Aye ti sara ti mû gonda na Jéhovah na lango ti mariage ti mo

1-2. Jéhovah abâ lango ti mariage tongana nyen?

ESKÊ mo ga nduru awe ti sara mariage? Tongana a yeke tongaso e gonda mo mingi. Peut-être mo ngbâ ti leke aye so mo yeke sara na lango ti mariage ti mo. Jéhovah ayeke bâ aye so mo yeke leke ndali ti mariage ti mo. Lo ye ti tene lango ti mariagea ti mo anzere na mo nga mo na wali wala koli ti mo aduti na ngia na yâ ti angoi so ayeke ga.—aProv. 5:18; Bia ti Sal. 3:11.

² Jéhovah alingbi ti tene mo mû gonda na lo na lango ti mariage ti mo. E tene tongaso ngbanga ti nyen? Tongana nyen la mo peut ti mû gonda na lo? Atâa so a leke article so mbilimbili ndali ti azo so ayeke leke aye ndali ti mariage ti ala, amama-ndia so ayeke na yâ ni apeut ti aidé e kue ti mû gonda na Jéhovah na ngoi so e gue na mariage wala tongana a hunda bango ndo ti e na ndö ti aye so a leke ti sara.

NGBANGA TI NYEN TI MÛ GONDA NA JÉHOVAH?

3. Nyen la a yeke nzoni mbeni couple so ayeke leke ti sara mariage agbu li na ndö ni? Ngbanga ti nyen?

³ A yeke nzoni acouple so ayeke leke ti sara mariage asara ye alingbi na amama-ndia ti Jéhovah so ayeke na yâ ti Bible na ngoi so ala yeke leke aye ni. Ngbanga ti nyen? Ngbanga ti so Jéhovah la azia mariage na sese. Lo la lo mû lani na Adam wali ti lo Ève (Gen. 1:28; 2:24). Tongaso, a yeke nzoni azo so ayeke leke ti sara mariage agbu li kozoni kue na ndö ti bango ndo ti Nzapa.

4. Mbeni raison nde wa la ndali ni acouple adoit ti mû gonda na Jéhovah na lango ti mariage ti ala?

⁴ Ambeni kota raison nde ayeke dä so ndali ni mo doit ti gbu li na ndö ti bango ndo ti Jéhovah na ngoi so mo yeke leke aye ndali ti lango ti mariage ti mo. Lo yeke Babâ ti mo ti yayu nga kota Kamarade ti mo (aHéb. 12:9). Kite ayeke dä ape so mo ye ti ngbâ ti duti na kpengba songo na lo. Mo ye ape ti tene mbeni ye so asi na lango ni so wala na mbeni lango nde ason bê ti lo (Ps. 25:14). Tongana mo gbu li na ndö ti aye kue so Jéhovah asara awe ndali ti mo nga lo yeke sara ande ndali ti mo, a yeke pusu mo ti kiri singila na lo na lege so mo yeke sara kue ti tene lango ti mariage ti mo amû gonda na lo.—Ps. 116:12.

TONGANA NYEN LA MO PEUT TI MÛ GONDA NA JÉHOVAH?

5. Tongana nyen la Bible apeut ti aidé acouple ti leke aye ndali ti lango ti mariage ti ala?

⁵ Bible afa ape molongo ti andia so aChrétien so aleke ti sara mariage adoit ti sara ye alingbi na ni na lango ti mariage ti ala. Tongaso, acouple apeut ti leke mariage ti ala alingbi na dutingo ti ala, ngobo ti ala nga na aye so ala ye. Atâ Chrétien adoit nga ti sara ye alingbi na andia so gouvernement alu na ndö ti mariage (Mat. 22:21). Mariage so a leke ni alingbi na amama-ndia ti Bible ayeke mû gonda na Jéhovah nga ayeke zia ngia na bê ti lo. Tongaso, amama-ndia wa la a yeke nzoni mo girisa ni ape?

6. Ngbanga ti nyen la a yeke kota ye ti tene mbeni couple asara ye alingbi na andia ti kodro na ndö ti mariage? (aRomain 13:​1, 2).

