Maaja

Mite Yihowa soqqamaano dhibbu, geedhimma woy bisu xeꞌne waaddannonsa. Tini, ditidhinoommoreeti yite heddanno gede assitansara dandiitanno. Insa ‘Yihowa xaano ane horoonsiꞌrannoe?’ yite insaneeto xaꞌmitannoha ikkara dandaanno. Faarso 71te borreessaanchono togoo hedo yaachishshinosi. Isi “Wolqa gooffannoe waro agurtootie” yee huucciꞌrino. (Far. 71:9, 18) Ikkirono faarsaanchu Yihowara ammaname soqqamiro Yihowa massagannositanna kaaꞌlannosita addaxxino. Faarsaanchu dhuku anje noonsari Yihowara soqqamate dandiiture baala assitannoha ikkiro isi insanni hagiidhannota huwatino. (Far. 37:23-25) Geerra roduuwa, kiꞌneneeto Yihowa laꞌꞌannoꞌne garinni laꞌe. Dhuku anje waaddannoꞌneha ikkiro nafa Yihowa ayyaanaamittetenni lattinanni gede kaaꞌlannoꞌne. (Far. 92:12-15) Assa dandiitinannikkire ikkikkinni assa dandiitinannire illachishshe. w24.10 28 guf. 14-16

Ayyaanaamittetenni gikki yiinokki Kiristaani, Qullaawu Maxaafiha xintu seera harunse doodha hasiissannonsari tuncu yaannonsa woyite, duucha woyite hatto assa qarra ikkitannonsa. Konne assi konne assitooti yaannohu Qullaawu Maxaafi seeri heeꞌrannokki woyite mitootu hasidhure assa dandiitannoha lawannonsa. Wolootu kayinni seeru hasiisannokki coyira seera hasidhara dandiitanno. Lawishshaho, Qorontoosi heeꞌranno Kiristaani kaphu magannara kakkalloonni sagale ita dandaannoronna teꞌee kulanno seeri nooro soqqamaasincho Phaawuloosi xaꞌminoha ikkara dandaanno. Phaawuloosi insa maa assitannoro kulantenni, mittu mittunku Kiristaanchi tiiꞌꞌisi yaannore macciishshe doodha dandaannota ammanino. Isi mittu mittunku Kiristaanchi tiiasi xursiisannokkihanna woloota gawajjannokkiha dancha doorsha doodhanno gede kaaꞌlannonsaha xintu seera kulinonsa. (1 Qor. 8:7-9) Phaawuloosi Qorontoosi heeꞌranno Kiristaani wolu manni shombinni foolantenni woy seera calla hasiꞌrantenni Qullaawa Borro horoonsiꞌre uminsa doorsha doodhanno gede rosiisinonsa; konni garinni isi insa ayyaanaamittetenni gikki yitanno gede kaaꞌlate sharramino. w24.04 5 guf. 14

Yoonaasi yannara heeꞌrinohu Nennewete manni maaro eanno faro afiꞌrino. Qoleno Yesuusi ‘yoote kao’ daafira mayinoro qaagge. Reyotenni kaꞌeenna yoo yinanninsa manni giddo gamu ‘busha looso loossinoreeti.’ (Yoh. 5:29) Hakko daafira Soddoomahonna Gomooraho heeꞌranno mannirano kaote hexxo noonsaha ikkara dandaanno. Insa giddo mitu reyotenni kaꞌannoha ikkara dandaanno; hattono insara Yihowanna Yesuusi daafira rosiisate faro afiꞌneemmoha ikkara dandaanno. Yihowa woꞌmanka woyite ‘mannu wodananna hedo baala fonqole laꞌꞌanno.’ Isi albillitte hiittoo manna reyotenni kayisannoro muranno woyite, mittu mittunku manchira ‘loosisita aanno.’ Yihowa hasiisanno woyite kaajjado yoo yaannoha ikkirono, maara hasiisannosi woyite kayinni maaranno. Hakko daafira buunxummokkinni mittu manchira kaote hexxo dinosi yine heda dihasiissannonke! w24.05 5-6 guf. 15-16

Hundi yannara heedhinori Maganu soqqamaanora uyinoonninsa looso umo fushsha qarra ikkitunsa yannara, Maganu Qaali giddo noo sokka jawaante ikkitinonsa. Hanni masaalaanchu Ermiyaasi lawishsha laꞌno. Isi Yihowa sabbakanno gede kulisita hobbi ruxxi yiino. Ermiyaasi, “Ani shiima beetto ikkoommo daafira coyiꞌnanni gara diegennoommo” yiino. (Erm. 1:6) Isi waajja qeeꞌlinohu hiittoonniiti? Maganu Qaalinni jawaante afiꞌrino. Isi togo yiino: “Sokkakki giddoꞌya giirate gede bubbanno. Anino sammi yee diafeemmo.” (Erm. 20:8, 9) Ermiyaasi sabbakanno qoqqowira noo manni macciishshannokkiha ikkirono, isi sabbakanno gede kulloonnisi sokka uyinoonnisi looso loosate jawaante ikkitinosi. Kiristaanu Maganu Qaali giddo noo sokkanni jawaante afiꞌranno. Soqqamaasinchu Phaawuloosi halaalu egenno afiꞌra ammanate roduuwisi Yihowara ‘maltino heeshsho heedhanno gedenna, baalunku coyinni dancha guma laaltanno gede’ kaaꞌlitannonsata coyiꞌrino.—Qol. 1:9, 10. w24.04 14-15 guf. 2-4

