A2
Tenne Tiro Amado
Girikete Afiiti Qullaawa Borro Haaro Alame Tiro Ingilizete Afiinni 1950 fultino; qoleno woꞌma Haaro Alame Tiro 1961 attammoonni. Tini tiro Qullaawa Maxaafa umo borreessini woyite sayinsara hasiꞌnoonni sokka garunni sayissanno; qoleno nabbawate injiitannote; hattee yannanni kayise 210 saꞌꞌanno afiinni qixxeessinoonniti tini tiro lowo miliyoone ikkanno manna kaaꞌlitino.
Qullaawu Maxaafi Haaro Alame Tiro Komite, xaa yannara nabbawanno mannira wodanaho coꞌanno tiro qixxeessa hasiissannota huwattino. Tenne mixo wonshate konni woroonni noore heddanni qixxeessitino:
Xaa yannara coyiꞌnannita huwatate qarrissannokki qaalla horoonsiꞌnoonni. Lawishshaho mite tiro ‘faanticha’ yite tirtino qaale xaa mannira leella hoogara dandaanno daafira, tenne tirora ‘borojjicho’ yine tirroonni. (Yohaannisi 13:16; 15:15, 20) “Cagaage” yaannohu bayichono “sansalate” yaanno qaale horoonsiꞌnoonni.—Maarqoosi 5:3.
Qullaawu Maxaafi qaalla xawinsoonni. Wole Qullaawu Maxaafi tirora noota mite qaalla garunni huwata dandiinanni gede lede xawisa hasiissino. Lawishshaho, “Heedisi” yaannoha Girikete qaale Qullaawu Maxaafi giddo mannu ooso baalate waamma kulate horoonsiꞌnoonni. Lowo manni konne qaale hakkeeshshi geeshsha diafino; qoleno “Heedisi” yaanno qaale Girikete maattora wolu garinni horoonsiꞌnanni daafira kuni qaali lame tiro afiꞌrinoho. Hakko daafira, konni qaali bayicho Qullaawu Maxaafi borreessaano sayissara hasidhino sokka garinni “Waamma” yaanno qaale horoonsiꞌnoonni. “Heedisi” yaanno qaale lekkaalliidi qaagishshira worroonni.—Soqqamaasinete Looso 2:27.
Qoleno nefeshi yaannoha Ibiraawootu qaalenna pisihi yaannoha Girikete qaale, “lubbo” yine tirranni keeshshinoonni. Kuri qaalla eo eonsa garinni, (1) mancho, (2) mittu manchi heeshsho, (3) heeshsho afiꞌrino kalaqama, (4) mittu manchi yortonna hasatto, mito woyite isinni, (5) reyino mancho nafa kulate horoonsiꞌnara dandiinanni. Ikkollana xaa yannara “lubbo” yaanno qaale hakko garinni horoonsiꞌnannikki daafira, konne qaale eo eosi garinni addi addi garinni tirroonni. Qoleno duucha bayicho “woy ‘lubbo’” yaannoha lekkaalliidi qaagishsha worroonni. (Lawishshaho Maatewoosi 6:25 lai.) Ikkollana kuni qaali sillisu tiro afiꞌrino bayicho woy yinanni heeꞌnoonniri xawe leellannowa “lubbo” yaanno qaale noo gedeenni horoonsiꞌne, nabbawanno manchi qaalu afiꞌrinota wole tiro lekkaalliidi qaagishshira woy Qaallate Tirora laꞌꞌanno gede kulloonni.—Maatewoosi 22:37.
Hatteente gede, Ajuuja 2:23 gedee qummeeshshuwara “mule” yaanno qaali lawishshu tiro afiꞌrinoha ikkanno woyite, “giddoyidi hedo” yine tirre, noo gedeenni tirriro afiꞌrino tiro lekkaalliidi qaagishshira worroonni.
Konni Qullaawu Maxaafira noo qummeeshshuwa baalanta tirroonnihu huuccatto assiꞌne, qorophinenna Qullaawu Maxaafi Haaro Alame Tiro Komite loossinohu danchu loosira lowo ayirrinyi noonketa leellishanno garinniiti.
Tenne tirora noota wole amado:
Tenne Qullaawu Maxaafi tirora lekkaalliidi qaagishshuwa noose. Lekkaalliidi qaagishshuwa xaphoomunni aante noo boosora gaamantanno:
“Woy” Ibiraawootu, Aramayikete woy Girikete Afii borronni tirranni woyite, mittu gari sokka sayissannota wolu gari yaatto xawisanno.—Maatewoosi 5:3 lekkaalliidi qaagishsha, “ayyaana afiꞌrate huuccidhannori.”
“Yaano ikkara dandaanno” Hedo baxxitinota ikkiturono, gara ikkitinota wolu garinni tirroonni yaatto leellishshanno.—1 Ximootewoosi 6:8, “galleemmowi.”
“Noo gedeenni tirriro” Ibiraawootu, Aramayikete woy Girikete yaatto qaalunni qaale tirriro sayissanno sokka woy umo borreessini qaalira horoonsiꞌnoonni yaatto afidhinota umi tiro kultanno.—Maatewoosi 6:11, “daabbo.”
Fichenna ledote mashalaqqe Suꞌmuwate fiche (Maatewoosi 1:21, “Yesuusa”; Soqqamaasinete Looso 9:36, “Dorqa”); qelpheephotenna bikkaasinchu daafira, (Yohaannisi 6:19, “kiilo meetire”); suꞌmu riqiwaano; (1 Teselonqe 4:14, “Isi”); Guwuurshunna Qaallate Tirono kaaꞌlitanno mashalaqqe amaddino.—Maatewoosi 5:22, “Gaannaame.”
Umi adda noohu, “Maganu Qaalinni Ronseemmo Roso” yaanno gafi Qullaawu Maxaafi giddo nooha safote roso amadino. Qullaawu Maxaafihu jeefote maxaafinni aanchite, “Qullaawu Maxaafi Maxaaffa Shae,” “Qullaawu Maxaafi Qaalla Furcho” hattono “Qullaawu Maxaafi Qaalla Tiro” no. Qaallate Tiro, nabbawanno manchi mite doorantino qaalla Qullaawu Maxaafi giddo ma garinni horoonsiꞌnoonniro huwatanno gede kaaꞌlitanno. Guwuurshu hunda aane noo gafi no: “Qullaawa Maxaafa Tirranni Woyite Haꞌrunsinanni Biddishsha,” “Tenne Tiro Amado,” “Qullaawu Maxaafi Ninkewa Iillino Gara,” “Maganu Suꞌma Girikete Afiite Qullaawa Borro Giddo,” “Yesuusi Uullate Noo Waro Ikkitinota Qara Qara Coyibba.” Qoleno Guwuurshu hunda kaartuwa, sanxarazhenna Qullaawa Maxaafa diinaggaawe nabbawanno manna kaaꞌlitannoti wole mashalaqqe no.
Mittu mittunku Qullaawu Maxaafi maxaafira hanafote, fooliishshote amadonna hasiꞌnoonni hedowa massitanno qummeeshshuwa no.