Sara terê ti mo kete tongana Jéhovah

1. Ngbanga ti nyen la li ti e akpe ti hinga so Jéhovah asara terê ti lo kete mingi?

TONGANA mo bâ azo so ayeke na komandema laso, eskê sarango terê kete ayeke ga na li ti mo? Peut-être a yeke ga na li ti mo ape. Me Jéhovah, so ngangu ti lo ahon angangu kue, ayeke sara terê ti lo kete (Ps. 113:​5-8). Mbeni zo so asara terê ti lo kete alingbi na Jéhovah ayeke dä ape. Baba alï lo lâ oko ape. Na yâ ti article so, e yeke bâ apendere fason osio so Jéhovah ayeke sara na ye na mbage ti e nga tongana nyen la afa so lo sara terê ti lo kete mingi. E yeke bâ nga tongana nyen la Jésus asara terê ti lo kete tongana Babâ ti lo. Tongana e gbu li na ndö ti aye so ayeke aidé e ti ga nduru mingi na Jéhovah nga ti sara terê ti e kete mingi tongana lo.

JÉHOVAH AYEKE LAKUE NDURU TI MÄ E

2. Psaume 62:8 afa na e nyen na ndö ti Jéhovah? (Bâ nga foto.)

² Mingi ni a yeke kete ye ape ti sara lisoro na mbeni zo so ayeke zo ti baba. Azo ti baba ayeke sara ka ye na nzoni bê na azo ape ndali ti so ala pensé so ala yeke nzoni ahon amba ti ala na azo ayeke kpe ala kpengo. Jéhovah ayeke ti lo nde mingi. Lo sara si a yeke ngangu na e ape ti sambela lo nga lo ye ti tene e fa na lo agingo bê ti e kue. (Diko Psaume 62:8.) Gï tongana ti so mbeni babâ so ayeke pensé na amolenge ti lo ayeke nduru ti mä ala na ngoi so ala yeke fa agingo bê ti ala, Jéhovah aye mingi ti mä asambela ti awakua ti lo. Ti vrai ni, lo sara si a sû gbâ ti mara ti asambela tongaso na yâ ti Bible. Ye so afa so lo ye mingi ti mä asambela ti e (Jos. 10:​12-14; 1 Sam. 1:​10-18). Me peut-être na ambeni ngoi e bâ so e peut ti sambela Jéhovah ape ndali ti gbâ ti afaute so e sara.

3. Ngbanga ti nyen la mo peut ti duti sûr so Jéhovah aye ti tene mo sambela lo lakue?

³ E peut ti sambela Jéhovah même tongana e bâ so e lingbi ape ti tene lo ye e. E tene tongaso ngbanga ti nyen? Na yâ ti toli ti Jésus na ndö ti molenge so agirisa lege, lo haka Jéhovah na mbeni babâ so ayeke sara ye na nzoni bê so molenge ti lo so achangé bê ti lo abâ so lo lingbi ape ti kiri na yâ ti sewa ni. Nyen la babâ ni asara na ngoi so molenge ni akiri na yanga-da? Jésus atene so gï so lê ti babâ ni atï na ndö ti molenge ni, lo ‘kpe loro lo gbu lo na kate na lo su ngbangba ti lo yeke.’ (Luc 15:​17-20). Jéhovah ayeke tongana babâ so. Gï so Jéhovah amä sambela ti azo so ayeke na vundu ndali ti so ala bâ so tënë ayeke na li ti ala wala ala gi bê ti ala, so lo sara terê ti lo kete ayeke pusu lo ti mä ala nzoni (Toto ti Jér. 3:​19, 20). Jéhovah abâ mawa ti ala na a yeke mo bâ mo tene lo kpe loro lo ga na terê ti ala ti dë bê ti ala nga lo sara si ala hinga so lo ye ti sara nzoni bê na ala nga lo ye ala (És. 57:15). Tongana nyen la Jéhovah ayeke “kpe loro ti ga na mbage” ti e laso? Mingi ni lo yeke sara ni na lege ti a-ancien, afami ti e so ayeke aTémoin nga na amba ti e aChrétien (Jacq. 5:​14, 15). Jéhovah asara tongaso ndali ti so lo ye ti tene e ngbâ nduru na lo.