Kakkalaanote Biili Abiyaataari zuufaane adhate hedinohu Daawiti beetti Adooniyaasira halama doodhirono, Saadooqi Yihowara ammaname heeꞌrino. Daawiti Saadooqi ammanaminoha ikkasi horo dihuluullamino. Adooniyaasi ganino gano xawo fultuta, Daawiti Selemooni Moote assite buurtanno gede Saadooqi, Naataaninna Beenaya doorino. (1 Mot. 1:32-34) Yihowara ammanante soqqantinorinna Daawiti gashshootira halantinori Naataaninna wolootu lawishshi Saadooqi jawaachishinositi dihuluullissannote. Selemooni moote ikkiti, ‘Abiyaataari darga, kakkalaancho Saadooqi wori.’ (1 Mot. 2:35) Saadooqi lawishsha harunsa dandaattohu hiittoonniiti? Muli jaalikki halaalu mininni agure fulanno woyite, Yihowara ammanamoottoha ikkakki leellishi. (Iya. 24:15) Yihowa hasiissannohe jawaante aannohe; qoleno worba ikkatto gede kaaꞌlannohe. Huuccatto assidhe hattono isira ammanante soqqantino roduuwiwa aante Yihowa addaxxi. Yihowa isira ammanamakki naadanno hattono baꞌraasannohe.—2 Sam. 22:26. w24.07 6-7 guf. 16-17

Faarso 15:2te Maganu jaali ‘suwashsho doogo haꞌrannotanna halaale loosannota’ kulloonni. ‘Haꞌranna loosa’ yaanno qaali mitto coye agurrikkinni assinannita leellishannoho. Ikkina addinta ‘suwashsho doogo haꞌra’ dandiineemmo? Ee. Guuta ikkino manchi dino; kayinni Yihowa isira hajajamate dandiinummore baala assineemmoha ikkiro, ‘suwashsho doogo haꞌnanni’ heeꞌnoommohu gede asse laꞌꞌanno. Heeshshonke Maganoho sayinse uyinummonna cuuammummo yannara isi ledo haꞌra hananfoommo. Hundi waro, mittu manchi Israeelicha ikkino daafira calla Yihowa dunkaani giddo wosincho ikkanno yaa ikkinokkita wodanche. Mitu manni suꞌmasi woshshinoha ikkirono, “halaalunninna keeraanchimmatenni” diheeꞌrino. (Isa. 48:1) Addinta Yihowa hasiꞌrannohu Israeelete manni isi biddishsha rosanna harunsa hasiissannonsa. Hatteente gede xaa yannarano Magano hagiirsiisate cuuamatenninna Kiristaanu songo miila ikkatenni sainore assa hasiissannonke. ‘Halaale loosa’ hasiissannonke. w24.06 9 guf. 4; 10 guf. 6

Yihowa shaqqille leellishannonketi mite doogga hiikkuriiti? Hanni mito lawishsha laꞌno. Yihowa maalaamittete coye aannonke. Heeꞌneemmo heeshsho woꞌmanka woyite qawaaxxaame ikka hooggara dandiitanno; kayinni Yihowa galatamona ninke giddo rooreho heeshshote hasiisannori noonke. Lawishshaho isi sagale, uddanonna galleemmowa afiꞌra dandiineemmo gede assanno. (Far. 4:8; Mat. 6:31-33; 1 Xim. 6:6-8) Yihowa maalaamittete hasiisannonkere aannonkehu hatto assa hasiissannosi daafira calla diꞌꞌikkino. Hanni Yesuusi Maatewoosi 6:25, 26 yiinore laꞌno. Yesuusi ceate daafira kulanni togo yiino: “Insa wixa diwixidhanno, dimixxitanno, woy gootaaraho diduuꞌnitanno.” Ikkirono isi hakkiinni aane, “Iimi Anniꞌne itisannonsa” yiinota wodanche. Hakkiinni Yesuusi “Ikkina kiꞌne cea diroortinanni?” yee xaꞌmino. Maa ronseemmo? Yihowa saadate hasiisannonsare ee towaatannonsaha ikkiro, ninkeno towaatannonketa addaxxa dandiineemmo! Mittu baxillaanchu anni gede, Yihowa maatesi baxillunni towaatanno.—Far. 145:16; Mat. 6:32. w24.09 26-27 guf. 4-6

