Sara ngangu ti ngbâ kota kamarade ti wali wala koli ti mo

1. Ngbanga ti nyen la anzoni kamarade ayeke mbeni cadeau so alondo na Jéhovah?

ANZONI kamarade ayeke mbeni cadeau so alondo na Jéhovah (Jacq. 1:17). Ala ye Nzapa nga ala ye e. Ala yeke na ngia na ngoi so e yeke na ngia, ala yeke dë bê ti e na ngoi so vundu asara e, nga ala yeke mû na e wango polele na ngoi so e bezoin ni. Ala yeke be-ta-zo na e peut ti sara confiance na ala. Mara ti akamarade tongaso ayeke ‘zia ngia na bê ti zo’.—aProv. 27:9.

2. Ngbanga ti nyen la a yeke kota ye ti tene azo so asara mariage angbâ ti kpengba songo ti kamarade na popo ti ala?

² A yeke kota ye ti tene koli na wali aduti akota kamarade. A yeke nzoni ala girisa ape so ala bezoin ti sara effort tongaso si songo ti ala ti kamarade angbâ ti kpengba. Tongana ala sara pëpe aye so ayeke aidé ala ti duti kamarade ti mba, ala yeke bâ so ala yeke gï ala oko, ala yeke duti na ngia ape nga bê ti ala apeut même ti son. Me tongana ala ngbâ ti sara effort ti kpengba songo ti kamarade so ayeke na popo ti ala, ala yeke ga akota kamarade. (Diko Matthieu 19:6.) Na yâ ti article so, e yeke bâ tongana nyen la azo so asara mariage awe apeut ti ngbâ ti kpengba songo ti kamarade na popo ti ala. Me kozoni, zia e bâ tongana nyen la aita so ade kumbamba apeut ti soro koli wala wali so ayeke duti ande kota kamarade ti ala na yâ ti gigi ti ala kue.

LEGE TI SORO WALI WALA KOLI SO AYEKE DUTI ANDE KOTA KAMARADE TI MO

3-4. Nyen la ayeke aidé mbeni zo ti wara nzoni wali wala nzoni koli ti sara mariage na lo? (aProverbe 18:22).

³ Kozo ti mû mbeni kota desizion, a yeke nzoni e gbu li na ndö ti akpale nga na anzoni ye ti peko ni. Akota desizion apeut ti changé gigi ti e, tongaso a yeke kota ye ti gbu li nzoni na ndö ni.

⁴ Sorongo mbeni zo ti sara mariage na lo ayeke kete desizion ape ndali ti so zo so e yeke soro lo ayeke duti ande kamarade ti e na yâ ti tanga ti gigi ti e kue. Ndali ti so Jéhovah la azia gere ti mariage na sese, a yeke na lege ni ti bâ ndo na mbage ti lo ti fa lege na e na ngoi so e yeke soro mbeni zo ti sara mariage na lo. Lo ye ti tene koli awara nzoni wali nga wali awara nzoni koli. Jéhovah aye lakue ye so ayeke nzoni mingi ndali ti e. (Diko aProverbe 18:22; És. 48:​17, 18.) Amama-ndia so ayeke na yâ ti Bible apeut ti aidé mbeni Chrétien ti wara nzoni zo ti sara mariage na lo.

5. Ngbanga ti nyen la a yeke kota ye ti sara mariage na mbeni ita so awara batême awe?

⁵ Na peko ti so e wara batême, e ga kamarade ti Nzapa (Ps. 25:14). Tongana mo ye ti sara mariage, soro koli wala wali so mo ye ti mû na popo ti akamarade ti Jéhovah (1 aCor. 7:39). Tongana mo sara tongaso mo fa so mo bâ na nene ni ye so Jéhovah ahunda na e ti sara na mo peut ti bâ wali wala koli ti mo ni tongana mbeni cadeau so alondo na Jéhovah (aProv 19:14). Mo yeke wara nga ape akpale so zo so asara mariage na mbeni zo so ayeke Témoin ape ayeke wara (2 aCor. 6:14). A yeke na lege ti ndara oko ape ti gue na peko ti mbeni zo so amä na bê ape peut-être ndali ti so mo pensé so a yeke ngangu ti wara mbeni zo na popo ti amba ti mo Chrétien. A yeke nga na lege ti ndara ape ti pensé so a yeke sioni ape ti gi ti hinga mbeni zo so amä na bê ape ti sara mariage na lo ndali ti so mo pensé so mbeni lâ lo peut ti ga Témoin.