⁶ Sara ye alingbi na andia ti kodro (aRom. 13:​1, 2). Na yâ ti akodro mingi, mbeni couple adoit ti sara ye alingbi na ambeni ndia ti kodro kozo si ala sara mariage. A yeke nzoni couple ni agi ti hinga andia ti kodro so ala yeke dä. Tongana mo bezoin aide ti hinga andia ni so, mo peut ti hunda a-ancien.b

7. Ngoi ti mbeni mariage adoit ti duti tongana nyen?

⁷ Sara si ngoi ti mariage ti mo aduti nzoni (1 aCor. 10:​31, 32). Sara kue ti tene aye so a sara na lango ti mariage ti mo ague oko na lengo ti yingo ti Nzapa me na ti yingo ti dunia so ape (aGal. 5:​19-26). So koli ni la ayeke duti mokonzi ti fini sewa ni, a yeke nzoni lo sara kue ti tene lango ti mariage ni aduti ngoi ti ngia nga azo asara ye na nengo terê. Nyen la apeut ti sara si lango ti mariage aduti tongaso? Mbeni diskur so a sara ni na ndoye nga na nengo zo ayeke aidé azo so ayeke mä ni ti comprendre so mariage ayeke mbeni cadeau so alondo na Jéhovah. A yeke aidé nga azo ni ti bâ so mariage ayeke kota ye mingi. Ndani la mingi ti acouple asoro ti tene a sara ni na Da ti Royaume tongana lege ayeke dä. Tongana mo ye ti tene a sara diskur ti mariage ti mo na Da ti Royaume, tokua mbeti hio na a-ancien ti hunda ni.

8. Nyen la mo peut ti sara ti tene matanga ti mariage ti mo amû gonda na Jéhovah? (aRomain 13:13).

⁸ Diko aRomain 13:13. Tongana mo soro ti sara mbeni matanga na lango ti mariage ti mo, nyen la mo peut ti sara ti tene a gue oko na yingo ti dunia so ape? Tënë ti Grec so a kiri peko ni na tënë “pumba ti kirikiri” aye ti sara tënë ti amatanga so na ngoi ni azo anyon sämba ahon ndö ni nga a pika mozoko juska l’heure ahon. (Bâ note ti étude na ndö ti tënë “fêtes débridées” so ayeke na aRomain 13:​13, na Français.) Tongana mo leke ti mû sämba na azo, gbu li kozoni na ndö ti ye so mo peut ti sara tongaso si mbeni zo anyon sämba ahon ndö ni ape.c Tongana a yeke pika mozoko, sara si go ni atoto alingbi na ni tongaso si azo so aga apeut ti sara lisoro na popo ti ala. Soro nzoni mozoko so a yeke pika ni nga bâ si atënë ti yâ ni aduti atënë so ayeke son bê ti zo ape.

9. Nyen la a yeke nzoni mbeni couple agirisa ape na ndö ti atënë so azo ayeke tene wala angia so azo ayeke sara na ngoi ti matanga ti mariage ti ala?

⁹ Eskê azo ayeke tene anduru tënë, a yeke fa afoto, avidéo wala a yeke sara ambeni ngia nde na ngoi ti matanga ti mariage ti mo? Aye so apeut ti sara si matanga ni anzere. Me sara kue ti tene aye so a sara ni akpengba azo (aPhil. 4:8). Hunda terê ti mo: ‘Eskê aye ni so ayeke mû nengo na azo? Eskê a yeke mû nengo na mariage?’ Me kota hunda ni ayeke so: ‘Eskê aye ni so ayeke mû gonda na Jéhovah?’ Atâa so a yeke sioni ape ti tene mbeni zo atene tënë ti ngia, a yeke nzoni lo tene pëpe mbeni sioni tënë so ayeke sara si zo apensé na bungbingo koli na wali (aÉph. 5:3). Tongana afami wala akamarade ti mo ayeke tene mbeni tënë na ngoi ti matanga ni, sara kue ti tene ala comprendre mara ti atënë so mo ye ti tene ala tene.