Songote soqqamaanchi, songote giddo lowo geeshsha hasiisanno looso loose songote cimeeyye kaaꞌlannoho qullaawu ayyaaninni shoommoonniho cuuamino rodooti. Ikkirono, songote soqqamaano wolu baalunkunni roore ayyaanaamittetenni gikki yitinore ikka hasiissannonsa; insa Yihowa baxxanno hattono isihu keeraanchu seeri garinni heedhanno. Qoleno ammanate roduuwansa lowo geeshsha baxxanno. (Mat. 22:37-39) Cuuantinori labballu roduuwi songote soqqamaano ikkate sharrama dandiitannohu hiittoonniiti? Qullaawu Maxaafi, songote soqqamaano ikkite shoomantannori wonsha hasiissannonsa guunte tittire kulanno. (1 Xim. 3:8-10, 12) Kuri Qullaawa Borro guunte daafira xiinxallitenna tenne guunte wonshate diinaggaabbe loosse tenne qoosso afiꞌra dandaatto. Kayinni balaxxe, songote soqqamaancho ikkate sharramattohu mayiraatiro seekkite heda hasiissannohe. w24.11 15 guf. 4-5

Mitu manni ‘Qullaawa Maxaafa duucha hinge nabbamboommo’ yaanno. Kayinni kuni manni Qullaawu Maxaafi yaannore addinta ammananno? Insa Qullaawu Maxaafi rosiisanno garinni heedhanno? Woy heeshshonsa biddi assiꞌranno? Hige ma assinayi, rooru manni Qullaawu Maxaafi amaale diharunsanno. Yihowa magansiꞌranno manni kayinni hattooha diꞌꞌikkino! Maganu Qaali heeshshonke giddo loosanno gede assiꞌrate sharrammeemmo. Hige Maganu Qaale nabbawanna loosu aana hosiisa shota ikkitannonkekki woyiti no. Qullaawa Maxaafa nabbawate yanna afiꞌra qarra ikkitankera dandiitanno. Woy muddammanni nabbambeemmohanna nabbamboommore gari geeshsha huwanteemmokkiha ikkara dandaanno. Qoleno biddi assiꞌra hasiissannonkeri lowori noota huwanteemmo daafira hexxo mudhinammora dandiineemmo. Qarrinke ikkihano ikkiro hatto assa kayi dandiinannikkire diꞌꞌikkitino. Yihowa kaaꞌlonni qarra ikkinonkere qeela dandiineemmo. Konnira Qaale assineemmore ikkate murciꞌno. Addanko Maganu Qaale nabbambummonna loosu aana hosiinsummo kiiro albinni roore hagiirraamma ikkineemmo.—Yai. 1:25. w24.09 7 guf. 15-16

Yihowa lowo geeshsha dadilline xissiisiꞌneemmo woyite qullaawu ayyaanisi widoonni sheshifachishannonke. Aterano buutote qarri iillanni nooheha ikkiro, duucha higge hasiꞌrootto yanna geeshsha giddokkita gudisse kulte Yihowa huucciꞌra dandaatto. (Far. 86:3; 88:1) Yihowa qullaawa ayyaanasi aannohe gede marro marro higge huucciꞌri. Isi horonta huuccattokki lashshi diassanno. Iillinohehu buutote qarri horo wolqa baꞌꞌatto gede assinohe? Qullaawu ayyaani Yihowara ammanante soqqama agurattokki gede jawaante ikkannohe. (Efe. 3:16) Yihowa qullaawa ayyaanasi aannohe gede huuccatto assiꞌrittohu gedensaanni ma assa hasiissannohe? Maganu ayyaana ledde afiꞌrate kaaꞌlannohere assi. Kuri giddo gamu gambooshshe haꞌratenna wolootaho dancha duduwo duduwate. Qullaawa Maxaafa barru baala nabbawi; tini Yihowa hedo maatiro hiincatto gede kaaꞌlitannohe. (Fil. 4:8, 9) Qullaawa Maxaafa nabbawatto woyite, qarru iillinonsa manni lawishsha borreessite amaxxi; hattono Yihowa dandiite saꞌanno gede kaaꞌlinonsa gara hiinci. w24.10 9 guf. 12-14

Yihowanna Beettisinte gede manna banxeemmo. (Law. 8:31) ‘Hexxo nookkirenna Magano afidhinokkire’ lowo geeshsha mararreemmo. (Efe. 2:12) Insa lowo qarri amadannonsa daafira, qarrinsara mala ikkannoha Maganu Gashshootiha dancha duduwo kulleemmonsa. Konne manna banxeemmonna mararreemmonsa daafira insara dancha duduwo kulate dandiinummore baala assineemmo. Tini kaajja sokka insara hexxo heedhannonsa gede, xaa yannara hagiirru noo heeshsho heedhanno gedenna haaro alamera “halaalaancho heeshsho” yaano hegere heeshsho hexxo afidhanno gede kaaꞌlitannonsa. (1 Xim. 6:19) Mannaho noonke baxilli tini busha alame baꞌanno yanna gambissinota kulle qorowisiinseemmo gedeno assannonke. (Hiz. 33:7, 8) Insa quuxxote qarri yannara kaphu ammaꞌno baꞌannotanna Armagedooni gedensaanni tini busha alame woꞌmunni woꞌma baꞌannota affara hasiꞌneemmo.—Aju. 16:14, 16; 17:16, 17; 19:11, 19, 20. w24.05 16-17 guf. 8-9

