Qulfe Gannoonni Minira

PHEEXIROOSINNA Yohaannisi Yesuusi reeshsha madaarroonniwiinni hadhuhu gedensaanni, Maariyaami callase hakko gattu. Iseno wiꞌlitu. Hakkiinnino saꞌu misilera laittonte gede, heeshshi yite waammate giddora laꞌu. Laꞌanno wote waammate giddo lame sokkaano no! Sokkaanono, ‘Mayira wiꞌlitanni nootta?’ yite xaꞌmituse.

Maariyaamino, ‘Mootichchaꞌya fushshite adhitino; hiikko wortinorono diafoomma’ yite qoltu. Hatto yite badheegge caaqqi yitanno wote, mittu manchi no. Manchuno, ‘Aye hasidhanni nootta?’ yee xaꞌmise.

Maariyaami kuni manchi gate agadhe noo mancho lawinose; Yesuusi reeshsha adhinohuno iso lawinose. Konni daafira togo yitusi: ‘Ati haaroottoro, eeggatena woroottowa kulie.’ Kuni manchi kayinni Yesuusaati. Isi Maariyaami affinokki biso uddirino. Maariyaami isi suꞌmase gane woshshiseta kayinni, Yesuusa ikkinota affu. Iseno doddanni marte, ‘Mootichchawe afumma!’ yite rosaanote kultu.

Hakko barra lamu rosaano Eemahusi yinanni qachcha hadhanni heedhe mittu manchinni xaaddu. Insano Yesuusa shinoonni daafira lowo geeshsha dadillite no. Mitteenni hadhanna kuni manchi Qullaawu Maxaafinni jawaachchishannore kulinsa. Gedensaanni kayinni sagale ittara fooliishshidhuti, kuni manchi Yesuusa ikkinota affu. Hakkiinnino Yesuusi maaxaminsa; kuri lamu rosaano kayinni tenne hawaariyaatete kultara galagalte Yerusaalame higgu.

Insa higganni doogote heedheenna, Yesuusi Pheexiroosirano leelli. Wolootu rosaano tenne macciishshite hagiidhitu. Hakkiinnino kuꞌuri lamu rosaano Yerusaalame marte hawaariyaatetenni xaaddu. Insano doogote Yesuusi leellinonsata kultunsa. Tenne kultanni heedheenna mittu xagge ikkanno coyi kalaqami; hakku coyi maatiro afootto?

Teeꞌꞌee misile lai. Saanqaho qulfe ganne heeꞌneennanni Yesuusi minira eꞌꞌe leelli. Rosaanono lowo geeshsha hagiidhitu! Hakko barri addinta hagiirsiisannoha diꞌꞌikkino? Yesuusi konni barrinni rosaanosira meꞌꞌe hige leellinoro kiirte afatto? Onte hige leellinota kiiritto?

Yesuusi rosaanote leelli wote, hawaariyaatichchu Toomaasi insa ledo dino. Konni daafira rosaano, ‘Mootichchawe anfummo!’ yite kultusi. Toomaasi kayinni illeꞌyanni laummokki diammaneemmo yii. Settu barri gedensaanni rosaano xaano qulfe gannoonni mine gamba yitu; hakkawote kayinni Toomaasi ledonsa no. Hedeweelcho Yesuusi minira eꞌꞌe leelli. Toomaasino xa ammani.