Mo peut ti hon ndö ti asioni pensé

1-2. Na ambeni ngoi, bazengele Paul ayeke tongana nyen? Ngbanga ti nyen la tapande ti lo apeut ti aidé e? (aRomain 7:​21-24).

NYEN la ayeke ga na li ti mo na ngoi so mo pensé na bazengele Paul? Eskê mo yeke pensé na mbeni missionnaire so ayeke sara ye na mbeto ape, mbeni zo so ahinga ti fa ye nzoni wala mbeni zo so asû gbâ ti ambage ti Bible? Tongana mo pensé na aye so, a yeke na lege ni. Me na ambeni ngoi, vundu ahon ndö ti lo, lo découragé wala lo gi bê ti lo. Tongaso, ye so asi lani na Paul ayeke si nga na e laso.

² Diko aRomain 7:​21-24. Na yâ ti lettre so Paul atokua na aRomain, lo fa apensé so mingi ti e ayeke nga na ni. Atâa so lo yeke mbeni Chrétien so ayeke be-ta-zo, mbeni tiri ayeke na yâ ti terê ti lo: lo yeke na nzara ti sara ye so bê ti Nzapa aye nga bê ti lo ayeke pusu lo ti sara asioni ye. Na ndö ti tiri so, na ambeni ngoi lo découragé ndali ti aye so lo sara ândö nga ndali ti kpale so lo yeke na yâ ni.

3. Nyen la e yeke bâ na yâ ti article so? (Bâ nga “Nda ti mbeni tënë.”)

³ Atâa tiri so ayeke na yâ ti terê ti Paul, lo zia pëpe si asioni penséa ahon ndö ti lo. Na yâ ti article so, e yeke kiri tënë na ahunda so: Nyen la asara si na ambeni ngoi Paul atene “so mawa na mbi”? Tongana nyen la lo hon ndö ti asioni pensé so lo yeke lani na ni? Tongana nyen la e peut ti hon ndö ti asioni pensé so e yeke na ni?

NYEN LA ASARA SI PAUL AWARA ASIONI PENSÉ?

4. Nyen la asara si Paul awara asioni pensé?

⁴ Aye so lo sara ândö. Kozo ti tene Paul so a hinga lo na iri ti Saul aga Chrétien, lo sara aye so na pekoni lo regretté. Na tapande, lo yeke lani dä na ngoi so a fâ Étienne so ayeke lani be-ta-zo. Lo pensé so a yeke na lege ni (Kus. 7:58; 8:1). Nga, Saul amû li ni ti sara ye ti ngangu mingi na aChrétien.—Kus. 8:3; 26:​9-11.

5. Aye so Paul asara ândö asara lo tongana nyen?

⁵ Na peko ti so bazengele Paul aga Chrétien, vundu asara lo ndali ti aye so lo sara ândö. Tongana ngoi ayeke hon, aye ti ngangu so lo sara lani na aChrétien asara lo vundu mingi. Na tapande, na yâ ti kozo lettre so lo sû na aChrétien ti Corinthe na ngu 55 tongaso, lo tene: “Mbi lingbi ti tene a iri mbi bazengele pëpe, ngbanga ti so mbi sara lani ye ti ngangu na congrégation ti Nzapa.” (1 aCor. 15:9). Ngu oku tongaso na pekoni, na yâ ti lettre ti lo na aChrétien ti Éphèse, lo tene so lo yeke “tâ kete ahon lo so ayeke tanga ti azo ti be-vulu kue”. (aÉph. 3:8). Na yâ ti lettre so lo tokua na Timothée, lo tene ândö lo yeke ‘mbeni zo ti zongango ndo, zo ti sarango ye ti ngangu na azo nga zo ti sioni yanga.’ (1 Tim. 1:13). Imaginé, na ngoi so Paul ayeke sara vizite na mbeni congrégation na lo wara terê na aita so ândö lo sara ye ti ngangu na ala wala na azo ti sewa ti ala, a sara lo tongana nyen?

