Mû tapande ti “Nzapa ti dengo bê kue”

1. Ngbanga ti nyen la a yeke nzoni e dë bê ti amba ti e?

E KUE, e yeke wara “atara nde nde so azia vundu na bê ti e,” tongaso na ambeni ngoi e bezoin ti tene a dë bê ti e nga a kpengba e (1 Pi. 1:6). A yeke nzere ka na e mingi tongana amba ti e adë bê ti e na ngoi so e yeke bâ pasi. Tongaso, a yeke nzoni e duti nduru ti dë bê ti ala nga na ngoi so ala yeke bâ pasi (Mat. 7:12). Jéhovah, so ayeke “Nzapa ti dengo bê kue,” afa na e tongana nyen ti ‘dë bê ti amba ti e na yâ ti atara kue so ala wara.’ E peut ti mû tapande ti lo tongana e ‘dë bê ti mba’. (2 aCor. 1:​3, 4; 1 aThes. 4:18). E yeke dë bê ti amba ti e ndali ti so e ye ala, me gï pëpe ndali ti so e doit ti sara ni. Na yâ ti article so, e yeke bâ aye ota. (1) Nda ti tënë dengo bê na yâ ti Bible, (2) aye so e peut ti sara ti dë bê ti amba ti e nga (3) ye so e bezoin ti sara na ngoi so e bezoin dengo bê.

NDA TI TËNË DENGO BÊ NA YÂ TI BIBLE

2. Tongana Bible awa e ti ‘dë bê’ ti mba aye ti tene nyen la?

² Na yâ ti Bible, tënë ti Grec so a kiri pekoni na tënë “dengo bê” nda ni ayeke mingi. Na tapande, a ye ti tene ti tene na mbeni zo mbeni tënë so a sara si lo sentir terê ti lo nzoni wala ti wa mbeni zo ti sara mbeni ye (aRom. 12:8). Me, vrai nda ti tënë ni aye ti tene “ti ga ti duti na terê ti mbeni zo ti mû maboko na lo.” Tongaso, e peut ti imaginé mbeni zo so aga hio aduti na terê ti mbeni kamarade ti lo so ayeke bâ pasi na lo sara mbeni ye ti aidé kamarade ti lo ni. Mbeni zo apeut ti dë bê ti kamarade ti lo na alege nde nde, me ye so lo yeke gi ayeke ti sara si kamarade ti lo ni asentir terê ti lo nzoni.

3. Barnabas adë lani bê ti amba ti lo tongana nyen? (Bâ nga foto.)

³ Bâ mbeni tapande ti Bible. Mbeni Chrétien ayeke lani dä so iri ti lo ayeke Joseph, lakue lo yeke lani nduru ti kpengba amba ti lo nga ti dë bê ti ala asara si abazengele amû na lo iri ti Barnabas, so ndani aye ti tene “Molenge ti dengo bê ti zo”. (Kus. 4:36). Iri ni alingbi tâ na lo asara si Bible airi lo encore Joseph ape. Fani mingi, Barnabas asara ye alingbi na iri ti lo na lege so lo mû maboko na amba ti lo aChrétien so abezoin ti tene a aidé ala. Na tapande, na ngoi so Saul so aga disciple fini fini asi na Jérusalem, lo ye lani ti wara terê na adisciple. Me, mbeto asara ala ndali ti so ala hinga so ândö lo sara aye ti ngangu na amba ti ala. Me Barnabas asara confiance na Saul na lo mû lo, lo gue lo fa lo na abazengele.—Kus. 9:​26-28.

AYE SO E PEUT TI SARA TI DË BÊ TI AMBA TI E

4. Mbeni nzoni lege ti dë bê ti amba ti e ayeke so wa? (aRomain 1:​11, 12).

⁴ Gue mo bâ ala tongana lege ayeke dä. Jéhovah ayeke sara kua na awakua ti lo ti dë bê ti amba ti ala. Na tapande, na ngoi so vundu ahon lani ndö ti prophète Élie, Jéhovah asara kua na mbeni ange ti kpengba lo (1 aGbia 19:​4-7). Bazengele Paul aye nga lani mingi ti gue ti bâ amba ti lo aChrétien ti kpengba ala. (Diko aRomain 1:​11, 12.) Tongana mo gue ti bâ mbeni zo ti kpengba lo, mû ngoi mingi ti duti na terê ti lo tongaso si mo peut ti kpengba lo (1 aCor. 16:7). Tongana mo wara lege ti gue ti bâ zo ni ape, mo peut ti iri lo na téléphone, ti tokua lettre na lo wala ti tokua message na lo ti kpengba lo. Tongana e yeke nduru ti aidé aita ti e, Jéhovah apeut ti sara kua na e ti dë bê ti ala.