Soqqamaasinchu Phaawuloosi Kiristaanu “darga Maganu hanqira” aguranno gede amaalino. Yihowa taashsho yannasiranna hedino garinni abba geeshsha cincine agadhine, darga isi hanqira agura dandiineemmo. Jooni yinanni rodii miincisihu gedensaanni togo yiino: “Gara ikkinokkire asseemmokki gede hanqo eemadha hasiissinoe; kayinni tini shota diꞌꞌikkitinoe. Roomu Sokka 12:19 Yihowa agadheemmo gede kaaꞌlitinoe.” Coye biddi assa geeshsha Yihowa agadhineemmoha ikkiro horo afiꞌneemmo. Hatto assineemmoha ikkiro, duhu shaalannonke hattono coye uminkenni tirate woꞌnaala abbitanno qarrinni ganteemmo. Yihowa kaaꞌlannonketa kulino. Isi, “Miincannihe woyite, coye ani afeemmona anera aguri” yiinonkehu gedeeti. Yihowa “ani bado qoleemmo” yee eino qaale ammanneemmoha ikkiro, coye isi woyyino garinni taashshannota addaxxine isira agurreemmo. w24.11 6 guf. 14-15

Maalaamittete coye calla illachisha qoropha hasiissannonke. Soqqamaasinchu Phaawuloosi Kiristaanaho borreessinorinni tenne daafira ronseemmo. Isi hunda Israeelete iillinonsare lawishshaho Siina Ilaali mule ikkinore qummi assino. Isi Israeele ‘gawajjanno coye halchituhu gede Kiristaanuno hattoore halchannokki gede’ qorowisiisino. (1 Qor. 10:6, 7, 11) Israeele maalaamittete coye halchansa Yihowa maalaletenni qixxeessinonsa qixxaawo “gawajjanno coye” ikkitannonsa gede assitino. (Kir. 11:4-6, 31-34) Qoleno insa culkunni siitu misile seekkidhu woyite ittino, agino hattono sirbitino. (Ful. 32:4-6) Phaawuloosi 70 M.D. Yerusaalamenna qullaawu mini baꞌꞌara albaanni heeꞌrino Kiristaana qorowisiisate insa xagge kulino. Ninkeno heeꞌnoommohu tenne busha alame goofimarchi gambise noo yannara ikkino daafira, Phaawuloosi amaalino amaale illachisha hasiissannonke. w24.12 6 guf. 13

Yihowa ‘hagiirraamo Maganooti’; ninkeno hagiirraamma ikkinammora hasiꞌranno. (1 Xim. 1:11) Isi hagiidhineemmo gede assitannonketa batinye elto uyinonke. (Yai. 1:17) Kuri elto giddo mitte adhamate. Labbaahunna meyati adhamanno woyite, mimmito baxatenna ayirrisate qaale eanno. Jaaloominsa kaajjado ikkiro insa addu hagiirre afiꞌra dandaanno. Xaa yannara noohu batinyu adhamino manni adhami woyite eino qaale hawanno; tini dadillissannote. Hakko daafira kuni manni hagiirraamma diꞌꞌikkino. Yihowa minaanni minaamasi ma assara hasiꞌranno? Yihowa minaannuwu minaamuwansa ayirrissara hajajino. Minaamasi ayirrisanno minaanni, isera shaqqillenna baxille leellishanno.—1 Ph. 3:7. w25.01 8 guf. 1-2; 9 guf. 4-5

Soqqamaasinchu Phaawuloosi Ibiraawootu Kiristaanira borreessino sokka, umi xibbi diro heeꞌrino Kiristaani iillannonsa qarrira qixxaawanno gede kaaꞌlitinonsati dihuluullissannote. Phaawuloosi ammanate roduuwisi Qullaawa Borro egenno afiꞌrate Maganu Qaale seekkite xiinxallitanno gede amaalinonsa. Tini ammanansa shoshshogishanno roso badde affanno gedenna gibbanno gede kaaꞌlitannonsa. Qoleno Yesuusinna songote giddo albisa ikkite soqqantannori uyitanno biddishsha bayichonkonni harunsate ammanansa kaajjishidhanno gede jawaachishinonsa. Hattono isi Kiristaanu iillannonsa fonqolira gara ikkitino lao heedhannonsa gede assiꞌraranna konne fonqolo baxillaanchu Anninsa Yihowa insa qajeelsara qixxeessino faro gede asse laꞌꞌara jawaachishinonsa. Ninkeno tenne qullaawu ayyaaninni uyinoonni amaale loosu aana hosiinso. Hatto assinummoro goofimarchu geeshsha kaajjine uurra dandiineemmo.—Ibi. 3:14. w24.09 13 guf. 17, 19

Qullaawu Maxaafi kulanno garinni, wodo keereensatenna araara kalaqate baantoonni waagaati. Yihowa wodo qixxeessinohu bainore qolateeti. Ma garinni? Addaaminna Heewani guuta heeshshonna hegerera heeꞌrate faro huꞌninota qaango. Hakko daafira wodo baino coyi ledo taalo waaga afidhinota ikka hasiissannose. (1 Xim. 2:6) Tenne wodo baata dandaannohu (1) guutaho; (2) uullate aana hegerera heeꞌrate faro noosihonna (3) umisi fajjonni heeshshosi ninkera kakkalo asse aate maahoyye yaannoho gikki yiino mancho callaho. Hanni Yesuusi wodote waaga baata dandiinohu mayiraatiro leellishannoha sase korkaata laꞌno. (1) Isi guutaho; “mitto cubbono diloosino.” (1 Phe. 2:22) (2) Hakko daafira isi uullate aana hegerera heeꞌra dandaanno. (3) Isi reyatenna heeshshosi ninke daafira sayise aate maahoyye yiino.—Ibi. 10:9. w25.02 4-5 guf. 11-12