10. Ngbanga ti nyen la a yeke nzoni mbeni couple agboto lê mingi na ndö ti ala ape na lango ti mariage ti ala? (1 Jean 2:​15-17).

¹⁰ Gboto lê mingi na ndö ti mo ape. (Diko 1 Jean 2:​15-17.) Tongana awakua ti Jéhovah agi ti mû gonda na lo ahon ti gboto lê senge senge na ndö ti ala wani, a yeke nzere na lo. Tongaso, aChrétien so aye ti gboto lê na ndö ti ala ape ayeke kpe ti dépensé gbâ ti nginza nga ti ‘sara baba ti kungba so ala yeke na ni’. Nzoni ti nyen la mo yeke wara tongana mo sara ye ahon ndö ni ape na ngoi ti matanga ti mariage ti mo? Gbu li na ndö ti tapande ti Ita-koli Mike so ayeke na Norvège. Lo tene: “E sara lani bon ape na amû lege na e ti ngbâ ti sara kua ti pionnier. Mariage ti e ayeke lani simple me ayeke pendere nga mbeni ngoi so zo ayeke girisa ni ape.” Ita-wali Tabitha so ayeke na Inde atene: “E ye lani ti gi bê ti e mingi ape. So e leke ti sara mariage ti e simple, e yeke lani na gbâ ti aye ti leke ape nga aye so e mä terê na ndö ni ape ayeke mingi ape.”

11. Tongana nyen la koli na wali so ayeke sara mariage apeut ti fa so ala sara ye ahon ndö ni ape na lege ti bongo so ala yeke yü? (Bâ nga afoto.)

¹¹ Eskê mo hinga awe bongo so mo yeke yü ande? Kite ayeke dä ape so mo ye ti duti pendere mingi. Même ândö, koli na wali so aye ti sara mariage aye mingi ti duti pendere (És. 61:10). Tâ tënë, bongo so mo yeke yü na lango ti mariage ti mo ayeke nde na bongo so mo yeke yü na ambeni ngoi nde, me a yeke nzoni a son bê ti azo ape wala a sara si azo apika gere ti ala ape (1 Tim. 2:9). Zia pëpe si bongo ti mo wala mbeni ye so mo yü aga ye so ayeke kota mingi na lango ti mariage ti mo.—1 Pi. 3:​3, 4.

12. Ngbanga ti nyen la a yeke nzoni mbeni couple asara kue ti ke angobo kue ti sarango mariage so ague nde na Bible so azo ayeke sara na ndo so ala yeke dä?

¹² Ke angobo so ague nde na Bible. (Apoc. 18:4). Laso na yâ ti dunia, mingi ti aye so a yeke sara na ngoi ti mariage ague oko na vorongo nzapa ti wataka, sarango yorö nga na tënë ti akotara. Jéhovah atene na e polele ti ngbâ ayo na mara ti asioni ye tongaso (2 aCor. 6:​14-17). Tongana mo hinga ape wala Jéhovah ayeda na ambeni ngobo ti ndo so mo yeke dä, sara recherche na ndö ni nga gi amama-ndia ti Bible so apeut ti aidé mo ti soro aye so mo yeke sara na ngoi ti mariage ti mo.

13. Tongana nyen la mbeni couple apeut ti duti na bango ndo ti Jéhovah na ndö ti warango acadeau?

¹³ Eskê na ndo so mo yeke dä azo so a tisa ala ayeke mû cadeau na azo so asara mariage? Azo ayeke mû cadeau na zo alingbi na ngangu ti ala. Bible awa aChrétien ti mû ye na zo na ala yeke na ngia tongana ala sara ni (aProv. 11:25; Kus. 20:35). Me a yeke nzoni ape ti tene mbeni couple asara si azo so aga abâ so ala doit gï ti mû cadeau, ala yeke sara nga ape si azo ni abâ so tongana ala mû kete cadeau ayeke nzere na ala ape. E yeke sara ye tongana Jéhovah na lege so e yeke gi ti duti na bango ndo ti lo na ndö ti acadeau nga e zia azo amû ye na e alingbi na ngangu ti ala nga na ye so bê ti ala apusu ala ti mû ni.—2 aCor. 9:7.

