Ndani so e bezoin ye so a futa ti zi azo

1-2. Nyen la asara si e bezoin ti tene a sö e? Ngbanga ti nyen? (aRomain 7:​22-24). (Bâ nga foto.)

IMAGINÉ ye so si. Mbeni da akungbi na ndö ti mbeni koli. Lo ngbâ na fini me lo peut ti sigi lo oko ape. Ye kue so lo peut ti sara ayeke gï ti dekongo ti tene mbeni zo aga azi lo.

² E oko oko kue dutingo ti e ayeke tongaso. Na lege wa? Na ngoi so Adam ake yanga ti Jéhovah, lo ga wasiokpari. Na pekoni, lo mû siokpari na amolenge ti lo kue. Azo kue ayeke na gbe ti siokpari tongana ti koli so da akungbi na ndö ti lo so. Tongana lo, e bezoin mbeni zo ti zi e. Bazengele Paul afa dutingo ti e ti awasiokpari nzoni mingi na yâ ti lettre ti lo na aRomain. (Diko aRomain 7:​22-24.) Lo voro yanga ti tene a sö lo ‘na yâ ti terê so ayeke gue na lo ti wara kuâ so’. Paul ayeke na gbe ti siokpari so nyen na nyen ayeke gue na lo na kuâ (aRom. 6:23). A yeke ye so ayeke si nga na e kue. E bezoin ti tene a sö e.

3. Na alege wa la ye so a futa ti zi azo apeut ti sö e?

³ Paul ahunzi atënë ti lo na ndö ti siokpari na mbeni pendere tënë. Na peko ti so lo hunda ndo, lo tene: “Zo wa la ayeke sö mbi ande na yâ ti terê so ayeke gue na mbi ti wara kuâ so?” lo wani lo kiri tënë, lo tene: “Singila na Nzapa na lege ti Jésus Christ Seigneur ti e!” (aRom. 7:25). Paul aye ti sara lani tënë ti fini ti Jésus so ayeke ye so a futa ti zi azo.a Ye so a futa ti zi azo apeut ti zi e na lege so asara si (1) e wara pardon ti asiokpari ti e, (2) e yeke na beku ti ga mbilimbili-kue nga (3) e kiri e duti na nzoni songo na Jéhovah. Na ngoi so e yeke bâ aye so oko na oko, e yeke ye Jéhovah, “Nzapa so ayeke mû beku na zo”, encore mingi (aRom. 15:13). E yeke ye nga mingi Jésus so, ‘na lege ti lo, a zi e na lege ti ye so a futa ti zi azo’.—aCol. 1:14.

E WARA PARDON TI ASIOKPARI TI E GRÂCE NA YE SO A FUTA TI ZI AZO

4-5. Ngbanga ti nyen la e kue e bezoin ye so a futa ti zi azo? (Zo-ti-fa-tene 7:20).

⁴ E bezoin ye so a futa ti zi azo tongaso si Jéhovah apeut ti pardonné e. E kue e yeke sara siokpari na lege ti atënë so e tene wala aye so e sara. (Diko Zo-ti-fa-tene 7:20.) Ambeni siokpari ayeke kota ahon ambeni. Na tapande, Ndia ti Moïse atene a doit ti fâ mbeni zo so asara lango-sioni wala a fâ zo (Lév. 20:10; Nom. 35:​30, 31). Mingi ti asiokpari ni ayeke akota siokpari ape, me a yeke siokpari. Na tapande, David so ayeke mbeni zo ti sungo psaume atene: “Mbi yeke sara hange na tambela ti mbi si mbi kpe ti sara siokpari na yanga ti mbi.” (Ps. 39:1). Biani, même na ambeni ngoi atënë ti yanga ti e apeut ti duti siokpari.—Jacq. 3:2.

