Mbeti ti Ésaïe apeut ti dë bê ti mo

1-2. Tongana nyen la Jéhovah ayeke aidé e na ngoi so vundu asara e?

IMAGINÉ mbeni molenge so vundu asara lo. Lo yeke toto sân ti kaï. Peut-être sewa ti lo ayeke quitté ti gue na mbeni fini ndo na lo doit ti quitté akamarade ti lo. Wala peut-être vundu asara lo ndali ti mbeni faute so lo sara. Na mara ti angoi tongaso, nyen la mbeni mama so aye molenge ti lo ayeke sara? Lo yeke gbu molenge ni na kate, lo mä lo nga lo yeke tene na molenge ni so lo ye lo.

² Na yâ ti Bible, Jéhovah ahaka lo wani na mbeni mama so aye molenge ti lo na so ayeke dë bê ti lo, lo tene: “Legeoko tongana ti so mbeni mama ayeke dë bê ti molenge ti lo, mbi yeke ngbâ ti dë bê ti ala.” (És. 66:13). Jéhovah aye e mingi ahon ti so mbeni babâ wala mama aye na molenge ti lo (És. 49:15). Na lege ti Bible, Jéhovah ayeke dë bê ti e nga lo yeke mû na e ngangu so e bezoin ni na ngoi so e découragé wala e yeke bâ pasi.—aRom. 15:4.

3. Nyen la e yeke bâ na yâ ti article so?

³ Mbeti ti Ésaïe asi singo na atënë ti dengo bê so alondo na Jéhovah (És. 40:1). Babâ ti e so aye e apusu Ésaïe ti sû atënë so na ngoi so azo ti Juda ayeke lani na gbâ ti akpale. E nga kue e yeke vivre na “angoi ti akpale so ayeke ngangu na zo ti kanga bê na yâ ni” na e yeke na bezoin ti dengo bê (2 Tim. 3:1). Zia e bâ ambeni versê ti mbeti ti Ésaïe so apeut ti dë bê ti e nga ti kpengba e na ngoi so (1) mbeni ye achangé na yâ ti gigi ti e gï hio tongaso, (2) e ngbâ ti bâ so tënë ayeke na li ti e ndali ti afaute so e sara ândö wala (3) e yeke na vundu ndali ti so e perdre mbeni zo so e ye lo.

TONGANA AYE ACHANGÉ GÏ HIO TONGASO NA YÂ TI GIGI TI E

4. Tongana mbeni ye achangé gï hio tongaso na yâ ti gigi ti e apeut ti sara e tongana nyen?

⁴ Gigi ti e apeut ti changé gï hio tongaso (Zo-ti. 9:11; 1 aCor. 7:31). E peut ti wara kpale ti seni, kpale ti nginza, bira apeut ti londo na yâ ti kodro ti e wala kua so e yeke sara na Jéhovah apeut ti changé. Mara ti achangement so apeut ti sara si e gi bê ti e wala li ti e aga kirikiri. A yeke na lege ni tongana e hunda terê ti e, e tene: ‘Mbi yeke sara tongana nyen?’ Ita-koli Joseph, so asara kua na Béthel ngu 17 na a tokua lo na territoire, atene: “A yeke lani ngangu na mbi ti komanse mbeni fini gigi na peko ti so mbi ninga na Béthel. Mbi hinga ye ti sara ape wala mbi hinga ape ye so ayeke si ande na mbi.” Atënë ti dengo bê wa la Jéhovah atene na e na lege ti Ésaïe tongana ye achangé gï hio tongaso na yâ ti gigi ti e?

