Nzoni bungbi ti vorongo Nzapa amaï tënë ti nzoni tambela
NZONI bungbi ti vorongo Nzapa afa na e tongana nyen e lingbi ti bi bê na ndo ti aye so ayeke nzoni na afa na e tongana nyen ti sara si tambela ti e aga nzoni. A mû maboko na e na yâ ti ngangu so e yeke sara ti sara ye so ayeke nzoni, na ti sara ye kue so e lingbi ti sara ti duti anzoni zo. E hinga tongana nyen so nzoni bungbi ti vorongo Nzapa ayeke sara ye so?
Bâ ye so bazengele Paul asû na akozo Chrétien so ayeke na Corinthe, na sese ti Grèce. A hinga gbata so teti asarango ye ti kirikiri ti azo ni. Paul amû na ala wango so: ‘Atâa azo ti sarango aye ti ndumba, atâa azo ti vorongo anzapa nde, atâa azo ti gingo wali wala koli ti amba ti ala, atâa akoli so ayeke lango na amba ti ala akoli, atâa azo ti nzi, atâa azo so kota nzara ti warango aye ayeke na bê ti ala, atâa azo so ayeke ngbâa ti sämba, atâa azo ti dungo mvene na li ti amba ti ala, atâa azo ti gbungo ye ti azo na ngangu, Kodoro ti Gbia Nzapa ayeke ga ande ti ala pëpe.’ Na pekoni Paul akiri atene: ‘Ambeni zo na popo ti ala ayeke ândö tongaso. Me Nzapa asukula asioni ti ala awe, lo sara si ala ga nzoni kue si lo zia ala nde; lo sara si ala ga mbilimbili na lê ti lo na iri ti Kota Gbia Jésus Christ nga na lege ti Yingo ti Nzapa ti e.’ (1 aCorinthien 6:9-11, Fini Mbuki, 2001). Gbu li ti mo kete: nzoni bungbi ti vorongo Nzapa amû maboko na ambeni zo so kozoni ayeke na sioni sarango ye ti ga anzoni wakua ti Nzapa so asara ye mbilimbili!
Nde na so, Bible amû wango so: ‘Biani, mbeni ngoi ayeke ga so fade azo ayeke ke ti mä fango ye so ayeke mbilimbili. Ala yeke sara ande gi aye ti bê ti ala wani si ala yeke iri gbâ ti awafango-ye ti ga ti fa na ala tënë so anzere na mê ti ala.’—2 Timothée 4:3, FM 01.
Abungbi ti vorongo Nzapa so mo hinga asara ti ala tongana nyen na ndo ti tënë so? Ala mû peko ti akpengba-ndia ti Bible so andu dutingo na nzoni tambela? Wala ala woko yâ ti atënë ti Bible na tenengo na azo gi ‘tënë so anzere na mê ti ala’?
Ti mû maboko na mo ti bâ wala mbeni bungbi ti vorongo Nzapa alë nzoni lengo, e hunda na mo ti mû ngoi ti kiri tënë na ahundango tënë so ayeke na gbe ni ge.
TËNË TI: Mariage.
YE SO BIBLE AFA: “Zia azo kue abâ mariage na nene ni mingi, na zia a sara si gbogbo ti mariage aga sioni pëpe, teti Nzapa ayeke fâ ngbanga ande na li ti azo ti sarango lango-sioni nga na azo ti gingo wali wala koli nde.”—aHébreu 13:4.
HUNDANGO NDO: Bungbi ti vorongo Nzapa ni so ahunda na amembre ti lo so amû tere ti sara mariage so ndia ayeda na ni?
TËNË TI: Divorce.
YE SO BIBLE AFA: Na ngoi so a hunda tënë na Jésus na ndo ti aye so amû lege na zo ti sara divorce, lo tene: ‘Tongana mbeni zo atomba wali ti lo, atâa so wali ni abungbi na mbeni koli nde pëpe, si lo mû mbeni wali nde, andâ lo gi wali ti mbeni zo awe.’—Matthieu 19:9, Fini Mbuki, 1995.
HUNDANGO NDO: Bungbi ti vorongo Nzapa ni so amû peko ti fango ye ti Jésus na lo mû lege na koli na wali so asara mariage awe ti sara divorce na ti kiri ti sara mariage me gi tongana mbeni oko asara lango-sioni?
TËNË TI: Bungbingo ti koli na wali.
YE SO BIBLE AFA: “Ala kpe lango-sioni! Siokpari kue so mbeni zo alingbi ti sara ayeke na gigi ti tere ti lo; me zo so asara lango-sioni asara siokpari na tere ti lo mveni.”—1 aCorinthien 6:18, La Bible en français courant.
‘Awali ti ala azia lege ti akoli awe si ala yeke gi tere na popo ti ala; ye so alingbi fade ti tene zo asara fade pëpe. Akoli nga azia lege ti awali awe si nzara ti gi amba ti ala akoli ahon ndo ti ala; ala yeke lango na amba ti ala akoli; so ayeke ye ti kamene mingi. Ala wani ayeke wara ande futa so alingbi na lege ti kirikiri so ala mû so.’—aRomain 1:26, 27, FM 01.
HUNDANGO NDO: Bungbi ti vorongo Nzapa ni so afa atene lango-sioni ayeke siokpari? atâa ayeke na popo koli na wali? wala na popo ti koli na koli wala wali na wali?
TËNË TI: Gbungo akpengba-ndia ti Bible ngangu na popo ti amembre ni.
YE SO BIBLE AFA: ‘Zo so atene ni yeke ita ti ala zo ti Christ si lo yeke gi awali kirikiri, wala kota nzara ti warango aye ayeke na bê ti lo, wala lo yeke voro anzapa nde, wala lo yeke dü mvene na li ti amba ti lo, wala lo yeke zo ti nyongo sämba ahon ndo ni, wala lo yeke zo ti nzi, ayeke nzoni ala sara songo na lo pëpe; ala te nga kobe na mara ti zo tongaso pëpe.’ (1 aCorinthien 5:11, FM 01). Nyen la alingbi ti si na azo so atene ani yeke aChrétien me so azia lege ti siokpari ti ala pëpe? Mbeti ti Nzapa atene: “I zi zo ti sioni na popo ti i.”—1 aCorinthien 5:13, Fini Mbuki, 1988.
HUNDANGO NDO: Bungbi ti vorongo Nzapa ni so ayeke zi mbeni membre ni so adoro andia ti Bible na so ake ti zia lege ti siokpari ti lo?
[Kete tënë na lembeti 6]
Bungbi ti vorongo Nzapa wa a hinga ni na sarango ye alingbi na akpengba-ndia ti Bible na ndo ti nzoni tambela?