Kasa desizion ti amba ti mo ape

1-2. Ngbanga ti nyen la na ambeni ngoi e yeke mû adesizion so ayeke nde na ti amba ti e Chrétien?

ESKÊ a si awe so mbeni zo akasa mo ndali ti mbeni desizion so mo mû? Eskê a si awe so mo kasa mbeni ita ndali ti desizion so lo mû? Kite ayeke dä ape so mingi ti e ayeke kiri tënë en na ahunda so.

² A yeke nzoni li ti e akpe ape so na ambeni ngoi adesizion ti e ague nde na ti aita. Ngbanga ti nyen? Ngbanga ti so e kue e yeke nde nde. Zo oko oko ayeke na bango ndo ti lo. Ngobo ti e, sewa ti e nga na aye so e vivre la ayeke sara ngangu na ndö ti pensé ti e. Me a yeke nzoni e zia ape si bango ndo ti e so ayeke nde na ti amba ti e abuba siriri nga na beoko ti congrégation.—aÉph. 4:3.

3. Nyen la apeut ti sara si e fâ ngbanga na li ti mbeni ita ndali ti desizion so lo mû?

³ Tongana mbeni ita amû mbeni desizion so ayeke ti bê ti e ape, e peut ti bâ so e bezoin ti aidé lo ti changé bango ndo ti lo wala e peut ti fa na ambeni ita so desizion ti lo ni ayeke na lege ni ape. Peut-être nzoni bibe la apusu e ti sara tongaso. E ye aita ti e na e ye ti tene sioni asi na ala ape (aProv. 17:17). Tongaso, e ye ape ti tene ala mû mbeni desizion so ala yeke regretté ni kekereke wala so apeut ti buba songo ti ala na Jéhovah.

4-5. Nyen la a yeke nzoni e sara tongana mbeni ita amû desizion ti sara mbeni ye so ayeke nde na ti so e peut ti sara?

⁴ Eskê a yeke nzoni e sara lisoro na ita ni ti fa na lo so e bâ so desizion so lo mû ayeke na lege ni ape? Na yâ ti ambeni ye, a yeke nzoni ti sara ni, me na yâ ti ambeni ye a yeke nzoni ape. Na tapande, tongana e bâ so ita ni apensé ti sara mbeni ye so ague nde na mbeni ndia ti Bible, a yeke nzoni e gi ti aidé lo ti changé bango ndo ti lo ndali ti so e ye lo (aProv. 27:​5, 6). Me, nyen la a yeke nzoni e sara tongana mbeni ita amû desizion ti sara mbeni ye so adoro mbeni ndia ti Nzapa ape me ayeke nde na ye so e peut ti sara? Bible afa kiringo tënë ni. A tene e “fâ ngbanga pëpe na ndö ti atënë ti bê so ayeke nde na ti e.”—aRom. 14:1.

⁵ Me, a peut ti duti ngangu na e ti yeda na desizion so zo ni amû. Na yâ ti article so, e yeke bâ ndani so a yeke nzoni e kasa pëpe adesizion so amba ti e amû nga tongana nyen la e peut ti sara ni. Me kozoni, zia e bâ ambeni ye so na yâ ni a yeke na zo oko oko ti mû desizion so apeut ti sara si e fâ ngbanga na ndö ti aita ndali ni.

ADESIZION SO A BÂ ZO WANI SO E PEUT TI KASA AITA NDALI NI

6-7. Fa ambeni ye so na yâ ni mbeni ita apeut ti mû desizion so e peut ti kasa ni.

⁶ Tongana ti so e tene fade, ndo so e kono dä wala aye so e vivre ni apeut ti sara si e luti nganganga na ndö ti ambeni tënë. E peut ti pensé so amba ti e ayeke na oko bango ndo ti e, me a peut ti duti tongaso ape. Zia e bâ ambeni tapande. Tapande 1: Kozo ti tene mbeni ita-koli amanda tâ tënë, babâ ti lo ayeke nyon lani sämba mingi. Na ngoi ti mbeni ngia, lo bâ ambeni ita ayeke nyon sämba. Bê ti lo ason na lo tene na ala so ye so ala sara so ayeke na lege ni ape. Tapande 2: Terê ti mbeni ita-wali ason lani ngangu, na pekoni lo wara sava. Ambeni ngoi na pekoni, lo mä so a wara mara kobela ti lo ni na terê ti mbeni ita-wali. Lo ye ti aidé ita-wali ni, ni la lo tene na lo ti sara kua na a-oko kode so lo sara kua lani na ni. Na tapande, lo fa na lo ti te ambeni kobe ape wala ti nyon mbeni yorö ti hôpital wala ti kodro. Tapande 3: Mbeni ita-koli ayeke lani membre ti mbeni bungbi ti vorongo nzapa ti wataka. Lo ke aye so lo sara ândö. Na ngoi so lo mä so mbeni ita ague na lungo kuâ so a gue na ni kozo na mbeni eglize, bê ti lo ason ngangu.a

