ATËNË SO AZO AHUNDA

Ambele use wa la bazengele Paul asara tënë ni na aGalate 4:24?

Na peko ti so Paul asara tënë ti songo so ayeke na popo ti Abraham na Sara nga na Agar, lo tene: “Aye so aduti tongana mbeni toli; awali so aduti tapande ti ambele use.” (aGal. 4:​22-24). Ândö, e tene so ambele use so ayeke mbele ti Ndia nga na fini mbele. Ye oko, na peko ti so e gi nda ti tënë ni nzoni, e bâ so e bezoin ti changé fason so e mä na yâ ni. Na bango ni, Paul ayeke sara lani tënë ti fini mbele ape, me lo yeke sara tënë ti mbele ti Abraham. Bâ ambeni raison so ndali ni e tene tongaso la.a

Paul atingbi Agar so ayeke ngbâa na Hoto ti Sinaï (aGal. 4:25). Agar aye ti sara tënë ti mbele ti Ndia so a mû lani na azo ti Israël na Hoto ti Sinaï na ngu 1513 kozo na ngoi ti e (Ex. 19:​5, 6). Mbeni zo so ayeke mbilimbili-kue ape apeut ti bata Ndia tâ na lege ni ape. Tongaso, Ndia ni adabe ti aJuif so ala yeke angbâa ti siokpari. Mbele ti Ndia a-aidé nga azo ti Israël ti hinga Messie so gï lo la lo peut ti sara ye alingbi na Ndia tâ na lege ni. Na ngoi so Messie amû fini ti lo so ayeke mbilimbili-kue na sandaga, lo zi azo so ayeke mbilimbili-kue ape na gbe ti ngbâa ti siokpari na kuâ (aGal. 3:​19, 24, 25). Na peko ti so Jésus asara ye so bê ti Nzapa aye, a bezoin Ndia ni encore ape.—aRom. 10:4.

Paul atene Agar ayeke nde na Sara, “wali so ayeke ngbâa pëpe” so adü “na lege ti mbeni zendo.” (aGal. 4:23). Zendo so ayeke mbele ti Abraham (aGal. 3:29; 4:​28, 30). A sara tënë ni na Genèse 22:18 atene: “Na lege ti hale ti mo [Abraham], amara kue ti sese ayeke wara ande tënë nzoni ndali ti ala wani ngbanga ti so mo mä yanga ti mbi.”

Mbele so a te na Abraham afa ambeni ye na ndö ti zendo so Jéhovah amû lani na yaka ti Éden (Gen. 3:15). A fa so “hale” so a sara tënë ti lo kozo ayeke duti mbeni hale ti Abraham. Paul atene so, kozoni kue “hale” ni aye ti sara tënë ti Jésus Christ. Me azo so ‘ayeke ti Christ,’ so ti tene azo 144000, so a soro ala ti gue na yayu, so ayeke komande ande legeoko na Jésus na yâ ti Royaume ti lo, ayeke nga mbage ti hale so (aGal. 3:​16, 29; Apoc. 14:​1-3). Azo so ayeda na Jésus nga amä yanga ti lo ayeke wara ande gbâ ti anzoni ye grâce na zendo so Nzapa amû lani na Abraham.

Ngbanga ti nyen la Paul asara kua na “toli” so? Lo ye lani ti fa so aJuif, so aye gï ti bata Ndia, ayeke duti tongana Agar so angbâ ti duti ngbâa. Me tongana ala yeda na kota mbage ti “hale” ti Abraham, so ti tene Jésus Christ, ala yeke duti tongana Sara, so ayeke ngbâa ape. A yeke zi ala biani na gbe ti siokpari na kuâ (Jean 8:​32-34). Tongana ala yeda na Jésus ape, a ye ti fa so ala comprendre ape ye so a sigi mbilimbili na mbele ti Ndia ni ndali ni so a yeke ti tene a gue na ala na Christ.

Gbâ ti azo ti Galatie so Paul atokua mbeti na ala ayeke lani aJuif ape nga ala yeke na gbe ti Ndia lâ oko ape. Ambeni Juif aye gï lani ti tene aChrétien so ayeke aJuif ape asara ye alingbi na Ndia, na tapande ti fâ ganza. Paul atene so a yeke ye ti buba ti tene ala ga ‘angbâa’ ti Ndia ndali ti so ala wara awe liberté so alondo na Christ.—aGal. 5:​1, 10-14.