Yeda so Jéhovah apardonné mo awe

1-2. Tongana e changé bê ti e, nyen la Jéhovah ayeke sara? A yeke sara e tongana nyen? (Bâ nga foto .)

GBIA David ahinga ye so ayeke sara zo tongana lo bâ so tënë ayeke na li ti lo ndali ti asiokpari so lo sara ândö (Ps. 40:12; 51:3; kete li ti tënë). Lo sara ambeni kota faute na yâ ti fini ti lo. Me lo changé bê ti lo na Jéhovah apardonné lo (2 Sam. 12:13). Terê ti David anzere lani mingi na ngoi so lo bâ so Jéhovah apardonné lo.—Ps. 32:1.

² Tongana ti David, e nga kue bê ti e apeut ti dë tongana e bâ so Jéhovah apardonné e. Bê ti e ayeke dë ti hinga so Jéhovah ayeke pardonné e, même tongana e sara akota siokpari, tongana e changé bê ti e biani, e fa siokpari ti e na gigi nga e sara kue ti kiri ti sara ni ape (aProv. 28:13; Kus 26:20; 1 Jean 1:9). Terê ti e ayeke nzere mingi na ngoi so Jéhovah apardonné asiokpari ti e, lo yeke kiri encore na ndö ni ape nga lo yeke punir e ndali ni ape.—Ézéch. 33:16

3-4. Mbeni ita-wali apensé nyen na peko ti so lo wara batême? Nyen la e yeke bâ na yâ ti article so?

³ Me na ambeni ngoi, a yeke ngangu na ambeni zo ti yeda so Jéhovah apardonné ala awe. Bâ ye so asi na Jennifer so akono na yâ ti tâ tënë. Na ngoi so lo ngbâ maseka, lo yeke sara asioni ye na lo honde ni na babâ na mama ti lo. Me ambeni ngu na pekoni, lo sara achangement, lo mû terê ti lo na Jéhovah na lo wara batême. Lo tene: “Ândö mbi sara lango-sioni, mbi nyon sämba ahon ndö ni, mbi sara ngonzo mingi nga aye ti sese ayeke kota mingi na lê ti mbi. Na li ti mbi, mbi hinga so, so mbi voro lani yanga na Jéhovah ti pardonné mbi nga mbi changé bê ti mbi, sandaga ti Christ asara si mbi ga nzoni awe. Me na bê ti mbi, mbi tene so ade Jéhovah apardonné mbi ape.”

⁴ Eskê na ambeni ngoi a yeke ngangu na mo ti yeda so Jéhovah apardonné mo awe ndali ti afaute so mo sara ândö? Jéhovah aye ti tene e hinga so lo yeke sara nzoni bê na e tongana ti so lo sara lani na David. Na yâ ti article so, e yeke bâ ndani so e doit ti yeda so Jéhovah apardonné e awe nga nyen la apeut ti aidé e ti yeda na ni.

NDANI SO E DOIT TI YEDA SO JÉHOVAH APARDONNÉ E AWE

5. Tënë wa la Satan aye ti tene e yeda na ni? Mû mbeni tapande ti fa ni.

⁵ Tongana e yeda so Jéhovah apardonné e awe, e yeke tï na yâ ti kûkû ti Satan ape. Girisa ape so Satan ayeke sara kue ti sara si e zia ti voro Jéhovah. Ti sara ni, lo peut ti gi ti sara si e bâ so Jéhovah apeut ti pardonné e lâ oko ape. Gbu li na ndö ti ye so asi lani na koli so ayeke na Corinthe so a zi lo na yâ ti congrégation ndali ti so lo sara lango-sioni (1 aCor. 5:​1, 5, 13). Ambeni ngoi na pekoni, lo changé bê ti lo. Me Satan aye si aita ti congrégation apardonné lo ape nga ala kiri ayamba lo na popo ti ala ape. Na oko ngoi ni, Satan aye si lo bâ so a peut ti pardonné lo ape, tongaso si “vundu so asara lo mingi awoko lo” na lo zia ti sara na Jéhovah. Juska laso, ye so Satan aye ti sara nga na akode ti lo achangé ape. Me “e hinga nzoni mingi aye so lo ye ti sara.”—2 aCor. 2:​5-11.