5. Nyen la Jéhovah atene lo yeke sara na e na Ésaïe 42:16? (Bâ nga foto.)

⁵ Diko Ésaïe 42:16. Jéhovah atene lo yeke hon na azo so lê ti ala akanga na lege ti fä na ndö ti alege so ala hinga ni pëpe nga lo yeke sara si vukongo ndo aga lumière. Tongana aye achangé gï hio tongaso na yâ ti gigi ti e, e peut ti bâ so e yeke tongana “awaziba,” e yeke na ndö ti ‘alege so e hinga ni pëpe’, e yeke na yâ ti “vukongo ndo” nga e yeke na “ando so ayeke kpangbala pëpe”. E peut ti bâ so e yeke tambela na yâ ti mbeni kota gbako na e hinga lege so e yeke hon dä ape. Me Jéhovah atene so atâa nyen la asi na e, lo yeke fa lege na e nga lo yeke dö e lâ oko ti zia ape. Lo yeke gbu maboko ti e lo hon na e na yâ ti vukongo ndo, lo yeke za lumière na ndö ti lege ti e nga ndo so ayeke kpangbala pëpe, lo yeke sara si a ga kpangbala. Jéhovah ayeke sara ni tongana nyen? Lo yeke sara ni na lege ti anzoni wango so lo mû na e na yâ ti Bible nga na bungbi ti lo (Ps. 119:105; És. 30:21). Lo yeke sara nga kua na aita ti e nga na ambeni zo ti mû maboko na e. Même tongana e hinga ape ye so ayeke si ande na e, e yeke na confiance so Jéhovah ayeke aidé e lakue ndali ti so lo ye e nga lo comprendre e.—És. 41:10; 1 Pi. 5:​6, 7.

6. Tongana aye achangé gï hio tongaso na yâ ti gigi ti e, nyen la e peut ti duti sûr na ni?

⁶ Joseph, so e sara tënë ti lo fade, afa tongana nyen la Jéhovah aye lo na wali ti lo nga amû maboko na ala na peko ti so ala quitté Béthel. Lo tene: “E bâ so Jéhovah andoye e nga lo mû maboko na e na ngoi ti changement so. Lo aidé nga e na lege ti aita. Lo aidé e ti wara aye so e yeke na bezoin ni, lo dë bê ti e na tâ ngoi ni nga lo ngbâ ti sara ni.” Tongana dutingo ti mo achangé gï hio tongaso, duti sûr so Jéhovah ayeke kpengba mo nga lo yeke fa lege na mo même tongana changement ni ayeke ngangu tongana nyen (És. 54:10; 58:11). Joseph akiri atene: “Mbi ye mingi atënë ti yâ ti mbeni bia ti e so ayeke nde, so atene: ‘Ti kekereke ni mbi hinga ‘pe, me mbi ‘ke sûr lo ‘ke zia mbi pëpe.’a Ti vrai ni, tongana aye asi tongana ti so e leke ape, e hinga so Jéhovah ayeke aidé e.”

TONGANA E BÂ SO TËNË AYEKE LAKUE NA LI TI E

7. Ambeni ita so asara afaute ândö apeut ti ngbâ ti pensé nyen?

⁷ Tongana e fa na a-ancien mbeni kota siokpari so e sara, na ndoye ala yeke aidé e nga e yeke sara kue ti kiri ti sara ni ape (aProv. 28:13; Jacq. 5:​14-16; 1 Jean 1:9). Me même na peko ti so a sara nzoni bê na e, e peut ti ngbâ ti bâ so tënë ayeke na li ti e. E peut ti pensé e tene: ‘Tongana nyen la Jéhovah apeut ti pardonné mbi ndali ti mara ti ye so mbi sara so?’ (2 aCor. 2:7). E peut ti pensé tongaso ndali ti so a peut ti duti ngangu ti girisa afaute so e sara ândö na afaute ni so apeut ti sara si e sara vundu aninga. Gbia David atene: “Siriri ayeke na yâ ti abio ti mbi pëpe ndali ti siokpari ti mbi. Amembre ti terê ti mbi kue akui nga mbi woko kue.” (Ps. 38:​3, 8). Tongana na ambeni ngoi mo pensé tongaso ndali ti afaute so mo sara ândö, mbeti ti Ésaïe apeut ti dë bê ti mo.

8-9. Ésaïe 1:18 atene nyen na ndö ti pardon ti Jéhovah?

⁸ Diko Ésaïe 1:18. Jéhovah amû mbeni tapande ti fa tongana nyen la lo yeke pardonné e kue kue kue. Lo tene même tongana asiokpari ti e “abe tongana mênë,” lo yeke sara si ‘a vuru tongana neige.’ Tongana mbeni tache so abe tongana mênë ayeke na terê ti bongo ti e, a yeke ngangu ti zi ni. Me Jéhovah atene tongana lo pardonné e awe, lo yeke dabe ti lo na afaute ti e encore ape.