4. Tongana nyen la Jésus afa so lo yeke nduru ti mä azo?

⁴ Jésus asara ye tongana Babâ ti lo. Jésus asara terê ti lo kete tongana Babâ ti lo. Ye so asara si na ngoi so lo yeke na sese, a nzere na azo ti ga na mbage ti lo. Mbeto asara lani ala ape ti hunda tënë na lo (Marc 4:​10, 11). Tongaso, na ngoi so lo hunda bango ndo ti ala na ndö ti mbeni tënë, ala yeke fa na lo vrai tënë ti bê ti ala (Mat. 16:​13-16). Nga na ngoi so ala sara afaute, mbeto ayeke hon ndö ti ala ape ndali ti so ala hinga so Jésus ayeke zo so asara ye na nzoni bê nga lo kanga bê (Mat. 17:​24-27). So Jésus asara ye tâ gï tongana Babâ ti lo, adisciple ti lo ahinga Jéhovah nzoni (Jean 14:9). Ala hinga so Jéhovah asara ye na ngangu ape, lo sara ye na baba ape nga lo yeke tongana akota zo ti nzapa ti ngoi ti ala ape. Me lo sara terê ti lo kete nga lo yeke mä azo.

5. Tongana nyen la sarango terê kete apeut ti aidé e ti mä azo?

⁵ Tongana nyen la e peut ti sara ye tongana Jéhovah? Tongana e sara terê ti e kete, a yeke duti ngangu na azo ape ti sara lisoro na e. Tongana e sara terê ti e kete ape, e yeke sara bê na terê ti azo, e yeke duti zo ti baba nga e yeke ke ti pardonné azo, sarango tongaso ayeke sara si azo ayeke kpe e kpengo. Me tongana e sara terê ti e kete ayeke aidé e ti sara ye na nzoni bê, ti kanga bê nga ti pardonné azo, asarango ye so ayeke gboto azo na mbage ti e (aCol. 3:​12-14). A yeke mbilimbili a-ancien la adoit ti sara kue ti tene a duti ngangu ape na aita ti sara lisoro na ala. Ti sara ni, a-ancien abezoin ti duti na terê ti aita. So aye ti tene tongana lege ayeke dä, a yeke nzoni a-ancien aga na bungbi na Da ti Royaume ahon ti sara ni na lege ti vidéoconférence. Nga ala yeke fa tënë legeoko na aita da na da. Tongana aita ahinga a-ancien nzoni, a yeke duti ngangu na ala ape ti fa tënë ti bê ti ala na ala tongana bezoin ni ayeke dä.

JÉHOVAH AYEKE SARA YE AHON NDÖ NI APE

6-7. Mû ambeni tapande so afa tongana nyen la Jéhovah ayeke nduru ti changé desizion ti lo tongana awakua ti lo asambela lo.

⁶ Mingi ni, azo ti baba apensé so bango ndo ti ala la ayeke nzoni na ala yeke nduru ti changé ni ape. Me Jéhovah so ahinga lakue ye so ayeke nzoni mingi ayeke tongaso ape. So lo sara terê ti lo kete, lo yeke nduru ti mä tënë so azo atene nga même ti changé mbeni desizion so lo mû. Bâ tongana nyen la lo sara ye na mbage ti Miriam, ita ti Moïse. Lo na Aaron adiko tënë na terê ti Moïse so asara kua na iri ti Jéhovah. Ti vrai ni, Miriam afa so lo ne Jéhovah ape. A sara si bê ti Jéhovah ason mingi na terê ti lo na lo sara si buruma amû terê ti lo kue. Me Aaron avoro yanga na Moïse ti aidé lo, na Moïse avoro yanga na Jéhovah ti sava lo. Tongaso, nyen la Jéhovah asara? Mbeni zo so ayeke zo ti baba ayeke changé desizion ti lo ape. Me Jéhovah asara tongaso ape. So lo sara terê ti lo kete, lo mä Moïse na lo sava Miriam.—Nom. 12:​1-15.