Cuuamattokki gede guficho ikkannohe coyi ikkihano ikkiro Yihowa baxannohetanna maatesi wido ikkattora hasiꞌrannota huluullantooti. Yesuusi umi xibbi diro rosaanosira togo yiino: “Halaale yeemmoꞌnena, lenteetu gumi geeshshi ammana heedhuꞌnero, konne ilaala ‘Kawiinni kaꞌe kaꞌa haꞌri’ yitiniro haꞌranno; dandiitinannikkiri mitturino diheeꞌranno.” (Mat. 17:20) Yesuusi coyiꞌrinore macciishshino manni isi ledo heeꞌra hanafinku boode diro calla ikkino daafira xaara ammanansa hakkeya dikaajjitino. Ikkollana Yesuusi, insa ammanansa kaajjishidhuro Yihowa guficho ikkannonsaha ilaalu geeshshi qarra qeeltanno gede kaaꞌlannonsata buuxisinonsa. Yihowa ateno kaaꞌlannohe! Cuuamattokki gede guficho ikkannohe coyi noota wodanchittoro konne coye qeelate keeshshittokkinni qaafo adhi. Heeshshokki Yihowara sayisse uyite cuuami. Doodhatto doorsha baala rooranno doorshi konneeti! w25.03 7 guf. 18-20

Heeshshote Magani ninkeno kaaꞌlate qixxaawinoha ikkinota qaangeemmoha ikkiro, iillannonke qarra qeelle saꞌꞌa dandiineemmo. Yihowa alba assinore hiincineemmoha ikkiro isi kaaꞌlannonketa albinni roore addaxxa dandiineemmo. (Isa. 37:17, 33-37) Qoleno Yihowa xaa yannara ammanate roduuwanke kaaꞌlanni noo gara leellishshannota jw.org webisayitenkera fultino rippoorte nabbawi woy lai. Hattono Yihowa ate kaaꞌlate qaafo adhino yanna qaagi. Yihowa ate gatisate maalale ikkannore assinoha lawa hoogahera dandaanno; kayinni Yihowa heeshshokki giddo lowo coye assinohe. Yihowa isi ledo jaalooma kalaqiꞌratto gede assinohe. (Yoh. 6:44) Yihowa huuccattokkira dawaro qolinohe gara, kaaꞌlo hasiisse noohe yannara kaaꞌlinohe gara woy qarru giddo heedheenna towaatinohe gara qaagatto gede kaaꞌlahera iso huucciꞌri. Kuri coyibba hiincakki Yihowa albillitteno ate kaaꞌla agurannokkita albinni roore addaxxatto gede assitannohe. w24.06 21 guf. 8

Yihowa dadillisannore assineemmokki gede murciꞌnoommoha ikkara dandaanno. Ikkirono guuntete xeꞌne noonke hattono gara ikkinokkire assa rakkannonke. (Rom. 7:21-23) Hedeweelcho gara ikkinokkire assate fonqolammammora dandiineemmo. Yihowaranna Beettisira ammanamme heeꞌrate, Yesuusi jifamate giddora ea qorophineemmo gede amaalinonke amaale haꞌrunsa hasiissannonke. Ninke baalunkura cubbo loonseemmo gede assanno fonqoli tuncu yaannonke. Ikkirono ninke mittu mittunkura uminke laanfe noonke; hakko daafira fonqolo ikkannonke coyino babbaxxanno. Lawishshaho, mittu manchi fooranno gede assannosi fonqolo qeeꞌlate sharramanni nooha ikkara dandaanno. Wolu qole busha rosicho lawishshaho maasterbeeshiinete gade qeeꞌlate woy teeda baꞌino misilla laꞌꞌa hoogate sharramanni nooha ikkara dandaanno. Wolu manchi qole, manna waajja, naaxxa, hanqoho muddama woy wole coye qeeꞌlate sharramanni nooha ikkara dandaanno. w24.07 14 guf. 3; 15 guf. 5

Hanni addinta maaro eino mancho cimeeyye songo higanno gede fajja gibburo woy higihu gedensaanni songo isira baxille leellisha gibburo mayi ikkara dandaannoro hedi. Kuni manchi ‘dadillunni kainohunni hexxo mudhara’ dandaanno. Isi xaate hexxo dinoe yee hedara dandaanno. Wole agurina Maganu ledo noosi jaalooma haaroonsiꞌrate sharrama agurara dandaanno. Roore busha, songote giddo noo roduuwi cubbo loose maaro eino mancho gatona yaa gibburo insa uminsa Yihowa ledo noonsa jaalooma huꞌnitanno. Mayira? Korkaatuno insa leellishshanni noohu maaranno Magani Yihowa akata ikkikkinni kaajjadunna maaro egenninokkihu Sheexaanu akataati. Konni garinni insa, Daawuloosi konni manchi ayyaanaamitte hunate horoonsiꞌranno uduunnicho ikkitara dandiitanno.—2 Qor. 2:10, 11; Efe. 4:27. w24.08 17 guf. 7, 10-11

