Ngbâ nduru na Jéhovah na ngoi so mo yeke manda mbeni ye na peko ti bac

1-2. (a) Tongana mo soro ti manda mbeni ye na peko ti bac, nyen la mo bezoin ti ngbâ ti sara? (b) Ti “ngbâ ti tambela mbilimbili na ndö ti oko lege ni so” aye ti tene nyen? (aPhilippien 3:16).

AMBENI wakua ti Jéhovah amû desizion ti manda mbeni ye na peko ti bac. Ala bâ so tongana ala sara ni, a peut ti sara si ala wara kua so ayeke aidé ala ti wara aye so ala yeke na bezoin ni ti ngbâ ti sara na kua ti Jéhovah. Tongana mo mû desizion ti manda mbeni ye na peko ti bac, nyen la mo peut ti sara ti ngbâ nduru na Jéhovah? (Jacq. 4:8a). Kite ayeke dä ape so mo wara atara na ngoi so mo yeke gue lani na ekole. Fadeso, mo bezoin ti “ngbâ ti tambela mbilimbili na ndö ti oko lege ni so”, so ti tene mo bezoin ti ngbâ ti sara na Jéhovah be-ta-zo tongana ti so mo sara awe.—Diko aPhilippien 3:16.

² Fani mingi, a sara kua na tënë ti Grec so a kiri peko ni na “tambela mbilimbili na ndö ti oko lege ni so” ti sara tënë ti aturugu so ayeke tambela legeoko sân ti luti wala sân ti kiri na peko. Tongana mo mû desizion ti manda mbeni ye na peko ti bac, mo bezoin ti ngbâ ti “tambela ti gue na devant” na yâ ti kua ti Jéhovah sân ti luti wala sân ti kiri na peko. Na yâ ti article so, e yeke bâ amama-ndia osio ti Bible so ayeke aidé mo. Mo hinga amama-ndia so awe. Mo sara kua na ni awe nga mo bezoin ti ngbâ ti sara kua na ni na ngoi so mo yeke manda mbeni ye na peko ti bac nga na peko ti so mo hunzi mandango ye ni.

NGBÂ TI SARA AYE SO MO YEKE SARA KA TI VORO NA JÉHOVAH

3. Na ngoi so mo yeke manda mbeni ye na peko ti bac, kpale wa la mo peut ti wara so andu aye so mo yeke sara ka ti voro Jéhovah?

³ Kpale ni. Mandango ye na peko ti bac apeut ti sara si mo yeke na aye mingi ti sara lâ na lâ. So mo ye mingi ti manda ye ni nzoni, mo peut ti komanse ti bâ kua ti Jéhovah na nene ni tongana ti kozo encore ape. Mo peut même ti komanse ti bâ na nene ni ape gango na abungbi, fango tënë, mandango ye mo wani nga na sambela.—Apoc. 2:4.

4. Nyen la apeut ti aidé mo ti ‘duti na ye mingi ti sara na yâ ti kusala ti Seigneur’? (1 aCorinthien 15:58).

⁴ Diko 1 aCorinthien 15:58. Ti tene mbeni vélo ague na devant, mo doit ti ngbâ ti pédalé ni. Legeoko nga, ti ngbâ ti duti na kpengba songo na Jéhovah, mo bezoin ti sara kua ti lo mingi. Ndani la Bible atene so e doit ti ‘duti na aye mingi ti sara na yâ ti kusala ti Seigneur’. Tënë so aye pëpe gï ti sara tënë ti ngoi so mo doit ti mû ti sara kua ti Jéhovah. Me a ye nga ti tene a doit ti duti kota ye na lê ti mo. Girisa ape so ti voro Jéhovah la ayeke kota ye mingi na yâ ti fini ti mo, me mandango mbeti ape (Mat. 22:37). Ita-wali Samantha so ade maseka atene: “Mbi mû lani zendo mbi tene tongana mandango mbeti ti mbi amû lege na mbi ti sara na Jéhovah ape, mbi yeke zia ni.”

