Ambakoro: Ala yeke aidé congrégation mingi

Peut-être mo nga kue mo peut ti sara ambeni ye so mo yeke sara kozo ape ndali ti ngu ti mo so ague na li ni. Atâa so mo sara na Jéhovah teti angu mingi, mo peut ti wara asioni pensé ndali ti so mo peut ti sara aye mingi laso ape. Na tapande, bê ti mo apeut ti pusu mo ti haka aye so mo yeke sara laso na ti so mo yeke sara ândö. Tongana a yeke tongaso, nyen la mo peut ti sara ti hon ndö ti mara ti pensé so?

YE SO JÉHOVAH AHUNDA NA MO TI SARA

Hunda terê ti mo: ‘Nyen la Jéhovah ahunda na mbi ti sara?’ Tënë so ayeke na Deutéronome 6:5 apeut ti dë bê ti mo. Versê ni atene: “Mo doit ti ndoye Jéhovah Nzapa ti mo na bê ti mo kue, na âme ti mo kue nga na ngangu ti mo kue.”

Ti gue oko na versê so, Jéhovah aye ti tene mo sara na lo na bê ti mo kue, na âme ti mo kue nga na ngangu ti mo kue. Ye so apeut ti aidé mo ti kpe ti haka terê ti mo na ambeni zo wala ti haka aye so mo peut ti sara laso na aye so mo sara ândö.

Gbu li na ndö ti ye so: Na ngoi so mo yeke lani maseka, nyen la mo mû na Jéhovah? Mingi ti awakua ti Jéhovah ayeke tene so ala mû lani na lo nzoni ye so ala yeke na ni. Mo nga kue mo sara lani tongaso. Nyen la mo peut ti mû na Jéhovah fadeso? A yeke peut-être nzoni ye so mo yeke na ni ti lingbi na dutingo ti mo ti laso, so ti tene ye so mo peut ti sara fadeso. Tongana mo bâ aye ni tongaso, mo peut ti tene so mo yeke mû na Jéhovah mara ye so mo mû na lo ândö. Mo mû lani na lo anzoni ye ti mo nga mo yeke mû na lo anzoni ye ti mo laso.

MO PEUT TI AIDÉ MINGI AZO

Bâ mbeni ye nde so mo peut ti gbu li na ndö ni la: Ahon ti pensé gï na aye so mo peut ti sara encore ape, pensé na gbâ ti aye so mo peut ti sara ti aidé azo. So mo yeke mbeni Chrétien so ngu ti lo ague na li ni, mo peut fadeso ti sara ambeni ye so mo peut ti sara lani ape na ngoi so mo de maseka. Na tapande, mo peut ti sara aye so:

Fa na azo aye so mo hinga. Gbu li na ndö ti atënë ti Bible so ayeke na yâ ti aversê so:

Gbia David: “Mbi yeke ândö maseka, na fadeso mbi yeke mbakoro, me mbi bâ pëpe mbeni zo ti mbilimbili so Nzapa adö lo azia, wala amolenge ti lo airi mapa.”—Ps. 37:25.

Josué: “Ala bâ fadeso mbi yeke nduru ti kui awe, na ala hinga nzoni mingi na bê ti ala kue nga na âme ti ala kue so mbeni tënë oko ti apendere zendo kue so Jéhovah Nzapa ti ala atene atï na ngu pëpe. Tënë ni kue aga tâ tënë tongana ti so lo tene ndali ti ala. Mbeni tënë ni oko atï na ngu pëpe.”—Jos. 23:14.

Peut-être mo tene mara ti atënë tongaso awe. Tënë so David na Josué atene ayeke ye so ala vivre lani. Awakua be-ta-zo ti Jéhovah so ayeke sara tënë ti ye so ala bâ nga ala mä teti angu mingi a sara si tënë ti ala ni ayeke kete tënë ape.

Tongana mo yeke sara na Jéhovah asara ngu mingi awe, mo nga kue mo peut ti fa atufa so Jéhovah asara na ndö ti mo ndali ni. Eskê mo dabe ti mo na mbeni ngoi so mo bâ Jéhovah a-aidé awakua ti lo na mbeni lege so ayeke nde? Tongana mo dabe ti mo na ni, fa ni na ambeni zo. Ye so apeut ti kpengba ala tongana ti so peut-être a kpengba mo lani. Tongana mo fa na aita aye so mo vivre ni, a peut ti kpengba ala mingi.—aRom. 1:​11, 12.

