Bocaasa

Cimeeyye songotenni fushshinoonni manna mararannohu Yihowa lawishsha harunsate sharrantanno. Lawishshaho Yihowa, haxawarra Israeelete manna kaaꞌlate insa maaro eꞌa geeshsha diagarino. Hatteentenni isi insa maaro eꞌinota leellishannore nafa assitukkinni kaaꞌlinonsa. Yihowa mannasi mararanno gara kulate Hoosei lawishsha horoonsiꞌrino; Yihowa, Hoosei minaamasi jawa cubbo loosa agurtinokkiha ikkirono, maarannosenna galagale baxannose gede kulinosi. (Hos. 3:1; Mil. 3:7) Cimeeyye Yihowa lawishsha haꞌrunsitanno daafira, cubbo loosino manchi isiwa higara halchitanno; qoleno insa Yihowawa higa qarra ikkitannosi gede diassitanno. Yesuusi qaetenni fule baino beetti daafira kulino lawishshira, Annu beettisi qaera higanni nooha xeertote heeꞌre lae, “Dodanni mare hanqafe kimmi asse sunqisi.” (Luq. 15:20) Annu beettisi maarie yee huucciꞌra geeshsha agarinokkita wodanchi. Hatteentenni annisi baxannosi daafira dodanni beettisiwa marino. w24.08 28 guf. 7-8

Techohu barru qummeeshshira noo hedo leellishannonte gede, Yihowa hayyosi badhera diqoꞌlanno. Isi hayyosi shaqqillunni wolootaho aanno. Qoleno Yihowa hayyosi aanno woyite “mishikkinni” aannota wodanchi. Isi biddishshasi aankera huucciꞌneemmo woyite ninkeneeto bushiinshammora dihasiꞌranno. Hatteentenni isi biddishshasi hasiꞌneemmo gede kulinonke. (Law. 2:1-6) Ninkena? Yihowa gede hayyonke wolootaho beeha dandiineemmo? (Far. 32:8) Yihowa manni afinore wolootaho kula dandaannoti batinye doogga no. Lawishshaho duucha woyite haaruudde soqqanshote qajeelsineemmo. Songote cimeeyye songote soqqamaanonna cuuantinori labballu roduuwi songote giddo uyinanninsa looso loossanno gara rossanno gede cincite kaaꞌlitanno. Qoleno Magano magansiꞌnanni minna minatenna gatamarate dandoo noonsari gari dandoo noonsakkire qajeelsitanno. w24.09 28-29 guf. 11-12

Songote cimeessa ikkate “minshanniri nookkiha” ikka hasiissannohe; hatto ikkiro aye manchino bushu amanyooti noosi yee kassasannohekki daafira songote giddo danchu suꞌmi heeꞌrannohe. (1 Xi. 3:2) Qoleno ammaninokki manni mereero danchu suꞌmi heeꞌrannohe gede assiꞌra hasiissannohe. Ammantinokkiri, ammanakki mishshara dandiitanno; kayinni ammanamoottoha ikkakki woy amanyootekki mishshanno gede assiꞌra dihasiissannohe. (Dan. 6:4, 5) Ateneeto togo yite xaꞌmi: ‘Songote giddono ikko songote gobbaanni danchu suꞌmi nooe?’ ‘Dancha coye baxattoha’ ikkiro, wolootunnita dancha akatta illachishatto hattono togoo akatta noonsa daafira galatattonsa. (Tit. 1:8) Wolootaho dancha coye assa hagiirsiissannohe; wole agurina assa hasiissannohehunni saꞌe assatto. Kuni akati songote cimeeyyera lowo geeshsha hasiisannohu mayiraati? Korkaatuno insa songo towaattanninna uyinoonninsa looso loossanni lowo yanna sayissanno. (1 Phe. 5:1-3) Ikkirono wolootaho soqqante afidhanno hagiirri, agurtanno coye baala koꞌo hune rooranno.—Soq. 20:35. w24.11 20-21 guf. 3-5

Songote soqqamaano songote giddo lowo geeshsha hasiisanno looso loossanno. Soqqamaasinchu Phaawuloosi kuri ammanantino labballo naadannota xawise kulino. Lawishshaho, isi Filiphisiyusi heeꞌranno Kiristaanira sokka borreessi yannara, songote cimeeyyera keere soyi woyite songote soqqamaanorano soyino. (Fil. 1:1) Wedella woy jajjabbano ikkituro batinye cuuantinore labballo roduuwa, songote soqqamaano ikke soqqama lowo geeshsha hagiirsiissannonsa. Lawishshaho, Devaani yinanni rodii songote soqqamaancho ikkinohu 18 dirihu heeꞌreeti. Luwiisi yinanni rodii kayinni songote soqqamaancho ikkinohu 50 dirihu heeꞌreeti. Isi togo yiino: “Roorenkanni songote giddo noori baalunku lowo geeshsha baxxannoeta hedeemmo woyite, songote soqqamaancho ikke soqqamate qoossoꞌya lowo geya naadeemmo!” Batinye songote soqqamaano tenne hedora sumuu yitanno. Cuuamoottoha kayinni songote soqqamaancho ikkoottokkiha ikkiro, songote soqqamaancho ikkate mixo fushshiꞌra dandaatto? w24.11 14 guf. 1-3

