe ikkitanno gede assitinonsa akatta hiitteetiro huwatate woꞌnaaloomma.” Ninkena? Rosinke deerrinni kainohunni woloota roorroommohu gede assine horo dihendeemmo! Roduuwanke “baala” lubbora banxeemmoha ikkiro mallaada qorophineemmo.—1 Phe. 2:17.

WOSINA ADHITINANNIRE IKKE

14. Ibiraawoota 13:16 kultanno garinni wosina adhineemmo woyite Yihowara mayi macciishshamannosi?

¹⁴ Yihowa wosina adhinannita lowo geeshsha baxanno. (Ibiraawoota 13:16 nabbawi.) Isi roorenkanni qarrantinore kaaꞌlineemmota magansiꞌranke wido ikkitinohu gede asse laꞌꞌanno. (Yai. 1:27; 2:14-17) Qullaawa Borro “wosinchimma” adhinammora jawaachishshannonke. (Rom. 12:13) Wosinimma adhineemmoha ikkiro, tini baxillenkenna jaaloomanke leellishshanno. Yihowa mitore assine roduuwa mininkera koyinseemmohanna insa ledo yanna sayinseemmoha ikkiro hagiidhanno. (1 Phe. 4:8-10) Ikkollana, wosina adhineemmokki gede guficho ikkannori heeꞌrara dandaanno.

15-16. (a) Mitootu wosina adhate badhera higgannohu mayiraati? (b) Ediiti wosina adhitannokki gede guficho ikkinosere qeeꞌlitinohu hiittoonniiti?

¹⁵ Heeꞌnoommo gari wosina adhate badhera hingeemmo gede assankera dandaanno. Hanni Ediiti yinannite minaannase shiidhino rodoo lawishsha laꞌno. Ise Yihowa Farciꞌraasincho ikkitara albaanni mannunniwa aana dibaxxanno. Ediiti anenni roore wosina wolu manni adhiro woyyanno yite heddanno.

¹⁶ Ise Yihowa Farciꞌraasincho ikkituhu gedensaanni hedose biddi assidhino. Ise wosina adhate sharrama hanaffino. Ediiti togo yitino: “Gambooshshu Addaraashenke minni yannara, mittu cimeessi, Addaraashe mina kaaꞌlara daanno minaannanna minaama mineꞌya lame lamala gashshammara xaꞌminoe. Yihowa Seraphita heedhannota mitte gunnitte mancho maassiꞌrino gara qaagoomma.” (1 Mot. 17:12-16) Ediiti hakko minaannanna minaama minese gashshate maahoyye yitino. Ise mayi atoote afidhuyya? Ediiti togo yitino: “Insa mineꞌya lame lamala calla ikkikkinni lame agana galino. Hatte yannara insa ledo lubbote jaalla ikkinoommo.” Qoleno, Ediiti songote giddo dancha jaalla afidhino. Ise xaa yannara suwisaancho ikkite soqqantanni no; hattono ledose soqqantannori minese dagge ise ledo hasaabbanni mimmito jawaachishshanno. Ise togo yitino: “Wolootaho aa hagiirsiissannoe! Adda coyiꞌniro kayinni oommarinni afiꞌroomma atooti rooranno.”—Ibi. 13:1, 2.

17. Lukinna minaamasi maa wodanchino?

¹⁷ Ninke wosina adha banxeemmoha ikkirono, woyyeessiꞌneemmori heeꞌra ikka? Lawishshaho, Lukinna minaamasi wosina adha baxannoreeti. Insa duucha woyite annansanna amansa, fiixansa, muli jaallansa, hattono woradu aliidi laꞌꞌaanchonna minaamasi mininsara koyisanno. Luki togo yiino: “Ninkewa aantannore calla koyinseemmota huwantoommo.” Ikkina Lukinna minaamasi wosina adhitanno gara woyyeessidhinohu hiittoonniiti?

18. Lukinna minaamasi wosina adhanno gara woyyeessiꞌrinohu hiittoonniiti?

¹⁸ Lukinna minaamasi Yesuusi “baxxannoꞌnere calla baxxine ma afidhinanni?” yee coyiꞌrino qaale hiincituhu gedensaanni laonsa biddi assidhino. (Mat. 5:45-47) Insa Yihowa faale haꞌra hasiissannonsata huwattino; isi baalunkura ela baxanno Maganooti. Hakko daafira insa koyisse egentinokki roduuwa koyissara murcidhino. Luki togo yiino: “Hatto assineemmo woyite baalunku hagiidhineemmo. Baalunku jawaante afiꞌneemmo hattono mimmito kiꞌneemmo.”

19. Yesuusi rosaano ikkinoommota leellinsheemmohu hiittoonniiti? Maa assate murciꞌrootto?

¹⁹ Roduuwinkera noonke baxilli keere kalanqeemmore, mallaandeemmokkirenna wosina adhineemmore ikkineemmo gede assannonkehu hiittoonniitiro ronsoommo. Gara ikkitinokki hedo baala qeeꞌlanna roduuwanke lubbora baxa hasiissannonke. Hatto assinummoro hagiirraamma ikkineemmo; hattono Yesuusi rosaano ikkinoommota leellinsheemmo.—Yoh. 13:17, 35.