6-7. Ahunda wa la a yeke nzoni mo wara kiringo tënë na ni na ngoi so mo yeke bâ terê na mbeni ita ndali ti mariage?

⁶ Ti vrai ni, zo kue so ayeke Témoin so awara batême la ayeke duti nzoni koli wala nzoni wali ape. Tongana mo pensé na mbeni zo, a yeke nzoni mo hunda terê ti mo na ambeni hunda.a Na tapande: ‘Lo yeke sara ka ye tongana nyen na azo ti sewa ti lo? Lo yeke pensé na azo nga lo yeke ne azo? Akamarade ti lo ayeke azo wa? Tongana bango ndo ti lo ayeke nde na ti mbeni zo, lo yeke sara ka ye tongana nyen? Eskê lo yeke luti nganganga na ndö ti bango ndo ti lo? Wala lo yeke nduru ti changé bango ndo ti lo na ngoi so mbeni mbilimbili mama-ndia ti Bible ayeke dä ape? Bango ndo ti lo na ndö ti nginza ayeke tongana nyen?’

⁷ Mo peut nga ti hunda terê ti mo na ahunda so: ‘Eskê zo so mbi yeke bâ terê na lo ndali ti mariage so aye Jéhovah mingi? Eskê lo yeke sara ngangu ti yü “fini zo”? (aCol. 3:​9, 10). Eskê lo yeke aidé ande mbi ti ngbâ ti sara na Jéhovah nzoni? Eskê aye so mbi na lo e leke ti sara na yâ ti kua ti Jéhovah ayeke oko? Eskê e peut ande ti ga akota kamarade?’ (aCol. 3:​9, 10). Tongana mo yeke ita-wali, eskê ita-koli so ayeke ga na peko ti mo ayeke duti ande nzoni kamarade nga nzoni mokonzi ti sewa? (1 aCor. 11:3). Tongana mo yeke ita-koli, eskê ita-wali ni ayeke mû ande maboko na mo nga lo yeke yeda na adesizion ti mo atâa so mo peut ti sara afaute? Ti kiri tënë na ahunda so ayeke mû ngoi. Tongaso, na ngoi so ala yeke bâ terê, gi ti hinga zo so ayeke ga ande wali wala koli ti mo ni nzoni.

8-9. Nyen la apeut ti aidé mbeni zo so ayeke pensé ti sara mariage ti mû nzoni desizion? (Bâ nga foto.)

⁸ Na ngoi so ala yeke bâ terê, peut-être mo yeke mû nzoni desizion tongana mo gi ti hinga zo ni nzoni. Gi ti hinga bango ndo ti azo na ndö ti lo. Mo peut ti hunda azo ti hinga asarango ye ti lo nga na bango ndo ti ala na ndö ti lo. Na tapande, eskê lo yeke sara terê ti lo kete, lo yeke sara ye na nzoni bê nga lo sara ye ahon ndö ni ape? Ita Sarah, so ayeke na Guyane française, so lo na Ita Daniel asara mariage, atene: “Mbi hunda azo ti hinga bango ndo ti ala na ndö ti Daniel. Na tapande, mbi sara lisoro na ita-koli so lo na lo alango da oko, na mbeni ancien ti congrégation ti lo, na akamarade ti e so ahinga mbi na lo use kue nzoni nga na ambeni ita-wali ti congrégation ti lo.” Na nzoni bê mo peut ti hunda zo so mo ye ti sara mariage na lo wala mbeni ye ayeke dä so lo sara ândö wala so lo sara ni so mo bezoin ti hinga ni? Ndali ti so ambeni ye so lo sara wala ambeni sarango ye ti lo apeut ti ga ande na akota kpale na yâ ti mariage ti ala.

⁹ Peut-être mo yeke na kite so zo ni apeut ti duti nzoni wali wala nzoni koli ape wala peut-être ambeni ita afa na mo ambeni sioni sarango ye ti zo ni. Tongana a yeke tongaso bâ ni tongana kete ye ape. Ye so apeut ti aidé mo ti bâ wala ala peut ti ngbâ ti bâ terê wala pëpe.b Fadeso, e yeke sara lisoro na ndö ti aye so azo so asara mariage awe apeut ti sara ti kpengba songo ti kamarade na popo ti ala.