Yihudu Moote Hiziqiyaasi 39 dirihu heeꞌre shaanno dhibbi amadinosita afi. Masaalaanchu Isayyaasi Yihowa kulinosi garinni Hiziqiyaasi dhibbisinni reyannota kulisi. (2 Mot. 20:1) Hiziqiyaasira hexxo noosiha dilawanno. Isi kulloonnisi duduwi masisinosi daafira hururame wiꞌlino. Isi Yihowa eeggifate huucciꞌrino. Yihowa Hiziqiyaasi wiꞌlanni huucciꞌrino daafira lowo geya mararinosi; togo yiinosi: “Huuccattokki macciishshoommo; hindiiddokkino laoommo; [hurseemmohe].” Yihowa Isayyaasi widoonni, Hiziqiyaasira diro ledannositanna Yerusaalame Asoorootu anganni gatisannota kule qaale eino. (2 Mot. 20:4-6) Dhiwanni waadannohe daafira hexxo dinoe yite hedootto? Huuccattotenni Yihowa hasaawisi; wiꞌlitanni huucciꞌrittoro nafa isi macciishshannohe. Qullaawu Maxaafi, “mararrotenna maarote Anni, shesho baalate Magani” iillannonke qarri baalunku giddo sheshifachishannonketa buuxisannonke.—2 Qor. 1:3, 4. w24.12 24 guf. 15-17

Reyotenni kaꞌannore anga fane haaꞌra lowo geya hagiirsiissanno! Hanni Yihowa kalaqinohu, batinyu kalaqami daafira xiinxalline isi daafira albinni roore rosa mageeshshi geeshsha hagiirsiissannorono hedi. (Far. 104:24; Isa. 11:9) Wolu baalunkunni roore kayinni, horo ninkeneeto bushiinshummokkinni Yihowa magansiꞌra lowo geeshsha hagiirsiissanno! ‘Cubbunni afiꞌnannihunni yannate geeshshi hagiirrira’ yine konne baala atoote hooga hasiꞌneemmo? (Ibi. 11:25) Hasiꞌneemmokkiti egennantinote! Konne atoote afiꞌrate yine xaa yannara agurreemmohu aye coyino gaabbisannoha diꞌꞌikkino. Gannate ikkitino uullara heeꞌra hexxo calla ikkite gattannokkita qaagi. Muli yannara tini hexxo woꞌmitanno. Yihowa baxillunni, Beettosi aa hoogoommenkero konne atoote afiꞌra didandiineemmo! w25.01 29 guf. 12

Ibiraawootu maxaafi giddo kulloonniri ammanatenni lawishsha ikkitannori giddo mittu kaajja ammana noosiho Museeti. (Ibi. 3:2-5; 11:23-25) Muse Yihowa addaxxasi garankolla; korkaatuno Yihowa Israeelete dagara halalla maalaletenni sagalenna waa qixxeessinonsa. (Ful. 15:22-25; Far. 78:23-25) Muse kaajjado ammana noosiha ikkirono, Israeele maalaletenni gatte fultuhunni mittu diri gedensaanni Yihowa mannisira maala aa dandaannota huluullamino. Muse, Yihowa halalla baddowa dunkaana qasiꞌre noohu lowo miliyoone ikkanno mannira ikkanno geeshshi maala aa dandaannota ammana hoogino. Hakko daafira Yihowa Muse “Kaaliiqi wolqa hanqatateni?” yee xaꞌmino. (Kir. 11:21-23) Yihowa Muse, ‘Ani asseemmo yoommore assa dandeeemmokkiha lawannohe?’ yee xaꞌmanni noosihu gedeeti. w25.03 26 guf. 1-2

Baote Wayi daafira kultanno xagge albillitte ikkanno coyira caaleho yine heda hasiissannonke? Dihasiissannonke. Mayira? Korkaatuno Qullaawu Maxaafi tenne daafira kulannori dino. Yesuusi ‘Nohi yanna’ isi galagale ledonke heeꞌranno yanna ledo heewisiisinoti egennantinote; kayinni isi Nohi yannara ikkinohu mittu mittunku coyi lawishshaho Yihowa markaawe cufasi albillitte ikkanno coyira caaleho diyiino. (Mat. 24:37-39) Yihowa kulinosi qorowishsha macciishshiti Nohi maa assi? Markaawe loose ammana noosita leellishino. (Ibi. 11:7; 1 Ph. 3:20) Hatteente gede, Maganu Gashshooti daafira kulannoha dancha duduwo macciishshino manni, macciishshinore loosu aana hosiisa hasiissannonsa. (Soq. 3:17-20) Pheexiroosi, ‘Nohi keeraanchimmannire kulannoho’ yiino. Xaa yannara ninke alamete doyichoha sabbakate looso diinaggaambe loosate sharrammanni heeꞌnoommo. Aye geeshshano sharrammummoro, goofimarchu daara albaanni uullate aana noo manni baalunkura dancha duduwo iillisha didandiineemmo. w24.05 9-10 guf. 3-5