⁷ Jéhovah afa nga so lo sara terê ti lo kete na yâ ti fason so lo sara ye na Gbia Ézéchias. Jéhovah atokua lani prophète Ésaïe ti tene na gbia ni so lo yeke kui. Ézéchias atoto nga lo voro yanga na Jéhovah ti sava lo. Na nzoni bê, Jéhovah amä sambela ti lo na lo tene na lo so ni yeke zia ngu 15 na ndö ti ngu ti lo (2 aGbia 20:​1, 5, 6). Jéhovah ayeke zia terê ti lo biani na place ti azo nga so lo sara terê ti lo kete, lo yeke nduru ti mä ala.

8. Atapande wa la afa so Jésus asara ye ahon ndö ni ape? (Marc 3:​1-6).

⁸ Jésus asara ye tongana Babâ ti lo. Na ngoi so Jésus ayeke lani na sese, lo sara ye ti nzoni na azo na ngoi kue so lo peut ti sara ni. Na tapande, lo sava azo na lâ ti Sabbat atâa so awato ti lo so ayeke bâ mawa ti azo ape ake. (Diko Marc 3:​1-6.) Jésus so ayeke mokonzi ti congrégation angbâ ti sara ye ahon ndö ni ape. Na tapande, tongana mbeni zo na yâ ti congrégation asara kota siokpari, lo yeke kanga bê na lo tongaso si lo peut ti changé.—Apoc. 2:​2-5.

9. Tongana nyen la e peut ti duti zo so asara ye ahon ndö ni ape? (Bâ nga afoto.)

⁹ Tongana nyen la e peut ti sara ye tongana Jéhovah? E doit ti manda na mbage ti Jéhovah tongana nyen ti pensé nga ti sara ye na mbeni lege so afa so e sara ye ahon ndö ni ape (Jacq. 3:17). Ababâ na amama so asara ye tongana Jéhovah ayeke hunda pëpe na amolenge ti ala ti sara ye so ala peut ti sara ape. Mbeni nzoni tapande ni ayeke ti Jacob so mbaï ni ayeke na Genèse 33:​12-14. Ababâ na amama so asara terê ti ala kete nga asara ye ahon ndö ni ape ayeke haka pëpe mbeni molenge ti ala na mbeni. A-ancien nga kue adoit ti sara ye ahon ndö ni ape. Mbeni lege ti sara ni ayeke ti yeda na desizion so amba ti ala amû tongana ague nde na amama-ndia ti Bible ape (1 Tim. 3:​2, 3). Nga, e kue e peut ti gi ti comprendre bango ndo ti amba ti e même tongana ti e ayeke nde (aRom. 14:1). A yeke nzoni azo kue na yâ ti congrégation agi ti sara si “azo kue ahinga so ala yeke sara ye ahon ndö ni pëpe.”—aPhil. 4:5.

JÉHOVAH AYEKE KANGA BÊ

10. Na yâ ti aye wa la Jéhovah afa so lo kanga bê?

¹⁰ Peut-être mo bâ awe so azo ti baba aye ti ku zo ape. Baba asara si ala yeke kanga bê ape. Jéhovah ayeke tongaso ape, lo kanga bê mingi ahon azo kue. Na tapande, na ngoi ti Noé, Jéhovah atene lo yeke ku ngu 120 ahon kozo ti tene lo futi azo ti sioni (Gen. 6:3). Noé ayeke lani na ngoi ti bata amolenge ti lo nga ti tene ala aidé lo ti leke arche. Ambeni ngoi na pekoni, Jéhovah akanga bê lo mä Abraham so ayeke hunda lo na ndö ti futingo Sodome na Gomorrhe. Mbeni zo ti baba apeut ti tene: ‘Ngbanga ti nyen la mo hunda yâ ti mbi tongaso?’ Me so Jéhovah asara terê ti lo kete, lo kanga bê na Abraham.—Gen. 18:​20-33.