5. Nyen la mo peut ti sara ti ngbâ ti sara kua ti Jéhovah mingi?

⁵ Ye so mo peut ti sara kozo ti komanse ti manda mbeni ye na peko ti bac. Sara kue ti ngbâ ti zia Jéhovah na kozo ndo na yâ ti fini ti mo. Hunda terê ti mo: ‘Nyen la mbi leke ti sara ti ngbâ lakue ti ga na abungbi, ti fa tënë nga ti manda ye mbi wani?’ (Jos. 1:8; Mat. 28:​19, 20; aHéb. 10:25). Mo peut nga ti hunda terê ti mo: ‘Tongana nyen la mbi wara lani ngoi ti sara aye ni so na ngoi so mbi yeke gue na ekole?’ Tongana mo bâ so ambeni ye ayeke dä so mo sara ni lani nzoni ape, nyen la mo peut ti sara ti changé ni laso? Leke na bê ti mo ti ngbâ ti sara kua ti Jéhovah mingi na ngoi so mo yeke manda mbeni ye na peko ti bac. A yeke nzoni ti manda ye nzoni, me zia pëpe si a buba songo ti mo na Jéhovah.a—Mat. 6:24.

6. Ahunda wa la mo peut ti hunda terê ti mo na ni ti bâ wala mo ngbâ ti zia Jéhovah na kozo ndo na yâ ti fini ti mo? (Bâ nga foto.)

⁶ Na peko ti so mo komanse ti manda mbeni ye na peko ti bac, nze oko oko, mo peut ti gi ti bâ wala mo ngbâ ti zia Jéhovah na kozo ndo na yâ ti fini ti mo. Ti sara ni, mo peut ti hunda terê ti mo na ahunda so: ‘Eskê fani mingi mbi yeke manke abungbi wala mbi ga na retard? Eskê fani mingi li ti mbi ayeke na ndö ti adevoir na ngoi so mbi yeke na bungbi? Eskê mbi yeke mä bungbi gï na téléphone ahon ti gue na popo ti aita?’ Mo peut nga ti hunda terê ti mo na ahunda so: ‘Eskê mbi yeke sambela nga mbi yeke diko Bible mingi encore ape? Eskê mbi yeke gue na fango tënë gï ndali ti so mbi doit ti gue na mbi ye ti tene fango tënë ni ahunzi hio?’ Tongana mo kiri tënë en na mbeni oko ti ahunda so wala na ambeni hunda so, sara achangement. Zia pëpe si mandango mbeti ti mo akanga lege na mo ti zia Jéhovah na kozo ndo na yâ ti fini ti mo.

“HINGA TI GBU LI NZONI”

7. Tongana nyen la mandango mbeni ye na peko ti bac apeut ti changé fason so mo yeke pensé na ni?

⁷ Kpale ni. Na ngoi ti ambeni cours so mo yeke mû, a peut ti fa na mo ambeni tënë so Bible atene ayeke na lege ni ape. Na tapande a peut ti fa na mo so Nzapa ayeke dä ape nga a créé azo crééngo ape, so ayeke atënë ti “senda-ndara nga na senge senge tënë ti handa”. (aCol. 2:8). A peut nga ti fa na mo ti sara confiance mingi na mo wani. Mbeni ita-koli so ade maseka atene: “A yeke fa lani na e mbeni kode ti kua; me a fa nga na e mbeni kode ti gbungo li so mingi ni ague nde na bango ndo ti Jéhovah. Na tapande, a fa na e so gï e wani la e peut ti sara si gigi ti e aga nzoni. Ye so asara si mbi komanse lani ti pensé so ti duti na ngia mbi bezoin ape ti tene Jéhovah a-aidé mbi. A sara si a yeke lani ngangu na mbi mingi ti sara confiance na lo.”

8. Ngbanga ti nyen la a yeke kota ye ti “hinga ti gbu li nzoni”? (aProverbe 5:​1, 2).

⁸ Diko aProverbe 5:​1, 2. Bible awa mo ti “hinga ti gbu li nzoni”. A yeke kota ye mingi ti sara ni ndali ti so Satan na dunia ti lo ayeke gi ti buba pensé ti mo (1 Pi. 5:8). Bango ndo ti azo na ndö ti ye so ayeke na lege ni wala ye so ayeke na lege ni ape, lege so fini abâ gigi nga so ala yeke na kite so Nzapa ayeke dä apeut ti sara si mo komanse ti duti na kite na ndö ti aye so Jéhovah afa na mo na yâ ti Bible. Awafango mbeti nga na ambeni zo apeut ti gi ti sara si mo bâ so bango ndo ti ala na ndö ti atënë so ayeke “nzoni mingi” ahon atanga ni. Me ti vrai ni, abango ndo ti ala ayeke “ye ti buba na lê ti Nzapa.”—1 aCor. 3:​18-20.