6. Mbeni ye nde wa la asara Paul vundu mingi? (Bâ nga kete tënë na gbe ni.)

⁶ Mbeni kî na yâ ti terê ti lo. Paul ahaka lani mbeni ye so asara lo vundu mingi na “mbeni kî na yâ ti terê” ti lo (2 aCor. 12:7). Lo fa mbilimbili ye so asara lo vundu so ape. A peut lani ti duti mbeni kobela wala mbeni kpale so asara si lo gi bê ti lo mingi.b

7. Awokongo ti Paul asara lo tongana nyen? (aRomain 7:​18, 19).

⁷ Awokongo ti lo. Paul atiri lani na awokongo ti lo. (Diko aRomain 7:​18, 19.) Atâa so lo ye lani ti sara ye so ayeke na lege ni, awokongo ti lo asara si a yeke ngangu na lo ti sara ni. Lo tene so lakue tongana lo ye ti sara ye so ayeke na lege ni, bê ti lo ayeke pusu lo ti sara sioni ye. Me Paul asara ngangu ti sara ye so ayeke na lege ni (1 aCor. 9:27). E peut ti imaginé tongana nyen la bê ti lo ason na ngoi so asioni sarango ye ti lo akiri asigi.

AYE SO PAUL ASARA TI HON NDÖ TI ASIONI PENSÉ TI LO

8. Ambeni ye wa la Paul asara so a-aidé lo ti changé?

⁸ Tongana ti so alettre ti Paul afa, lo gbu li na ndö ti ye so lo na amba ti lo aChrétien apeut ti sara ti tiri na awokongo ti ala nga ti hon ndö ni grâce na mungo maboko ti yingo ti Nzapa (aRom. 8:13; aGal. 5:​16, 17). Fani mingi Paul asara tënë ti asioni sarango ye nga na asioni nzara so aChrétien adoit ti tiri na ni (aGal. 5:​19-21, 26). Kite ayeke dä ape so Paul agbu li na ndö ti awokongo ti lo, lo gi wango na yâ ti Mbeti ti Nzapa nga lo hinga ambilimbili ye ti sara ti hon ndö ni. E peut ti duti sûr so lo sara ye alingbi na wango so lo mû na ambeni zo.

9-10. Nyen la a-aidé lani Paul na ngoi so lo découragé? (aÉphésien 1:7). (Bâ nga foto.)

⁹ Atâa so na ambeni ngoi Paul adécouragé, aye ayeke mingi so a-aidé lo ti duti na ngia. Na tapande, terê ti lo anzere mingi ti mä nzoni sango na ndö ti acongrégation so ayo (2 aCor. 7:​6, 7). Songo ti kamarade so lo yeke na ni na aita asara si lo yeke na ngia (2 Tim. 1:4). Lo hinga nga so lo nzere na lê ti Jéhovah. Biani, Paul ayeke lani na ngia ndali ti so lo peut ti sara na Nzapa “na nzoni conscience”. (2 Tim. 1:3). Même na ngoi so lo yeke na kanga na Rome, lo wa amba ti lo aChrétien ti ‘duti na ngia na yâ ti Seigneur.’ (aPhil. 4:4). Tongana e diko atënë ti Paul, e peut ti comprendre so lo yeke pensé lakue gï na akpale nga na afaute ti lo ape. Na ngoi so asioni pensé aga na li ti lo, hio lo yeke pensé na aye so asara si lo yeke na ngia.

¹⁰ Mbeni ye nde so a-aidé Paul ti ngbâ ti duti na ngia ayeke ye so a futa ti zi azo. Lo girisa ape so Jéhovah aye lo nga lo mû ni ndali ti lo nga kue. (aGal. 2:20; diko aÉphésien 1:7.) Ye so asara si lo hinga na bê ti lo kue so Jéhovah apardonné lo awe na lege ti Jésus Christ (aRom. 7:​24, 25). Atâa so Paul asara afaute ândö nga lo yeke na awokongo, lo peut lani ti “sara kusala so ayeke nzoni-kue” na Nzapa na ngia.—aHéb. 9:​12-14.

11. Ngbanga ti nyen la tapande ti Paul akpengba e?

¹¹ Tongana ti Paul, e peut ti bâ so mbeni tiri ayeke lakue na yâ ti terê ti e. A peut ti duti aye so e pensé, aye so e sara wala tënë so e tene. E nga kue e peut ti tene: ‘So mawa na mbi!’ Élizac, mbeni ita-wali so ayeke na ngu 26, atene tënë so na ndö ti ye so lo yeke tiri na ni, lo tene: “Gbungo li na ndö ti dutingo ti Paul akpengba mbi mingi. A nzere na mbi ti hinga so Paul adoit lani ti sara achangement tongana ti so mbi nga mbi doit ti sara. Mbeni ye so mbi dabe ti mbi na ni ayeke so Jéhovah ahinga akpale so awakua ti lo ayeke na yâ ni.” Nyen la e peut ti sara tongaso si tongana ti Paul, e peut ti duti na nzoni conscience nga e duti na ngia atâa e découragé?

