Ngbâ ti gi ti wara “aye ti yingo” so mo bezoin ni

1. Aye wa la Jéhovah acréé e na bezoin ni? (Matthieu 5:3).

JÉHOVAH acréé azo na bezoin ti wara ambeni ye. Na tapande, ti tene e ngbâ na fini, e bezoin kobe, bongo nga na ndo ti lango. Tongana mbeni ye so amanke e, même gï teti kete ngoi, gigi ayeke ga ngangu na e. Jéhovah acréé e na bezoin ti aye ti mitele me nga na bezoin ti aye ti yingo. (Diko Matthieu 5:3.) Tongana e ye biani ti duti na ngia, e doit ti hinga so e bezoin aye ti yingo nga e ngbâ ti gi ti wara ni.

2. Tapande wa la mo peut ti sara kua na ni ti fa nda ti tënë ti ‘hinga so mo bezoin aye ti yingo’?

² Ti ‘hinga so mo bezoin aye ti yingo’ aye ti tene nyen? Na Grec, tënë so aye ti sara tënë ti zo so ayeke iri yingo tongana zo ti iringo ye. Gbu li na ndö ti mbeni zo ti iringo ye. Lo yü surungo bongo nga lo duti na sese na terê ti lege. Lo fatigué ndali ti so lo te ye ape, azo ake lo ndali ti so lo yeke saleté, lâ asu lo ngangu nga dê asara lo mingi na bï. Zo ti iringo ye so ahinga so lo bezoin ti tene a aidé lo si lo ngbâ na fini nga lo wara ngangu. Legeoko nga, zo so ahinga so lo bezoin aye ti yingo ahinga so lo bezoin mungo maboko ti Nzapa. Tongaso, a nzere na lo mingi ti bâ nzoni na lege ti gbâ ti aye ti yingo so Jéhovah amû na azo so aye lo.

3. Nyen la e yeke bâ na yâ ti article so?

³ Na yâ ti article so, e yeke bâ kozoni ye so e peut ti manda na lege ti tapande ti mbeni wali ti Phénicie so avoro yanga na Jésus ti aidé lo. Mbaï so afa asarango ye ota so azo so ahinga so ala bezoin aye ti yingo adoit ti gi ti duti na ni. Na pekoni, e yeke sara tënë na ndö ti tapande ti Pierre, ti Paul nga na ti Gbia David so azia lani bê ti ala na Jéhovah ti aidé ala.

ASARANGO YE OTA SO E BEZOIN NI

4. Nyen la mbeni wali ti Phénicie aye lani ti tene Jésus asara?

⁴ Mbeni lâ, mbeni wali ti Phénicie aga na terê ti Jésus. Mbeni “sioni yingo ayeke sara sana mingi” na molenge ti lo ti wali (Mat. 15:​21-28). Wali ni asara agenou na devant ti Jésus lo hunda lo ti aidé molenge ti lo ni. Wali so ayeke lani na ambeni pendere sarango ye na ngoi so lo ga na terê ti Jésus. Zia e bâ ambeni.

5. Asarango ye wa la wali ni ayeke lani na ni? Jésus asara ye tongana nyen? (Bâ nga foto.)

⁵ Wali ti Phénicie ni asara lani terê ti lo kete. E tene tongaso ngbanga ti nyen? Ngbanga ti so bê ti lo ason ape ndali ti fason so Jésus akiri tënë na lo. Lo haka lo na mbeni kete mbo so azo so ayeke aJuif ape ayeke bata ni. Tongana a yeke mo la Jésus asara lani tënë so na mo, mo yeke sara ye tongana nyen? Eskê bê ti mo ayeke son na mo yeke zia lege ti hunda lo ti mû maboko na mo? Me a yeke ye so wali ti Phénicie so asara lani la ape. Lo sara terê ti lo kete nga lo ngbâ ti hunda mungo maboko. E bâ ni polele na lege so lo ngbâ lani ti voro yanga na Jésus ti aidé lo. Nyen la apusu lo ti sara tongaso? Lo sara tongaso ndali ti so lo yeke na mabe na Jésus. So Jésus abâ so lo yeke na kpengba mabe, lo aidé lo. Atâa so lo tene so a tokua lo gï na mbage ti “ataba ti da ti Israël so agirisa”, Jésus atomba sioni yingo so ayeke na yâ ti molenge ti wali so.