Yihowa jaallara danchumma leellinsheemmonna ayirrinseemmonsa doogga hasiꞌra hasiissannonke. (Rom. 12:10) Hiittoonni? Faarso 15:4 tenne assa dandiineemmota mitte doogo kulloonni; qummeeshshu, Yihowa dunkaani giddo heeꞌranno manchi ‘qarramiro nafa coyiꞌrino qaale soorrannokkita’ kulanno. Coyiꞌnoommo qaale agadha hooga woloota gawajjitara dandiitanno. (Mat. 5:37) Lawishshaho, Yihowa dunkaanisi giddo heedhannori adhantu woyite eꞌino qaale agadhite heedhara hasiꞌranno. Annuwunna amuuwu oosonsara eꞌino qaale wonshate sharrantanna laꞌꞌanno woyiteno hagiidhanno. Maganohonna mannaho noonke baxilli, eꞌnoommo qaale wonshate dandiinummore baala assineemmo gede kakkayisannonke. Yihowa jaalla ayirrinseemmoti wole doogo insa wosinsiꞌratenna shaqqille leellishate. (Rom. 12:13) Ammanate roduuwinke ledo yanna sayisa insanna Yihowa ledo noonke jaaloomi kaajjanno gede assitanno. Roorenkanni insa wosinsiꞌneemmo woyite Yihowa lawishsha harunsineemmo. w24.06 12 guf. 15-16

Yihowa umonsa heeshshi assitannorira halaale xawisannonsa. (Mat. 11:25) Umonke heeshshi assine halaale rosate maahoyye yinoommo. (Soq. 8:30, 31) Ikkirono booꞌnineemmokki gede qoropha hasiissannonke. Booꞌnineemmoha ikkiro, Qullaawa Borrohu xintu seerinna Yihowa biddishshinte gede, ane hedono garaho yinammora dandiineemmo. Umonke heeshshi assineemmore ikkate, Yihowa hendiro garire ikkinoommokkita qaaga hasiissannonke. (Far. 8:3, 4) Qoleno umonke heeshshi assineemmorenna rosate qixxaamboommore ikkineemmo gede kaaꞌlankera Yihowa huucciꞌra dandiineemmo. Yihowa uminke hasattonni roore Qaalisinna dirijjitesi widoonni kulinonketa isi hedo balaxisiinseemmo gede kaaꞌlannonke. Qullaawa Maxaafa nabbawatto woyite, Yihowa umonsa heeshshi assitannore baxannota, naaxxitannore, kakkachootanna booꞌnitannore kayinni giwannota wodanchi. Qoleno mitte qoosso uyineennahe mannu naadannohe woyite, roore umo heeshshi assate woꞌmanka woyite sharrama hasiissannohe. w24.07 10 guf. 8-9

Yesuusi 1919 hanafe, buurantinori giddonni boode labballo horoonsiꞌre sabbakate looso qineessanninna harunsaanosira ayyaanaamittete sagale shiqishanni no. (Luq. 12:42) Yihowa kuri labballi loossanno looso maassiꞌranni nooti dihuluullissannote. (Isa. 65:13, 14) Qinaawa hoongoommoro Yesuusi loonsammora uyinonke looso umo fushsha didandiineemmo. (Mat. 28:19, 20) Lawishshaho qinaamboommore ikka hoongoommoro soqqanshote qoqqowi diheeꞌrannonke; aye manchino hasiꞌrinowa haꞌre sabbakara dandaanno. Addi addi halashshaano duucha higge mittu qoqqowira calla sabbakkara dandiitanno; mitu qoqqowi horontanni sabbankikki gatara dandaanno. Qinaamboommore ikkanke kaaꞌlitannonketa wole doogga heda dandaatto? Yesuusi uullate aana noo yannara assinori xaa yannara ninkeno qinaamboommore ikkineemmo gede assinonke. w24.04 8-9 guf. 2-4