MÛ NGOI TI DUTI NA TERÊ TI WALI WALA KOLI TI MO

10. Ngbanga ti nyen la a yeke nzoni koli na wali amû ngoi ti duti na terê ti mba?

¹⁰ Koli na wali apeut ti kpengba songo ti kamarade so ayeke na popo ti ala nga ti kpengba mariage ti ala tongana ala mû ngoi ti duti na terê ti mba atâa ala yeke na akua mingi ti sara. Ye so ayeke mû lege na ala ti sara lisoro na ndö ti aye so apassé na yâ ti lango ni, ti fa apensé ti ala na mba, ti fa na mba ti ala ni so ala ye lo nga ti sara ngia ndo oko.

11. Nyen la apeut ti buba songo ti kamarade so ayeke na popo ti koli na wali?

¹¹ Koli na wali so ayeke akota kamarade aye mingi ti duti ndo oko, me ti duti nde na mba ape. Tâ tënë a yeke gï lakue la ala yeke duti ndo oko ape. Me mbeni ye apeut ti sara si ala duti ndo oko ape teti mbeni ngoi. Me dutingo ndo oko ape aninga a peut ti ga na kpale. Na tapande, ambeni koli wala wali ayeda ti gue ti sara kua na kodro-wande ye so asara si ala gue yongoro na sewa ti ala teti mbeni ngoi so aninga. Ye so apeut ti aidé ala ti wara nginza, me tongana ala duti ndo oko ape aninga, a peut ti ga na kpale.

12-13. (a) Nyen la ambeni Chrétien so asara mariage asara ti wara ngoi ti duti na terê ti mba? (Bâ nga foto.) (b) Songo ti mo na koli wala wali ti mo adoit ti duti tongana nyen na lê ti mo? (Bâ encadré “Place ti koli wala wali ti mo na yâ ti fini ti mo.”)

¹² Bâ ambeni ye so azo so asara mariage asara ti wara ngoi ti duti lakue na terê ti mba. Leah, so ayeke na Guam, atene: “A nzere na mbi na koli ti mbi ti sara gbâ ti aye ndo oko. A yeke ngangu ti sara ambeni ye wala ti gue na ambeni tisango ndo sân mba.” Roxanne, so ayeke na États-Unis, atene: “So e yeke na aye mingi ti sara, e bâ so e bezoin ti wara ngoi ti duti ndo oko gï tongana ti so e yeke sara ni ndali ti aye so ayeke akota ye.” (Bâ Amos 3:3.). Damien, so ayeke na France, atene: “E manda ti pensé na mba nga même ti ye aye so mba ti e ni aye ni mingi.” (Mat. 7:12). Katie, so ayeke nga na États-Unis, atene: “Na ambeni ngoi, e zia téléphone ti e ayo na e tongaso si agboto lê ti e ape.”

¹³ Ye so ayeke kota ye mingi ayeke ti mû ngoi ti sara aye ti yingo ndo oko. Myriam, so ayeke na France, atene: “E yeke komanse lango ti e na dikongo Bible nga e yeke fa na mba aye so anzere na e nga na aye so e manda. Mbi ye ka angoi ni so mingi.” Lo kiri lo tene: “Tongana mbi na koli ti mbi e sambela ndo oko, a yeke nzere na mbi mingi; nga a nzere na mbi ti mä tongana nyen la koli ti mbi ayeke fa so lo ye Jéhovah mingi.” Katie, so e sara tënë ti lo fade, atene: “Mbeni ye so anzere na e mingi ti sara ndo oko ayeke kua ti fango tënë. Tongana mbi na koli ti mbi e mä tongana nyen la e yeke fa tënë ti mabe ti e na azo, a sara si e ga nduru mingi na mba nga e ngbâ ti manda afini ye na mbage ti mba.”—aProv. 27:17.

TONGANA AKPALE ALONDO, ALA SARA KUE TI LEKE NI

14-15. Ngbanga ti nyen la a yeke nzoni azo so asara mariage asara kue ti leke akpale so ala wara? Mu mbeni tapande ti fa ni.