6. Nyen la e peut ti sara ti tene e bâ so tënë ayeke na li ti e encore ape?

⁶ Tongana e yeda so Jéhovah apardonné e awe, e yeke bâ so tënë ayeke na li ti e encore ape. Tongana e sara siokpari, vundu ayeke sara e (Ps. 51:17). So ayeke mbeni nzoni ye. Conscience ti e apeut ti pusu e ti sara ambeni changement (2 aCor. 7:​10, 11). Me tongana a ninga na peko ti so e changé bê ti e, e ngbâ ti bâ so tënë ayeke na li ti e, e peut ti découragé. Ye oko, tongana e yeda so Jéhovah apardonné e biani, e yeke bâ so tënë ayeke na li ti e encore ape. Na pekoni, e yeke sara na Jéhovah tongana ti so lo ye: na nzoni conscience nga na ngia mingi (aCol. 1: 10, 11; 2 Tim. 1:3). Me nyen la apeut ti aidé e ti hinga so Jéhovah apardonné e awe?

NYEN LA APEUT TI AIDÉ E TI HINGA SO JÉHOVAH APARDONNÉ E AWE?

7-8. Nyen la Jéhovah afa na Moïse na ndö ti lo wani? A sara si e yeke sûr na nyen? (Exode 34:​6, 7).

⁷ Gbu li na ndö ti aye so Jéhovah afa na ndö ti lo. Na tapande, bâ ye so Jéhovah atene na Moïse na ndö ti Hoto ti Sinaï.a (Diko Exode 34:​6, 7.) Atâa so Jéhovah ayeke na anzoni sarango ye mingi, lo soro ti fa na Moïse so lo yeke “Nzapa so asara nzoni bê na zo nga so abâ mawa ti zo”. So Jéhovah ayeke sara ye tongaso, eskê lo yeke ke ti pardonné mbeni wakua ti lo so asara siokpari na achangé biani bê ti lo? Ên-ën. Tongana Jéhovah apardonné zo ni ape, andâ lo yeke na bê ape nga lo yeke bâ mawa ti zo ape, aye so Jéhovah apeut lâ oko ti sara ape.

⁸ E peut ti duti sûr so, so Jéhovah atene lo yeke sara nzoni bê na zo, tâ tënë la lo tene so ndali ti so lo yeke tene mvene ape (Ps. 31:5). Tongaso, e peut ti yeda na tënë so lo tene. Tongana a yeke ngangu na mo ti bâ so Jéhovah apardonné mo awe, hunda terê ti mo: ‘Eskê mbi hinga so Jéhovah ayeke biani Nzapa so ayeke sara ye na nzoni bê nga lo yeke bâ mawa ti zo na so lo yeke ke lâ oko ape ti pardonné zo kue so asara siokpari na lo changé bê ti lo? Tongaso, eskê a yeke nzoni ape ti tene mbi bâ so lo pardonné mbi?’

9. Nyen la Psaume 32:5 afa na e na ndö ti fason so Jéhovah ayeke pardonné asiokpari ti e?

⁹ Gbu li na ndö ti ye so Jéhovah afa na e na yâ ti Bible na ndö ti fason so lo yeke pardonné e. Na tapande, gbu li na ndö ti tënë so David atene na yâ ti mbeni psaume na ndö ti fason so Jéhovah ayeke pardonné e. (Diko Psaume 32:5.) David atene: “Mo pardonné asiokpari ti mbi.” Tënë ti Hébreu so a kiri peko ni na tënë “pardonné” aye ti tene “ti yô mbeni ye na nduzu” wala “ti hon na mbeni ye.” Tongaso, na ngoi so Jéhovah apardonné lani David, a yeke mo bâ mo tene lo yô asiokpari ti lo, lo hon na ni. Vundu ti peko ti siokpari ti David ayeke lani tongana mbeni nengo kungba, me so Jéhovah azi ni na ndö ti lo ahon na ni, bê ti lo adë (Ps. 32:​2-4). E kue e peut nga ti wara mara ti dengo bê so. Tongana e sara siokpari na e changé bê ti e biani, vundu adoit ti ngbâ ti sara e ape ndali ti so Jéhovah ayô ye so ane e lo hon na ni awe.

10-11. Nyen la tënë “nduru ti pardonné zo” afa na e na ndö ti Jéhovah? (Psaume 86:5).