5. Ngbanga ti nyen la na ambeni ngoi a peut ti duti ngangu na e ti dë bê ti aita ti e?

⁵ Na ngoi so akpale ayeke ga ngangu mingi na lâ ti nda ni so, akpale so e peut ti wara na ngoi so e yeke gi ti dë bê ti aita ti e ayeke gue nga na li ni. Na tapande, na ngoi so a kanga lani Paul na Rome, Onésiphore, so ayeke zo ti Éphèse agi lani peko ti lo atâa so a peut ti kanga lo wala même ti fâ lo (2 Tim. 1:​16-18). A-Témoin so ayeke na Russie ayeke nga na oko bibe so na ngoi so a yeke sara aye ti ngangu na aita ti ala ndali ti mabe ti ala. Na ngoi so a gue na aTémoin na gbele ngbanga, aita ti ala ayeke ga ti mû maboko na ala atâa so a peut ti gbu ala. Mo peut ti leke terê ti mo ti mû tapande ti azo so asara ye sân mbeto so, na lege so mo manda ye na lege ti tapande ti awakua ti Nzapa ti ândö nga na ala ti laso so amû maboko na mba; ala wara ngia na pekoni atâa so a sara ye ti ngangu na ala.

6. Tongana nyen la e peut ti mû tapande ti Jéhovah na ngoi so e yeke dë bê ti amba ti e? (Bâ nga foto.)

⁶ Mä ala nzoni. Na ngoi so prophète Élie abâ lani so fini ti lo ayeke na yâ ti kpale, lo zi bê ti lo na Jéhovah. Nzapa ti e ti ndoye amä lani Élie na ngoi so lo yeke fa agingo bê ti lo atâa so Jéhovah ahinga awe aye so asara si lo gi bê ti lo. Jéhovah akanga bê lo mä Élie même na ngoi so lo kiri na ndö ti atënë ni fani mingi (1 aGbia 19:​9, 10, 14). Jéhovah amû nga lani lege na prophète Habakuk ti fa agingo bê ti lo nga na kite so lo yeke na ni atâa so, na bango ni, lo sara ni na mbeni lege so afa so lo ne Nzapa ape (Hab. 1:​2, 3). Laso, Jéhovah ayeke mä nzoni asambela ti e atâa so lo hinga awe ye so e bezoin ni. E peut ti mû tapande ti Jéhovah na lege so e dengi mê nzoni e mä aita ti e nga e ne ala na ngoi so ala yeke sara tënë. “Duti nduru ti mä” ala na ngoi so ala yeke sara tënë, fâ tënë na yanga ti ala ape wala zia si bê ti mo ason ape même tongana na bango ni ala sara tënë na lege ni ape wala ala kiri na ndö ti tënë fani mingi.—Jacq. 1:19; Zo-ti. 7:9.

7. Nyen la apeut ti aidé e ti hinga ye so mbeni zo abezoin ni?

⁷ Gi ti hinga ye so zo ni abezoin ni. E lingbi pëpe ti hinga ye so ayeke na bê ti zo tongana ti Jéhovah, me e peut ti dë bê ti zo ni tongana e mä lo nzoni. Tene ape so mo hinga ye so zo ni abezoin ni ndali ti so mo hinga ye so mo bezoin tongana fade mo yeke na place ti lo. E yeke nde nde. Tongaso, mû ngoi ti mä zo ni nzoni, hunda atënë na lege ti ndara ti aidé mo ti hinga ye so lo bezoin ni.—aProv. 20:5.

8. Tongana nyen la Jésus adë lani bê ti Marthe na Marie na peko ti kuâ ti Lazare? (Bâ nga afoto.)

⁸ Bâ tongana nyen la Jésus adë lani bê ti Marthe na Marie na peko ti so ita ti ala Lazare akui. Awali so use kue aperdre ita ti ala; me Jésus adë bê ti ala na alege nde nde. Na peko ti so Marthe asara lisoro na Jésus, Jésus afa na lo tâ tënë na ndö ti zingongo akuâ nga lo aidé lo ti duti na kpengba mabe na beku so. Me na ngoi so Marie aga lo yeke toto, na bango ni Jésus asara na lo tënë ti zingongo ti akuâ ape me lo toto legeoko na Marie nga lo hunda ndo so a lu Lazare dä (Jean 11:​20-35). Ye ti manda ni ayeke so wa? Na ngoi so e yeke gi ti dë bê ti mbeni zo so ayeke bâ pasi, a yeke nzoni e gi ti hinga bezoin ti zo ni ahon ti dë bê ti azo kue na oko fason.