AYE TI SARA TI HON NDÖ TI ASIONI PENSÉ

12. Tongana nyen la ti sara lakue aye so e yeke sara ti voro Jéhovah ayeke aidé e ti hon ndö ti asioni pensé?

¹² Sara lakue aye so mo yeke sara ti voro Jéhovah. Tongana e yeke gi ti sara lakue aye so e yeke sara ti voro Jéhovah, e yeke duti na nzoni bango ndo. E peut ti haka aye ni so na aye so e yeke sara lakue ti duti na nzoni seni. Tongana e te ye nzoni, e sara sport lakue nga e lango nzoni, mingi ni e yeke sentir terê ti e nzoni. Legeoko nga, e kue e bâ so e yeke nzoni tongana e diko Bible lakue, e leke terê ti e ndali ti abungbi, e gue dä nga e mû mbage na ni; nga e fa tënë. Tongana e ngbâ ti sara aye so, a yeke aidé e ti pensé na anzoni ye ahon ti pensé na aye so ayeke découragé e nga e yeke duti na ngia.—aRom. 12:​11, 12.

13-14. Tongana nyen la ambeni Chrétien so ayeke be-ta-zo abâ nzoni na lege ti aye so ala yeke sara lakue ti voro Jéhovah?

¹³ Gbu li na ndö ti tapande ti John so a wara cancer so ayeke gbu azo hio hio ape na terê ti lo na ngoi so lo yeke na ngu 39. Na tongo nda ni, mbeto ahon ndö ti lo mingi nga lo gi bê ti lo mingi. Li ti lo aga kirikiri nga a yeke ngangu na lo ti yeda so lo wara kobela so atâa so lo ngbâ maseka. Na ngoi ni so, molenge ti lo ti koli ayeke gï na ngu ota. Nyen la a-aidé lani John ti pensé na anzoni ye? Lo tene: “Atâa so mbi fatigué, mbi sara kue ti tene sewa ti e asara lakue aye so e yeke sara ti voro Jéhovah. E gue na abungbi kue, e fa tënë yenga oko oko na e voro Nzapa lakue na sewa même tongana a yeke ngangu ti wara ngoi ti sara ni.” Lo kiri lo tene: “Na ngoi so e wara mbeni ngangu kpale, na tongo nda ni li ti e apeut ti ga kirikiri. Me kete na pekoni, e yeke bâ so Jéhovah amû na e ngangu so e bezoin ni nga lo ye e mingi. Jéhovah apeut ti aidé mo tongana ti so lo aidé mbi.”

¹⁴ Éliza, so e sara tënë ti lo fade, atene: “Lakue tongana mbi gue na abungbi nga mbi manda ye mbi wani, a yeke dabe ti mbi so Jéhovah ayeke mä mbi nga lo ye mbi biani. So mbi hinga ni asara si mbi yeke na ngia.” Nolan, mbeni surveillant ti circonscription na Afrika, asara tënë ti lo na wali ti lo Diane, lo tene: “E ngbâ ti sara aye so e yeke sara ti voro Jéhovah même na ngoi so e découragé. Jéhovah afa na e lakue polele so lo yeke aidé e ti duti na nzoni bango ndo. E gi ti dabe ti e lakue so Jéhovah ayeke aidé e nga lo yeke sara tufa na ndö ti e; e hinga ape tongana nyen la lo yeke sara ni me e hinga so lo yeke sara ni.”

15. Mbeni ye nde wa la e peut ti sara ti hon ndö ti asioni pensé? Fa mbeni tapande ni.

¹⁵ Tongana e ngbâ ti découragé, ambeni ye nde ayeke dä so e peut ti sara. Na tapande, imaginé so peko ti mo ayeke son. Ti tene a kaï, mo peut ti tambela lakue me a ngbâ gï ge ape. Ti hinga ye so asara si peko ti mo ni ason, mo peut ti sara recherche nga même ti hunda mbeni docteur. Legeoko nga, e peut ti sara recherche na yâ ti Bible nga na ambeti ti e wala même ti sara lisoro na mbeni ita so akpengba ti hinga ye so e peut ti sara ti hon ndö ti asioni pensé so e yeke wara ka. Bâ ambeni wango nde so apeut ti aidé mo la.