⁷ Bâ ambeni tapande ni encore. Tapande 4: Mbeni ita-koli akono na ngoi so mingi ti azo abâ so a yeke na lege ni ape ti tene akoli abata kuä ti yanga ti ala wala awali ayü pantalon ti gue na ni na bungbi wala na fango tënë. Atâa so ita-koli ni ahinga achangement so bungbi ti Jéhovah asara na ndö ti tënë so, lo ngbâ ti tene na azo so a yeke na lege ni ape ti tene aita-koli abata kuä ti yanga ti ala nga ti tene aita-wali ayü pantalon ague na ni na bungbi nga na fango tënë. Tapande 5: Mbeni ancien ahinga mbeni ita-koli so amanda mbeni ye na peko ti bac; ambeni ngoi na pekoni lo zia tâ tënë. Fadeso, mbeni ita-koli so ade maseka na yâ ti congrégation ti ancien ni amû desizion ti manda mbeni ye na peko ti bac. Ancien ni agi bê ti lo na lo gi ti pusu ita-koli ni nga na babâ na mama ti lo ti changé bango ndo ti ala.

8. (a) Nyen la apeut ti sara si mbeni babâ wala mama akasa ambeni babâ na mama? (b) Nyen la apeut ti si tongana e yeke kasa ambeni ita ti congrégation?

⁸ Bâ mbeni ye so apeut ti si so andu ababâ na amama. Tapande 6: So mo yeke babâ wala mama, mo yeke sara ngangu ti fa ye na amolenge ti mo “alingbi na fango lege nga na wango ti gbotongo mê so alondo na Jéhovah.” (aÉph. 6:4). Me na bango ni, ambeni babâ na amama ayeda na amolenge ti ala ti sara ambeni ye so mo ke na amolenge ti mo ti sara. Na tapande, ala yeda na amolenge ti ala ti kiri hio ape na yanga-da wala ala vo téléphone na amolenge ti ala atâa so ala de kete. A sara si molenge ti mo abâ so mo sara ye ahon ndö ni. Molenge ti mo ahunda mo atene: “Ngbanga ti nyen la mo sara ye tongana babâ na mama ti kamarade ti mbi ape?” Tongana ye tongaso asi, a peut ti sara si mo kasa ambeni babâ na mama. Ti vrai ni, tongana mbeni Chrétien amû desizion so ayeke nde na ti e, a peut ti sara si e kasa lo. Na tapande, e peut ti pensé so lo sara kua na nginza ti lo na lege ni ape, lo voyagé ahon ndö ni wala angia so lo soro ti sara ayeke na lege ni ape. Me e doit ti zia ape si apensé ti e aga ye so ayeke kota mingi ahon beoko ti congrégation.

9. Ngbanga ti nyen la a yeke nzoni e fâ ngbanga ape na li ti amba ti e ndali ti adesizion so ala mû so abâ ala wani? (Bâ nga foto.)

⁹ Tongana adesizion so mbeni Chrétien amû ayeke nde na ti mbeni, a ye lakue ape ti tene so mbeni ayeke na raison nga mbeni ayeke na raison ape (aRom. 14:5). So Bible atene e doit ti duti na “oko bibe”, a ye ti tene e kue e doit ti sara ye alingbi na andia ti Jéhovah, me a ye ti tene ape so e doit ti duti na oko pensé na ndö ti aye kue (2 aCor. 13:11). E peut ti haka adesizion so abâ zo wani na ye so e soro ti voyagé na ni ti gue na mbeni ndo. Mingi ni, ti gue na mbeni oko ndo, alege apeut ti duti nde nde. E yeke soro lege so anzere na e nga alingbi na ngangu ti e. Legeoko nga, aChrétien apeut ti mû desizion nde nde na ndö ti aye so abâ zo wani. Me ye so e kue e ye ayeke oko: E yeke gi ti zia ngia na bê ti Jéhovah. Tongaso, e yeke fâ ngbanga na li ti amba ti e ape ndali ti adesizion so ala mû so abâ ala wani.—Mat. 7:1; 1 aThes. 4:11.