Qaayeeli Addaamiranna Heewanira umi beettooti. Isi insawiinni cubbo ragiꞌrino. Qoleno Qullaawu Maxaafi, ‘loosisi busha’ ikkinota kulanno. (1 Yoh. 3:12) Qaayeeli kakkalo shiqishiꞌri woyite, Yihowa “Qaayeeliwanna kakkalosi widira” lainokkihu isera ikkara dandaanno. Qaayeeli busha assootesi agurantenni ‘lowo geeshsha giiramino; albisino kolishshiꞌrino.’ Yihowa ma assiyya? Isi Qaayeeli coyishiishino. (Kal. 4:3-7) Yihowa Qaayeeli shaqqillunni hasaawisinosita, assootesi biddi assiꞌranno gede kulinositanna cubbu gawajjannosita kule qorowisiisinosita wodanchi. Qaayeeli kayinni macciishshe adha giwino. Isi maaro eanno gede Yihowa kaaꞌlannosita giwino. Qaayeeli maahoyye yaa giwihu gedensaanni, Yihowa cubbo loosinohu wolu manni maaro eanno gede kaaꞌla agurinoni? Diagurino! w24.08 10 guf. 8

Israeelete dagara albillitte dhagge ikkitanno hexxo noonsa. Yihowa maassiꞌrannonsa daafira Israeelete daga isi aansara qaale eino gobbara seeda diro heeꞌra dandiitanno. Tini gobba baxissannotenna addi addi laalo noote! Muse hatte gobba daafira kulanni togo yiino: “Hakkiicho kiꞌne miꞌnitinoonnikkire jajjabbanna biifadda katamma, umiꞌneta ikkitinokkita danchu coyi baalu woꞌmino minna, uꞌmitinoonnikkita wayi balla, kaasidhinoonnikkiha woyinete kaashshonna ejersu haqqe [aannoꞌne].” (Mar. 6:10, 11) Muse Israeelete mannira qorowishshano kulinonsa. Insa biifado gobbara heeꞌrate Yihowa hajajo agadha hasiissannonsa. Muse, insa Yihowa yaannore macciishshitenna isira ‘ammanantinore ikkite heeshsho doodhitanno’ gede kulinonsa. (Mar. 30:20) Ikkirono Israeele Yihowara dihajajantino. Hakko daafira Yihowa, insa Asooru manni horranno gedenna gedensaanni qole Baabiloonete manni qafade haaꞌre haꞌranno gede assino.—2 Mot. 17:6-8, 13, 14; 2 Dud. 36:15-17, 20. w24.11 9 guf. 5-6

Ninke Kiristaanaho yaannohu batinyu manni, Yesuusa ammannummoronna iso gatisaanchonke assine adhinummoro ganteemmo yee hedanno. (Yoh. 6:29) Ikkollana, Galiilaho gamba yiino manni giddo mitu umi qara Yesuusa ammaninoha ikkirono, gedensoonni iso agure haꞌrino. Mayira? Galiilaho Yesuusi itisino manni giddo rooru isi hasidhannore uyinonsa daafira iso harunsino. Insa Yesuusi maalaletenni hursansara, sagale mulla aansara woy insa macciishsha baxannore rosiisansara hasidhino. Ikkirono Yesuusi isire addu rosaanosi ikkate tini calla guddannokkita leellishino. Yesuusi uullara dayinohu qaru korkaati, mannunnita maalaamittete hasatto wonshara diꞌꞌikkino. Insa Yesuusi rosiisinonsa roso baala macciishshite adhitenna hajajante ‘anewa amme’ yee koyisinonsa koyishsha adha hasiissannonsa.—Yoh. 5:40. w24.12 12 guf. 12-13

Mittu minaanni minaamasi miicanna shollisha aguranno gede kaaꞌlannosiri maati? Isi Yesuusi lawishsha haꞌrunsate sharrama dandaanno. Yesuusi rosaanosira shaqqille leellishe minaannuwaho dancha lawishsha ikkino. Hanni Yesuusi soqqamaasinesira shaqqille leellishinonna insa hasaawisino garinni minaannuwu maa rossannoro laꞌno. Yesuusi soqqamaasinesira shaqqille leellishinonsa; hattono ayirrisinonsa. Isi insara kaajjishe coyiꞌre woy insa gadadise diegennino. Wolqasi horoonsiꞌre insara silxaanesi leellishate diwoꞌnaalino. Hatteentenni umosi heeshshi asse soqqaminonsa. (Yoh. 13:12-17) Isi rosaanosira togo yiino: “Anewiinnino rosse; ani shaqqadohonna wodana joogaho; umiꞌnerano fooliishsho afidhinanni.” (Mat. 11:28-30) Yesuusi shaqqado ikkinota qaango. Shaqqadu manchi laafa diꞌꞌikkino. Hatteentenni togoo manchira isonooto eemadhate jawaante noosi. Caacceessanno coyi tuncu yiisiro wodanaaꞌmanno; hattono coye heeshshi gotti asse hedanno. w25.01 10 guf. 10-11