16. Nyen la apeut ti aidé mo ti hinga ye so asara si mo yeke na asioni pensé? (Psaume 139:​1-4, 23, 24).

¹⁶ Hunda Jéhovah ti aidé mo ti hinga ye so asara si mo yeke na vundu. Gbia David ahinga lani so Jéhovah ahinga lo nzoni mingi. Tongaso, David ahunda Jéhovah ti aidé lo ti hinga ye so asara si lo yeke na “agingo bê”. (Diko Psaume 139:​1-4, 23, 24.) Mo nga kue mo peut ti hunda Jéhovah ti aidé mo ti hinga ye so asara si mo yeke na asioni pensé nga ti hinga tongana nyen ti hon ndö ni. Mo peut nga ti hunda terê ti mo na mara ti atënë tongaso: ‘Vrai ye so asara si mbi yeke gi bê ti mbi ayeke nyen? Eskê mbeni ye ayeke dä so asara si lakue mbi gi bê ti mbi? Eskê mbi yeke zia li ti mbi gï na ndö ni ahon ti tomba ni?’

17. Atënë wa la e peut ti manda ye na ndö ni so apeut ti aidé e ti duti na anzoni pensé? (Bâ nga foto.)

¹⁷ Manda ye na ndö ti atënë so alingbi na dutingo ti mo. Na ambeni ngoi, a yeke nzoni ti manda ye na ndö ti mbeni sarango ye ti Jéhovah so ayeke kpengba mo. Na tapande, bazengele Paul awara ye ti nzoni mingi na ngoi so lo gbu li na ndö ti ye so a futa ti zi azo nga na pardon ti Jéhovah. Mo kue mo peut ti sara tongaso. Sara kua na Mbeti ti sarango na recherche ndali ti aTémoin ti Jéhovah, Aversê so ayeke aidé e ti sara na Jéhovah wala na ambeni gbakuru ti mandango na Bible na yanga ti kodro ti mo ti gi ti hinga ye na ndö ti nzoni bê, pardon nga na tâ ndoye ti Nzapa. Na peko ti so mo wara a-article so apeut ti aidé mo, sara molongo ni. Zia ni na mbeni ndo so mo peut ti bâ ni nga manda a-article ni na ngoi so mo komanse ti gi bê ti mo. Gi ti sara ye alingbi na ni alingbi na dutingo ti mo.—aPhil. 4:8.

18. Atënë wa la ambeni Chrétien amanda ye na ndö ni so a-aidé ala?

¹⁸ Éliza, so e sara tënë ti lo fade, amanda ye na ndö ti Job. Lo tene: “Dutingo ti mbi ayeke tongana ti Job. Lo wara akpale na peko ti terê. Me na ngoi so lo découragé ngangu, lo ngbâ ti bâ ndo na mbage ti Jéhovah, atâa so lo hinga ape ndani so lo wara akpale so.” (Job 42:​1-6). Diane, so e sara tënë ti lo fade, atene: “Mbi na koli ti mbi e yeke manda buku Ga ndulu na Jéhovah. E kiri singila na Jéhovah so ayeke leke e tongana ti so zo ti lekengo ta ayeke leke popoto ti sarango na ta. Tongana e découragé ndali ti afaute so e sara, e yeke dabe ti e so Jéhovah ayeke leke e nga lo yeke gi ti sara si e ga nzoni ahon ti kozo. Ye so asara si e ga nduru mingi na lo.”—És. 64:8.

HINGA SO JÉHOVAH AYEKE AIDÉ MO NGA LO YEKE FUTA MO

19. Nyen la apeut ti si na e na ambeni ngoi? Nyen la e peut ti duti sûr na ni?

¹⁹ Atâa tongana e sara ye alingbi na awango kue so ayeke na yâ ti article so, na ambeni ngoi vundu ayeke sara e nga e yeke gi bê ti e. Na ambeni lango, e peut même ti découragé ngangu. Me grâce na mungo maboko ti Jéhovah, e peut ti zia ti pensé na aye so asara si e découragé na bê ti e ayeke dë. E peut ti duti sûr so, na mingi ti alango, e yeke duti na ngia ndali ti so e yeke na nzoni songo na Jéhovah nga e hinga so ye so e sara ndali ti lo azia ngia na bê ti lo.

20. Nyen la mo leke na bê ti mo ti ngbâ ti sara?

²⁰ Zia e ngbâ ti sara kue ti zia lege pëpe na akpale ti e, aye so asi na e ândö wala afaute so e sara ti kanga lege na e ti duti na ngia. Na ngoi so e komanse ti gi bê ti e, Jéhovah apeut ti sara si bê ti e adë (Ps. 143:10). E yeke ku kungo ngoi so a yeke duti ande ngangu na e ape ti duti na anzoni pensé. Lakue na ndapre e yeke zingo sân gingo bê, e yeke duti na ngia ti sara na Nzapa ti e Jéhovah so aye e mingi.