Mbeni lege so mo peut ti kpengba aita ayeke ti ga na abungbi na Da ti Royaume tongana mo peut. Kâ, mo peut ti kpengba aita na ala peut nga ti kpengba mo. Connie, so e sara tënë ti lo fade, atene: “Guengo na abungbi a-aidé mbi ti découragé ape. Aye so aita asara na Da ti Royaume ti fa so ala ye mbi asara si mbi peut ti découragé ape. Mbi gi ti kiri singila na azo na lege so mbi mû na ala akete kete cadeau. Nga, mbi sara kue ti ngbâ ti sara aye so mbi yeke sara ka ti voro Jéhovah legeoko na aita.”

SO MO YEKE SARA NA JÉHOVAH BE-TA-ZO LO BÂ NI NA NENE NI

Bible asi singo na tapande ti azo so dutingo ti ala asara si ala peut ti sara aye mingi ape, me Jéhovah aye ala. Gbu li na ndö ti Siméon, mbeni mbakoro na Israël so ayeke lani na fini na ngoi so a dü Jésus. Na ngoi so Siméon ayeke ga na temple, peut-être lo yeke bâ azo so ngu ti lo ahon ti ala so ayeke sara akota kua kâ. Ka ti lo wani a yeke tongana nyen? Na bango ndo ti zo, lo peut ti pensé so, so lo yeke mbakoro Jéhovah abâ lo na nene ni pëpe. Me Jéhovah abâ ti lo ye ni nde. Jéhovah abâ Siméon tongana zo so ‘asara ye mbilimbili nga so amû bê ti lo kue na kua ti Nzapa’ na lo mû na lo pasa ti bâ Jésus so angbâ bébé. Jéhovah asara même kua na Siméon ti tene mbeni prophétie na ndö ti Messie so ayeke ga ande (Luc 2:​25-35). A yeke polele so Jéhovah abâ gï mbakoro ti Siméon ape, me lo bâ so lo yeke mbeni koli so ayeke na kpengba mabe “nga yingo vulu ayeke na ndö ti lo.”

Mo nga kue hinga so, so mo yeke sara na Jéhovah be-ta-zo, lo bâ ni na nene ni atâa so mo peut ti sara aye mingi ape. Na lê ti lo, ‘a yeke yamba mbeni sandaga alingbi na ye so zo ayeke na ni, me a yeke yamba ni pëpe alingbi na ye so zo ayeke na ni pëpe.’—2 aCor. 8:12.

Tongaso, gbu li na ndö ti aye so mo peut ti sara. Na tapande, mbage wa ti fango tënë la mo peut ti ngbâ ti sara ni même gï teti kete ngoi? Mo peut nga ti kpengba aita na lege so mo iri ala na téléphone wala mo tokua na ala mbeni lettre. Akete ye so a sara na ndoye apeut ti kpengba aita mingi mbilimbili tongana mbeni mbakoro la asara ni.

Ambeni mbakoro ayeke na ngangu mingi ape. Bâ mbeni ye so asi na Afrique de l’est na yâ ti encadré “A sö fini ti lo.”

Girisa ape so, so mo sara na Jéhovah teti angu mingi nga mo ngbâ ti sara ni, a peut ti kpengba aita mingi. Mo yeke mbeni tapande ti gbungo ngangu ndali ti ala nga mo peut ti hinga na bê ti mo kue so ‘Nzapa ayeke kirikiri pëpe si lo girisa kusala ti mo nga na ndoye so mo fa ndali ti iri ti lo na lege so mo sara kua na azo ti be-vulu na mo ngbâ ti sara kua na ala.’—aHéb. 6:10.

NGBÂ TI AIDÉ AZO TONGANA MO PEUT TI SARA NI

Awandara afa so gbâ ti ambakoro so ayeke aidé azo ayeke na nzoni seni, ayeke gbu li nzoni nga ayeke vivre aninga.

Tâ tënë, sarango anzoni ye apeut ti zi akpale kue so mbakoro aga na ni ape. Gï Royaume ti Nzapa la apeut ti zi ni na lege so a yeke zi vrai ye so aga na mbakoro nga na kuâ: so a yeke siokpari.—aRom. 5:12.

So mo ngbâ ti sara na Jéhovah, na tapande so mo yeke aidé azo ti hinga lo, asara si beku ti mo akpengba nga apeut même ti sara si mo duti na nzoni seni. Ambakoro, zia ala hinga so Jéhovah abâ na nene ni aye so ala yeke sara na yâ ti kua ti lo nga aita abâ na nene mingi tapande ti mabe ti ala.