Ti duti mbeni Chrétien aye ti tene nyen? Bible atene nyen na ndö ni? 

Laso, anzere na azo mingi ti tene so ala yeke aChrétien. Me, ala yeke son bê ti amba ti ala na lege ti asarango ye ti ala. Ambeni ayeke pensé gï na ala wani, ala yeke sara ye na likisi wala ala yeke sara ye na nzoni bê ape. Ambeni ayeke be-ta-zo na koli wala na wali ti ala ape. Asarango ye ti ala asara si ambeni zo ayeke hunda terê ti ala, a tene: ‘Ti duti mbeni Chrétien aye biani ti tene nyen?’ 

Ti duti mbeni Chrétien aye biani ti tene nyen? 

A yeke facile ti tene mbeni zo atene so lo yeke Chrétien. Me, tënë so andu aye mingi. Ti gue oko na tënë so Bible atene, mbeni Chrétien ayeke mbeni zo so ayeke disciple ti Jésus Christ (Kusala 11:26). Jésus lo wani atene: “Tongana ala ngbâ na yâ ti tënë ti mbi, ala yeke biani adisciple ti mbi.” (Jean 8:31). Ti vrai ni, mbeni zo apeut ape ti mä yanga ti Jésus na yâ ti aye kue. Me, mbeni Chrétien ayeke sara kue ti mû peko ti afango ye ti Jésus nga ti sara ye alingbi na andia ti lo na yâ ti gigi ti lo ti lâ oko oko. Bâ ambeni tapande ni. 

A-Chrétien ayeke sara ye na ndoye 

Tënë so Jésus atene: “Mbi yeke mû na ala mbeni fini commandement: Ala ndoye terê na popo ti ala. Legeoko tongana ti so mbi ndoye ala, zia ala nga ala ndoye terê na popo ti ala. A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”—Jean 13:34, 35. 

Ye so Jésus asara lani: Jésus asara lani ye na ndoye na azo kue, atâa dutingo ti ala wala ndo so ala londo dä ayeke so wa. Lo sava azo, lo mû lani kobe na azo so nzara asara ala nga lo mû fini ti lo ndali ti azo.—Matthieu 14:14-21; 20:28. 

Fason so aChrétien ayeke sara na ye: A-Chrétien afa tâ ndoye na lege so ala yeke mû ye na azo, ala yeke sara kangbi na popo ti azo ape nga ala yeke pardonné zo. Ala yeke mû maboko na azo so ayeke na bezoin ti mbeni ye nga ala yeke nduru ti sara asacrifice ndali ti amba ti ala.—1 Jean 3:16. 

A-Chrétien ayeke sara ye na lege ni 

Tënë so Jésus atene: “Mbi yeke . . . tâ tënë.”—Jean 14:6. 

Ye so Jésus asara lani: Jésus asara ye lani na lege ni na yâ ti aye kue. Lo sara ye na handa lâ oko ape wala lo tene mvene ape. A hinga lo tongana mbeni zo so ayeke sara ye na lege ni, même si ye ni ayeke ga na akpale na lo.—Matthieu 22:16; 26:63-67. 

Fason so aChrétien ayeke sara na ye: A-Chrétien ayeke tene mvene ape. Ala yeke payé impôt, ala yeke nzi ye ape nga ala yeke sara kua ngangu alingbi na ngoi so a hunda na ala ndali ti kua ni (aRomain 13:5-7; aÉphésien 4:28). Ala yeke escroqué azo ape, ala yeke triché na temps ti a-examen ape, ala yeke tene mvene ape na yâ ti ambeti ti gingo kua ti ala wala na yâ ti ambeni mbeti ti ala nde.—aHébreu 13:18. 

A-Chrétien ayeke sara ye na nzoni bê 

Tënë so Jésus atene: “Ala ga na mbi, ala kue so asara ngangu kua na kungba ane ala, na mbi yeke dë bê ti ala. Ala yô joug ti mbi na ala manda ye na mbage ti mbi, ndali ti so mbi yeke sara ye na ngangu pëpe nga mbi sara terê ti mbi kete, na ala yeke wara dengo bê ndali ti ala wani. Ndali ti so a yeke ngangu pëpe ti yô joug ti mbi na kungba ti mbi ayapu.”—Matthieu 11:28-30. 

Ye so Jésus asara lani: A yeke lani ngangu na azo ape ti ga nduru na Jésus nga lo sara ye na nzoni bê. Anzere na amolenge ti ga na terê ti lo, lo dë bê ti azo so vundu asara ala nga lo ne azo.—Marc 10:13-15; Luc 9:11. 

Fason so aChrétien ayeke sara na ye: A-Chrétien ayeke sara tënë na amba ti ala na nzoni bê; ala yeke sara ye na azo na ngangu ape wala ala yeke zonga ndo ape (aÉphésien 4:29, 31, 32). Ala yeke pensé na azo nga ala yeke gi alege so azi na ala ti aidé amba ti ala.—aGalate 6:10. 

A-Chrétien ayeke ngbâ be-ta-zo na koli wala na wali ti ala 

Tënë so Jésus atene: “Ye so Nzapa abungbi na gbe ti joug oko awe, zia zo akangbi yâ ni pëpe.”—Marc 10:9. 

Ye so Jésus asara lani: Atâa so Jésus asara lani mariage ape, lo encouragé azo so asara mariage awe ti ngbâ be-ta-zo na koli wala na wali ti ala (Matthieu 19:9). Lo wa ala ti kpe asarango ye kue so apeut ti buba yâ ti mariage ti ala.—Matthieu 5:28. 

Fason so aChrétien ayeke sara na ye: A-Chrétien ayeke kpe asarango ye so afa so ala bâ mariage na nene ni ape (aHébreu 13:4). Akoli na awali so asara mariage awe ayeke ndoye mba nga ala yeke ne mba.—aÉphésien 5:28, 33.