Nyen la ayeke si ande na abungbi ti vorongo Nzapa? Bible atene nyen na ndö ni?

Eskê bê ti mo ason na terê ti abungbi ti vorongo Nzapa? Atâa so abungbi ti vorongo Nzapa ayeke sara aye ti nzoni ndali ti azo, ala yeke nga na gunda ti aye ti sioni mingi. Mbeni mbeti (Encyclopedia of Religion and War) atene: “Ambeni ngangu bira so asi na yâ ti mbaï ti azo ayeke abungbi ti vorongo Nzapa la ayeke na gunda ni.” Mingi ni, akota zo ti bungbi ti nzapa ayeke sara ye mo bâ mo tene ala yeke voro Nzapa, me na gbe ni ala yeke yôro terê ti ala na yâ ti aye ti poroso. Ambeni ayeke lango na amolenge na ngangu na hondengo ni wala ala yeke gi ti wara go na ndö ti amembre ti ala na alege nde nde.

Tongana bê ti mo ason na terê ti abungbi ti vorongo Nzapa, mo pensé so a sara Nzapa tongana nyen? Bible afa so sarango ye ti mingi ti abungbi ti Nzapa anzere na Nzapa ape. A yeke wara nga na yâ ti Bible, aprophétie so afa ye so Nzapa ayeke sara ande na abungbi ti vorongo Nzapa. Bible atene nga so Nzapa ayeke sara ande mbeni ye so ade lâ oko lo sara ni ape na abungbi ti vorongo nzapa kue so ayeke sara ye na lege ni ape.

Bible atene nyen la ayeke si ande na abungbi ti vorongo Nzapa?

Prophétie ni: Mbeti ti Apocalypse ahaka Babylone, Ngangu gbata na mbeni wali-ndumba so aduti na ndö ti mbeni bengba nyama ti ngonda. A yeke si ande na mbeni ngoi, bengba nyama ti ngonda ni so ayeke na adidi bale-oko ayeke tourné ande na terê ti wali-ndumba ni ti fâ lo.—Apocalypse 17:3, 5, 16.

Nda ti prophétie ni: Wali-ndumba ni wala Babylone, Ngangu gbata aye ti sara tënë ti abungbi ti vorongo nzapa ti wataka kue so Nzapa ake ni.a Nga, bengba nyama ti ngonda ni aye ti sara tënë ti Bendo ti gigi (UN).b So wali-ndumba ni aduti na ndö ti bengba nyama ti ngonda ni aye ti fa so abungbi ti vorongo nzapa ti wataka ayeke gi ti sara ngangu na ndö ti abungbi ti poroso wala même ti komande na ndö ti ala. So nyama ti ngonda ni ayeke tourné ande na terê ti wali-ndumba ni ti fâ lo, a ye ti fa so Bendo ti gigi nga na bungbi ti amara so amû maboko na lo ayeke tourné ande na terê ti abungbi ti vorongo nzapa ti wataka kue ti dunia so ti futi ala. A yeke duti ande mbeni ye so ade ti si lâ oko ape.

Tongana nyen la a yeke futi ande abungbi ti vorongo nzapa ti wataka?

Prophétie ni: “Adidi bale-oko so mo bâ, nga na nyama ti ngonda ni, ala yeke ke ande wali-ndumba so . . . na ala yeke te ande nyama ti terê ti lo si ala yeke gbi lo kue na wâ. Biani, Nzapa azia na yâ ti bê ti ala [na yâ ti bê ti agbia ti dunia so] ti sara ye so ayeke na bê ti lo, so ti tene ti sara ye so ayeke na bê ti ala na mungo royaume ti ala na nyama ti ngonda ni . . . gï na yâ ti lango oko, asioni ye so ayeke si ande na lo: kuâ, mua na kota nzara; na a yeke gbi lo ande kue na wâ, ngbanga ti so Jéhovahc Nzapa so afâ ngbanga ti lo ayeke ngangu.”—Apocalypse 17:16, 17; 18:8.

Nda ti prophétie ni: Nzapa ayeke zia ande na yâ ti bê ti amara ti “sara ye so ayeke na bê ti lo”. Lo yeke pusu ande agbia ti dunia so ti mû “royaume ti ala” wala komandema ti ala na Bendo ti gigi. Na pekoni, ngangu so Bendo ti gigi akiri awara na mbage ti agbia ti dunia so ayeke mû ande lege na lo ti futi abungbi ti vorongo nzapa ti wataka kue. Ye ni so ayeke si ande “gï na yâ ti lango oko” na ayeke ahon gbungo li ti azo, na mingi ti azo ayeke ku terê ti ala na ni ape.—Apocalypse 18:21.

Ngbanga ti nyen la a yeke futi ande abungbi ti vorongo nzapa ti wataka?

Prophétie ni: “Asiokpari ti lo abungbi na ndö ti terê juska na yayu, nga Nzapa adabe na aye ti kirikiri so lo sara.”—Apocalypse 18:5.