¹⁴ So e yeke mbilimbili-kue ape, azo so asara mariage ayeke wara akpale na yâ ti mariage ti ala. Bible atene so azo so asara mariage “ayeke wara aye ti vundu na yâ ti mitele ti ala.” (1 aCor. 7:28). Mbeni note ti étude na ndö ti versê so atene tënë so “aye ti sara tënë ti akpale so azo so asara mariage ayeke wara ka.” Me tongana mara ti akpale tongaso asi, ngbanga ti nyen la a yeke nzoni ala ngbâ ndo oko nga ala sara kue ti leke ni?

¹⁵ Bâ tapande so. Tongana mbeni pendere da wala mbeni dessin ti ngangu ngere abuba, wa ni ayeke gi ti leke ni. Peut-être lo yeke mû nginza mingi ti leke na ni nga lekengo ni apeut ti ninga. Ngbanga ti nyen la lo yeke sara kue ti leke ni? Lo yeke sara ni ngbanga ti so da ni wala dessin ni ayeke ye ti ngangu ngere na lê ti lo. Legeoko nga, amariage kue ayeke ye ti ngangu ngere. Même azo so aye terê mingi ayeke wara akpale nga ala peut ti mä terê ape na ndö ti ambeni ye. Me gï tongana ti so a peut ti kiri ti leke mbeni da wala mbeni ye ti ngangu ngere so abuba, mbeni koli na wali so awara kpale apeut ti kiri ti leke songo so ayeke na popo ti ala. A peut ti mû ngoi nga a hunda effort mingi, me Jéhovah ayeke duti na ngia ti bâ so ala sara ye kue so ala peut ti sara ti kpengba songo ti mariage ti ala nga ti ngbâ ndo oko (Mal. 2:16). Tongana ala sara tongaso, ala yeke fa so ala ye terê na ala ne mba nga ala yeke fa so ala ye Jéhovah so azia gere ti mariage na sese nga ala ne lo.

16. Tongana ti so 1 aCorinthien 13:​4-8a afa, nyen la apeut ti aidé mbeni koli na wali so asara mariage so ayeke na mbeni ngangu kpale? (Bâ nga foto nga na encadré “Aye so apeut ti aidé azo so asara mariage ti kpengba songo ti ala.”)

¹⁶ Tongana akpale alondo na yâ ti mariage ti mo, pensé hio ape ti quitté wali wala koli ti mo (1 aCor. 7:​10, 11). Me, hunda terê ti mo: ‘Eskê mbeni ye ayeke dä so mbi peut ti sara ti kiri ti kpengba songo ti mbi na koli wala wali ti mbi?’ Kiri mo bâ aye so Bible afa na ndö ti sarango ye na ndoye na hunda terê ti mo: eskê mbeni ayeke dä so mo peut ti kiri ti sara ti fa so mo yeke sara ye na ndoye tongana ti so a fa na 1 aCorinthien 13:​4-8a. (Diko ni.) Gi ti quitté koli wala wali ti mo ape, me sara kue ti kiri ti ye lo. Pensé na ye so mo peut ti sara ti kiri ti kpengba songo ti ala. Sambela Jéhovah ti fa lege na mo. Gi ambeti nga na avidéo ti e so apeut ti aidé mo ti hinga ye so mo peut ti sara; mo peut nga ti hunda wango na a-ancien wala na aita so ayeke sara ye alingbi na awango ti Bible na yâ ti mariage ti ala. Bible atene mariage ayeke tongana kamba so a pe ni na “kamba ota” na Jéhovah ayeke ota kamba ni nga lo yeke kota mingi. Tongaso tongana mo sara ye tongana ti so lo ye, mariage ti mo ayeke kpengba.—Zo-ti. 4:12.

17. Tongana nyen la azo so aye ti sara mariage nga na ala so asara mariage awe apeut ti duti na ngia?

¹⁷ Jéhovah aye ti tene awakua ti lo kue aduti na ngia, ala so aye ti sara mariage nga na ala so asara mariage awe. Tongaso, tongana mo yeke kumbamba nga mo ye ti sara mariage, soro nzoni zo so mo yeke sara ande mariage na lo. Nga tongana mo sara mariage awe, ngbâ ti kpengba songo ti kamarade ti mo na wali wala koli ti mo. Sara kue ti hon ndö ti akpale so apeut ti londo na yâ ti mariage ti mo na mungo maboko ti Jéhovah. Tongana mo sara aye so, mo yeke duti na “ngia” na wali wala koli ti mo so mo ye lo mingi.—Zo-ti. 9:9.