Baalanti Ammaꞌno Halaale Rosiissanno?

1. Afirikaho noo ammaꞌno giddo mite mite hiitteeti?

AFIRIKAHO heeꞌrannohu rooriidi manni Magano magansiꞌra hasiissannota ammananno. Ikkollana, ma garinni magansiꞌra hasiissanno yitanno xaꞌmora babbaxxitino hedo noonsa. Mitu manni masgiidaho mare magansiꞌranno, mitu kayinni budu ammaꞌno harunsanno. Wolu qole beetekiristaane haꞌranno. Togo yaa kayinni Afirikaho sase ammaꞌno calla no yaa diꞌꞌikkitino. Isilaamu ammaꞌno giddoseenni babbaxxitino higguwanna ammana amaddinote. Budu ammaꞌno qolte bayichu bayichu garinni babbaxxitanno. Ninke Kiristaanaho yitanno beetekiristaanna isinni roore babbaxxitinote. Afiriku giddo qara qara beetekiristaanna agurranna, umonsa dandiitinori batinye beetekiristaanna no.

Harunsineemmo Ammaꞌno Halaalu Aana Xintantinota Ikka Hasiissannose

2. (a) Roore wote, mittu manchi ammaꞌno harunsannohu hiikkiinni adheeti? (b) Ammaꞌnonke Magano hagiirsiissannota ikkitannohu mayinni diꞌꞌikkino?

² Batinyu manni xa harunsanni noo ammaꞌno harunsa jammarinohu hiittoonniiti? Rooru manni anninsanna amansa ammaꞌno harunsanno. Seedu diri albaanni ikkitino ikkitono, xaa yannara mannu harunsanno ammaꞌnora kaaꞌlo assitino. Mittu maxaafi togo yaanno: “Isilaamu ammaꞌno Saara Barahira aliyyeenni noo gobba tuqqinohu, Isilaamu hattee gobbuwa horrino daafiraati; . . . Kiristinnu ammaꞌno Saara Barahira wodiidoonni noo gobbuwa tuqqinohuno horrunniiti. Isilaamu ammaꞌno Saarara aliyyeenni noo gobbuwa tuqqinohu bisetenniiti, Kiristinnu Saarara wodiidoonni noo gobbuwa tuqinohu kayinni qawwetenniiti.” Ikkeennano, rooru manni harunsineemmo ammaꞌno Magano hagiirsiissannote yaanno. Ikkollana, mitte ammaꞌno annuwanke harunsitinota ikkitino daafira calla, woyi baara widi gobbuwa annuwanke giddeessite harunsitanno gede assitino daafira calla halaalaanchote yaa diꞌꞌikkino.

3-5. Halaale rosiissannoti baalanta ammaꞌno ikkitinokkita huwatate kaaꞌlannonke lawishshi hiikkonneeti?

³ Baalanti ammaꞌno Magano magansiꞌnanni gara lainohunni halaale rosiinseemmo yiturono, hedonsa babbaxxitinote. Maganu ayeti, hattono isi ninke maa assinammora hasiꞌranno yitanno xaꞌmora babbaxxitino dawaro qoltanno. Hanni mitto lawishsha laꞌno: mitte lowo dirijjite giddo looso afiˈrootto gede assite hedi. Umi barra looso loosattora maratto wote dirijjitete halaafichi nookkita kullihe. Konni daafira maa loosa hasiissannohero sase loosaasine xaꞌmitto. Umi loosaasinchi, halaafichu mine feyattora hasiꞌranno yee kulihe. Layinkihu qole, hintsaho qalame gana hasiissannohe yiihe. Sayikkihu kayinni, addi addi dabdaabbe mannaho iillishatto yee kulihe.

⁴ Aantete, halaafichu hiittoohoro xaꞌmitto. Umi loosaasinchi, halaafichu hojjaameessaho, aja beettootinna kaajjadoho yiihe. Layinkihu qole, deeꞌni isi haranchoho, jawa manchootinna shaqqadoho yee qolihe. Sayikkihu kayinni halaafichu dilabbaahona meyaate yiihe. Tenne baala macciishshatto wote, sasunku coyidhinori halaale ikkinokkita afattora dandaatto. Haarote afiˈrootto looso loosa hasiꞌrittoro, dirijjitete halaafichi ayetironna ati ma loosattora hasiꞌrannoro buuxa hasiissannoheti dihuluullissannote.

⁵ Ammaꞌnote coyino hattooti. Maganu ayetironna isi ninke assinammora hasiꞌrannore lainohunni babbaxxitinoti batinye assaawe noo daafira, ammaꞌnonke halaalu ledo sumuu yitannoteronna teꞌee buuxa hasiissannonke. Ikkina Maganunnire rosiinsanni rosi giddo halaale ikkinoha bada dandiineemmohu hiittoonniiti?