6. Tongana nyen la e peut ti mû tapande ti wali ti Phénicie so?

⁶ Ti kaï abezoin ti e na lege ti yingo, e doit ti gi ti duti na mara ti asarango ye ti wali so. E doit ti sara terê ti e kete, ti ngbâ ti hunda mungo maboko nga ti duti na kpengba mabe. Gï azo so asara terê ti ala kete la ayeke ngbâ ti voro yanga na Nzapa ti aidé ala. E doit nga ti duti na kpengba mabe na Christ Jésus nga ti sara confiance na azo so lo yeke sara kua na ala ti fa lege na adisciple ti lo (Mat. 24:​45-47). Tongana e sara terê ti e kete, e ngbâ ti hunda Jéhovah na Molenge ti lo ti mû maboko na e nga e yeke na mabe, a yeke nzere na ala nga ala yeke aidé e na ala yeke fa lege na e. (Bâ Jacques 1:​5-7.) Zia e bâ fadeso fason so Jéhovah ayeke mû na e kobe, bongo nga na ndo ti batango terê na lege ti yingo. E yeke bâ ye so e doit ti sara ti wara aye ni so na lege so e gbu li na ndö ti tapande ti abazengele Pierre na Paul nga na Gbia David.

NGBÂ TI MANDA MBETI TI NZAPA TONGANA PIERRE

7. Kua wa la Jésus amû lani na Pierre? Mbeni ye nde wa la lo doit lani ti sara ni? Fa ndani so mo tene tongaso. (aHébreu 5:14–6:1).

⁷ Gbu li na ndö ti tapande ti bazengele Pierre. Lo yeke mbeni kozo zo na popo ti aJuif so ahinga so Jésus ayeke Messie, zo so Jéhovah ayeke sara lani kua na lo ti fa na awakua ti Lo “atënë so amû na zo fini ti lakue lakue.” (Jean 6:​66-68). Kozo si Jésus so a zingo lo na kuâ akiri na yayu, lo tene na Pierre, lo tene: “Mû kobe na akete taba ti mbi.” (Jean 21:17). Pierre asara kua so na bê ti lo kue nga Jéhovah asara même kua na lo ti sû alettre so aga mbage ti Bible. Me Pierre ayeke nga lani na bezoin ti te kobe ti yingo. Na tapande, lo manda alettre so bazengele Paul asû lani kozo na gbe ti yingo ti Nzapa. Pierre ayeda so ambeni tënë so Paul asû lani ayeke “ngangu ti mä yâ ni”. (2 Pi. 3:​15, 16). Me Pierre angbâ lani ti manda ni. Lo yeke na mabe so Jéhovah ayeke aidé lo ti mä yâ ti aye ni so nga ti sara ye alingbi na atënë so ayeke tongana “kpengbango kobe” so Paul amû ni na azo na lege ti alettre ti lo.—Diko aHébreu 5:14–6:1.

8. Nyen la Pierre asara na peko ti so mbeni ange ti Nzapa atene na lo ti sara mbeni changement?

⁸ Pierre afa so lo yeke na mabe na Jéhovah na lege so lo sara ye alingbi na fango lege so lo wara. Na tapande, na ngoi so Pierre ayeke lani na gbata ti Joppé so ayeke na yanga ti ngu, lo bâ mbeni vision so na yâ ni mbeni ange ti Jéhovah atene na lo ti fâ anyama so Ndia ti Moïse atene ayeke sioni nga ti te ni. Na lê ti aJuif, ti sara tongaso ayeke na lege ni ape. Na tongo nda ni, Pierre atene: “Ên-ën, Seigneur, mbi de mbi te mbeni sioni ye na mbeni ye ti saleté lâ oko pëpe.” Me ange ni atene na lo, atene: “Ye so Nzapa asara si aga nzoni awe, zia ti iri ni sioni ye.” (Kus. 10:​9-15). Pierre ayeda na ni. E hinga ni tongana nyen? Kete na peko ti so lo bâ vision ni, akoli ota so Corneille so ayeke Juif ape atokua ala asi, na ala tisa Pierre ti gue ti sara tënë na wa ti ala. Tongana Pierre abâ fade vision so ape, lo yeke yeda ti gue ape ndali ti so aJuif abâ azo so ayeke aJuif ape tongana azo so ayeke saleté (Kus. 10:​28, 29). Me hio Pierre ayeda na changement so Jéhovah afa na lo (aProv. 4:18). Lo fa tënë na Corneille na azo ti da ti lo nga lo yeke na ngia ti bâ ala yeda na tâ tënë, ala wara yingo vulu nga ala wara batême.—Kus. 10:​44-48.