¹⁰ Diko Psaume 86:5. Ge, David atene so Jéhovah ayeke “nduru ti pardonné zo.” Mbeni mbeti so afa nda ti atënë ti Bible atene na ndö ti Jéhovah, atene: “[Lo] yeke ‘Zo so ayeke pardonné zo,’ a yeke na yâ ti ‘asarango ye ti lo.’” Ngbanga ti nyen la e tene so a yeke na yâ ti asarango ye ti Jéhovah ti pardonné zo? Na yâ ti psaume so, David atene nga atene: “Mo fa tâ ndoye ti mo mingi na mbage ti azo kue so airi ndo na mo.” Na yâ ti article so ahon, e manda so Jéhovah amû zendo ti fâ tâ ndoye na azo so aye lo nga ti dö ala ti zia lâ oko ape. Azo kue so achangé bê ti ala, tâ ndoye so apusu lo ti “pardonné [ala] na bê ti lo kue.” (És. 55:​7, kete tënë na gbe ni). Tongana a yeke ngangu na mo ti yeda so Nzapa apardonné mo, mo peut ti hunda terê ti mo: ‘Eskê mbi hinga so Jéhovah ayeke nduru ti pardonné azo kue so achangé bê ti ala na atoto na lo ti sara nzoni bê na ala? Tongana a yeke tongaso, mbi peut ti duti sûr so lo yeke pardonné mbi nga kue na ngoi so mbi toto na lo ti sara nzoni bê na mbi nga ti pardonné mbi.’

¹¹ Bê ti e adë ti hinga so Jéhovah acomprendre dutingo ti e ti awasiokpari nzoni mingi (Ps. 139:​1, 2). Zia e bâ tënë so David atene na yâ ti mbeni psaume nde nga tongana nyen la tënë so apeut nga ti aidé e ti hinga so Jéhovah aye ti pardonné e.

YE SO JÉHOVAH ADABE TI LO NA NI

12-13. Ti gue oko na Psaume 103:​14, nyen la Jéhovah adabe ti lo na ni na ndö ti e? Ye so apusu lo ti sara nyen?

¹² Diko Psaume 103:14. David atene so Jéhovah ‘adabe ti lo so e yeke fuku ti sese.’ Na lege ti atënë so, David afa mbeni raison so ndali ni Jéhovah ayeke nduru ti pardonné awakua ti lo so achangé bê ti ala: Lo girisa lâ oko ape dutingo ti e ti awasiokpari. Ti comprendre ni nzoni, zia e gbu li na ndö ti atënë ti David so.

¹³ David atene so Jéhovah ‘ahinga nzoni mingi lege so a leke na e’. Lo sara Adam “na fuku ti sese” na lo hinga nzoni mingi so azo ayeke na alimite, na tapande, ala bezoin ti te ye, ti lango nga ti wu pupu (Gen. 2:7). Me ndali ti so Adam na Ève asara siokpari, azo ayeke fuku ti sese na mbeni lege nde. E yeke fuku ti sese ndali ti so a dü e na siokpari na terê ti e, ye so asara si a yeke ngangu na e ape ti sara sioni ye. Jéhovah ahinga dutingo ti e ti awasiokpari nga tongana ti so David atene na ndö ti lo, “lo dabe ti lo” na ni. A sara si lakue lo sara ye na e na nzoni bê. Na nduru tënë, e peut ti fa peko ti atënë ti David so tongaso: Jéhovah acomprendre so na ambeni ngoi e peut ti sara faute, tongana e sara ni si e changé bê ti e, lo yeke sara nzoni bê na e nga lo yeke pardonné e.—Ps. 78:​38, 39.

14. (a) Mbeni tënë nde wa la David atene ti fa fason so Jéhovah ayeke pardonné e? (Psaume 103:12). (b) Nyen la e peut ti manda na lege ti fason so Jéhovah apardonné David? (Bâ nga encadré “Fason so Jéhovah ayeke pardonné siokpari ti e nga lo girisa ni.”)

¹⁴ Mbeni ye nde wa la e peut ti manda na ndö ti fason so Jéhovah ayeke pardonné na e? (Diko Psaume 103:12.) David atene so tongana Jéhovah apardonné e, Lo zia asiokpari ti e yongoro na e “tongana ti so ndo so lâ asigi dä [est] ayo mingi na ndo so lâ alinda dä [ouest]”. Popo ti ndo so lâ asigi dä nga na ti ndo so lâ alinda dä ayo mingi. Ye so afa na e nyen na ndö ti asiokpari so Jéhovah apardonné ni awe? Na ndö ti versê so, mbeni mbeti atene so, so a tene Nzapa amû siokpari ti e ahon na ni yongoro, a yeke tongana fion ti mbeni ye so ayeke dä encore ape. Tongaso, e peut ti duti sûr so lo yeke dabe ti lo na ni encore ape nga lo yeke dabe ti e na ni encore ape. Mango fion ti mbeni ye apeut ti dabe ti e na mbeni ye so asi ândö. Me tongana Jéhovah apardonné e, mbeni ye so apeut ti sara si lo dabe ti lo na ni nga ti punir e ndali ni ayeke dä ape.—Ézéch. 18:​21, 22; Kus. 3:19.