⁹ Bâ tapande ti Gbia David. Atâa so lo gi lani wali ti mbeni zo nga lo fâ zo, Jéhovah apardonné lo nga na pekoni Jéhovah atene lo yeke koli so ayeke be-ta-zo (2 Sam. 11:​3, 4, 14, 15; 12:13; 1 aGbia 9:​4, 5). Tongana Jéhovah apensé na David, lo yeke dabe ti lo na dutingo be-ta-zo ti lo, me pëpe na afaute so lo sara ândö. Legeoko nga, na ndoye Jéhovah ayeke pardonné e tongana e changé bê ti e nga lo yeke aidé e ti ngbâ ti sara na lo na nzoni conscience. Mbeni tënë ti dengo bê wa la e yeke wara na yâ ti mbeti ti Ésaïe tongana e bâ so tënë ayeke lakue na li ti e?

10. Tënë ti dengo bê wa la ayeke na Ésaïe 38:17?

¹⁰ Diko Ésaïe 38:17 nga na kete tënë na gbe ni. A peut ti kiri na peko ti tënë “mo bi asiokpari ti mbi kue yongoro na peko ti mo” na tënë “mo zi asiokpari ti mbi kue na lê ti mo.” Versê so afa Jéhovah so amû afaute ti mbeni zo so achangé bê ti lo, lo bi ni na peko ti lo na ndo so lo peut ti bâ ni encore ape wala lo peut ti pensé na ni encore ape. Mbeni mbeti so asara tënë na ndö ti Bible atene a peut ti fa nda ti tënë ni tongaso: “Mo sara si [asiokpari ti mbi] aduti mo bâ mo tene mbi sara ni lâ oko ape.” Tongaso, tongana Jéhovah apardonné asiokpari ti e, na lo a yeke mo bâ mo tene e sara ni lâ oko ape. Tongana Jéhovah apardonné e, lo yeke punir e ndali ti afaute so e sara ape ndali ti so lo yeke dabe ti lo na ni ape. Lo tene: “Mbi yeke dabe ti mbi na asiokpari ti mo pëpe.” (És. 43:25). Tënë so adë bê ti e mingi. Tongana Jéhovah so ayeke Juge so ahon atanga ni kue ayeke dabe ti lo na asiokpari ti e ape, e yeke zo wa ti ngbâ ti dabe ti e na ni?

11. Atâa nyen la e sara ândö, nyen la Jéhovah ayeke bâ? (Bâ nga foto.)

¹¹ Na ngoi kue so e bâ so tënë ayeke na li ti e, a yeke nzoni e dabe ti e na atënë so Jéhovah atene ti dë bê ti e. Pardon ti lo ayeke tâ pardon. Kamene ayeke sara lo ape ndali ti afaute so e sara ândö nga lo yeke tongana azo ape so ayeke ngbâ lakue ti dabe na afaute so e sara (És. 57:16). Aye so e sara ândö ayeke kota ye na lo ape, me aye so e yeke sara laso nga na aye so e yeke sara ande la ayeke kota ye na lo (És. 55:7). Jéhovah Nzapa ti e aye e mingi nga lo ye ti pardonné e na ngoi so e sara afaute. Tongaso, a yeke nzoni e zia lâ oko ape si afaute so e sara ândö asara si e perdre ngia so e yeke na ni laso wala akanga lege na e ti wara anzoni ye so ayeke ga ande.

TONGANA VUNDU ASARA E NDALI TI MBENI ZO SO E YE LO SO AKUI

12. Tongana mbeni zo so e ye lo akui apeut ti sara e tongana nyen?

¹² Tongana mbeni zo so e ye lo akui, vundu apeut ti sara e aninga. Na ambeni ngoi, e peut ti hunda terê ti e na ndani so Jéhovah azia lege si zo so e ye lo akui. Wâ agbi lani babâ na mama ti mbeni ita-koli so iri ti lo ayeke Michaël. Lo tene: “Vundu ahon ndö ti mbi, nga ngonzo asara mbi na terê ti Jéhovah so azia lege si ala kui. Mbi hinga so lo la lo sara si ala kui ape, me lo kanga lege na ni ape.” Peut-être mo pensé tongaso awe. Na mara ti angoi ti vundu tongaso, Jéhovah ayeke dë bê ti e tongana nyen nga beku wa la lo mû na e?