Kiristoosi Yesuusi songote wolu garinni soqqantannore ‘elto ikkitino labballo’ uyino. Isi uyino biddishshi garinni, Yerusaalamete heedhanno cimeeyye Phaawuloosinna Barnabaasi aliidi laꞌꞌaano ikkite soqqantara sokkino. (Soq. 11:22) Mayira? Songote soqqamaanonna songote cimeeyye gede insano songo dhaabbanno gedeeti. (Soq. 15:40, 41) Woradu aliidi laꞌꞌaano woꞌmanka woyite bayichunni bayicho hadhanno. Mitu woradu aliidi laꞌꞌaano mitte songonni wole songo iillate lowo kiilomeetire hadhanno. Mittu woradu aliidi laꞌꞌaanchi lamalate kiiro, duucha lallawo shiqishanno, roduuwa towaatanno hattono suwisaanote, songote cimeeyyenna qanchu soqqansho gambooshshe massaganno. Isi duucha lallawo qixxaawanno hattono woradunna qoqqowu gambooshshe qineessanno. Qoleno, suwisaanote rosi mine rosiisanno, hakko woradira assinanniha baxxinoha suwisaanote gambooshshe qineessanno; hattono wole looso lawishshaho sinu biiro uyitannosiha ranke loosa hasiissanno looso loosanno. w24.10 21 guf. 12-13

Yihowa masaalaanchu Ermiyaasira, techohu barru qummeeshshira noo hedo coyiꞌrino. Soqqamaasinchu Phaawuloosi tenne hedo qummi asse coyiꞌranni, ‘Kunni kaꞌa cubbonsa diqaageemmo’ yiino. (Ibi. 8:12) Kayinni hatto yaa mayyaate? Qullaawu Maxaafi giddo, “qaaga” yaanno qaale horoonsiꞌnoonnihu mittu manchi mitto coye qaagannota woy hedannota kulate calla diꞌꞌikkino. Konne qaale mittu manchi qaafo adhannota kulateno horoonsiꞌnoonni. Yesuusi ledo suntoonnihu jaddo loosino manchi, “Yesuusa, Gashshootikkinni daatto woyite qaagie” yiino. (Luq. 23:42, 43) Isi hatte yannara Yesuusa xaꞌmiꞌranni noohu Yesuusi mulla isi daafira hedanno gede diꞌꞌikkino. Yesuusi qolino dawaro isi konne mancho reyotenni kayisate qaafo adhannota leellishshanno. Hakko daafira Yihowa cubbonke qaagannokkita kulasi, loonsoommo cubbira ninke qorichishate qaafo adhannokkita leellishshanno. Isi gatona yiinonke cubbira diqorichishannonke. w25.02 10-11 guf. 14-15

Yihowa akatta, isi assara hedinore hattono isi maa baxannoronna maa giwannoro anfummoro addu wodancha afiꞌneemmo. Ateneeto togo yite xaꞌmi: ‘Yihowa daafira afoommore hendiro, isi hagiidhannohu maa doodhummorooti?’ (Efe. 5:17) Yihowa hagiirsiisate, mito woyite fiixanke woy jaallanke hagiirsiisannokkire assa hasiissannonkeha ikkara dandaanno. Lawishshaho, mitu anninna ama danchare hede beettonsa dureessu manchira woy lowo miine miinannohura assidhanno gede xixxiiwara dandaanno; kayinni kuni manchi ayyaanaamittetenni jawaatinoha ikka hoogara dandaanno. Hige insa beettonsa maalaamittetenni qawaaxxidhara hasiꞌransa nooreentilla; kayinni ise ayyaanaamittetenni ayi towaatannoseyya? Yihowa tenne hajo ma garinni laꞌꞌanno? Maatewoosi 6:33 tennera dawaro qoltanno. Hakkiicho, Kiristaanu ‘balaxe Maganu Gashshoote hasiꞌranno’ gede amaalloonni. Annankenna amanke hattono qooxeessinkera noo manna ayirrinseemmoha ikkirono, qara hasattonke Yihowa hagiirsiisate. w25.01 17 guf. 9-10

Xaa yannara mannu giwannonke woyite, woꞌmanka woyite diinaggaambe sabbakate Yihowa kaaꞌlo hasiissannonke. (Aju. 12:17) Yihowa kaaꞌlannoheta addaxxa dandaattohu mayiraati? Hanni Yohaannisi fooliishsho 17 noota Yesuusi huucciꞌrino huuccatto laꞌno. Yesuusi soqqamaasinesi agaranno gede Yihowa huucciꞌrino; Yihowano tenne huuccattora dawaro qolino. Soqqamaasinete Loosi maxaafi, mannu waadinsarono soqqamaasine diinaggaabbe sabbakkanno gede Yihowa kaaꞌlinonsa gara kulanno. Qoleno Yesuusi, soqqamaasine kultanno sokka ammane adhanno mannano Yihowa agarannonsa gede huuccino. Hakko manni giddo mittu ateeti. Yihowa xaano Yesuusi huuccattora dawaro qola diagurino; isi soqqamaasine kaaꞌlinte gede ateno kaaꞌlannohe. (Yoh. 17:11, 15, 20) Goofimarchu gambise dayi kiiro dancha duduwo diinaggaambe duduwa qarra ikkitannonkeha ikkiro nafa hasiissannonke kaaꞌlo afiꞌra dandiineemmo.—Luq. 21:12-15. w25.03 18 guf. 13-14