11. Tongana ti so 2 Pierre 3:9 atene, ngbanga ti nyen la Jéhovah angbâ ti kanga bê na ngoi ti e?

¹¹ Jéhovah asara terê ti lo kete lo ngbâ nga ti kanga bê na ngoi ti e. Lo yeke ku ti tene ngoi so lo leke alingbi awe si lo futi dunia so. Ngbanga ti nyen la lo yeke kanga bê? Lo yeke kanga bê “ngbanga ti so lo ye si a futi zo oko pëpe, me lo ye si azo kue achangé bê ti ala.” (Diko 2 Pierre 3:9.) Eskê Jéhovah ayeke kanga bê senge senge? Ên-ën! Azo kutu mingi aga akamarade ti lo. E yeke na beku so azo kutu mingi ayeke sara nga tongaso. Me Jéhovah ayeke ngbâ gï lakue ti kanga bê ape. Jéhovah aye azo, me lo ye gï ti tene ala sara ye ti bê ti ala ape. Lo yeke futi ande asioni zo.—Hab. 2:3.

12. Tongana nyen la Jésus akanga bê tongana Jéhovah?

¹² Jésus asara ye tongana Babâ ti lo. Teti angu saki mingi, Jésus akanga bê tongana Jéhovah. Jésus abâ Satan so atene sioni mvene na ndö ti Jéhovah nga na azo so ayeke be-ta-zo (Gen. 3:​4, 5; Job 1:11; Apoc. 12:10). Jésus abâ nga gbâ ti azo so ayeke bâ pasi na asioni ye. Imaginé tongana nyen la lo ye mingi “ti futi akusala ti Zabolo.” (1 Jean 3:8). Nyen la a-aidé Jésus ti kanga bê ti ku ti tene Jéhovah amû yanga awe si lo futi biani biani akusala ti Zabolo? Mbeni ye so a-aidé lo ayeke sarango terê kete. Lo hinga so Jéhovah la ayeke fa lawa la a yeke futi dunia so.—Kus. 1:7.

13. Tongana nyen la Jésus akanga bê na abazengele ti lo? Lo sara ni ngbanga ti nyen?

¹³ Na ngoi so Jésus ayeke lani na sese, lo kanga nga bê na abazengele ti lo. Na tapande, na ngoi so ala papa fani mingi ti hinga zo wa la ayeke kota na popo ti ala, Jésus adécouragé na terê ti ala ape. Me lo ngbâ ti kanga bê na ala (Luc 9:46; 22:​24-27). Lo yeke lani na confiance so tongana ngoi ayeke hon, ala yeke changé. Eskê mo sara mbeni faute fani mingi na peko ti terê awe? Tongana a yeke tongaso, a yeke nzere na mo ti hinga so mo yeke na mbeni gbia so asara terê ti lo kete nga akanga bê.

14. Nyen la ayeke aidé e ti kanga bê mingi?

¹⁴ Tongana nyen la e peut ti sara ye tongana Jéhovah? Tongana e gi ti duti na “bibe ti Christ,” e yeke pensé nga e yeke sara ye tongana Jéhovah (1 aCor. 2:16). Nyen la ayeke aidé e ti pensé mingi tongana Jésus? Mbeni kota ye so e peut ti sara ayeke ti diko lakue mbaï ti fini ti Jésus so ayeke na yâ ti Bible. Na pekoni, e doit ti mû ngoi ti gbu li na ndö ti aye so Jésus asara nga na ndani so lo sara ni. E bezoin nga ti hunda Jéhovah ti aidé e ti sara terê ti e kete nga ti kanga bê tongana Jésus. Tongana e gi mingi ti pensé tongana Jésus, e yeke sara ye tongana Jéhovah na lege so e kanga bê na amba ti e nga na e wani.—Mat. 18:​26-30, 35.

