GAFA 2
Maganunnire Rosiinsanni Rosi Giddo Halaale Ikkinoha Bada
1, 2. Ammaꞌno keenate kaaꞌlannohu, mannu baalunku sumuu yaanno bikkaanchi hasiisannota leellishanno lawishshi hiikkonneeti?
MAGANO afate maa assa hasiissannonke? Iso afate, batinye ammaꞌno rosiissannoha baalanka roso buuxa hasiissannonke? Hatto assa dandiinannita diꞌꞌikkitino. Dandiinanniha ikkiro nafa, halaalu hiikkonneetiro mayinni anfanni?
2 Maganunnire rosiinsannihu batinyu rosi noo daafira, halaale ikkinoha bandeemmo doogo, yaano mannu baalunku sumuu yaanno bikkaanchi hasiisannonke. Hanni mitto lawishsha laꞌno: Hoccu daddalaanchiranna hidhanno manchira hoccu seendille lainohunni coyi kawanna kaꞌaa higinsa. Daddalaanchu hoccu sase meetire ikkanno yaanno, garafirinohu kayinni hakkeeshsha diꞌꞌikkanno yaanno. Konne coye tirate ma assa hasiissanno? Hocco meetiretenni lakkaꞌꞌa hasiissanno.
3. Qullaawu Maxaafi borreessaminohu mayiraati?
3 Ammaꞌno keenate kaaꞌlitanno meetire, yaano bikkaanchu nooyyani? Ee, Qullaawu Maxaafi no. Maganu, bayicho baalaho noo manni isire halaale afanno gede kaaꞌlate Qullaawu Maxaafi borreessamanno gede assino. Xaa geeshsha lowo biliyoone ikkannohu Qullaawu Maxaafi attamamino. Woꞌmu woyi xeu Qullaawu Maxaafi 2,400 ikkanno afiinni qixxaawino. Konni daafira woꞌmunku manni Qullaawa Maxaafa uminsa afiinni nabbawe Maganunnire halaale afa dandaanno doogo noonsa yaate.
4. Qullaawu Maxaafi maa maa kulannonke?
4 Qullaawu Maxaafi Maganu uyinonkete muxxe eltooti. Kuni maxaafi wole ayee doogonnino afa dandiineemmokkire kulannonke. Lawishshaho, iima heedhannori ayeootiro kulannonke. Maganu hedo, ayimmasinna alaamasi anfeemmo gede kaaꞌlannonke. Hundinni jammare Maganoho mannu ooso ledo hiittoo xaadi noosiro kulannonke. Konni kaꞌa ikkannoreno kulannonke. Qoleno, hegere heeshshowa massitanno doogo anfeemmo gara kulannonke.
Qullaawa Maxaafa Ammanatto Gede Assannoheri Maati?
5. Qullaawu Maxaafi sayinsete ledo sumuu yaannota leellishanno lawishshi hiikkonneeti?
5 Qullaawu Maxaafi Maganu Qaale ikkinota ammanneemmo gede assannonkehu batinyu korkaati no. Mittu korkaati, Qullaawu Maxaafi sayinsete ledo sumuu yaannoha ikkasiiti. Biꞌree waro alame woꞌmate heeꞌranno manni uulla irkise amadinori no yee ammananno. Lawishshaho biꞌree waro Galchimi Afirikira mannu, uulla mittu xaaxamino hamashshi hanqafeenna no, yaano aleenni 3,500 xaaxonna woroonni qole 3,500 xaaxo mereero hanqafante no yee ammananno. Ikkollana, sayinsete ledo sumuu yaanno garinni 3,500 diri albaanni mittu Qullaawu Maxaafi borreessaanchi, Maganu uulla “mullawa rarraasinota” borreessino.—Iyyoobi 26:7.
6. Qullaawu Maxaafi Maganu Qaale ikkinota leellishshannoti qara taje hiitteeti?
6 Qullaawu Maxaafi Maganu Qaale ikkinota leellishshannoti qara taje, albillitte ikkannore mitte mommodda nookkiha kulannoha ikkasiiti. Mannu masaalaano albillitte ikkannore diaffanno, Maganu kayinni seekke afino; qoleno isi coyiꞌrannori baalunku woꞌmanno.
7. Biꞌree waro woꞌmitinoti mite mite Qullaawu Maxaafi masaalo hiitteeti?
7 Biꞌree waro batinye Qullaawu Maxaafi masaalo woꞌmitino. Lawishshaho, Qullaawu Maxaafi Yesuusi Beeteleemete katamira ilamannota 700 diri albaanni masaalino; tini masaalo mittore mommodditukki woꞌmitino. (Mikkiyaasi 5:2; Maatewoosi 2:3-9) Yesuusire kultannota wole batinye masaalono agurranna, Qullaawu Maxaafi Yesuusi seemo beetto widoonni ilamannotanna gedensaanni 30 birru saantera hiramannota masaalino. Tini masaalono woꞌmitino. Addaho, togoori ikkannota balaxe kulanno manchi dino!—Isayyaasi 7:14; Zekkaariyaasi 11:12, 13; Maatewoosi 1:22, 23; 27:3-5.
8. Yannankera woꞌmitanni nooti mite mite Qullaawu Maxaafi masaalo hiitteeti? Tini masaalo woꞌmase maa buuxissanno?
8 Yannankerano batinye Qullaawu Maxaafi masaalo woꞌmitanni no. Hakkuri giddo gama aante noote:
“Daga dagate aana, mangiste mangistete aana [ola kayissanno]; hattono uulla lowo geeshsha huxidhanno, qoleno addi addi bayicho taraawe manna gudanno xibbinna sagalete anje heedhanno.”—Luqaasi 21:10, 11, NW.
‘Bunshe batidhanno.’—Maatewoosi 24:12.
“Goofimarchu barra . . . mannootu umonsa baxxannore, woxe baxxannore, . . . iltinonsarira hajajantannokkire, . . . umonsa qeeꞌlitannokkire, kaajjadda, danchare baxxannokkire, . . . naaxxatenni woꞌmitinore, Maganunni roore qawaaxxo baxxannore ikkitanno.”—2 Ximootewosi 3:1-5, NW.
Kuni baalunku ikkanni nooreeti yiniro sumuu yaattoti dihuluullissannote. Qullaawu Maxaafi masaalo halaalaancho ikkasenna garunni woꞌmase, kuni maxaafi addiha ikkinota leellishshanno. Addaho, kuni maxaafi qullaawa Maganu Qaaleeti!—2 Ximootewosi 3:16.
Qullaawu Maxaafi Soorraminoni?
9, 10. Mannu Qullaawa Maxaafa soorrara Maganu wore agurinokkita leellishannohu maati?
9 Hanni ateneeto mitte dirijjite anna ikkootto gede assite hedi; dirijjitekki giddo loossannori harunsitanno higguwa fushshootto yino. Mittu baarigaarikki borreessootto higge soorriro, ma assatto? Isi soorrino higguwa biddi diassatto? Hatteente gede, Maganu Qaalisi giddo yaano Qullaawu Maxaafi giddo noo halaale mannu ooso soorritara sammi yee diaguranno.
10 Maganu Qaali giddo noo halaale soorrate woꞌnaaltinorira diqinaawinonsa. Yannankera nooha Qullaawa Maxaafa hunda noohu ledo heewisiinse laꞌniro, soorraminori dino. Tini qolte, Qullaawu Maxaafi lowo diro heeꞌrinoha ikkirono soorraminokkita leellishshanno.