⁵ Gbu li na ndö ti ambeni tënë so mo tene nga na aye so mo sara. Eskê mo tene ambeni tënë so mo ye fade ti tene ape na ambeni zo? Eskê mo sara ambeni ye so na pekoni mo regretté? Kite ayeke dä ape so mo yeke kiri tënë en na ahunda so use kue. Bible atene: “Tongana e tene: ‘E yeke na siokpari pëpe,’ e handa terê ti e wani na tâ tënë ayeke na yâ ti e pëpe.”—1 Jean 1:8.

6-7. Nyen la amû lege na Jéhovah ti pardonné asiokpari ti e? (Bâ nga foto.)

⁶ Ye so a futa ti zi azo amû lege na Jéhovah ti pardonné asiokpari ti e (aÉph. 1:7). Me a ye ti tene ape so Jéhovah ayeke kanga lê na ndö ti afaute so e sara mo bâ mo tene a sara ye oko na lo ape. Jéhovah aye ti tene e sara siokpari ape (És. 59:2). So Jéhovah ayeke fâ ngbanga tâ na lege ni, lo doit lani ti sara mbeni ye so amû lege na lo ti pardonné asiokpari ti e.

⁷ Ndia ti Moïse ahunda lani ti tene azo ti Israël amû sandaga ti anyama tongaso si a pardonné asiokpari ti ala (Lév. 4:​27-31; 17:11). Asandaga so aye ti sara tënë ti kota sandaga so Jésus ayeke mû ande nga na anzoni ye so ayeke ga na pekoni. Sandaga ti Jésus amû lege na Jéhovah ti pardonné asiokpari ti e. Paul acomprendre lani anzoni ye so sandaga ti Jésus ayeke ga na ni na azo. Na yâ ti lettre so lo tokua na aChrétien ti Corinthe, lo fa molongo ti asioni ye so ala sara ândö, na pekoni lo tene: “A sukula ala si ala ga nzoni, a sara si ala ga nzoni-kue, a diko ala tongana azo ti mbilimbili na iri ti Seigneur Jésus Christ nga na lege ti yingo ti Nzapa ti e.”—1 aCor. 6:​9-11.

8. Na ngoi so mo yeke leke terê ti mo ndali ti Mémorial ti ngu so, nyen la mo peut ti gbu li na ndö ni?

⁸ Na ngoi so mo yeke leke terê ti mo ndali ti Mémorial ti ngu so, mû ngoi ti gbu li na ndö ti ye so pardon ti Jéhovah aye ti tene ndali ti mo. Na tapande, grâce na ye so a futa ti zi azo, mo bezoin ti bâ ape so tënë ayeke lakue na li ti mo ndali ti asiokpari so mo sara ândö me mo changé bê ti mo awe. Ka tongana a yeke ngangu na mo ti yeda so Nzapa apardonné mo awe? Peut-être mo tene na bê ti mo, mo tene: ‘Mbi hinga so Jéhovah apeut ti pardonné mbi, me mbi peut ti pardonné mbi wani ape.’ Tongana mo pensé tongaso, girisa ye so ape: Jéhovah la ayeke pardonné zo nga lo mû na Molenge ti lo kua ti fango ngbanga. Jéhovah amû na mo wala na mbeni zo nde ape kua ti bâ zo wa la a yeke sara nzoni bê na lo wala zo wa la a yeke sara nzoni bê na lo ape. Bible atene: ‘Ndali ti so Jéhovah wani ayeke na yâ ti lumière, tongana e yeke tambela na yâ ti lumière, mênë ti Molenge ti lo Jésus asukula e na a zi asiokpari kue awe.’ (1 Jean 1:​6, 7). E peut ti duti na confiance na tënë so tongana ti so e yeke na confiance na tanga ti afango ye ti Bible. Ye so a futa ti zi azo amû lege na Jéhovah ti sara nzoni bê na e nga Bible atene so lo yeke “nduru ti pardonné zo”.—Ps. 86:5.