9. Nyen la mo peut ti sara ti hinga ti gbu li ti mo nzoni?

⁹ Ye so mo peut ti sara kozo ti komanse ti manda mbeni ye na peko ti bac. Ti hinga ti gbu li ti mo nzoni, sara kue ti mä na bê ngangu na aye so Bible afa kozo si mo komanse ti manda mbeni ye na peko ti bac. Hunda terê ti mo na mara ti ahunda so: ‘Mbi mä na bê na Nzapa ngbanga ti nyen? Nyen la afa na mbi so Bible alondo na lo? Nyen la asara si mbi yeda biani so andia ti Bible na ndö ti nzoni sarango ye ayeke nzoni ahon ti dunia so?’ Ahunda so apeut ti aidé mo ti gbu li na ndö ti aye so ayeke passé lani na ngoi so mo yeke gue na ekole. Hunda terê ti mo: Eskê mbi komanse ti duti na kite so Nzapa ayeke dä nga lo la lo créé aye kue na ngoi so azo atene so a créé aye crééngo ape? Eskê a yeke lani ngangu na mo ti ke asioni ye so amba ti mo ti ekole ayeke sara? Tongana mo kiri tënë en na mbeni hunda so wala na ambeni, nyen la mo peut ti sara laso ti hinga biani so aye so Bible afa ayeke tâ tënë nga ayeke lakue ndali ti nzoni ti mo? Leke na bê ti mo ti hinga ti gbu li nzoni na ngoi so mo yeke manda mbeni ye na peko ti bac.—2 Tim. 2:​16-18.b

10. Nyen la mo peut ti sara ti ngbâ ti “gbu li ti mo nzoni”?

¹⁰ Même na peko ti so mo komanse ti manda mbeni ye na peko ti bac, ngoi na ngoi hunda terê ti mo na ahunda so: ‘Eskê mbi komanse ti pensé so sarango ye ti amba ti mbi ayeke sioni ape atâa so ala sara ye ague nde na ti so Jéhovah ahunda? Tongana a fa mbeni ye so ayeke ndara ti azo, eskê mbi peut ti hinga ni? Eskê mbi hinga na bê ti mbi kue so gï Royaume ti Nzapa la apeut ti leke kpale ti azo?’ Ti ngbâ ti gbu li ti mo nzoni, ngbâ ti manda Bible nzoni. Tongana mo manda Bible nga mo gbu li na ndö ni ayeke aidé mo ti hinga biani so atënë so ayeke na yâ ni ayeke tâ tënë.—1 Tim. 4:15.

SARA KUA NZONI NA NGOI TI MO

11. Na ngoi so mo komanse ti manda mbeni ye na peko ti bac, ngbanga ti nyen la a peut ti duti ngangu na mo ti sara kua nzoni na ngoi ti mo?

¹¹ Kpale ni. Tongana mo komanse ti manda mbeni ye na peko ti bac, a peut ti mû ngoi ti mo mingi, mbilimbili na ngoi so mo yeke leke terê ti mo ndali ti a-examen wala mo yeke na mbeni ye so mo doit ti sara ni na yâ ti mbeni mbilimbili ngoi. Tongana mo sara kua nzoni na ngoi ti mo ape, mo peut ti gi bê ti mo mingi nga ngangu apeut même ti hunzi na mo. Ndani la a yeke kota ye ti tene mo bâ lege ti seni ti mo.

12. Aye wa la mo bezoin ti wara ngoi ndali ni? (aÉphésien 5:​15, 16).

¹² Diko aÉphésien 5:​15, 16. Tongana mo yeke na gbâ ti aye ti sara, a peut ti duti ngangu na mo ti “sara kua nzoni na ngoi ti mo.” Na tapande, mo bezoin ti manda aye so a yeke fa na mo, me a yeke kota ye mingi ti wara ngoi ndali ti sewa ti mo nga na aita ti congrégation (Ps. 133:1; aProv. 18:1). Aye ti yingo adoit ti duti na kozo ndo (Mat. 6:33). Peut-être mo bezoin nga ti sara ambeni kua ti yanga-da ti aidé azo ti sewa ti mo nga peut-être mo yeke sara kua ti nginza. Na ndö ni, mo doit ti bâ lege ti seni ti mo na lege so mo lango nzoni nga mo sara sport (Zo-ti. 4:6; 1 Tim. 4:8). Ti sara aye so kue, mo bezoin ti sara kua nzoni na ngoi ti mo.

