Atënë so ayeke na yâ ti Bible: Beku ndali ti aréfugié

Ngu oko oko, azo kutu mingi abâ so ala doit ti kpe ndo ti ala. Eskê mo kue ye ni so asi na mo awe? Tongana a yeke tongaso, hinga so mbeni zo apeut ti aidé mo. Nzapa amû na mo mbeni pendere beku ti gigi ti kekereke, na Bible apeut ti aidé mo ti hinga ye mingi na ndö ni.

Christos Stylianide, so ayeke commissaire ti Union européenne,a atene: “Aréfugié nga na azo so akpe ndo ti alab abezoin ti tene a sara mbeni ye hio ti aidé ala, na ala bezoin nga mbeni beku ti nzoni gigi ti kekereke.” Azo so ayeke na beku ayeke na nzoni bango ndo na ndö ti gigi ti ala ti kekereke. Me na ndö ni, aréfugié abezoin dengo bê so apeut ti aidé ala ti hon ndö ti aye so ala vivre ni.

“Na temps so mbi kpe lani kodro ti mbi nga mbi zia azo ti sewa ti mbi, a sara mbi lani nzoni ape na mbi bâ so mbi peut ti gbu lê ni ape. Mbeto nga vundu asara mbi na mbi gi bê ti mbi.”—Emmanuel, na Haïti.

Eskê mo kue mo yeke na mara ti pensé ti Emmanuel so? Tongana mo kpe ndo ti mo, mo bezoin ti wara dengo bê nga na beku. Tongana nyen la Bible apeut ti aidé mo?

Atënë ti dengo bê so ayeke na yâ ti Bible

Bible atene: ‘Jéhovahc . . . aye awande.’—Deutéronome 10:17, 18.

Bible atene: “Jéhovah ayeke nduru na azo kue so ayeke iri lo.”—Psaume 145:18.

Bible atene: “Tâ Nzapa alingbi ti pensé lâ oko pëpe ti sara ye ti sioni . . . Lo so ngangu ti lo ahon angangu kue ayeke ba pëpe yâ ti ye so ayeke mbilimbili.”—Job 34:10, 12.

Ye so afa so Nzapa la ayeke na gunda ti apasi ti mo ape. Aye ti ngangu so mo yeke vivre ni wala atara so mo yeke wara ayeke punition ti Nzapa ape.

Atënë ti beku so ayeke na yâ ti Bible

Bible afa ye so Nzapa ayeke sara ande ndali ti e. Bâ tongana nyen la beku ni so a-aidé azo so akpe ndo ti ala.

Bible atene: ‘Nzapa ayeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.’—Apocalypse 21:4.

Ye so afa so apasi ti e ayeke hunzi ande. Nzapa amû zendo ti zi akpale kue so apeut ti sara si e bâ so laso e yeke na beku ape.

“Na yâ ti kete ngoi, Nzapa ayeke hunzi ande tënë ti injustice nga na aye ti sioni so e yeke vivre ni laso. Beku ni so a-aidé mbi ti ngbâ ti zia li ti mbi na ndö ti ngoi so apasi kue ayeke hunzi ande.”—Karla, na El Salvador.

Bible atene: “Azo ayeke dabe ti ala na angbene ye encore ape, nga azo ayeke bi bê ti ala na ni pëpe.”—Ésaïe 65:17.

Ye so afa so e yeke dabe ti e encore ape na aye ti sioni so asi na e ândö. Nzapa ayeke sara kue ti tene aye ti sioni so asi na e ândö, e dabe ti e na ni encore ape.

“Bible amû zendo so, e yeke dabe ti e encore ape na aye ti vundu nga na pasi so e bâ ndali ti kuâ ti mbeni zo so e ye lo. Beku ni so a-aidé mbi ti gbu ngangu na yâ ti angoi ti kpale ndali ti so mbi hinga so fafadeso aye ni so kue ayeke hunzi.”—Natalia, na Ukraine.

Bible atene: “Nzapa ti yayu ayeke sigi na mbeni royaume so ayeke . . . neka aroyaume so kue nga ayeke futi ala biaku biaku.”—Daniel 2:44.

Ye so afa so Royaume ti Nzapa so ayeke na yayu ayeke komande ande na ndö ti sese kue. Fafadeso, Royaume ti Nzapa so ayeke na yayu ayeke mû ande place ti agouvernement ti azo. Royaume ni so ayeke ga ande na tâ siriri, nzoni duti, sarango ye ti mbilimbili nga aye kue ayeke ga ande nzoni.—Michée 4:3, 4.

“So mbi hinga so akpale tongana sarango ye ti ngangu na zo, tënë ti kangbi, dutingo na sioni pensé na ndö ti zo nga na tënë ti mara ayeke gï tënë ti kete ngoi, ye so a mû na mbi courage. Fafadeso, Royaume ti Jéhovah ayeke hunzi ande akpale so kue.”—Mustafa, na Moyen-Orient.