E YEKE NA BEKU TI GA MBILIMBILI-KUE GRÂCE NA YE SO A FUTA TI ZI AZO

9. Na yâ ti Bible, tënë siokpari aye ti tene nyen? (Psaume 51:5 nga na kete tënë na gbe ni).

⁹ Na yâ ti Bible, tënë siokpari aye ti sara tënë ti mbeni ye so zo asara nga dutingo mbilimbili-kue ape, so a dü zo dungo na ni. (Diko Psaume 51:5 nga na kete tënë na gbe ni.) So e yeke mbilimbili-kue ape ayeke sara si e sara ye so ayeke na lege ni ape, me a yeke sara nga si e tï kobela, e ga mbakoro nga e kui. Ye so afa ndani so amolenge so asara siokpari ape apeut ti tï kobela nga même ti kui. A fa nga na e ndani so anzoni zo nga na asioni zo ayeke bâ pasi nga ayeke kui. So e kue e yeke ahale ti Adam, siokpari ayeke na terê ti e.

10. So Adam na Ève aga awasiokpari asara ala tongana nyen?

¹⁰ Gbu li na ndö ti ye so asara Adam na Ève na peko ti so ala sara siokpari. Siokpari asara si ala bâ so ala yeke nzoni encore ape. Hio na peko ti so ala ke yanga ti Nzapa, ala komanse ti wara aye ti peko ti dorongo ndia ti Nzapa, ndia so a ‘sû tënë ni na yâ ti bê ti ala’. (aRom. 2:15). Ala hinga so mbeni ye achangé na yâ ti terê ti ala, me a yeke nzoni ye ape. Ala bâ so ala doit ti kanga mbage ti terê ti ala na ti honde terê ti ala na lê ti Lo so acréé ala (Gen. 3:​7, 8). Ti kozoni, Adam na Ève abâ so tënë ayeke na li ti ala, ala gi bê ti ala, ala bâ so ala yeke nzoni ape, ala mä songo ti ye nga kamene asara ala. Na aye ni so asara ala juska ala kui na ni.—Gen. 3:​16-19.

11. So e yeke awasiokpari asara e tongana nyen?

¹¹ So e yeke awasiokpari, aye so asi na Adam na Ève asi na e nga kue. Vundu ayeke sara e nga e yeke mä songo ti ye. Même tongana e gi ti sara si fini ti e aga nzoni nga ti kpe akpale, lakue ambeni kpale ayeke dä so e peut ti leke ni ape. Ngbanga ti nyen? Ngbanga ti so tongana ti so Bible atene ‘a zia e na gbe ti buba ye’. (aRom. 8:20). Tënë so ayeke tâ tënë gï na ndö ti zo oko ape me na ndö ti azo kue. Na tapande, gbu li na ndö ti ngangu so azo ayeke sara ti bâ lege ti sese, ti kanga lege na sarango asioni ye, ti hunzi yere nga ti sara si amara kue aduti na siriri. Atâa so ala sara effort, ala hunzi akpale so ape. Tongana nyen la ye so a futa ti zi azo apeut ti sara si e ga mbilimbili-kue?

12. Beku wa la e yeke na ni grâce na ye so a futa ti zi azo?

¹² Grâce na ye so a futa ti zi azo, e yeke na beku so “a yeke zi ande création . . . na gbe ti ngbâa ti ye so abuba”. (aRom. 8:21). So aye ti tene so na peko ti so e ga ande mbilimbili-kue na yâ ti Paradis, terê ti e ayeke son encore ape nga vundu ayeke sara e encore ape. E yeke bâ ande encore ape so tënë ayeke na li ti e nga e yeke gi bê ti e encore ape. Na ndö ni, “Mokonzi ti siriri,” so ti tene Jésus Christ so amû fini ti lo ti zi e, ayeke komande ande. Lo yeke aidé azo ti leke akpale kue so ala peut ti leke ni ala wani ape.—És. 9:​6, 7.