NDANI SO E DOIT TI YEDA NA DESIZION SO AMBA TI E AMÛ NA NDÖ TI YE SO ABÂ ZO WANI

10. Ti gue oko na Jacques 4:​12, nyen la e yeke na droit ti sara ape? Ngbanga ti nyen?

¹⁰ Bible afa gbâ ti araison so ndali ni e doit ti yeda na desizion ti amba ti e. Ambeni raison ni la. Na ndö ti aye so Bible asara tënë dä ape, e yeke na droit ape ti fa na amba ti e ye so ala doit ti sara. (Diko Jacques 4:12.) Jéhovah la ayeke Zo ti lungo ndia nga Juge so ayeke mbilimbili. Gï lo oko la lo yeke na droit ti fa na e ye so e doit ti sara nga na ye so e doit ti sara ape. Aita ti e ayeke kiri tënë na lo, me na e ape (aRom. 14:10). E yeke na droit ape ti fâ ngbanga wala ti kasa amba ti e na ngoi so ala sara ye nde na ti so e pensé.b

11. Tongana nyen la e peut ti sara si beoko aduti na yâ ti congrégation? (Bâ nga foto.)

¹¹ Jéhovah aye ti tene awakua ti lo aduti beoko me ala duti gï na oko sarango ye ape. Ti vrai ni, Nzapa aye ti tene aye aduti nde nde. E bâ ni na yâ ti aye so lo créé. Na tapande, tongana mo fâ akugbe use na ndö ti mbeni keke, a peut ti duti tâ gï même ape. Gbu nga li na ndö ti azo. Na popo ti azo so ahon milliard miombe na ndö ti sese, a yeke ngangu ti wara azo use so akpa terê nga so ayeke na amême sarango ye. Jéhovah acréé e ti duti nde nde. Lo ye ape ti tene e duti tâ gï tongana mbeni zo, me lo ye ti tene e duti beoko. Tongaso, tongana amba ti e asara ye nde na ti e, e yeke yeda na ni nga bê ti e ayeke son na terê ti ala ape. Ye so ayeke kota ye na e ayeke ti tene siriri nga na beoko aduti na yâ ti congrégation ahon ti tene amba ti e asara ye tongana ti so e pensé fade.—aRom. 14:19.

LEGE TI BÂ NA NENE NI BANGO NDO TI AMBA TI E

12-13. Nyen la a yeke nzoni e girisa ape tongana e bâ so mbeni zo amû “sioni lege”? (aGalate 6:1; bâ encadré “Tongana mo yeda ape na desizion so mbeni ita amû.”)

¹² Na ngoi so amba ti e amû desizion na ndö ti ye so abâ gï ala. Hunda terê ti mo: ‘Eskê zo ni amû “mbeni sioni lege” wala ye so lo sara ayeke gï nde na ti mbi?’ Tongana zo ni amû sioni lege, so ti tene lo sara mbeni ye so ague nde na mbeni commandement ti Bible, hunda terê ti mo: ‘Eskê mbi la mbi doit ti kiri na lo na nzoni lege wala mbeni zo nde ayeke dä na tapande mbeni ancien la apeut ti sara ni nzoni?’ Tongana mo bâ so mo la mo peut ti kiri na zo ni na nzoni lege, sara ni na nzoni bê. (Diko aGalate 6:1.) Me mingi ni, e peut ti bâ so zo ni amû sioni lege ape, me ye so lo sara ayeke nde na ti so e pensé fade. Tongana a yeke tongaso, duti na kite na ndö ti lo ape wala sara sioni tënë ti desizion so lo mû ape. Yeda so lo yeke na droit ti mû desizion na ndö ti ye so abâ gï lo nga fâ ngbanga na ndö ti lo ape.—aRom. 14:​2-4.

¹³ Gbu li na ndö ti tapande so: Tongana mo na mbeni kamarade ti mo ague na mbeni restaurant ti te ye, eskê mo yeke hunda na lo ti commandé gï oko kobe so mo commandé? Ên-ën! Lo yeke na droit ti commandé kobe ti bê ti lo na mo yeke yeda na ni. Même tongana mo ye kobe so lo commandé ape, a bâ mo ape ndali ti so mo la mo yeke te ni ape. Mo yeke ye nga ape ti tene kamarade ti mo ni la acommandé na mo kobe so lo ye. Legeoko nga, e peut ti fa so e ne amba ti e na lege so e zia ala mû desizion na ndö ti aye so abâ gï ala sân ti pusu ala ti sara ye so e ye.