Atënë ti ndara so ayeke na yâ ti Bible

Atënë ti ndara so ayeke na yâ ti Bible apeut ti aidé mo ti accepté ye so asi na mo. A peut nga ti aidé mo na temps so dutingo ti mo achangé, na tapande, tongana mo perdre aye ti mo. Bâ tongana nyen la amama-ndia so ayeke na gbe ni ge aga na aye ti nzoni na aréfugié:

Bible atene: “Atâa tongana mbeni zo ayeke na aye mingi, fini ti lo alondo pëpe na aye so lo yeke na ni.”—Luc 12:15.

Tongana nyen la atënë ti ndara so apeut ti aidé mo ti hon ndö ti kpale so: Li ti mo apeut ti ga kirikiri ndali ti aye so asi nga vundu ayeke sara mo ndali ti so mo perdre aye ti mo. Me, tongana mo hinga so fini ti mo ayeke kota ye mingi ahon aye so mo perdre, a peut ti aidé mo ti sara vundu mingi ape.

“Fini ayeke kota ye mingi ahon aye ti sese. Na yâ ti ambeni ye, aye so mo yeke na ni wala nginza apeut ti aidé mo ape.”—Natalia, na Ukraine.

Bible atene: “Tene pëpe: ‘Nyen la si ngoi ti ândö ayeke nzoni ahon ti laso so?’”—Zo-ti-fa-tene 7:10.

Tongana nyen la atënë ti ndara so apeut ti aidé mo ti hon ndö ti kpale so: Situation ti mo ti laso apeut ti duti ngangu mingi, me tongana mo gi ti haka ni ape na ngbene dutingo ti mo ayeke aidé mo ti gi bê ti mo mingi ape.

“So mbi yeda na situation ti mbi a-aidé mbi ti duti na nzoni bango ndo.”—Eli, na Rwanda.

Bible atene: “Tongana e yeke na kobe na bongo, so alingbi na e awe.”—1 Timothée 6:8.

Tongana nyen la atënë ti ndara so apeut ti aidé mo ti hon ndö ti kpale so: A yeke kota ye zia bê ti e gï na ndö ti aye so e yeke na ni. Ti zia bê gï na ndö ti aye so e yeke na ni apeut ti aidé e ti gi bê ti e ahon ndö ni ape.

“Bible a-aidé mbi ti pensé ape gï na ndö ti aye so e perdre, me ti bâ aye ni na mbeni lege nde. Mbi na wali ti mbi, e yeke na ngia ndali ti so e yeke na fini nga e yeke na securité.”—Ivan, na Ukraine.

Bible atene: “Tongaso, ye kue so ala ye azo asara na ala, ala sara ni na azo ni nga.”—Matthieu 7:12.

Tongana nyen la atënë ti ndara so apeut ti aidé mo ti hon ndö ti kpale so: Mo na azo apeut ti mä terê, tongana mo kanga bê na ala nga mo sara ye na ala na nzoni bê. Tongana mo sara tongaso, a peut ti sara si mo na azo ayeke mä terê nga ala ke mo senge senge ape.

“Mingi ti azo aye mingi ti tene a ne ala, a sara ye na ala na nzoni bê nga a ye ala. Ye so a sara si mo yeke duti na nzoni songo na azo ti ndo so mo yeke dä.”—Angelo, na Sri Lanka.

Bible atene: “Ala hunda na Nzapa aye so agbu bê ti ala, na fade siriri ti Nzapa . . . ayeke bata bê ti ala nga na lege ti hingango ndo ti ala.”—aPhilippien 4:6, 7.

Tongana nyen la atënë ti ndara so apeut ti aidé mo ti hon ndö ti kpale so: Fa na Nzapa na yâ ti sambela atënë ti bê ti mo, aye so mo yeke na bezoin ni, aye so asara mo mbeto nga na agingo bê ti mo. Mara ti asambela tongaso apeut ti sara si mo gi bê ti mo mingi ape nga ti sara achangement alingbi na fini situation ti mo ni.

“Mbi yeke sambela Nzapa lakue tongana mbi yeke na akpale nga lo yeke kiri tënë na mbi. Ye so mbi manda na yâ ti Bible asara si mbi yeke na siriri ti bê.”—Yol, na Soudan du Sud.

“Anzoni wango so ayeke na yâ ti Bible a-aidé mbi ti wara siriri ti bê nga ti hon ndö ti ngangu kpale so mbi wara.”—Valentina, na Ukraine.

“Bê ti mbi adë ti hinga so Jéhovah amû zendo ti mbeni nzoni gigi ti kekereke.”—Emmanuel, na Haïti.

Eskê mo ye ti hinga ye mingi na ndö ti zendo ti Bible so adë bê zo nga so amû na zo beku? Ngbanga ti nyen la mo peut ti sara confiance na ni? Hunda na aTémoin ti Jéhovah ti tene ala manda Bible na mo senge senge. A yeke nzere na ala ti aidé mo.