13. Mbeni ye nde wa la mo peut ti gbu li na ndö ni na ngoi so mo yeke leke terê ti mo ndali ti Mémorial ti ngu so?

¹³ Gbu li na ndö ti gigi ti mo na ngoi so mo yeke ga mbilimbili-kue. Imaginé lakue na ndapre tongana mo zingo mo bâ so mo yeke nzoni, mo yeke gi bê ti mo ape na ndö ti ye so mo wala azo so mo ye ala ayeke te, mo yeke gi bê ti mo ape wala mo wala azo so mo ye ala ayeke tï kobela wala ayeke kui. Même laso mo peut ti duti kamême na siriri tongana mo ‘gbu beku so a zia na gbele e so ayeke tongana kale ti bateau ndali ti âme ti e. Beku ni so aluti nzoni nga aluti ngangu’. (aHéb. 6:​18, 19). Tongana ti so mbeni kale apeut ti sara si bateau aluti, beku ti mo ti Chrétien apeut ti sara si mo yeke na kpengba mabe nga apeut ti aidé mo ti gbu ngangu na yâ ti akpale kue so mo wara. Mo peut ti duti sûr so Jéhovah ayeke ga “zo so ayeke futa azo so ayeke gi lo ngangu.” (aHéb. 11:6). Bê ti mo apeut ti dë laso nga mo peut ti duti na tâ beku ndali ti kekereke gï grâce na ye so a futa ti zi azo.

E KIRI E DUTI NA NZONI SONGO NA JÉHOVAH GRÂCE NA YE SO A FUTA TI ZI AZO

14. Siokpari asara nyen na ndö ti songo ti e na Lo so acréé e? Ngbanga ti nyen?

¹⁴ Depuis na ngoi so Adam na Ève asara siokpari, azo ayeke na nzoni songo na Nzapa ape. Bible atene même so yâ ti songo ti azo na Nzapa afâ (aRom. 8:​7, 8; aCol. 1:21). Ndali ti nyen? Ndali ti so Jéhovah ayeke mbilimbili-kue na lo peut ti sara sanka ti siokpari ape. Bible atene na ndö ti Jéhovah, atene: “Lê ti mo ayeke tâ nzoni-kue si mo peut ti ngbâ ti bâ ye ti sioni gï na lê pëpe, mo lingbi ti kanga lê na ndö ti ye ti sioni pëpe.” (Hab. 1:13). Siokpari azi mbeni dû na popo ti Nzapa na azo. Zo oko apeut ti duti na nzoni songo na Jéhovah ape gï tongana a kanga dû ni nga e kiri e leke songo na lo awe si. Ye so a futa ti zi azo asara si e peut ti kiri ti lë songo na lo.

15. Tongana nyen la kuâ ti Jésus amû lege na azo ti kiri ti duti na nzoni songo na Jéhovah?

¹⁵ Bible atene so Jésus ayeke “sandaga so amû lege ti leke songo na popo ti zo na Nzapa, sandaga ndali ti asiokpari ti e.” (1 Jean 2:2). Tongana nyen la sandaga ti Jésus amû lege na azo ti kiri ti duti na nzoni songo na Jéhovah? Sandaga ti Jésus ayeke ye so na lege ni Nzapa ti e so ayeke mbilimbili-kue apeut ti kiri ti duti na nzoni songo na azo (aRom. 3:​23-26). Lo peut même ti ‘bâ’ azo so avoro lo be-ta-zo kozo na kuâ ti Christ tongana azo ti mbilimbili (Gen. 15:​1, 6). Ndali ti nyen? Ndali ti ye so a futa ti zi azo so a yeke mû ande. Jéhovah ahinga lani na bê ti lo kue so Molenge ti lo Jésus ayeke mû ye so a futa ti zi azo (És. 46:10). Ye so a futa ti zi azo azi lege na azo ti duti na nzoni songo na Nzapa.

