දෙවියන්ගේ නම යේසුස්ද?

බයිබලයේ ඒ ගැන කියන දේ

යේසුස් තමන්ව හැඳින්නුවේ “දෙවිගේ පුත්‍රයා” කියලයි. (යොහන් 3:18; 10:36) තමන් සියලු බලැති දෙවි කියලා යේසුස් කවදාවත් කිව්වේ නැහැ.

ඒවෙනුවට යේසුස් දෙවියන්ට යාච්ඤා කළා. (මතෙව් 26:39) තම ගෝලයන්ට යාච්ඤා කරන්න උගන්වද්දී යේසුස් කිව්වේ “ස්වර්ගයෙහි සිටින අපගේ පියාණෙනි, ඔබේ නාමය සැමදා ශුද්ධව පවතීවා” කියලා යාච්ඤා කරන්න කියලයි.—මතෙව් 6:9.

යේසුස් හෙබ්‍රෙව් ලියවිල්ලෙන් කොටසක් මේ විදිහට කියෙව්වා. “ඊශ්‍රායෙල්වරුනි, සවන් දෙන්න. අපගේ දෙවි යෙහෝවායි. යෙහෝවා යන නමින් සිටින්නේ එකම දෙවි කෙනෙක් පමණයි.” දෙවියන්ගේ නම යෙහෝවා කියලා යේසුස් පවා පිළිගත්තා.—මාක් 12:29; ද්විතීය කතාව 6:4.