9. Tongana e sara nzara ti te kpengbango kobe ti yingo, e yeke bâ nzoni dä na alege use wa?

⁹ Tongana Pierre, e doit lakue ti nyon lait, so ti tene ti manda akozo tâ tënë ti Bible. E doit nga ti duti na nzara ti te akpengbango kobe ti yingo, so ti tene ti manda atâ tënë so apeut ti duti ngangu ti mä yâ ni. E doit ti sara kue ti mû ngoi ti manda Bible nzoni. Nga a yeke kota ye ti sara effort ti gi ti mä yâ ti atënë so peut-être e mä yâ ni kozo ape. Ngbanga ti nyen? E yeke bâ nzoni dä na alege use: Kozo ni, e yeke manda ye na ndö ti Jéhovah so ayeke sara si e ye lo nga e ne lo mingi; use ni, bê ti e ayeke pusu e mingi ti fa na azo aye na ndö ti Babâ ti e ti yayu so asarango ye ti lo apika bê mingi (aRom. 11:33; Apoc. 4:11). E manda nga mbeni ye na lege ti tapande ti Pierre: Tongana a changé fason so e mä na yâ ti mbeni tâ tënë ti Bible, hio e doit ti yeda na ni nga ti sara ye alingbi na ni. Tongana e sara tongaso, e yeke ngbâ ti te kobe ti yingo nzoni nga Jéhovah ayeke ngbâ ti sara kua na e.

NGBÂ TI GI TI YÜ FINI ZO TONGANA PAUL

10. Ti gue oko na aColossien 3:​8-10, nyen la e doit ti sara ti zia ngia na bê ti Jéhovah?

¹⁰ Ti zia ngia na bê ti Nzapa, e doit ti gi ti bâ nzoni na lege ti mbeni ye nde so Jéhovah amû na e: bongo ti e ti yingo. So aye ti tene nyen? Bazengele Paul atene so e doit ti “zi ngbene zo” nga ti yü “fini zo”. (Diko aColossien 3:​8-10.) Ti gi ti duti na asarango ye so anzere na Jéhovah amû ngoi mingi nga ahunda ti sara effort. Gbu li na ndö ti tapande ti Paul. Même na ngoi so lo de maseka, lo sara ngangu ti zia ngia na bê ti Nzapa (aGal. 1:14; aPhil. 3:​4, 5). Me lo hinga lani ape tongana nyen ti voro Nzapa na lege ni. So lo hinga afango ye ti Christ ape nga lo yeke zo ti baba, a sara si lo ga “zo ti sioni yanga” so ayeke na anzoni sarango ye ape.—1 Tim. 1:13.

11. Changement wa la Paul adoit lani ti sara? Fa ndani so mo tene tongaso.

¹¹ Kozo ti tene Paul aga Chrétien, bê ti lo ayeke wâ mingi. Mbeni mbaï so ayeke na yâ ti mbeti ti Kusala atene so ‘lê ti lo angbâ lakue ti bê na ngonzo na terê ti adisciple ti Jésus nga lo yeke na kota nzara ti fâ ala’. (Kus. 9:1). Na peko ti so Paul aga Chrétien, kite ayeke dä ape so lo sara ngangu ti zia ngbene sarango ye ti lo so (aÉph. 4:​22, 31). Atâa so kue, na ngoi so lo na Barnabas amä terê ape, a ga “mbeni ngangu papa”. (Kus. 15:​37-39). Ngbene sarango ye ti Paul akiri asigi, me lo ngbâ ti sara ngangu ti zia lege ni. Lo ngbâ lani ti ‘pika terê ti lo’, so ti tene ti tiri na awokongo ti lo tongaso si lo ngbâ ti zia ngia na bê ti Jéhovah.—1 aCor. 9:27.

12. Nyen la a-aidé lani Paul ti zia angbene sarango ye ti lo?

¹² Paul awara lani lege ti zia angbene sarango ye ti lo nga ti yü fini zo ndali ti so lo zia bê ti lo na ndö ti ngangu ti lo wani ape (aPhil. 4:13). Tongana Pierre, lo zia bê ti lo na “ngangu so Nzapa ayeke mû”. (1 Pi. 4:11). Me na ambeni ngoi, Paul asara afaute na lo découragé. Me na ngoi so lo découragé, lo pensé na anzoni ye so Babâ ti lo ti yayu asara ndali ti lo na amû na lo ngangu ti ngbâ ti tiri na awokongo ti lo.—aRom. 7:​21-25.

13. Tongana nyen la e peut ti mû tapande ti Paul?

¹³ E peut ti sara ye tongana Paul tongana e yeda so atâa e yeke sara na Jéhovah asara ngu oke, e bezoin ti ngbâ ti sara ngangu ti zi ngbene zo na ti yü fini zo, ye so ayeke tongana bongo so Jéhovah amû na e. Tongana mbeni ngbene sarango ye ti e akiri asigi, na tapande tongana e sara ngonzo wala e sara tënë na mbeni zo na nzoni bê ape, a yeke nzoni e pensé ape so e peut ti zia lege ni ape. Me a yeke nzoni e ngbâ lakue ti gi ti sara achangement (aRom. 12:​1, 2; aÉph. 4:24). Me tongana e ngbâ ti sara tongaso, e doit ti girisa mbeni kota ye ape: Ti bongo ti e, e yeke leke ni ti lingbi na e, me ti bongo ti e ti yingo so Jéhovah amû na e, e la e doit ti changé ti lingbi na ni. A yeke na lege ni ti tene e sara achangement ti lingbi na aye so Nzapa ahunda.