13. Nyen la mo peut ti sara ti sara kua nzoni na ngoi ti mo?

¹³ Ye so mo peut ti sara kozo ti manda mbeni ye na peko ti bac. Bible atene so tongana zo aleke gere ti akua ti lo nzoni, aye so lo leke ti sara ayeke ga nzoni (aProv. 21:5). Tongaso, leke kapa ti akua ti mo kozo si mo komanse ti manda mbeni ye na peko ti bac. Mo peut ti gbu li na ndö ti aye ni so ayeke passé lani na ngoi so mo yeke gue na ekole na hunda terê ti mo: Eskê mbi wara lani lege ti sara aye kue so ayeke akota ye? Tongana mo bâ so ambeni ye ayeke lani dä so mo doit ti changé, nyen la mo peut ti sara laso ti changé ni? Leke ngoi ti akua ti mo nzoni tongaso si mo bâ pëpe so mo yeke na ngoi ape ti sara aye kue.c

14. Ahunda wa la apeut ti aidé mo ti bâ wala mo sara kua nzoni na ngoi ti mo?

¹⁴ Na ngoi so mo yeke manda mbeni ye na peko ti bac, lakue mû ngoi ti bâ wala mo sara kua nzoni na ngoi ti mo. Hunda terê ti mo: ‘Eskê kapa ti mbi amû lege na mbi ti lango nzoni nga ti sara sport? Eskê mbi yeke na ngoi ndali ti aita ti congrégation? Eskê mbi peut ti sara adevoir ti yanga-da na l’heure? Tongana a yeke tongaso ape, eskê a yeke ngbanga ti so mbi yeke na aye mingi ti sara wala a yeke ngbanga ti so mbi yeke kiri ka na aye na peko? Eskê akamarade nga na afami ti mbi abâ so mbi bezoin ti sara ambeni changement?’ Tongana mo bâ so mo bezoin ti sara achangement na yâ ti akapa ti mo wala mo bezoin ti mû tâ gï peko ni, sara ni hio. Mo peut même ti sara lisoro na azo so ayeke sara kua nzoni na ngoi ti ala.—aProv. 11:14.

NGBÂ TI ‘TAMBELA NA AZO TI NDARA’

15. Na ngoi so mo yeke manda mbeni ye na peko ti bac, kpale wa la mo peut ti wara?

¹⁵ Kpale ni. Na ngoi so mo yeke manda mbeni ye na peko ti bac, amba ti mo so mo na ala ayeke manda ye ni apeut ti gi ti yôro mo na yâ ti aye so ala yeke sara na peko ti cours. Bê ti mo apeut ti pusu mo ti tene mo na ala asara aye ni. Ndali ti so ngu ti mo na ala ayeke oko, ye so agbu bê ti ala ayeke oko nga mo na ala ayeke mû cours ndo oko. Mo peut même ti bâ so mo yeke nduru mingi na ala ahon ambeni ita. Ye oko, mo bezoin ti sara hange. Atâa so mo na ala ayeke mû cours ndo oko, aye so ayeke kota ye na lê ti mo ayeke oko na ti ala ape. Nga tongana mo passé ngoi mingi na terê ti ala, mo peut ti komanse ti pensé tongana ala (1 aCor. 15:33). A yeke ye so asi na mbeni ita so iri ti lo ayeke Michael, so amû ngu osio ti manda ye na ndö ti wâ ti courant. Lo tene: “Yenga oko oko, mbi yeke passé ngoi ahon l’heure 40 na terê ti amba ti mbi so mbi na ala e yeke sara kua. Ala yeke tene sioni yanga, ala yeke mä asioni mozoko nga ala ne awali ape na mbi komanse ti pensé so atënë so ala yeke tene nga aye so ala yeke sara ayeke sioni kue ape.”

16. Ti ‘tambela na azo ti ndara’ aye ti tene nyen? (aProverbe 13:20).

¹⁶ Diko aProverbe 13:20. Bible atene na e so tongana e sara kamarade na asioni zo, a yeke ga na e kpale. Na mbage, “zo so atambela na azo ti ndara, lo yeke ga zo ti ndara.” Ye ti manda ni ayeke polele: Azo so e mû ngoi ti duti na terê ti ala apeut ti changé e ti nzoni ni wala ti sioni ni. Tongaso, sara kamarade na azo so aye Jéhovah tongana mo nga so aye ti tene mo duti na tâ ngia.—Ps. 101:​6, 7; 119:63.

