Nzoni bungbi ti vorongo Nzapa amaï tënë ti yengo tere
BIBLE atene: ‘Lo so ayeke na ndoye pëpe ahinga Nzapa pëpe, tënë ti so Nzapa ayeke ndoye.’ (1 Jean 4:8, Tene ti Nzapa, Fini Mbuki, 1988). A lingbi nzoni bungbi ti vorongo Nzapa amaï tënë ti yengo tere na popo ti azo kue.
Abungbi ti vorongo Nzapa mingi asara anzoni kusala na mungo maboko na azo ti kobela, ambakoro nga na awayere. Ala yeke wa amembre ti ala ti sara ye alingbi na tënë so bazengele Jean asû na mbeti: ‘Tongana mbeni zo ayeke na aye ti dunia so mingi, si lo bâ mbeni ita so ye atia lo, si lo ke ti sara nzoni na zo ni, fade lo yeke tene ande atene lo ye Nzapa tongana nyen? Amolenge ti mbi, ayeke nzoni i ye tere gi na lege ti tënë ti yanga pëpe. Me i ye tere na sarango kua, nga na tenengo tâ tënë.’—1 Jean 3:17, 18, Fini Mbuki, 1995.
Nyen la ayeke si ka tongana amara asara bira? Ndia ti Nzapa ahunda ti tene ‘mo ye ita ti mo tongana mo mveni.’ A lingbi ti sara ye alingbi na ndia so gi na ngoi ti siriri, me pëpe na ngoi so mbeni zo ti poroso wala mbeni gbia asoro ti tiri bira na mbeni kodoro so ayeke na tere ti lo?—Matthieu 22:39, FM 88.
Jésus atene: “Tongana ala ye tere na popo ti ala, fade azo ahinga atene ala yeke azo ti mbi.” (Jean 13:35, FM 95). Na ngoi so mo yeke kiri tënë na ahundango ndo so ayeke na gbe ni ge, hunda tere ti mo: ‘Amembre ti bungbi ti vorongo Nzapa ni so afa ndoye na mbage ti azo kue na ngoi kue gi na yanga pëpe me nga na sarango ye?’
TËNË TI: Bira.
YE SO BIBLE AFA: Jésus amû yanga na adisciple ti lo: “Ti mbi, mbi tene na ala mbi tene: ala ye awato ti ala! Ala sambela ndali ti azo so ayeke sara ngangu na ala.”—Matthieu 5:44, Fini Mbuki, 2001.
Tongana aturugu aga ti gbu Jésus, bazengele Pierre agboto yongoro zembe ti kanga lege na ala. Me, Jésus atene: ‘Kiri na yongoro zembe ti mo na yâ ti bozo ni, ngbanga ti so azo so kue amû yongoro zembe ti fâ zo na ni, fade ala yeke kui ande kuâ ti yongoro zembe.’—Matthieu 26:52, FM 95.
Bazengele Jean asû na mbeti: ‘Ye so ayeke fa atene zo ayeke molenge ti Nzapa wala molenge ti Zabolo ayeke so: zo so ayeke sara ye ti mbilimbili pëpe, wala lo ye ita ti lo pëpe, lo yeke zo ti Nzapa pëpe. Tënë so ala mä ngbene ye na tongo nda ni ayeke so: a yeke nzoni e ye tere na popo ti e. E sara ye tongana Caïn pëpe; lo yeke zo ti Zabolo si lo fâ ita ti lo Abel.’—1 Jean 3:10-12, FM 01.
HUNDANGO NDO: Bungbi ti vorongo Nzapa ni so awa amembre ti lo ti sara bira?
TËNË TI: Poroso.
YE SO BIBLE AFA: Na peko ti amiracle so Jésus asara, ambeni zo aye si lo yôro tere ti lo na yâ ti poroso ti kodoro ni. Lo sara ye tongana nyen? ‘Jésus ahinga atene, azo aye ti ga ti mû lo na ngangu ti sara si lo ga gbia. Ni la lo gboto tere ti lo, lo gue lo duti na ndo ti hoto gi lo oko.’—Jean 6:15, FM 01.
Tongana a gbu Jésus na a dü mvene na li ti lo atene so lo yeke pusu azo ti sara ngangu-li na ngorogbia, lo kiri tënë lo tene: ‘Lengo gbia ti mbi alondo na dunia so pëpe. Tongana lengo gbia ti mbi alondo fade na dunia so, ka azo ti mbi atiri bira ti kanga lege si azo aga na mbi na akota zo ti aJuif pëpe. Me fadeso, lengo gbia ti mbi alondo na ndo so pëpe.’—Jean 18:36, FM 01.
Na ngoi so lo yeke sambela Nzapa teti adisciple ti lo, Jésus atene: ‘Mbi fa na ala tënë ti mo si azo ti dunia so ake ala, ndali ti so ala yeke azo ti dunia so pëpe, tongana ti so mbi nga, mbi yeke ti dunia so pëpe.’—Jean 17:14, FM 01.
HUNDANGO NDO: Bungbi ti vorongo Nzapa ni so amû peko ti tapande ti Jésus ti kpe ti yôro tere na yâ ti poroso, atâa tongana ambeni zo ti poroso aye tënë ti amembre ni pëpe?
TËNË TI: Sarango kangbi na popo ti azo.
YE SO BIBLE AFA: Na ngoi so akozo zo so mara ti ala ayeke nde (so ade afa ganza pëpe) nga so ayeke aJuif pëpe aga Chrétien, bazengele Pierre atene: “Nzapa ayekia mbeni zo teti lê ti lo pëpe; me na yâ amara kue, zo so akpe mbeto ti Nzapa, na lo sara ye ti mbilimbili, lo lingbi na lê ti Lo.”—Kusala 10:34, 35, La Sainte Bible en sango.
Jacques asû mbeti na akozo Chrétien lo tene: ‘Aita ti mbi, ala mä na bê awe na Kota Gbia ti e Jésus Christ so e yeke gonda lo; tongaso ala ne ambeni zo ahon ambeni pëpe. E mû mbeni tapande: mbeni zo ayü pendere bongo, bague ti lor ayeke na maboko ti lo, lo ga lo lï na yâ ti bungbi ti ala si mbeni zo ti mawa so ayü gbagba bongo aga alï nga na yâ ti bungbi ni. Tongana ala ne gi zo so ayü nzoni bongo so si ala tene na lo, atene: “Kota zo, mo ga, mo duti na ndo ti nzoni ngende so,” si na pekoni, ala tene na zo ti mawa ni, atene: “Mo so, ngbâ ti mo na nduzu” wala “duti ge na sese, na tere ti mbata ti gere ti mbi,” so ala sara tongaso so, ala ne mbeni zo ahon mbeni pëpe? Na sarango ye tongaso, ala yeke na sioni tënë na bê ti ala si ala yeke fâ na ngbanga pëpe?’—Jacques 2:1-4, FM 01.
HUNDANGO NDO: Bungbi ti vorongo Nzapa ni so afa so azo kue ayeke gi oko na lê ti Nzapa? A fa nga na amembre ni ti ye amba ti ala atâa mara ti ala wala atâa ala yeke na nginza mingi wala ala yeke na ni pëpe?
[Kete tënë na lembeti 7]
Bungbi ti vorongo Nzapa wa la afa na amembre ti lo ti zia yamba tënë ti poroso, tënë ti mara na ti nginza so aga na kangbi na popo ti azo?