15. Nyen la e peut ti sara tongana e bâ so ade Jéhovah apardonné afaute so e sara ândö ape?

¹⁵ Tongana nyen la atënë ti David so ayeke na Psaume chapitre 103 a-aidé e ti yeda so Jéhovah apardonné e awe? Tongana e bâ so ade Jéhovah apardonné afaute so e sara ândö ape, e peut ti hunda terê ti e: ‘Eskê mbi girisa ye so Jéhovah adabe ti lo na ni, so ti tene, mbi girisa so Jéhovah adabe ti lo na dutingo ti mbi ti wasiokpari nga so lo yeke pardonné zo so asara siokpari na so achangé bê ti lo tongana ti mbi? Eskê mbi dabe ti mbi nga na ye so Jéhovah agirisa, so ti tene, mbi dabe ti mbi so afaute ti mbi so Jéhovah apardonné awe lo yeke kiri encore na ndö ni ape?’ Jéhovah ayeke ngbâ ti pensé na afaute so e sara ândö ape. A yeke nzoni e sara nga tongaso (Ps. 130:3). Tongana e yeda so Jéhovah apardonné e awe, e yeke ngbâ ti pensé ape so tënë ayeke na li ti e nga e yeke ngbâ ti sara na lo na ngia.

16. Mû mbeni tapande ti fa tongana nyen la a yeke sioni ti ngbâ ti pensé so ade Jéhovah apardonné e ape. (Bâ nga foto.)

¹⁶ Gbu li na ndö ti tapande so. Ti kiri na ndö ti asiokpari so e sara ândö ayeke mo bâ mo tene lê ti e ayeke bâ gï rétroviseur na ngoi so e yeke kpe na oto. Ngoi na ngoi, a yeke nzoni ti bâ lê ti rétroviseur ti kpe mbeni kpale so apeut ti ga na peko. Me ti kpe na oto sân ti tene kpale asi, mo doit ti zia lê ti mo gï na devant. Legeoko nga, a yeke nzoni ngoi na ngoi ti pensé na afaute so e sara ândö, a peut ti aidé e ti kpe ti sara mara ni encore. Me tongana e ngbâ ti pensé gï na afaute so e sara ândö so Jéhovah apardonné awe, e yeke perdre ngia ti e nga e yeke sara na lo nzoni ape. Tongaso, zia e zia li ti e gï na ndö ti sarango na Jéhovah nga e ngbâ ti gbu li na ndö ti azendo ti kekereke so na ngoi ni azo ayeke ‘dabe ti ala encore ape’ na asioni ye.—És. 65:17; aProv. 4:25.

NGBÂ TI YEDA SO JÉHOVAH APARDONNÉ MO AWE

17. Ngbanga ti nyen la e doit ti ngbâ ti yeda so Jéhovah aye e nga lo yeke pardonné e?

¹⁷ E doit ti ngbâ ti yeda so Jéhovah aye e nga lo yeke pardonné e (1 Jean 3:19). Ngbanga ti nyen? Ngbanga ti so Satan ayeke ngbâ ti gi ti sara si e bâ so a peut ti ye e ape wala ti pardonné e ape. Satan ayeke sara aye ni so ti gi ti sara si e zia ti sara na Jéhovah. Lo yeke sara ni encore mingi ndali ti so lo hinga so ngoi ti lo angbâ mingi ape (Apoc. 12:12). Me e doit ti zia lo lo sö benda ape.

18. Nyen la mo peut ti sara ti duti sûr so Jéhovah aye mo nga lo yeke lakue nduru ti pardonné mo?

¹⁸ Ti ngbâ ti duti sûr so Jéhovah aye mo, sara ye alingbi na awango so ayeke na yâ ti article so ahon so. Ti yeda so Jéhovah apardonné mo awe, gbu li na ndö ti tënë so Jéhovah atene na ndö ti lo wani. Gbu li na ndö ti tënë so azo so asû Bible atene na ndö ti fason so lo yeke pardonné na zo. Girisa ape so lo hinga nzoni mingi dutingo ti mo ti wasiokpari na lo yeke sara ye na mo na nzoni bê. Girisa nga ape so tongana lo pardonné zo, lo pardonné lo na bê ti lo kue. Na pekoni, mo peut ti duti na ngia ndali ti so mo hinga na bê ti mo kue so Jéhovah asara nzoni bê na mo, nga mo peut ti tene tongana David: “Merci Jéhovah ndali ti so mo pardonné ‘asiokpari ti mbi.’”—Ps. 32:5.