Tenne busha alame goofimarchi gambise dayi kiiro miinju qarri roore lexxanni haꞌrannota anfoommo. Poletiku ikkito, olu, kalaqamu dano woy haarote ubbanno fayya hendoommokki woxe fushshineemmo gede assitankera dandiitanno; woy loosonke, jajjanke woy qaenke hoongammora dandiineemmo. Ikkina Yihowa addaxxineemmota leellishanno doorsha doodhineemmo gede kaaꞌlannonkeri maati? Assa hasiissannohehu qarunna kaaꞌlannohe coyi yaachishinohe coye Yihowara hasaaphate. Dancha doorsha doodhatto gede hayyo aaheranna iillinohe coyi daafira ‘quwa saꞌe yaada’ agurte wodanaaꞌmatto gede kaaꞌlahera Yihowa huucciꞌri. (Luq. 12:29-31) Noohe coyinni kassi yite heeꞌratto gede kaaꞌlahera ganyite huucciꞌri. (1 Xim. 6:7, 8) Angate anje dandiine saꞌnanni gara afate borruwanke xiinxalli. Miinju qarra dandiine saꞌnanni gara kultannoti jw.org aana noo borruwanna viidiyubba lowo manna kaaꞌlitino. w25.03 28-29 guf. 10-11

Barcintinokkiri dagate wido ikkitinori Maganu manni wido ikkitanno yanna gambissino. Soqqamaasinchu Pheexiroosi dagate wido ikkinohura Qornelewoosira sabbakanno gede kulloonnisi; Qornelewoosi umo Kiristaana ikkituri giddo mittoho. Ayihude Dagate wido ikkino manni ledo horo xaadooshshe diafidhino; hakko daafira Pheexiroosi uyinoonnisi loosira qixxaawanno gede kaaꞌlo hasiissinositi dihuluullissannote. Pheexiroosi hatte hajo daafira Maganu fajjo maatiro wodanchiti hedosi biddi assiꞌrino. Hakko daafira isi sonkisita ‘mittoreno xiixamikkinni’ haꞌrino. (Soq. 10:28, 29) Isi Qornelewoosiranna minisi mannira sabbakino; hakkiinni insa cuuantino. (Soq. 10:21-23, 34, 35, 44-48) Lowo diri gedensaanni Pheexiroosi ammanate roduuwasi “mimmitiꞌne ledo sumuu yitine heedhe” yee amaalino. (1 Phe. 3:8) Yihowa manna ikkinoommo daafira Qaalisi giddo kulloonnita Yihowa hedo xiinxalline ammanate roduuwinke ledo mitte hedore ikka dandiineemmo. w25.03 9-10 guf. 7-8

Mannu hedo albinni roore Yihowa hedo ledo sumuu yitannokkita ikkitanni no. (Law. 17:15) Hakko daafira gibbannonkeri ninke hexxo mudhineemmo gede assate woy halaalu doogonni fulleemmo gede assate horoonsidhanno totao bande afanna giwa hasiissannonke. Soqqamaasinchu Phaawuloosi Ibiraawootu Kiristaani woꞌma ikkino rosiwa saꞌꞌanno gede amaalino amaale ninkeno seekkine haꞌrunsa hasiissannonke. Tenne assate, halaale seekkine xiinxallanna Yihowa hedo afa hasiissannonke. Heeshshonke Yihowara sayinse uyinummohunna cuuammummohu gedensaannino tenne assa diagurreemmo. Halaalu mine keeshshinoommo diri ikki geeshshihano ikkiro, ninke baalunku Maganu Qaale ganyine nabbawanna xiinxalla hasiissannonke. (Far. 1:2) Hojju xiinxallo assiꞌrate rosichi Phaawuloosi Ibiraawootu Kiristaanira borreessino sokkara luphi asse xawisino akata yaano ammana kaajjishiꞌneemmo gede kaaꞌlannonke.—Ibi. 11:1, 6. w24.09 10 guf. 7-8

Yihowa xawe leellinkero isira ammanamme heeꞌra qarra diꞌꞌikkitannonke. Yooseefi xagge tini halaale ikkase leellishshanno. Isi foorre tiyyiꞌre giwino. Isira Maganu xawe leellinosi hattono iso dadillisa dihasiꞌrino. (Kal. 39:9) Yihowa xawe leellannonke gede huuccatto assiꞌratenna Qaalesi xiinxallate yanna gaaꞌma hasiissannonke. Konni garinni isi ledo noonke jaaloomi kaajjanno. Yooseefi gede Yihowa ledo danchu jaaloomi heeꞌrinkero Iso dadillisannoha aye coyeno assa dihasiꞌneemmo. Yihowa heeshshote Magano ikkinota deꞌannori isiwiinni xeertidhanno. Hanni Israeele halalla noo yannara ikkinore laꞌno. Insa Yihowa nooha ikkinota affino; kayinni insa towaatannonsata huluullama hanaffino. (Ful. 17:2, 7) Hakkunni gedensaanni Maganoho finqiltino. Insaha busha lawishsha haꞌrunsa hasiꞌneemmokkiti egennantinote.—Ibi. 3:12. w24.06 24 guf. 14-15

