Yesuusi Reyotenni Kai

TINI manchonna kuri lamu mannooti ayeootiro afootto? Mancho Megidelu Maariyaamiiti; ise Yesuusi jaalaati. Waajjo uduunne uddidhinori kayinni sokkaanote. Maariyaami giddo qolte laꞌanni noo bale, Yesuusi reeshsha worroonnite. Tenne bale waammate yinanni. Xa kayinni reeshshu hakko dino! Hiikkikka? Hanni laꞌno.

Yesuusi reyihu gedensaanni, kakkalaano Philaaxoosi togo yitu: ‘Yesuusi lubbote noo yannara, sasu barri gedensaanni kaeemmo yiino. Konni daafira rosaanosi reeshsha moorte Yesuusi reyotenni kaino yitannokki gede, waamma agarranni gede hajaji!’ Philaaxoosino waamma agaranno wottaaddara sokkanno gede kakkalaanote kulinsa.

Yesuusi reyihunni sayikki barra soodo, mittu Yihowa sokkaanchi hedeweelcho dayi. Sokkaanchuno waamma tuꞌnoonni kincho gongoꞌmishi. Wottaaddarootuno lowo geeshsha waajjite, noowiinni milli yaa hooggu. Gedensaannino waammate giddora qolte laꞌanno wote, reeshshu dino! Gamu wottaaddarooti katama hadhe kakkalaanote tenne kultu. Hatti busha kakkalaano maa assituro afitto? Wottaaddarootaho kaphphitanno gede woxe uyitunsa. ‘Hashsha ninke gonxe heeꞌneenna rosaanosi dagge, reeshsha moortino yiiyye’ yitunsa.

Hakko mereero, Yesuusi jaalla giddo gamu meenti waammanniwa mari. Insa waammate giddo reeshshu nookkita laꞌuti kawoote lowo geeshsha massino! Hedeweelchono waajjo uduunne uddidhinori lame sokkaano daggu. Insano togo yitunsa: ‘Yesuusa kowiichcho hassinannihu mayiraati? Isi reyotenni kaino. Jawaattine hadhine tenne rosaanosira kulle.’ Meentuno dodanni haꞌri! Ikkollana doogote mittu manchi uurrisinsa. Hakku manchi ayeetiro afootto? Yesuusaati! Isino, ‘Hadhine rosaanoꞌyara kulle’ yiinsa.

Meentuno mare Yesuusi reyotenni kainotanna insa uminsa lainota rosaanote kulita, rosaano ammana gibbu. Pheexiroosinna Yohaannisi illensanni laꞌara waammanniwa doddu; martanno wote waamma fanote! Insa lamunku agurte higguta, Megidelu Maariyaami hakko gattu. Ise waammate giddora laꞌe, lame sokkaano affinohu hakka woteeti.

Yesuusi reeshshi hiikkiro afootto? Reeshshasi Maganu maaxino. Maganu Yesuusa reyotenni kayisinohu reyi wote noosihunni, maalu bisinni diꞌꞌikkino. Maganu isira iimi sokkaanora noohu gedeeha haaro ayyaanu biso uyinosi. Ikkollana Yesuusi reyotenni kainota rosaanosi affanno gede, mannu laꞌꞌannoha maalu biso uddiꞌra dandaanno; aanchine tenne ronseemmo.