විනීතව ඇඳ පැළඳ සිටිමු
1 ලොව පුරා අප ප්රසිද්ධ වී ඇත්තේ පෙනුමෙන් කැපී පෙනෙන වෙනසක් ඇති ජනතාවක් ලෙසයි. (මලා. 3:18) ඒ මන්ද? ඊට හේතුව “ලජ්ජාවෙන් සහ විනීතභාවයෙන් යුක්තව, ඔබින වස්ත්ර ඇඳ . . . දේවභක්ති නාමය දරන [අයට] සුදුසු ලෙස සැරසෙන” ලෙසට දී ඇති ශුද්ධ ලියවිලිමය අවවාදය අප අනුගමනය කරන නිසාය.—1 තිමෝ. 2:9, 10.
2 අප අඳින ඇඳුම්, ඒවා අඳින ආකාරය අප ගැන, එනම් අපගේ විශ්වාසයන්, ආකල්පයන් සහ චේතනා ගැන ඉතා පැහැදිලි යමක් කියාපායි. මේ ලෝකයෙහි ජනප්රියයයි පිළිගැනෙන පහත් අදහස් සහ හැසිරීමට අප විසින් කිසිවිටකත් රුකුල් නොදිය යුතුය. අපට වැදගත් වන්නේ එක්තරා විලාසිතාවක් ජනප්රියද යන්න නොව, දෙවිගේ සේවකයෙකු ලෙස පෙනී සිටින කෙනෙකුට එය ඔබිනවාද නැද්ද යන්නයි. (රෝම 12:2) එමනිසා, ස්වාධීන ආකල්පයක් ප්රදර්ශනය කරන පෙනුමක් හෝ ප්රතිරූපයක් තෝරාගන්නවා වෙනුවට, අප සැබවින්ම “දෙවිට ගෞරව කරන” බව පෙන්නුම් කිරීමට කැමැත්තෙමු.—1 පේතෘ. 2:12.
3 සමුළුවකට සහභාගි වන විට, අඳින පළඳින ආකාරය ගැන පරෙස්සම් විය යුතු බව ඇතැම් අය අප්රමාදව සිය එකඟතාව පළ කරති. එනමුත්, සමුළු සැසිවාරවලින් පසුව වෙනත් ස්ථානවල විවේක ගන්නා විට, ඔවුහු තම ප්රමිතිය පහත දමති. (2 කොරි. 6:3, 4) මිනිසුන් ගැවසෙන ඕනෑම ස්ථානයකදී අප යෙහෝවාගේ සාක්ෂිකරුවන් බව හඳුනාගැනීමට අපගේ සමුළු කාඩ්පත සහ ඔබින ඇඳුම් පැළඳුම් උපකාරවත් වේ. එමනිසා, අප සැමවිටම ඔබින හා විනීත ඇඳුම් ඇඳිය යුතුය. ‘අප ලෝකයට අයිති නැති බවට’ මෙය සාක්ෂියක් වේ.—යොහ. 15:19.
4 මෙම වසරේ පවත්වන “ජ්වලිත රාජ්ය ප්රකාශකයෝ” දිස්ත්රික් සමුළුවේ අප ‘අපගේ දෙවි යෙහෝවාට ශුද්ධ වූ සෙනඟක්’ බව ඔප්පු කිරීමට අපට හැකි සියල්ල කරමු. ප්රතිඵලයක් වශයෙන් අප ගැන ඇති වන හොඳ හැඟීම යෙහෝවාගේ ‘ප්රශංසාවටත්, කීර්තියටත්, ගෞරවයටත්’ හේතුවක් වනු නියතය. —ද්වි. 26:19.