16. Mbeni ye nde wa encore la mo peut ti gbu li na ndö ni na ngoi so mo yeke leke terê ti mo ndali ti Mémorial ti ngu so? (Bâ nga foto.)

¹⁶ Gbu li na ndö ti ye so ti kiri ti duti na nzoni songo na Jéhovah aye ti tene ndali ti mo. Na tapande, mo peut ti iri Jéhovah “Babâ” ti mo tongana ti so Jésus afa na e ti sara (Mat. 6:9). Na ambeni ngoi mo peut même ti iri Jéhovah “Kamarade” ti mo. Tongana e iri Jéhovah “Babâ” ti e wala “Kamarade” ti e, a yeke nzoni e sara ni na nengo ndo nga e sara terê ti e kete. Ngbanga ti nyen? Ngbanga ti so e yeke awasiokpari na e lingbi pëpe ti ga nduru na Jéhovah na ngangu ti e wani. A yeke gï grâce na ye so a futa ti zi azo la e peut ti duti na songo na Jéhovah. Na lege ti Jésus, Jéhovah asara si ‘songo akiri na popo ti lo na tanga ti aye kue, lo leke songo so na lege ti mênë ti Christ so lo tuku na ndö ti keke ti pasi.’ (aCol. 1:​19, 20). Ndani la e peut ti duti na nzoni songo na Jéhovah atâa so laso e yeke mbilimbili-kue ape.

YE SO A FUTA TI ZI AZO AFA SO JÉHOVAH ASARA NZONI BÊ MINGI

17. Tongana nyen la ye so a futa ti zi azo afa so Jéhovah asara nzoni bê mingi na e? (aÉphésien 2:​4, 5).

¹⁷ Ye so a futa ti zi azo afa so Jéhovah ‘asara nzoni bê mingi.’ Lo ‘sara si e kiri na fini na ngoi so e kui lani awe na yâ ti afaute ti e.’ (Diko aÉphésien 2:​4, 5.) Azo kue so ayeke “nduru ti yeda na tënë ni ti wara fini ti lakue lakue” adekongo ti tene a aidé ala, ala hinga so ala yeke na gbe ti siokpari na ala bezoin ti tene a sö ala (Kus. 13:48). Jéhovah ayeke aidé ala na lege so lo bâ si ala mä nzoni tënë ti Royaume tongaso si ala peut ti hinga lo na Molenge ti lo Jésus (Jean 17:3). Tongana Satan apensé so, so Adam na Ève aga awasiokpari abuba yâ ti ye so Nzapa aleke ti sara awe, andâ lo handa terê ti lo.

18. Na ngoi so e yeke gbu li na ndö ti ye so a futa ti zi azo, kota tënë wa la a yeke nzoni e girisa ape?

¹⁸ Na ngoi so e yeke gbu li na ndö ti anzoni ye ti peko ti ye so a futa ti zi azo, a yeke nzoni e girisa ape kota raison so ndali ni Jéhovah amû ni. Lo mû ni ti sö e me nga ndali ti mbeni ye so ayeke kota mingi: Ti kiri tënë na tënë so Satan abi na sese na yaka ti Éden (Gen. 3:​1-5, 15). Na lege ti ye so a futa ti zi azo, Jéhovah asara si iri ti lo aga nzoni-kue, lo zi zonga kue so a bi na ndö ti iri ti lo. Lo zi nga e na gbe ti siokpari nga na kuâ ti fa so lo yeke Nzapa ti ndoye. Na lege ti kota nzobe ti lo, lo mû lege na e atâa so e yeke awasiokpari ti kiri nga tënë na tënë so Satan abi na sese (aProv. 27:11). Tongana nyen la mo peut ti fa so mo kiri singila ndali ti ye so a futa ti zi azo? E yeke kiri tënë na hunda so na yâ ti article ti peko.