Asango ti Royaume No. 37

Tokua so abâ azo ti sese kue

Bungbi ti nzapa ti wataka aga nduru ti hunzi!

▪ Bungbi ti nzapa ti wataka ayeke nyen?

▪ A yeke hunzi ande tongana nyen?

▪ Na lege wa tënë ni ayeke bâ mo ande?

Bungbi ti nzapa ti wataka ayeke nyen?

Vundu asara mo ndali ti aye ti sioni so azo ayeke sara ni na iri ti abungbi ti nzapa? Tënë ti bira, kpale ti aterroriste nga na petengo goro so azo so atene ala yeke awakua ti Nzapa si ayeke sara ni, aso bê ti mo ndali ti so mo ye mbilimbili? Ngbanga ti nyen a bâ so a yeke abungbi ti nzapa si ayeke na gunda ti akpale mingi tongaso? Kpale ni aga pëpe na lege ti abungbi ti nzapa kue, me na lege ti bungbi ti nzapa ti wataka. Jésus Christ, mbeni kota wakua ti Nzapa so azo ane lo mingi, afa lani so bungbi ti nzapa ti wataka ayeke pusu azo ti lë asioni ye, legeoko tongana ti so “keke ti sioni alë le-keke ti sioni.” (Matthieu 7:15-17). Alengo wa bungbi ti nzapa ti wataka alë ni?

Bungbi ti nzapa ti wataka:

◼ AYEKE YÔRO TERE TI LO NA YÂ TI BIRA NGA NA YÂ TI POROSO: Mbeni mbeti-sango (Asiaweek) atene: “Na akodoro ti Asie nga na ambeni kodoro nde, amokonzi ti poroso, so aye tënë ti komandema mingi, ayeke sara kusala na kode na nzara so azo ayeke na ni ti voro na Nzapa, me tënë ti nzoni ti azo ni agbu bê ti ala pëpe.” Ye ti pekoni ni ayeke so, mbeti-sango ni afa: “Sese ayeke gue ti ga kirikiri.” Na kodoro ti Amerika, mbeni kota mokonzi-nzapa atene: “Ti kanga lege na aterroriste ti fâ azo, a yeke ti mo ti hunzi na ala kozoni.” Ti lo yorö ni ayeke nyen? Lo tene: “Fâ ala kue na iri ti Seigneur.” Nde na tënë ti lo so, Bible atene: “Tongana zo atene, Mbi ndoye Nzapa, na lo ke ita ti lo, lo yeke wamvene.” (1 Jean 4:20). Jésus atene même : “I ndoye awato ti i.” (Matthieu 5:44). Mo pensé ti mo abungbi ti nzapa oke si azo ti yâ ni abi tere ti ala na yâ ti bira?

◼ AYEKE MAÏ AFANGO YE TI WATAKA: Mingi ti abungbi ti nzapa afa so âme wala yingo ti zo ayeke mbeni mbage ti tere ti zo so lê ayeke bâ ni pëpe na so ayeke ngbâ na fini na peko ti kuâ ti zo ni. Na lege ti tënë so, abungbi ti nzapa ayeke wara go na ndo ti azo so ayeke na yâ ti abungbi ti ala ni, ala hunda na azo ni ti futa na ala mbeni nginza tongaso si ala sambela tënë ti âme ti azo so akui awe. Ye oko, ye so Bible afa na ndo tënë so ayeke tâ nde. “Âme so asara siokpari, fade a kui.” (Ezéchiel 18:4). “Ala so ayeke na fini, ala hinga fade ala kui; me akinda ahinga ye oko pëpe, wala futa ayeke pëpe teti ala; teti azo adabe ala na akinda mbeni pëpe.” (Zo-ti-fa-tene 9:5). Jésus atene lani so a yeke zingo ande akuâ; me tongana azo ayeke na mbeni âme so ayeke kui pëpe, zingongo ala na kuâ ni ayeke duti kota ye oko pëpe (Jean 11:11-25). Bungbi ti nzapa ti mo afa na mo so âme ayeke kui pëpe?