Maganu manni lowo geeshsha hagiidhanno daafira, isira ‘hagiirrunni faarsiꞌranno.’ Maganu Qaali giddo noohu jawaachishanno halaalinna isi einohu sheshifachishanno qaali, hattono Kiristoosite wodote kakkalo aana xintantinoti kaajjado hexxonke, ‘wodaninke hagiidhanno’ gede assitanno. Kuri coyi daafira hasaawanke addinta hagiidhineemmo gede assitannonke! (Far. 34:8; 133:1-3) Yihowa manni mereero noo baxillinna mittimma ayyaanaamittete gannate giddo lowo geeshsha hasiisanno coyeeti. Tini, “woꞌma mittimma” haaro alamera heeshsho hiittoota ikkitannoro huwanteemmo gede kaaꞌlitannonke; hakkiicho Yihowa soqqamaano xaa yannanni roore mimmito baxxannorenna mittimma noore ikkitanno. (Qol. 3:14) Addu hagiirrenna harshammo afiꞌra hasiꞌrannohu baalu ayyaanaamittete gannate ea hasiissannosi. Tini alame Yihowa soqqamaano daafira heddannori ikkireno ikkiro, insara Yihowanna iso magansiꞌranno manni albaanni suꞌnaadu suꞌmi noonsa.—Isa. 65:15. w24.04 21 guf. 7-8

Ninke baalunku adhama hasiꞌranno Kiristaana kaaꞌla dandiineemmohu hiittoonniiti? Tenne assa dandiineemmoti mitte doogo coyiꞌneemmore qorophine coyiꞌrate. (Efe. 4:29) Ninkeneeto togo yine xaꞌma dandiineemmo: ‘Adhama hasidhannori ledo busha haariimo haariimeemmo? Mittu rodiinna rodoo hasaawanna laeemmo woyite insa baxaminohu gede asse hedeemmo?’ (1 Xim. 5:13) Qoleno adhaminokki Kiristaani adhaminokki daafira gate bainonsari noohu gede asse hedanno gede assa dihasiissannonke. Adhaminokki Kiristaana galanteemmo faro hasiꞌra lowo geeshsha danchate! Mittu rodiinna mitte rodoo dancha minaannanna minaama ikkanno yine hendeemmohalla ikki? Qullaawu Maxaafi wolootu hedo daafira qorophineemmo gede kulannonke. (Rom. 15:2) Batinyu adhantinokki roduuwi insara galte ikkanno yine hendoonni mancho egensiinsansara dihasidhanno; ninkeno hasattonsa ayirrisa hasiissannonke. (2 Tes. 3:11) Mitu roduuwi kayinni kaaꞌlinansara hasidhannoha ikkara dandaanno; kayinni xaꞌmininkekkinni mereero ea dihasiissannonke.—Law. 3:27. w24.05 24-25 guf. 14-15

Heeꞌnoommo alamera hedeweelchu qarri iillankera dandaanno; isinni mitu qarri heeshshonke woꞌmunni woꞌma soorrara dandaanno. Kayinni Yihowa kaaꞌlannonketa addaxxa dandiineemmo; tini hagiirsiissannote! Yihowa kaaꞌlannonke woyite tini isi ‘heeshshonniha’ ikkinota buunxeemmo gede assitannonke. (Far. 18:46, NW) Ikkirono Daawiti Yihowa heeshshonniho yiihu gedensaanni, “Isi jawu kinchi gedee Goloꞌyaati” yiino. Isi Yihowa heeshsho afiꞌrinokki kinchi ledo heewisiisinohu mayiraati? Qullaawu Maxaafi, Yihowa akatta huwanteemmo gede kaaꞌlate iso ‘jawa kinchooti’ yaanno. Yihowa soqqamaano isi taalle nookki Magano ikkinota kulte galattu woyite iso goꞌlinanni kinchi gede assite xawissino. Umo Yihowa ‘goꞌlinanni kinchi’ gede assine kulloonnihu Marro 32:4. Haanna huuccidhanni “Maganinke gedeehu golu [“jawu gaaꞌlinanni kinchi,” NW] dino” yitino. (1 Sam. 2:2) Imbaaqoomi Yihowa ‘golonke woy gaaꞌlinanni kinchonke ikkoottohu’ yee coyiꞌrino. (Imb. 1:12) Faarso 73 borreessaanchi, ‘Maganiꞌya kayinni wodaniꞌyara jawaantete woy gaaꞌleemmo kinchooti’ yiino. (Far. 73:26) Wole agurina Yihowa umisi isonooto gaaꞌlinanni kinchi gede asse xawisino.—Isa. 44:8. w24.06 26 guf. 1, 3