14. Tongana nyen la mo peut ti maï beoko na ngoi so mo yeke mû desizion na ndö ti aye so abâ gï mo? (1 aCorinthien 8:​12, 13).

¹⁴ Na ngoi so mo yeke mû desizion na ndö ti aye so abâ gï mo. Mo peut ti maï beoko na lege so mo sara kue ti son bê ti amba ti mo ape. (Diko 1 aCorinthien 8:​12, 13.) Na ambeni ngoi, mo peut ti bâ so ye so mo ye ti sara “ndia” amû lege na mo ti sara ni, so ti tene a yeke sioni ape. Me tongana a yeke son bê ti mbeni ita, eskê a yeke “sara nzoni” na lo?c (1 aCor. 10:​23, 24). Na yâ ti aye tongaso ahon ti luti nganganga na ndö ti adroit ti mo, pensé na ye so agbu bê ti amba ti mo (aRom. 15:1). Me e tene fade so amba ti e adoit ti kasa e ape ndali ti adesizion so e mû na ndö ti ye so abâ gï e wani. E nga e doit ti kasa adesizion ti ala ape. Me a yeke nzoni e girisa ape wango so ayeke na aRomain 12:​18, so atene: “Tongana lege ni ayeke dä na ala lingbi ti sara mbeni ye, zia ala duti na siriri na azo kue.” Tongaso, e yeke sara ye kue so e peut ti sara ti ngbâ ti duti na siriri na amba ti e nga e yeke kpe ti son bê ti ala senge senge.

15. Tongana nyen la a-ancien apeut ti sara si beoko aduti na yâ ti congrégation? (1 aCorinthien 4:6).

¹⁵ A-ancien ayeke kasa pëpe aita ndali ti desizion so ala mû. A-ancien ayeke sara si beoko aduti na yâ ti congrégation na lege so ala yeke sigi pëpe na andia na ndö ti aye so abâ gï zo wani nga ala yeke ‘sara ye pëpe ahon ti so a sû’ na yâ ti Bible. (Diko 1 aCorinthien 4:6.) Ye so aye nga ti tene ala yeke tene pëpe atënë so ague nde na awango ti Bible so ayeke na yâ ti ambeti ti e. Na ndö ni, tongana mbeni ita ahunda a-ancien ti aidé lo, ala yeke sara hange ti mû na zo ni pëpe wango so ague oko na ye so ala pensé. Me ala yeke mû na lo wango so ague oko na Bible.—És. 48:​17, 18.

16. Tongana nyen la mbeni ancien apeut ti fa so lo bâ na nene ni desizion so bungbi ti a-ancien amû?

¹⁶ Mbeni ancien adoit nga ti fa so lo yeda na desizion so bungbi ti a-ancien amû. Na peko ti so a-ancien asambela ti wara yingo vulu nga ala gbu li nzoni na ndö ti aye so Bible afa, ala yeke mû desizion legeoko. Ancien oko oko adoit ti yeda na desizion so même tongana bango ndo ti lo ayeke nde (aÉph. 5:17). A-ancien ayeke sara nga kue ti mû tâ gï peko ti afango lege ti Bible nga na ambeti ti e na ala yeke gï pëpe ti sara si ague oko na bango ndo ti ala. Na tapande, mbeni ancien ayeke mû pëpe mbeni tënë oko so ayeke na yâ ti mbeni article ti ambeti ti e ti fa so bango ndo ti lo ayeke na lege ni sân ti bâ tanga ti article ni kue.

17. Tongana e yeda na desizion ti amba ti e, nzoni ti nyen la ayeke ga na pekoni?

¹⁷ Tongana ti so e bâ fade, e yeke nde nde. Zo oko oko ayeke na bango ndo ti lo nga na aye so agbu bê ti lo, na ye so ayeke nzoni. So e londo na ando nde nde nga sarango ye ti e ayeke nde nde, a sara si congrégation ayeke pendere ndo ti duti dä nga e yeke nzoni. Ahon ti zia si bango ndo ti e nga na asarango ye ti e so ayeke nde nde aga na akpale, e yeke yeda na adesizion so amba ti e amû. Tongana e sara tongaso, siriri nga na beoko ayeke ngbâ na yâ ti congrégation nga e yeke duti na ngia.—Ps. 133:1; Mat. 5:9.