GI TI HON NDÖ TI AKPALE

14. Akpale wa la ambeni couple awara?

¹⁴ Mo peut ti wara akpale tongana mo ye ti sara mbeni mariage so ayeke mû gonda na Jéhovah. Na tapande, a peut ti duti ngangu na mo ti sara mbeni mariage so ayeke simple. Charlie, so ayeke na îles Salomon, atene: “A yeke lani ngangu mingi na e ti hinga zo wa la e yeke tisa lo na matanga ti mariage ti e. E yeke na gbâ ti akamarade nga na yâ ti ngobo ti e, zo kue ayeke ku ti tene a tisa lo.” Tabitha, so e sara tënë ti lo fade, atene: “Na ndo so mbi yeke dä, azo ayeke sara ka kota matanga ti mariage. A mû lani ngoi ti tene ababâ na amama ti e ayeda na desizion so e mû ti tisa gï azo 100 tongaso.” Sarah, so ayeke na Inde, atene: “Ye so agbu bê ti ambeni zo mingi ayeke wungo ti nginza so ala yeke na ni nga na bango ndo ti azo na ndö ti ala. Aita ti mbi asara lani kota mariage, tongaso ambeni zo apusu mbi ti sara ti mbi kota ahon ti ala.” Nyen la apeut ti aidé mo ti hon ndö ti akpale so nga na ambeni nde?

15. Ngbanga ti nyen la a yeke nzoni e sambela fani mingi ndali ti aye so e yeke leke ndali ti mariage ti e?

¹⁵ Sambela ndali ti aye so mo yeke leke ndali ti mariage ti mo. Mo peut ti fa na Jéhovah akpale kue so mo wara nga na agingo bê ti mo (aPhil. 4:​6, 7). Mo peut ti hunda lo ti aidé mo ti mû anzoni desizion, ti duti kpô na ngoi so mo gi bê ti mo nga ti sara ye na mbeto ape na ngoi so a hunda ti sara ni (1 Pi. 5:7). Mo yeke sara confiance mingi na Jéhovah tongana mo bâ so lo kiri tënë na asambela ti mo. Tabitha, so e sara tënë ti lo fade, atene: “Mbi na fiancé ti mbi e yeke gi bê ti e lani so mbi na lo nga na afami ti e, e yeke mä terê ape. Tongaso, lakue tongana e ye ti sara lisoro na ndö ti aye so e leke ndali ti mariage ti e, e yeke komanse na sambela. E bâ biani mungo maboko ti Jéhovah nga ye kue apassé na yâ ti siriri.”

16-17. Tongana nyen la nzoni lisoro apeut ti aidé ala na ngoi so ala yeke leke aye ndali ti mariage ti ala?

¹⁶ Sara lisoro polele nga na nzoni bê. (aProv. 15:22). Ala use kue abezoin ti mû gbâ ti adesizion na ndö ti aye so a yeke sara na lango ti mariage ti ala. Ala bezoin ti soro lango ti mariage ni, nginza oke la ala yeke dépensé, azo wa la ala yeke tisa ala nga na ambeni ye nde. Kozo ti mû mbeni desizion, zia ala bâ aye nde nde so ala peut ti sara nga ala sara lisoro na ndö ti amama-ndia ti Bible so abâ tënë ni nga na wango so ala wara na mbage ti aita so akpengba. Na ngoi so mo yeke fa aye so mo ye, sara ni na nzoni bê, sara ye ahon ndö ni ape nga duti nduru ti changé bango ndo ti mo. Na tapande, tongana babâ na mama ti mo aye ti sara mbeni ye na lango ti mariage ti mo so na bango ni ayeke nga sioni ape, mo peut ti yeda. Lango ni so ayeke nga kota ye mingi na ala. Tongana mo peut ti sara ye so ala hunda ape, fa ndani na ala na nzoni bê (aCol. 4:6). Fa polele na afami ti mo so ye so mo ye ayeke ti tene lango ti mariage ti mo aduti mbeni pendere ngoi nga amû gonda na Jéhovah.