Heeꞌnoommohu goofimarchu barraati; hakko daafira, wiꞌlineemmo gede assannori lexxanni haꞌrannota anfoommo. Yihowa hindiiddonke laꞌꞌanno hattono lowo geya mararannonke. Isi hindiiddonke dihawanno. Hakko daafira buutote qarri amadannonke woyite, huuccattotenni giddonketa Yihowara hasaapha hasiꞌneemmoti egennantinote. Ammanate roduuwinkewa gambo gimboonke. Qoleno Qullaawu Maxaafi giddo noote jawaachishshanno hedonni shesho afiꞌra agurroonke. Kaajjine uurrinummoro Yihowa baꞌraasannonketa addaxxa dandiineemmo. Isi baꞌraasannonke doogga giddo gama, dadillunni kainohunni, kaandoonninke daafiranna hexxo mudhinoommo daafira hindiidiꞌnoommo hindiiddo baala feyanno yanna daggannota kule uyino hexxooti. (Aju. 21:4) Hatte yannara wiꞌlineemmohu hagiidhinoommo daafira callaati. w24.12 20 guf. 3; 25 guf. 19

Yihowa Farciꞌraasinesi asse shoominonke; hattono worbuulle ikkineemmo gede kaaꞌlannonketa kule qaale eino. (Isa. 43:10, 11) Hanni isi ninke kaaꞌlannota shoole doogga laꞌno. Umihunni, dancha duduwo dudumbeemmo woyite woꞌmanka woyite Yesuusi ledonke heeꞌranno. (Mat. 28:18-20) Layinkihunni, Yihowa kaaꞌlitannonke gede sokkaasine shoomino. (Aju. 14:6) Sayikkihunni, Yihowa ronsoommore qaangeemmo gede kaaꞌlannonkeha qullaawa ayyaanasi aannonke. (Yoh. 14:25, 26) Shoolkihunni, Yihowa ledonke soqqantannore ammanate roduuwanke uyinonke. Yihowanna ammanate roduuwinke kaaꞌlitannonke daafira worbimmatenni soqqanshonke umo fushsha dandiineemmo. Soqqamatto woyite manna mine hoogge hexxo mudhatto woyite, ateneeto togo yite xaꞌmi: ‘Soqqanshote qoqqowiꞌyara heeꞌranno manni xa mama nookka?’ (Soq. 16:13) ‘Loosoho haꞌrinonso dikko haꞌrinokka?’ Hatto ikkiro, rooru manninni xaadate doogote sabbaka dandaatto? w24.04 17 guf. 10-11

Mine kalaqiꞌroottohanna songote cimeessa ikka hasiꞌrattoha ikkiro, maatekki wolootaho dancha lawishsha ikkitannore ikka hasiissannonsa. Hakko daafira ‘minikki manna seekkite gashsha dandaattoha’ ikka hasiissannohe. Maatekki baxillunni towaatanna insara kaaꞌlannore assa hasiissannohe yaate. Tenne assate albisa ikkite maatekki ayyaanaamittete coye assitanno gede kaaꞌla hasiissannohe. Ooso iloottoha ikkiro, ‘oosokki kawajjaamma ikkitanno’ gede assiꞌra hasiissannohe. (1 Xi. 3:4) Insa baxillunni rosiisanna qajeelsa hasiissannohe. Wole oosonte gede insano hagiirraamma ikkanna godoꞌla baxxannoti egennantinote. Kayinni dancha gede qajeelsittonsaro insa hajajantannore, manna ayirrissannorenna danchu amanyooti noonsare ikka dandiitanno. Qoleno oosokki Yihowa ledo dancha jaalooma kalaqidhanno gede, Qullaawu Maxaafihu xintu seeri garinni heedhanno gedenna ayyaanaamittetenni lophite cuuantanno gede kaaꞌlate dandiittore baala assa hasiissannohe. w24.11 22 guf. 10-11

Soqqanshonke halashshiꞌnummo kiiro albinni roore Yihowa kaaꞌlannonketa huwanteemmo; tini qolte albinni roore iso addaxxineemmo gede kaaꞌlitannonke. (1 Qor. 3:9) Ikkirono Yihowa ati assattore wolootu assitannori ledo heewisiisannokkita qaagi; isi wodana laꞌꞌanno. Isi, uyinohete muxxe eltora yaano wodote galatu nooheta leellishshanna laꞌꞌanno woyite hagiidhanno. (1 Sam. 16:7; Maq. 12:41-44) Cubbinkera maaro afiꞌnoommohu, Yihowa ledo jaalooma kalaqiꞌnoommohunna hegere heeshsho hexxo afiꞌnoommohu wodo baantoonninke daafira callaati. Yihowa konne atoote afiꞌneemmo faro fane leellishinonke baxillira woꞌmanka woyite galatu noonketa leellinsho. (1 Yoh. 4:19) Qoleno heeshshosi ninkera sayise aa geeshsha lubbora baxinonkeha Yesuusa galanteemmota leellinsho!—Yoh. 15:13. w25.01 31 guf. 16-18