Yihowa woꞌmu wodaninsanni magansidhinori Israeelete mootoolla iso hagiirsiissino. Qullaawu Maxaafi Iyosiyaasi daafira kulanni, “Woꞌmu wodanisinni . . . Kaaliiqira soqqaminohu Iyosiyaasi gedee moote isira albaannino ikko gedensaanni horontanni dino” yaanno. (2 Mot. 23:25) Geedhimmasi yannara busha coye assinohu Selemoonina? Isi “Kaaliiqira diammanamino.” (1 Mot. 11:4) Qoleno Qullaawu Maxaafi ammanaminokki moote Abiya daafira kulanni, “Coꞌo yiino wodaninni Maganisi Kaaliiqira diammanamino” yaanno. (1 Mot. 15:3) Qullaawu Maxaafi giddo “wodana” yaanno qaali duucha woyite giddiidi ayimmanke woꞌma, yaano hasattonke, hedonke, dooꞌꞌonke, laonke, dandoonke, halchonkenna mixonke kulanno. Ikkina Yihowara woꞌmu wodaninni soqqamate yaa mayyaate? Yihowara woꞌmu wodaninni soqqamanno manchi isira soqqamannohu hatto assa hasiissannosi daafira calla diꞌꞌikkino. Hatteentenni heeshshosi diro woꞌma Yihowara soqqamannohu iso baxannonna ayirrisanno daafiraati. w24.07 21 guf. 4-5

Yihowa cubbonke feye hunanno gara kulate lawishsha horoonsiꞌrino. Isi togo yiino: “Saokki gomichunni, cubbokkino tunsino gomichinni diweemmo.” (Isa. 44:22, NW) Yihowa gatona yaannonke woyite cubbonke tunsino gomichinni diwe horonta leellannokki gede assinohu gedeeti. Konni lawishshinni maa ronseemmo? Yihowa cubbonke gatona yaanno woyite, hakkunni gedensaanni ninkeneeto busha assa dihasiissannonke. Yesuusi Kiristoosi mundeenni asalenke woꞌmunni woꞌma agurroonni. Asalinke horonta borreessine amandoonnikkihu gede ikke baꞌꞌanno. Cubbinkera maaro eꞌnummoro Yihowawiinni afiꞌneemmoti addu maaro tenneeti. Yihowa maaro isi ledo danchu jaaloomi heeꞌrannonke gede assitannonke. Tini maaro quwa saꞌne ninkeneeto bushiinsheemmokki gede kaaꞌlitannonke. w25.02 10 guf. 11-14

Cimeeyyete komitera songo Yihowa albaanni xuru nookkita ikkitanno gede assate qeechi noonsa. (1 Qor. 5:7) Qoleno insa dandiitu deerrinni cubbo loosino manchi maaro eanno gede kaaꞌla hasidhanno. Tenne assate insa, cubbo loosino manchi maaro eanno yite hexxa diagurtanno. Mayira? Korkaatuno insa, ‘sao agurannohunna maaranno’ Magani Yihowa lawishsha harunsa hasidhanno. (Yai. 5:11) Hanni geedhinohu soqqamaasinchu Yohaannisi togoo akata leellishino gara wodanchi. Isi togo yee borreessino: “Oosoꞌya! Cubbo loossinannikki gede konne coye borreessoommoꞌne. Ayino cubbo loosiro kayinni, Maganu Annunniwa ninkera sae coyiꞌramannohu noonke; isino keeraanchu Yesuusa Kiristoosaati.” (1 Yoh. 2:1) Ikkirono mito woyite mitu Kiristaani maaro ea giwanno; tini dadillissannote. Hatto ikkiro, togoo Kiristaana songotenni fushsha hasiissanno. w24.08 25 guf. 19-20

Ati assattore wolootu assitannori ledo heewisiisattoha ikkara dandaanno. Hatto assa qorophi! Mayira? Korkaatuno Yihowa ninke assineemmore wolootu assitannori ledo diheewisiisanno. (Gal. 6:4) Lawishshaho Maariyaami lowo woxita kaajja shitto Yesuusira uyitino. (Yoh. 12:3-5) Mitte buxicho gunnitte kayinni shiima waaga afidhinota lame saante qullaawu minira fushshaate assite uyitino. (Luq. 21:1-4) Ikkirono Yesuusi lamenti mancho assinori ammana noonsata leellishannota coyiꞌrino. Assattori atera shiimare lawiherono Yihowa iso magansiꞌratenna iso baxatto daafira assattoha aye coyeno lowo geeshsha naadanno. Ninke baalunku huluullammeemmo woyiti no. Ikkirono, halaalunnihunna addaxxinannihu Maganu Qaali huluullo qeeꞌlineemmo gede kaaꞌlannonke. Huluullo hooꞌlite ammana kaajjishiꞌri. Yihowa ninke mitto mittonka afinonke. Isira soqqamate assattore naadanno hattono baꞌraasahera qaale eino. Yihowa baalanta ammanantino soqqamaanosi baxanno hattono insa daafira hedanno. w24.10 25 guf. 3; 29 guf. 17-18