9. Tongana nyen la e peut ti sara kua na Bible ti dë bê ti amba ti e? (aRomain 15:​4, 5).

⁹ Sara kua na Bible. Tongana mo diko aversê na mbeni zo so ayeke bâ pasi ti dë bê ti lo, a yeke aidé lo ti duti na kpengba beku na azendo ti Jéhovah. (Diko aRomain 15:​4, 5.) Beku so ayeke dë bê ti zo ni nga ayeke kpengba lo (És. 40:31). Tongana nyen la mo peut ti wara mbeni versê ti kpengba na mbeni zo? Ambeni ita ayeke sara molongo ti aversê tongaso si ala peut ti bâ ni na ngoi so ala bezoin ni, na tapande, aversê so ayeke na gbe ti li ti tënë “Dengo bê” na yâ ti buku Aversê so ayeke aidé e ti sara na Jéhovah. Hunda Jéhovah ti aidé mo ti sara kua nzoni na Bible ti kpengba azo. Yingo ti lo apeut ti dabe ti mo na ambilimbili versê na ngoi so mo bezoin ni.—Jean 14:26.

10. Ngbanga ti nyen la e doit ti sara tënë na nzoni bê na ngoi so e yeke gi ti kpengba mbeni zo?

¹⁰ Sara tënë na nzoni bê. Tënë ti Grec so a kiri pekoni na “dengo bê” aye nga ti tene ti “wa zo”. Na ambeni ngoi, mo peut ti bâ so mo bezoin ti wa zo so mo yeke dë bê ti lo ti changé bango ndo ti lo. Tongana mo doit ti sara ni, gbu li ti mo nzoni kozo si mo sara tënë, tongaso si atënë ti mo ni akpengba zo ni me ason bê ti lo ape (aProv. 12:18). E peut ti mû tapande ti fason so Jéhovah a-aidé lani na Élie. Élie apensé lani so gï lo oko la lo ngbâ ti sara na Jéhovah be-ta-zo nga lo pensé so lo sara kua ti lo ti prophète nzoni ape. Me na nzoni bê, Jéhovah a-aidé Élie ti changé bango ndo ti lo sân ti fa na lo droit faute so lo sara (1 aGbia 19:​15-18). Mo nga kue mo peut ti aidé aita ti mo tongana mo sara tënë na ala na nzoni bê nga mo gbu li nzoni na ndö ti atënë so mo yeke tene. Na ngoi so mo yeke gi ti kpengba aita na lege ti mbeni diskur wala mbeni commentaire na ngoi ti abungbi, sara tënë lakue na nzoni bê nga gi ti kpengba azo.

11. Nyen la mingi ni azo so ayeke na yâ ti kpale abezoin ni? (1 Jean 3:18).

¹¹ Sara mbeni ye ti aidé ala. Mingi ni, azo so ayeke na yâ ti kpale abezoin ti tene a sara mbeni ye ti aidé ala me a tene na ala gï atënë ape. (Diko 1 Jean 3:18.) Barnabas azia na e nzoni tapande ni na lege so lo kä mbeni sese ti lo, lo mû nginza ni ti aidé na aita so awara batême fini fini so ayeke na bezoin ti mungo maboko (Kus. 4:​36, 37). Gbâ ti aita laso amû nzoni tapande ti lo na lege so ala yeke sara mbeni ye ti aidé azo so ayeke na bezoin ti mungo maboko. Gabriela so ayeke na Pologne ayeke lani na vundu nga lo gi bê ti lo mingi na ngoi so ngu asuku abuba da ti lo sioni sioni. Lo tene: “Mbeto ahon ndö ti mbi na babâ na mama ti mbi so ayeke lango na ndo ti mbi. Mbi gi bê ti mbi tongana nyen la mbi yeke hon ndö ti kpale so. Me aita ti acongrégation so ayeke nduru na mbi aga na ala sara gbâ ti akua na yâ ti lango oko ti leke aye so abuba na terê ti da ni. Ye so asara si mbi yeke biani na mabe so Jéhovah ayeke fa lege na azo ti lo ti dë bê ti azo so ayeke bâ pasi.”