Hanni Faarso 73te borreessaanchira mayi macciishshaminosiro hedi. Isi Yihowara soqqantannokkiri dhiwantannokkita hattono qawaaxxaamenna qarru nookki heeshsho heedhannota laino. (Far. 73:3-5, 12) Isi insa qawaaxxidhe heedhannota laiti Yihowara soqqamate assinori waaga afiꞌrinokkihu gede asse hedino. Iso tini gara ikkitinokki hedo ‘barra woꞌma shetissinosi.’ (Far. 73:13, 14) Isi tenne gara ikkitinokki hedo qeeꞌlinohu hiittoonniiti? Faarsaanchu keere afiꞌnanniwa Yihowaha qullaawa mine haꞌrino. (Fa. 73:16-18) Hakkiicho isi garunni heda dandaanno. Isi mitu manni heeꞌranno heeshsho qawaaxxaame labburono insara albillittete hexxo noonsakkita huwatino. Isi tenne huwatino daafira ayyaanaamittete coye balaxisiisa, baalanka rooranno doorsha ikkitinota wodanchino; tini qolte giddoyidi keere afiꞌranno gede assitinosi. Hakko daafira isi Yihowara soqqamanni heeꞌrate murciꞌrino.—Far. 73:23-28. w24.10 27 guf. 11-12

Yihowa ‘naqaashshesi’ asse doorinonke. (Isa. 43:10-12) Boodu diri albaanni Aliidi Bisi soyinoti mitte sokka togo yitanno: “Yihowa Farciꞌraasine yaamame woshshama ninkera lowo ayirrinyeeti.” Hatto yineemmohu mayiraati? Hanni mitto lawishsha laꞌno. Yoote mine naqaashshe ikkannohe manchi hasiisihero egennoottohanna ammanattoha hattono wolootuno ammantanno mancho doodhatto. Yihowa ninke Farciꞌraasinesi asse doodhasi, seekke afinonketanna halaalaanchu Magani iso calla ikkinota wolootaho farciꞌneemmota addaxxannonketa leellishshanno. Isi farciꞌraasine ikka ninkera lowo ayirrinyeeti; hakko daafira afiꞌnummo faro baala horoonsiꞌne mannu suꞌmasi afanno gedenna isi daafira kullannihu batinyu coyi kapho ikkinoti leeltanno gede assineemmo. Kuri coyibba assine Yihowa Farciꞌraasine ikkanke leellishanno garinni heeꞌneemmo!—Rom. 10:13-15. w24.05 18 guf. 13

Yesuusi wolootaho soqqame lowo hagiirre afiꞌrino. Mitte yannara Yesuusi lowo mannira soqqami woyite rosiise calla diagurino. Isi maalaamittete hasiisannonsare asseno towaatinonsa. Isi maalaletenni sagale qixxeesse rosaanosi tuqissanno gede assino. (Maq. 6:41) Tenne asse rosaanosi wolootaho soqqantanno gara rosiisinonsa. Qoleno isi songote soqqamaano loossanno loosi hasiisannoha ikkinota leellishino. Hanni soqqamaasine ‘baalunku manni ite duuwa’ geeshsha Yesuusi ledo sagale tuqisate looso loosse hagiidhitino gara hedi! (Maq. 6:42) Hige Yesuusi umisi qiniite agure mannu hasatto balaxisiisino yanna tenne calla diꞌꞌikkitino. Isi uullate aana heeꞌrino yanna baalate mannaho soqqamino. (Mat. 4:23) Yesuusi manna rosiisenna shaqqillunni hasiisannonsare wonshe hagiirrenna harshammo afiꞌrino. w24.11 16 guf. 10-11

‘Goofimarchu barri’ ikkito roore bushshanni hadhanno woyite, albinni roore ammanate roduuwanke kaaꞌlineemmo faro afiꞌneemmoti dihuluullissannote. Qoleno insa sheshifachishanna banxeemmonsata leellisha dandiineemmo. Tenne assa dandiineemmoti mitte doogo gambooshshe dagganno woyite hasaawisatenna sheshifachishate. Hakko daafira ammanate roduuwinke gambooshshe dagganno woyite, insa jawaachishatenna banxeemmonsata leellishate dandiinummore baala assa hasiꞌneemmo. Songote cimeeyye, ammanate roduuwinsara addi addi qarri iillannonsa woyite golo ikka dandiitanno. Kalaqamu dano iillitanno woyite woy hedeweelchu dhibbi amadannonsa woyite songote cimeeyye ammanate roduuwansa kaaꞌlate coye bayichonko qineessitanno. Ayyaanaamittetennino kaaꞌlitannonsa. Mittu songote cimeessi shaqqillunni coyiꞌrannoha, mararannohanna hasaaphinanni woyite macciishshannoha ikkiro roduuwu isiwa shiqqe kaaꞌlo xaꞌmiꞌra qarra diꞌꞌikkitannonsa. Togoo akatta roduuwu banxanninsata affanno gede assitanno; tini qolte uyinanninsata Qullaawu Maxaafi aana xintantino amaale haꞌrunsa shota ikkitannonsa gede kaaꞌlitanno.—1 Tes. 2:7, 8, 11. w24.06 29 guf. 12-13