17. Nyen la mo peut ti sara ti kpe asioni kamarade?

¹⁷ Ye so mo peut ti sara kozo ti manda mbeni ye na peko ti bac. Leke na bê ti mo ti passé ngoi mingi na terê ti amba ti mo ti klase ape. Mbeni Témoin so iri ti lo ayeke Trenton atene: “Mbi sara ye na amba ti mbi ti klase na nzoni bê me mbi passé ngoi mingi na terê ti ala na peko ti cours ape. Mbi bâ ala tongana akamarade ti mbi ti klase me tongana akota kamarade ti mbi ape.” Nyen la mo yeke sara ti passé ngoi mingi ape na terê ti akamarade ti mo ti klase wala ti tene ala ga akota kamarade ti mo ape? Ti aidé mo ti kiri tënë na hunda so, gbu li na ndö ti aye so mo yeke sara lani na ngoi so mo yeke gue na ekole. Tongana mo bâ so ambeni ye ayeke dä so mo sara ni lani na lege ni ape, nyen la mo peut ti sara laso ti changé ni? Leke na bê ti mo ti ngbâ ti ‘tambela na azo ti ndara’ nga ti passé ngoi mingi ape na terê ti azo so aye Jéhovah ape.d

18 Ahunda wa la mo peut ti hunda terê ti mo na ni? (Bâ nga foto.)

¹⁸ Ngoi na ngoi, hunda terê ti mo na ahunda so: ‘Eskê mbi ga nduru mingi na amba ti mbi ti klase? Eskê mbi komanse ti sara ye tongana ala, so ti tene mbi yeke sara tënë nga mbi yeke pensé tongana ala? Jéhovah abâ songo ti mbi na ala tongana nyen?’ (Ps. 1:1). Tongana mo bâ so mo bezoin ti sara ambeni changement, sara ni hio. Sara kue ti tene akamarade ti mo aduti azo so aye Jéhovah tongana mo. Sara nga mbeto ape ti fa tënë na akamarade ti mo ti klase, mo la mo peut ti aidé ala ti hinga tâ tënë.

LEKE TERÊ TI MO

19. Na ngoi so mo yeke manda mbeni ye na peko ti bac, nyen la mo peut ti sara ti ngbâ nduru na Jéhovah? Mû mbeni tapande ti fa ni.

¹⁹ Zo ti ndara so aye ti tambela na yâ ti gbako ayeke leke terê ti lo kozo si lo hon. Na tapande, lo yeke bâ wala lo yeke na ngangu ti tambela, bongo so lo yü alingbi ti bata lo nga lo hinga ndo so lo ye ti gue dä. Atâa so lo peut ti hinga ye kue so ayeke si ape, so lo leke terê ti lo ayeke aidé lo ti si na ndo so lo ye ti gue dä. Legeoko nga, na ngoi so mo yeke manda mbeni ye na peko ti bac, ngbâ ti kpengba mabe ti mo, “yü aye ti bira kue so alondo na Nzapa” nga girisa ape ye so mo ye ti sara. Ye so mo ye ti sara ayeke pëpe ti wara gbâ ti nginza wala ti ga kota zo me ti zia ngia na bê ti Jéhovah na yâ ti aye kue so mo yeke sara.—aÉph. 6:​11-13; 1 aCor. 9:​26, 27; 10:31.

20. Nyen la mo peut ti sara ti ‘ngbâ ti bâ yâ ti asarango ye ti mo ti bâ wala mo yeke na yâ ti mabe’?

²⁰ Bible awa e, atene: “Ala ngbâ ti bâ yâ ti asarango ye ti ala ti bâ wala ala yeke na yâ ti mabe, ala ngbâ ti bâ terê ti ala nzoni wala ala wani ala yeke tongana nyen.” (2 aCor. 13:5). Mo peut ti sara ni na ngoi so mo yeke manda mbeni ye na peko ti bac. Gi lakue ti bâ yâ ti asarango ye ti mo na yâ ti aye so a sara tënë ni na yâ ti article so. Eskê mo ngbâ ti sara aye so mo yeke sara ka ti voro Jéhovah? Eskê mo yeke sara hange si ndara ti dunia so abuba apensé ti mo ape? Eskê mo yeke sara kua nzoni na ngoi ti mo? Eskê mo yeke soro akamarade na popo ti aita nga mo yeke ke ti sara kamarade na asioni zo? Mo doit ti hunda terê ti mo na ahunda so atâa mo yeke na ekole, na place ti kua wala na mbeni ndo nde. Leke na bê ti mo ti sara si mabe ti mo angbâ ti kpengba atâa nyen la asi na mo. Hinga so Jéhovah ayeke sara tufa na ndö ti ngangu so mo yeke sara ti ngbâ nduru na lo.—aProv. 3:​5, 6.