ZIA JÉHOVAH ABATA MO TONGANA DAVID

14-15. Na alege wa la Jéhovah ayeke bata azo ti lo? (Psaume 27:5). (Bâ nga foto.)

¹⁴ Ti duti biani na ngia, e bezoin gï kobe ti yingo na bongo na lege ti yingo ape. E bezoin nga ti tene Jéhovah abata e. Na alege wa la Jéhovah ayeke bata e? Nyen la e bezoin ti sara tongaso si lo bata e?

¹⁵ Gbia David asara tënë na ndö ti ndo ti batango terê na lege ti yingo so Jéhovah amû na e. (Diko Psaume 27:5.) Tongana nyen la Jéhovah ayeke bata awakua ti lo laso? Jéhovah ayeke bata e si mbeni zo wala mbeni ye asara si mabe ti e atï ape. Lo mû zendo lo tene aye ti bira kue so a leke ti sara na bira na e ayeke sara ye oko na e ape (Ps. 34:7; És. 54:17). Satan, asioni yingo ti lo nga na azo so ayeke sara ye ti ngangu na e ayeke na ngangu. Me Jéhovah ayeke na ngangu ahon ala. Même tongana ala fâ e, Jéhovah ayeke kiri na e na fini (1 aCor. 15:​55-57; Apoc. 21:​3, 4). Jéhovah ayeke aidé nga e na ngoi so e gi bê ti e tongaso si e zia ti sara na lo ape (aProv. 12:25; Mat. 6:​27-29). Babâ ti e so aye e amû nga na e aita ti e so ayeke wa e nga ayeke mû maboko na e na angoi ti ngangu. Lo mû nga na e a-ancien so ayeke fa ye na e nga ayeke aidé e si mabe ti e angbâ ti kpengba (És. 32:​1, 2). Na ngoi ti abungbi, a yeke fa na e tongana nyen la e peut ti zia si Jéhovah a-aidé e nga abata e.—aHéb. 10:​24, 25.

16. Na alege wa la Jéhovah abata David?

¹⁶ Na ngoi so David amä yanga ti Jéhovah, lo bata lo na lege so lo aidé lo ti mû anzoni desizion na asara si lo yeke na ngia. (Bâ aProverbe 5:​1, 2.) Me na ngoi so lo sara sanka ti andia ti Jéhovah, lo wara asioni ye ti peko ni (2 Sam. 12:​9, 10). Ka ti ambeni ngoi so David abâ pasi atâa so lo sara faute ape? Lo zi bê ti lo na Jéhovah na yâ ti sambela na Jéhovah asara si bê ti lo adë na lege so lo fa na lo so lo ye lo mingi nga lo yeke bâ lege ti lo.—Ps. 23:​1-6.

17. Tongana nyen la e peut ti mû tapande ti David?

¹⁷ E peut ti mû tapande ti David tongana e gi wango na mbage ti Jéhovah na ngoi so e ye ti mû adesizion. E doit ti hinga nga so na ambeni ngoi e peut ti bâ pasi ndali ti so e mû asioni desizion, me pëpe ndali ti so Jéhovah abata e ape (aGal. 6:​7, 8). Nga tongana e wara kpale ndali ti afaute so e la e sara ape, e yeke zi bê ti e na Jéhovah na yâ ti sambela na hingango so lo yeke bata bê ti e nga na apensé ti e.—aPhil. 4:​6, 7.

NGBÂ TI GI TI WARA AYE TI YINGO SO MO BEZOIN NI

18. Ngbanga ti nyen la a peut ti duti kpale na e ti kaï bezoin ti e ti aye ti yingo? Tongana nyen la e peut ti ngbâ ti kaï bezoin ti e ti aye ti yingo? (Bâ nga afoto.)

¹⁸ Versê ti e ti ngu 2026 atene: “Ngia ayeke na ala so ahinga so ala yeke na bezoin ti aye ti yingo.” Tënë so ayeke mbilimbili tâ tënë na ngoi ti e laso. Ngbanga ti nyen? Ngbanga ti so e yeke na popo ti gbâ ti azo so ayeke na ngia ape so ake ti yeda so ala yeke na bezoin ti aye ti yingo wala so agi ti kaï bezoin ni so na fason ti ala wani na lege ti abungbi ti vorongo nzapa ti wataka wala na lege ti ndara ti azo. E doit ti mû tapande ti ala ape. Tongaso, nyen la ayeke aidé e ti ngbâ ti sara confiance na Jéhovah? Tongana e ngbâ ti te kobe ti yingo so Jéhovah amû na e, e yü fini zo nga e gi ti bâ nzoni na lege ti aye so Jéhovah amû na e ti bata e, e yeke ngbâ ti sara confiance na lo.