■ AYEKE KANGA LÊ NA NDO YE TI PITAN: Na akodoro mingi, abungbi ti nzapa ayeke zia maboko na li ti akoli so ayeke bungbi na amba ti ala koli wala awali so ayeke bungbi na amba ti ala wali ti ga aprêtre. Abungbi ni so ayeke hunda na ngorogbia ti kodoro ti ala ti yeda na tënë ti mariage na popo ti akoli na koli wala na popo ti awali na wali. Même abungbi so ake tënë ti pitan ayeke kanga lê na ndo ti amokonzi-nzapa ti ala so ayeke sara pitan na akete molenge. Ye oko, Bible afa nyen na ndo tënë so? Bible atene tâ polele atene: “I handa tere ti i pëpe; azo ti pitan, azo ti sambela ayanda, azo so asara lango-sioni, azo so asara ye ti kamene na tere ti ala na popo ti ala, akoli so asara lango-sioni na mbeni koli, fade azo tongaso aga ahéritier ti royaume ti Nzapa pëpe.” (1 aCorinthien 6:9, 10). Mo hinga abungbi ti nzapa so ayeke kanga lê na ndo ye ti pitan?

Kekereke, nyen la ayeke si ande na abungbi ti nzapa so ayeke lë asioni lengo so nyen? Jésus atene: “Keke oko oko kue so alë le-keke ti sioni, fade a fâ keke so na a bi na wâ.” (Matthieu 7:19). Biani, a yeke futi ande bungbi ti nzapa ti wataka! Me, a yeke futi lo tongana nyen? Na futingo ti lo ni ayeke si lawa? Mbeni prophétie so a bâ ni na suma na so ayeke na mbeti ti Apocalypse chapitre 17 nga na 18, ayeke kiri tënë na ni.

Bungbi ti nzapa ti wataka ayeke hunzi ande tongana nyen?

Tara ti bâ ni na li ti mo. Mbeni wali ti pitan ayeke duti na ndo ti mbeni sioni nyama ti gunda. Nyama ti gunda ni ayeke na li mbasambala na adidi bale-oko (Apocalypse 17:1-4). Wali ti pitan ni so aduti fâ ti nyen? Lo wali ti pitan ni lo yeke na ngangu so “akomande agbia ti sese.” Lo yü bongo ti pourpre, lo yeke sara kusala na yombo na lo yeke na gbâ ti mosoro. Nga, na lege ti asarango ye ti yorö ti lo, ‘amara kue amä handa’ ti lo. (Apocalypse 17:18; 18:12, 13, 23). Bible amû maboko na e ti hinga so wali ti pitan ni so ayeke abungbi ti nzapa ti dunia kue. Lo duti pëpe gi fä ti mbeni bungbi ti nzapa oko, me abungbi ti nzapa kue so ayeke lë asioni lengo.

Nyama ti gunda ni so wali ti pitan ni aduti na ndo ti lo so ayeke fä ti azo ti poroso ti sese (Apocalypse 17:10-13).a Bungbi ti nzapa ti wataka aduti na ndo ti nyama ti gunda ni so ayeke fä ti azo ti poroso, na lege so lo yeke gi ti sara ngangu na ndo adesizion ti ala nga ti fa ndo so a lingbi ala gue dä.

Ye oko, na yâ ti kete ngoi mbeni ye ti dongo bê ayeke si. “Nza bale-oko, na nyama ni so mo bâ, fade ala ke wali ti pitan so, ala hunzi ye ti lo kue si tere ti lo angbâ senge, na fade ala te mitele ti lo, na ala zö lo na wâ.” (Apocalypse 17:16). Gi hio tongaso nga na mbeni lege so aso bê, azo ti poroso ti sese so ayeke tï na ndo ti bungbi ti nzapa ti wataka na ayeke futi lo biaku biaku! Nyen la ayeke pusu ala ande ti sara tongaso? Mbeti ti Apocalypse akiri tënë ni atene: ‘Nzapa azia na bê ti ala ti sara ye so Lo ye.’ (Apocalypse 17:17). Biani, Nzapa ayeke iri ande bungbi ti nzapa ti wataka ti kiri tënë na ndo ti aye ti sioni kue so lo sara ni na iri ti Nzapa. Na sarango ye na lege ti tâ mbilimbili, Nzapa ayeke sara kua ande na andeko ti wali ti pitan ni, so ti tene azo ti poroso, ti ga mbeni ye ti futi na lo.