12. Tongana mo ngbâ be-ta-zo atâa kpale so mo wara apeut ti aidé amba ti mo aChrétien tongana nyen?

¹² Ngbâ be-ta-zo na Jéhovah. Na ngoi so Paul amä so aChrétien ti Thessalonique angbâ be-ta-zo na Jéhovah, atâa so a sara aye ti ngangu na ala, a kpengba lo mingi (1 aThes. 3:​5-8). Paul ahinga nga lani so tongana lo ngbâ be-ta-zo na Jéhovah na yâ ti akpale so lo wara ayeke aidé nga amba ti lo aChrétien ti ngbâ be-ta-zo (aCol. 2:​1, 2). Legeoko nga tongana amba ti e aChrétien abâ so e ngbâ be-ta-zo na Jéhovah na yâ ti akpale, a yeke kpengba ala mingi.

13. Mbeni ye wa la e bezoin ti sara tongana e ye ti kpengba amba ti e?

¹³ Kanga bê. Tongana e dë bê ti aita so adécouragé, peut-être ala yeke sentir terê ti ala nzoni na lê ni lê ni ape. Me Bible awa e ti “ngbâ ti dë bê ti mba”. Tënë “ngbâ ti dë bê ti mba” aye ti sara tënë ti mbeni ye so zo angbâ ti sara ni (1 aThes. 5:11). Tongaso, kanga bê na ngoi so mo yeke dë bê ti azo so abezoin mungo maboko (1 aThes. 5:14). Me na ambeni ngoi, e nga kue e bezoin ti tene a dë bê ti e. Tongana e bezoin ti tene amba ti e adë bê ti e, nyen la e peut ti sara?

TONGANA MO BEZOIN DENGO BÊ

14-15. Nyen la a yeke nzoni e sara na ngoi so e gi bê ti e wala vundu asara e?

¹⁴ Sambela Jéhovah. Hunda Jéhovah ti dë bê ti mo na ngoi so mo gi bê ti mo wala vundu asara mo (Ps. 94:19). Fa na Jéhovah mbilimbili ye so mo ye, zi bê ti mo na lo (Ps. 62:8). Tâ tënë, Jéhovah ahinga atënë ti bê ti mo kozo ti tene mo sambela lo. Me tongana mo fa na lo atënë ti gbe ti bê ti mo na yâ ti sambela afa so mo yeke na mabe na lo. Jéhovah ayeke sara lakue mbeni ye ti aidé zo so ayeke na mabe na lo nga so asambela lo (Marc 11:24). A-Philippien 4:​6, 7 awa e atene: “Ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala.”

¹⁵ Hunda amba ti mo ti aidé mo. Fa atënë ti bê ti mo na mbeni kamarade ti mo so akpengba wala na mbeni ancien so mo yeke na confiance na lo. Aita apeut ti dë bê ti mo, me ala yeke hinga ye so mo bezoin ni gï tongana mo fa ni na ala si (aProv. 14:10). Hunda ala ti dengi mê ti mä mo na ngoi so mo yeke fa atënë ti bê ti mo wala mo peut ti hunda ala ti fa na mo mbeni versê wala mbeni article so ala bâ so a dë bê ti zo.

16. Na ngoi so aita ayeke gi ti dë bê ti mo, nyen la apeut ti si? Nyen la a yeke nzoni mo girisa ape?

¹⁶ Kanga bê nga pardonné zo. Aita apeut ti sara mbeni ye na lege ni ape na ngoi so ala yeke gi ti kpengba mo. Na tapande, ala peut ti tene mbeni tënë wala ti sara mbeni ye so asara mo nzoni ape. Tongana a si tongaso, kanga bê na ala (1 aCor. 13:​4, 7). Girisa nga ape tënë so ayeke na Jacques 3:2 so atene: “Tongana mbeni zo apika gere ti lo na tënë ti yanga ti lo pëpe, zo tongaso ayeke mbilimbili-kue.” Bâ gï nzoni bibe so aita ti mo ayeke na ni. Girisa ape so “yingo ti zo ayeke na nzara ti sara ye, me mitele awoko.”—Mat. 26:41.

17. Nyen la a yeke nzoni e leke na bê ti e ti ngbâ ti sara?

¹⁷ E kue e bezoin ti tene a dë bê ti e nga a kpengba e. Nga e yeke na bezoin ni mingi na lâ ti nda ni so, so aye ti sioni ayeke gue gï guengo na li ni nga ngonzo ayeke sara awato ti Nzapa mingi na terê ti e. Tongaso, zia e leke na bê ti e ti ngbâ ti sara ngangu ti dë bê ti mba.