යෙහෝවාගේ මහත් දවස ළඟය
1 පවතින සමාජ ක්රමය තුරන් කර ධර්මිෂ්ඨකම රජයන නව ලොවක් ගෙනෙනු ලබන දෙවිගේ දවස එනතුරු ක්රිස්තියානීන් මහත් ඕනෑකමකින් බලා සිටිනවා. (2 පේතෘ. 3:12, 13) එම දවස කවදා පැමිණේද කියා නොදන්න නිසා අප නොකඩවා සෝදිසියෙන් සිටිය යුතු අතර අන් අයටත් එසේ කිරීමට උපකාර කළ යුතුයි. (එස. 33:7-9; මතෙ. 24:42-44) දෙවිගේ අනාවැකිමය වචනය මෙනෙහි කිරීම මගින් “යෙහෝවාගේ මහත් දවස ළඟ” බවට අප තුළ තිබෙන ස්ථිර විශ්වාසය තව තවත් ශක්තිමත් වෙයි.—ශෙප. 1:14.
2 ලෝක බලයන්වල වැටීම: එළිදරව් 17:9-11හි වාර්තා වී ඇති ලෙස ප්රේරිත යොහන් “රජවරු සත්දෙනෙක්” ගැන සඳහන් කරනවා. අනුපිළිවෙළින් පැමිණි ලෝක බලවේග හත ඔවුන්ගෙන් නියෝජනය වෙනවා. ඒවගේම ‘අටවන රජ’ කෙනෙකු ගැනද යොහන් සඳහන් කරනවා. දැන් ඉන් නියෝජනය වෙන්නේ එක්සත් ජාතීන්වයි. තවත් ලෝක බලවේගයන් පැමිණෙයි කියා අප අපේක්ෂා කළ යුතුද? නැහැ. මන්ද අනාවැකියේ සඳහන් වන්නේ අටවන රජ “විනාශයට යන්නේය” කියායි. ඉන්පසු භුමික රජ කෙනෙකුගේ පැමිණීමක් ගැන සඳහන් වන්නේ නැහැ. අප සිටින්නේ කුමන කාල වකවානුවකද කියා තේරුම්ගැනීමට එම අනාවැකියෙන් ඔබට උපකාරයක් ලැබුණාද?
3 දානියෙල් 2:31-45හි තිබෙන අනාවැකිය අපට යෙහෝවාගේ දවස පැමිණීම ගැන තේරුම්ගන්න උපකාර කරනවා. නෙබුකද්නෙශර් දුටු එම සිහිනයෙන් දැක්වෙන දැවැන්ත රූපයෙන් නියෝජනය වන්නේ ලෝක බලයන්වල වැටීමයි. මේ සෑම බලයක්ම පැමිණ අවසන්. එසේනම් අපේ කාලයේ පවතින්නේ කුමන බලයද? එම රූපයේ පාදවලින් සංකේතවත් කරන කාලය තුළයි. ඊළඟට සිදු වන දේ අනාවැකිය තුළ පැහැදිලිව විස්තර කර තිබෙනවා. මනුෂ්යයන්ගේ පාලනයන් මුළුමනින්ම විනාශ කර “කිසි කලකත් විනාශ නොවන රාජ්යයක් පිහිටුවන්නේය.” මෙයින් යෙහෝවාගේ දවස ළඟ බව පෙනී යන ආකාරය ඔබට දැකගත හැකිද?
4 අමතර සාක්ෂි: යෙහෝවාගේ දවස ළඟ බවට අමතර සාක්ෂි අප දකිමින් සිටිනවා. ප්රේරිත පාවුල් “අන්තිම දවස්වල” සිටින මිනිසුන්ගේ ගති ලක්ෂණ ගැන කළ පුරෝකථනය අද ඉටු වෙමින් තිබෙන ආකාරය අප දකිනවා. (2 තිමෝ. 3:1-5) අවසානය පැමිණීමට පෙර ලොව පුරා සිදු කළ යුතු සාක්ෂි දැරීමේ කාර්යයට අප හවුල් වෙමින් සිටිනවා. (මතෙ. 24:14) අපගේ ප්රසිද්ධ දේශනා සේවය තුළින් දේවදූතයෙකු කළ ප්රකාශයේ හදිසිතාව අපි තුළ තිබෙන බව පෙන්වමු. එම ප්රකාශය මෙයයි. “දෙවිට භය ඇතිව සිටින්න. ඔහුව මහිමයට පත් කරන්න. මන්ද, ඔහුගේ විනිශ්චයේ පැය පැමිණ තිබේ.”—එළි. 14:6, 7.