Tongana mo ye ti tene mo wara pëpe mbage ti ye ti sioni so ayeke tï na ndo ti bungbi ti nzapa ti wataka, a lingbi mo sara nyen? Ange ti Nzapa atene: “Azo ti mbi, i sigigi na kodoro so.” (Apocalypse 18:4). Biani, a yeke fadeso ngoi ni la ti sigigi na yâ ti bungbi ti nzapa ti wataka! Me mo lingbi ti sigigi ti gue na ndo wa? A ye ti tene pëpe ti sigigi na ti ke ti duti na mabe na Nzapa (2 aThessalonicien 1:6-9). Ndo oko so mo lingbi ti sigigi ti gue dä ayeke ti lï na yâ ti tâ bungbi ti Nzapa. Me, mo lingbi ti hinga tâ bungbi ti Nzapa ni tongana nyen?

Lege ti hinga na tâ bungbi ti Nzapa

A lingbi tâ bungbi ti Nzapa alë alengo wa?—Matthieu 7:17.

Tâ bungbi ti Nzapa:

◼ AYEKE SARA YE NA NDOYE: Atâ wakua ti Nzapa ayeke ti “sese so pëpe”, yâ ti ala akangbi pëpe tënë ti mara wala tënë ti ngobo ti sarango ye; na ala ‘ndoye tere na popo ti ala.’ (Jean 13:35; 17:16; Kusala 10:34, 35). Ahon ti tene ala fâ tere na popo ti ala, ala yeke nduru ti kui ndali ti amba ti ala.—1 Jean 3:16.

◼ AYEKE ZIA BÊ KUE NA TËNË TI NZAPA: Ahon ti tene lo fa “tënë ti akotara” nga na “ndia ti azo,” atënë so tâ bungbi ti Nzapa ayeke fa alondo gi na yâ ti Bible. (Matthieu 15:6-9). Ngbanga ti nyen? Ngbanga ti so “Tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni”.—2 Timothée 3:16.

◼ AYEKE KPENGBA AZO TI SEWA NGA AYEKE MAÏ NZONI SARANGO YE: Tâ bungbi ti Nzapa afa na akoli ti ‘ndoye awali ti ala legeoko tongana tere ti ala mveni.’ Lo yeke mû maboko na awali ti ‘yekia wala ti kpe mbeto ti akoli ti ala’ nga tâ bungbi ti Nzapa ayeke fa na amolenge ti ‘mä tënë ti ababâ na amama ti ala’. (aEphésien 5:28, 33; 6:1). Na ndo ni, a lingbi azo so amû li ni na yâ ti tâ bungbi ti Nzapa aduti nzoni tapande na lege ti tambela ti ala.—1 Timothée 3:1-10.

Mbeni bungbi ti Nzapa ayeke dä so asara ye alingbi na aye so? Na ngu 2001, mbeni buku (Holocaust Politics) atene tënë so: “Tongana azo mingi asara ye alingbi na tapande ti tënë so aTémoin ti Jéhovah ayeke fa na ayeke sara ye alingbi na ni, ka fade a kanga lege na futingo aJuif, nga kpale ti futingo mbeni mara angbâ mbeni pëpe ti bi vundu na sese.”

Biani, na yâ ti akodoro 235, aTémoin ti Jéhovah ayeke fa gi pëpe andia ti nzoni sarango ye so ayeke na yâ ti Bible, me ala yeke sara ye alingbi na ni. E wa mo ti hunda na aTémoin ti Jéhovah ti mû maboko na mo ti hinga ye so Nzapa ahunda na mo tongaso si mo lingbi ti voro lo tongana ti so lo ye. Laso ayeke ngoi ti tene mo sara mbeni ye. Mo ku kete pëpe. Bungbi ti nzapa ti wataka aga nduru ti hunzi awe!—Sophonie 2:2, 3.

Tongana mo ye ti hinga ye mingi na ndo tënë ti Nzapa so aTémoin ti Jéhovah ayeke fa, ku kete pëpe ti wara ala na lege ti adresse so ayeke na gbe ni ge.

□ Mbi ye a tokua na mbi mbeni brochure I lango pëpe! sân ti hunda mbeni ye na mbi.

□ Mbi ye mbeni zo aga amanda Bible na mbi senge senge.

[Kete tënë na gbe ni]

[Kete tënë na lembeti 3]

Bungbi ti nzapa ti wataka ayeke na ngangu so “akomande agbia ti sese”

[Foto na lembeti 3]

“Azo ti mbi, i sigigi na kodoro so”