Maganu woꞌmanka dandaannoha ikkino daafira calla didadillannoho yine heda dihasiissannonke! Ninke kalaqammoommohu isi daninniiti; konnira dadillano hagiidhano dandiineemmo; hakko daafira Yihowa hagiidhano dadillano dandaanno yee heda garaho. Qullaawu Maxaafi Yihowa Israeele hajajama gibbusita ‘dadillinotanna aaraawinota’ kulanno. (Far. 78:40, 41) Yihowa maganiweelu manni Beettosi beebba assiꞌre shaanna lai woyite lowo geeshsha xissiisiꞌrinoti egennantinote! Wodo Yihowa geeshsha baxannonkehu nookkita leellishshanno; muli fiixinke woy muxxe jaalinke nafa Yihowa geeshsha baxankera didandaanno. (Rom. 8:32, 38, 39) Yihowa ninke umonke banxeemmohunni roorse baxannonketi dihuluullissannote. Hegerera heeꞌra hasiꞌratto? Ati hasiꞌrattohunni roore Yihowa hegerera heeꞌrattora hasiꞌranno. Cubbokki gatona yinahera hasiꞌratto? Yihowa ati hasiꞌrattohunni roore cubbokki gatona yaa hasiꞌranno. Isi, ammana noonketa leellinshenna hajajamme isi aanno elto afiꞌnammora hasiꞌranno. Wodo Yihowa lowo geeshsha baxannonketa leellishshannote muxxe eltooti.—Ros. 3:11. w25.01 22-23 guf. 8-9

Hige ninke baalunku laꞌneemmorenna macciishshineemmore kaima assiꞌne doodhineemmohu mitu doorshi heeꞌrara dandaanno. Ikkollana mito woyite laꞌneemmorinna macciishshineemmori dogankera dandaanno. Kuni ikka hoogiro nafa, laꞌꞌatenni calla qaanfeemmoha ikkiro, Maganu fajjo woy amaale lashshi assinammora dandiineemmo. (Ros. 11:9; Mat. 24:37-39) Ammanatenni qaanfeemmoha ikkiro kayinni, roore ‘Mooticha hagiirsiisanno’ doorsha doodhineemmo. Maganu aanno amaale haꞌrunsa giddoyidi keerenna addu hagiirre afiꞌneemmo gede assitannonke. (Far. 16:8, 9; Isa. 48:17, 18) Qoleno woꞌmanka woyite ammanatenni qaanfeemmoha ikkiro, albillitte hegere heeshsho afiꞌneemmo. (2 Qo. 4:18) Ammanatenni woy laꞌꞌatenni qaanfanni heeꞌneemmoronna teꞌee afa dandiineemmohu hiittoonniiti? Ninkeneeto togo yine xaꞌma dandiineemmo: Mitto doorsha doodheemmohu maa laeeti? Laeemmo coye calla kaima assiꞌreetinso Yihowa amaale haꞌrunseeti? w25.03 20-21 guf. 3-4

Ninke mittu mittunkura ayyaanaamittete gannate laꞌꞌate baxissannota assate qoosso noonke. Tenne assa dandiineemmohu Yihowa lawishsha harunsineemmoha ikkirooti. Isi mannu dirijjitesiwa daanno gede digiddeessanno. Hatteentenni isi mannu dirijjitesiwa ‘daanno gede’ assannohu shaqqillunniiti. (Yoh. 6:44; Erm. 31:3) Suwashshu wodani noonsa manni Yihowa baxillinna dhagge ikkitanno akattasi daafira rosanno woyite isiwa daa hasiꞌranno. Danchu akatinkenninna amanyootinkenni mannu ayyaanaamittete gannatewa daanno gede assa dandiineemmohu hiittoonniiti? Mitte doogo ammanate roduuwinkera baxillenna danchumma leellishate. Mite yee gambooshshenke daanno manni hundi waro Qorontoosi noo songo haꞌrino manni yiinota yaara hasiꞌneemmo. Kuni manni “Halaalinta Maganu kiꞌne ledo no” yiino. (1 Qor. 14:24, 25; Zak. 8:23) Hakko daafira techohu barru qummeeshshira amaalloonninke amaale woꞌmanka woyite haꞌrunsa hasiissannonke. w24.04 23-24 guf. 16-17