2023: හදවත් ගිනිගත් වසරක් - ඒ ගැන බයිබලයේ කියන්නේ මොකක්ද?

අපි ජීවත් වෙන මේ කාලය බයිබලයේ හඳුන්වන්නේ ‘අවසාන කාලය’ විදිහට. (2 තිමෝති 3:1) අවසාන කාලේ වෙනවා කියලා බයිබලයේ කියපු හැම දෙයක්ම අද ඒ විදිහටම වෙනවා. 2023 ලෝකේ පුරාම වෙච්ච දේවල්වලින් ඒක හොඳින්ම පැහැදිලියි. මේ, ඒකට උදාහරණ.

ලෝකේ පුරාම වෙනවා කියලා බයිබලයේ කියපු දේවල්

“යුද්ධ ගැනත් යුද්ධ පිළිබඳ ආරංචි ගැනත් අසන්න ලැබෙයි.”—මතෙව් 24:6.

• “ලෝකේ ගොඩක් තැන්වල යුද ගිනි ඇවිළෙනවා.”a

“එක් තැනක් පාසා තවත් තැනක භූමිකම්පා.”—මාක් 13:8.

• “2023 රික්ටර් මාපක 7ට වඩා වැඩි භූමිකම්පා 13ක් වෙලා තියෙනවා. මීට කලින් එච්චර ලොකු භූමිකම්පා ඒ තරම් ප්‍රමාණයක් අවුරුද්දක් ඇතුලත වාර්තා වෙලා නැහැ.”b

“බිහිසුණු දේවල්.”—ලූක් 21:11.

• “ගෝලීය උණුසුම වැඩි වෙන යුගය අවසන් වෙලා. දැන් ගෝලය ගිනිගන්න යුගය පටන් අරන්.”—එක්සත් ජාතීන්ගේ සංවිධානයේ මහ ලේකම් ඇන්ටෝනියෝ ගුටරෙස්.c

“ආහාර හිඟකම්.”—මතෙව් 24:7.

• “2023: පවුලේ අයගේ බඩ කට පුරවන්න දහඩිය හෙළන අය කබලෙන් ලිපට වැටුණ තවත් වසරක්.”d

“ඉතා අසීරු, අනතුරු සහිත කාලයක්.”—2 තිමෝති 3:1.

• “ලෝකේ පුරාම ඉන්න මිනිස්සු අටදෙනෙක්ගෙන් එක් කෙනෙක් මොකක් හරි මානසික ගැටලුවකින් දුක් විඳනවා.”e

2024 මොනවා වෙයිද?

2024 මොනවා වෙයිද කියලා කාටවත් කියන්න බැහැ. ඒත් ලෝකේ වෙන දේවල්වලින් තේරෙනවා ළඟදීම දෙවියන්ගේ ආණ්ඩුව මේ පොළොව පාලනය කරන්න යනවා කියලා. ස්වර්ගයේ තියෙන ඒ ආණ්ඩුව මේ පොළොව පාලනය කරන හැම ආණ්ඩුවක්ම අයින් කරලා මිනිස්සුන්ගේ දුකට, කනස්සල්ලට හේතු වෙන හැම දෙයක්ම නැති කරනවා.—දානියෙල් 2:44; එළිදරව් 21:4.

ඒ කාලේ එන කල් අපිට බයක් දැනෙන, හිතට ලොකු බරක් වෙන දේවල් වෙයි. ඒ වගේ වෙලාවලදී අපිට දෙවියන්ගෙන් උදව් ඉල්ලන්න පුළුවන්. බයිබලයේ මෙහෙම කියනවා.

“මට භයක් දැනෙන ඕනෑම අවස්ථාවක මාගේ විශ්වාසය ඔබය.”—ගීතාවලිය 56:3.

දෙවියන් ගැන ඒ වගේ විශ්වාසයක් ඇති කරගන්නේ කොහොමද? අපි ඔයාගෙන් ආදරෙන් ඉල්ලනවා බයිබලයේ තියෙන පොරොන්දු ගැන හොයලා බලන්න කියලා. දුක වේදනාව නැති අනාගතයක් ගැන බයිබලයේ පොරොන්දු වෙනවා. ඔයාටත් ඔයාගේ පවුලේ අයටත් ඒ වගේ කාලෙක ජීවත් වෙන්න පුළුවන්. අපි නොමිලේ කරන බයිබල් සාකච්ඡාවලින් ඒ කොහොමද කියලා ඔයාට දැනගන්න පුළුවන්.