¹⁷ Ti fa aye so mo ye na babâ na mama ti mo apeut ti duti ngangu mingi tongana ala yeke na yâ ti tâ tënë ape, me mo peut ti sara ni. Ita-koli Santhosh so ayeke na Inde atene: “Afami ti e aye lani ti tene e yôro angobo ti aHindou na yâ ti aye so e yeke sara na ngoi ti mariage ti e. A mû lani ngoi mingi ti tene mbi na fiancée ti mbi e fa na ala adesizion ti e. E sara lani ambeni changement so e bâ so e peut ti sara ni sân ti tene a zia vundu na bê ti Jéhovah. Na tapande, e changé lani kobe so e ye ti tene a tö na matanga ti mariage ti e na ti so ala ye, nga e mû desizion ti tene a he bia ape wala a dodo ape ndali ti so a yeke ye so ala yeke sara ka ape.”

18. Nyen la apeut ti aidé mo ti sara kue ti tene aye tambela nzoni na lango ti mariage ti mo? (1 aCorinthien 14:40). (Bâ nga foto.)

¹⁸ Leke aye ni nzoni. Tongana mo leke aye nzoni, peut-être mo yeke gi bê ti mo mingi ape na lango ti mariage ti mo. (Diko 1 aCorinthien 14:40.) Wayne so ayeke na Taïwan atene: “Lango mingi ape kozo na mariage ti e, e sara mbeni kete bungbi na azo kue so ayeda ti aidé e. E sara lisoro na ndö ti aye so e leke nga e tara peko ti ambeni ye so e yeke sara na lango ni so ti duti sûr so ayeke tambela nzoni.” Ti fa so mo ne azo so mo tisa ala, sara kue ti sara ye na l’heure.

19. Nyen la apeut ti aidé mo ti bâ ndo nzoni na ndö ti aye so ayeke passé na matanga ti mariage ti mo?

¹⁹ Tongana mo gbu li nzoni kozo, mo peut ti kanga lege na gbâ ti akpale (aProv. 22:3). Na tapande, tongana mo yeke na ndo so mingi ni azo ayeke ga ka na matanga sân ti tene a tisa ala, gbu li na ndö ti ye so mo peut ti sara ti tene ye tongaso asi ape. Sara kue ti tene afami ti mo so ayeke aTémoin ape ahinga ye so apeut ti si nga fa na ala bango ndo ti mo na ndö ti ambeni ngobo so azo ayeke sara na matanga ti mariage. Mo peut ti fa na ala article “Comment se passe un mariage chez les Témoins de Jéhovah ?” so ayeke na ndö ti jw.org. Ti bâ ndo nzoni na ndö ti aye so ayeke passé na matanga ti mariage ti mo, mû mbeni ita-koli so akpengba ti duti “zo ti bango ndo na ndö ti matanga ni.” (Jean 2:8). Tongana mo fa na lo polele aye so mo leke ti tene a sara, lo peut ti aidé mo ti sara kue ti tene matanga ni amû gonda na Jéhovah nga aye atambela tongana ti so mo ye.

20. Nyen la a yeke nzoni mbeni couple agirisa ape na ndö ti lango ti mariage ti ala?

²⁰ Tongana mo gbu li na ndö ti aye kue so ayeke passé na lango ti mariage ti mo, mo peut ti gi bê ti mo. Me girisa ape so lango ti mariage ti mo ayeke gï lango oko. A yeke gï tongo nda ti pendere gigi so mo na koli wala wali ti mo ayeke sara na Jéhovah. Sara kue ti tene a duti simple nga a ne Jéhovah. Sara confiance na Jéhovah. Tongana mo zia si lo fa lege na mo, mo yeke leke mariage ti mo nzoni nga tongana ngoi ahon si mo pensé na ni, mo yeke duti na ngia na mo yeke regretté ye oko ape.—Ps. 37:​3, 4.