13. Zendo wa la Jéhovah amû na e na Ésaïe 25:8?

¹³ Diko Ésaïe 25:8. Jéhovah amû zendo ti “mene ande kuâ biaku biaku”. Imaginé ngoi so kuâ ayeke duti dä encore ape. Mo yeke sara ande vundu lâ oko ape ndali ti so mo perdre mbeni zo so mo ye lo (És. 35:10). Mo yeke kiri ti sara vundu lâ oko ape ndali ti so mo bâ mbeti so afa ndo so a lu mbeni zo so mo ye lo mingi dä. Me mo yeke na beku so azo so mo ye ala mingi ayeke duti lakue na terê ti mo, ala yeke na fini nga na nzoni seni. Zendo so ayeke tënë ti tere ape, a yeke tâ tënë ndali ti so Jéhovah la amû ni nga lo yeke na ngangu ti sara si aga tâ tënë.—Apoc. 21:​4, 5.

14. Tongana mo gbu li na ndö ti beku ti zingongo ti akuâ, a yeke sara mo tongana nyen? (Ésaïe 26:19). (Bâ nga foto.)

¹⁴ Diko Ésaïe 26:19. Jéhovah ayeke mene ande kuâ nga lo yeke kiri na fini azo ti e so e ye ala mingi. Tongana lo yeke sara tënë ti azo so akui, lo tene: “Azo ti mbi so akui ayeke londo ande.” Tënë so aye ti tene so ala yeke ti lo. Lo ngbâ ti dabe ti lo na ala. Tongana ngoi so lo leke alingbi, lo yeke zingo ala na kuâ. Tongana ti so ngu ayeke sara si akugbe so akui azingo, Jéhovah, so amû fini na aye kue, ayeke zingo ande azo so e ye ala na kuâ. A yeke nzere ande na e mingi ti yamba ala.—Bâ Marc 5:42.

15. Tongana mbeni zo so e ye lo akui, zendo ti zingongo ti akuâ apeut ti aidé e tongana nyen?

¹⁵ Atâa so zendo so Nzapa amû ti zingo akuâ azi vundu ti e biani biani ape, bê ti e apeut ti dë ti hinga so Jéhovah agirisa ape azo ti e so e ye ala so akui. Beku so adë lani bê ti Michaël so e sara tënë ti lo fade. Lo tene: “Ésaïe 26:19 a-aidé mbi ti comprendre so Jéhovah aye babâ na mama ti mbi mingi. Lo ngbâ ti dabe ti lo na ala na lo yeke ngbâ ti sara ni juska lo zingo ala na kuâ na ngoi so lo leke. Tënë so adë bê ti mbi nga akpengba mbi.” Zia e nga kue e bata na li ti e zendo so Nzapa amû na e ti kiri ti wara terê na azo so e ye ala so akui. Tongana e sara tongaso, vundu ayeke hon ndö ti e ape.

16. Versê wa la adë bê ti mo na ngoi ti mbeni ngangu kpale?

¹⁶ E bâ fade ambeni versê na yâ ti mbeti ti Ésaïe so apeut ti dë bê ti e tongana aye achangé gï hio tongaso na yâ ti gigi ti e, tongana e bâ so tënë ayeke lakue na li ti e nga tongana vundu asara e. E kiri singila mingi na Jéhovah so adë bê ti e na lege ti Bible (Ps. 94:19). Eskê mbeni mbilimbili versê ayeke dä so adë bê ti mo na ngoi so mo wara mbeni ngangu kpale? Bata ni na li ti mo tongana lege ayeke dä, sû ni na yâ ti mbeni mbeti wala zia ni na mbeni ndo so mo yeke bâ ni lakue. Nga zia si atënë ti Jéhovah, Babâ ti e ti yayu so aye e, adë bê ti mo.