Nda ti prophétie ni: Abungbi ti vorongo nzapa ti wataka asara aye ti sioni teti angu mingi. Bâ ambeni ‘siokpari’ so ala sara so ayeke pusu ande Nzapa ti futi ala:

Ala mû mbage na aye ti poroso. Jésus Christ atene lani na adisciple ti lo ti yôro terê ti ala na yâ ti aye ti poroso ape, me ti zia bê ti ala na ndö ti Royaume ti Nzapa so ayeke mbeni gouvernement so ayeke na yayu na so ayeke mû ande place ti gouvernement ti azo.d (Daniel 2:44; Matthieu 6:9, 10; Jean 6:15; 18:36). Me abungbi ti vorongo nzapa ti wataka asara ti ala ye ague nde na tënë ti Jésus ni so. So Babylone, Ngangu gbata ayôro terê ti lo na yâ ti aye ti poroso na lo yeke be-ta-zo na Nzapa ape, a yeke ndani la prophétie ti mbeti ti Apocalypse atene so lo sara “lango-sioni”. Ni la, Bible airi lo “kota wali-ndumba.”—Apocalypse 17:1, 2; Jacques 4:4.



Ala sara ye ti ngangu na zo. Mbeti ti Apocalypse afa so abungbi ti vorongo nzapa ti wataka la ayeke na gunda ti kuâ ti “azo kue so a fâ ala na ndö ti sese.” (Apocalypse 18:24). Abungbi ti vorongo nzapa ti wataka ayeke fa na amembre ti ala ape ti sara ye na siriri. Ambeni ayeke pusu même amembre ti ala ni ti sara bira nga na aye ti terroriste.



Ala sara bê ti ye. Abungbi ti vorongo nzapa ti wataka ayeke vivre na ‘gbâ ti aye ti ala so ayeke aye ti nginza so kamene asara ala na ni pëpe’. (Apocalypse 17:4; 18:7). Mingi ti abungbi ti vorongo nzapa ti wataka asara kua na komandema ti ala nga na songo so ala yeke na ni na ambeni zo ti gi ti wara na mosoro. Mara ti sarango bê ti ye tongaso anzere na Nzapa ape.—Tite 1:7.



Ala tene mvene. Afango ye ti abungbi ti vorongo nzapa ti wataka nga na asarango ye ti ala ague nde na atâ tënë so ayeke na yâ ti Bible.e Ye so asara si afango ye nga asarango ye ti abungbi ti vorongo nzapa ti wataka ayeke pusu azo ti sara aye so ague nde na ye so bê ti Nzapa aye. Ndani la prophétie ti Apocalypse airi Babylone, Ngangu gbata, “mama . . . ti aye ti saleté ti sese so.”—Apocalypse 17:5; 18:23.

Eskê a yeke futi ande abungbi ti vorongo Nzapa kue?

Ên-ën. Mbeti ti Apocalypse asara tënë ti azo nde nde so alondo na yâ ti dunia kue so a iri ala “azo mingi mingi”. (Apocalypse 7:9). So azo mingi mingi ni so ‘ayü yongoro vuru bongo’ afa so ala yeke be-ta-zo na Nzapa nga ala sara ye so bê ti lo aye. Ni la, Bible afa so na ngoi ti kota ye ti vundu, azo mingi mingi ni so ayeke sö ande kuâ nga Nzapa ayeke futi ande awato ti lo nga na abungbi ti vorongo nzapa ti wataka kue (Apocalypse 7:13, 14; 19:11, 19-21). Azo mingi mingi so ayü yongoro vuru bongo ayeke na yâ ti tâ bungbi ti vorongo Nzapa, na ala yeke ngbâ ande ti voro Nzapa lakue lakue.f

Tënë ti futingo abungbi ti vorongo nzapa ti wataka abâ mo tongana nyen?

Bê ti mo ayeke dë ti hinga so Nzapa ake asarango ye ti abungbi ti vorongo nzapa ti wataka so ayeke ason bê ti azo. Ye so asara si mo peut ti duti na beku ndali ti gigi ti kekereke, nga ti hinga so na yâ ti kete ngoi Nzapa ayeke futi azo kue so ayeke na gbe ti afango ye ti abungbi ti vorongo nzapa ti wataka so asara si azo ague nde na ye so bê ti lo aye.

Mo peut nga ti duti sûr so mbeni nzoni lege ti vorongo Nzapa ayeke dä. Bible atene so “atâ zo ti vorongo Nzapa ayeke voro Babâ na yingo nga na tâ tënë, ndali ti so, biani, Babâ ni ayeke gi mara ti azo tongaso ti voro lo.” (Jean 4:23). Nzapa atene: “Azo ti mbi, ala sigi na yâ ti gbata so [Babylone, Ngangu gbata], tongana ala ye ti yô mbage ti asiokpari ti lo pëpe, nga tongana ala ye ti wara mbage ti asioni ye so ayeke si na lo so pëpe.” (Apocalypse 18:4, 5). Nzapa aye ti tene azo so ayeke voro lo asara ye alingbi na atâ tënë so ayeke na yâ ti Bible (1 Timothée 2:3, 4). Lo mû zendo so azo so asara ye alingbi na tënë ni so ayeke wara ande fini ti lakue lakue.—1 Jean 2:17.