JÉHOVAH ANE AZO SO ASARA TERÊ TI ALA KETE

15. Tongana nyen la Jéhovah asara ye alingbi na atënë so ayeke na Psaume 138:6?

¹⁵ Diko Psaume 138:6. So kota Gbia ti dunia kue ahinga azo so asara terê ti ala kete, a yeke mbeni kota pasa. Bâ ambeni tapande ti azo so asara terê ti ala kete so Jéhovah ane ala na yâ ti angu mingi. Peut-être e hinga ambeni nzoni ape, me Jéhovah asara si a sara tënë ti ala na yâ ti Bible. Na tapande, Déborah ayeke lani mbeni zo ti kua so ayeke be-ta-zo na yâ ti sewa ti Isaac nga na Jacob na yâ ti angu 125 tongaso. Atâa so e hinga ye mingi na ndö ti wali be-ta-zo so ape, Jéhovah asara kue ti tene Moïse asû mbeni tënë na ndö ti lo so afa tongana nyen la a ye lo lani mingi (Gen. 24:59; 35:​8, kete tënë na gbe ni). Ngu ngbangbo mingi na pekoni, Jéhovah asoro mbeni berger so ade maseka so iri ti lo ayeke David ti ga gbia ti Israël (2 Sam. 22:​1, 36). Kete na peko ti so a dü Jésus, Nzapa atokua a-ange na mbeni groupe ti aberger nga lo mû na ala pasa ti duti akozo zo so ahinga so a dü Messie na Bethléhem (Luc 2:​8-11). Na ngoi so Joseph na Marie aga na Jésus na temple, Jéhovah amû pasa na Siméon nga na Anne, so ayeke ambakoro, ti bâ Molenge ti lo (Luc 2:​25-30, 36-38). Biani, “atâa so Jéhovah ayeke na nduzu mingi, lo bi bê ti lo na azo so asara terê ti ala kete”.

16. Tongana nyen la Jésus asara ye na mbage ti azo tongana ti Babâ ti lo?

¹⁶ Jésus asara ye tongana Babâ ti lo. Tongana ti Babâ ti lo, Jésus ane azo so azo abâ ala tongana ambumbuse zo. Lo fa na ‘azo so amanda mbeti pëpe so ayeke asenge zo’ atâ tënë na ndö ti Royaume ti Nzapa (Kus. 4:13; Mat. 11:25). Lo sava nga kobela ti azo, lo sara ni na mbeni fason so a sara si ala bâ so lo ye ala nga lo ne ala (Luc 5:13). Na bï so na ndade ni Jésus akui, lo sukula gere ti abazengele ti lo, mbeni ye so gï azo ti kua la ayeke sara ni (Jean 13:5). Nga kozo ti tene lo gue na yayu, lo mû na adisciple ti lo kue, so e kue e yeke na popo ni laso, pasa ti sara kota kua so zo apeut ti sara, so ayeke ti aidé azo ti wara fini ti lakue lakue.—Mat. 28:​19, 20.

17. Tongana nyen la e peut ti ne azo? (Bâ nga foto.)

¹⁷ Tongana nyen la e peut ti sara ye tongana Jéhovah? E yeke ne azo tongana e fa nzoni tënë na azo kue so ayeke mä e, atâa ndo so ala londo dä, couleur ti terê ti ala wala mandango mbeti ti ala ayeke tongana nyen. Nga e yeke ne aita tongana e bâ ala tongana azo so ayeke kota ahon e, atâa akode so e yeke na ni wala akua so e yeke sara na yâ ti congrégation (aPhil. 2:3). Jéhovah ayeke duti na ngia tongana e sara terê ti e kete e ‘mû li ni kozo’ ti ne azo na alege so nga na ambeni lege nde.—aRom. 12:10; Soph. 3:12.

18. Ngbanga ti nyen la mo ye ti sara terê ti mo kete tongana Jéhovah?

¹⁸ Tongana e sara kue ti sara ye tongana Babâ ti e ti yayu so aye e so asara terê ti lo kete, e yeke mä azo nzoni mingi, e yeke sara ye ahon ndö ni ape ahon ti kozo nga e yeke kanga bê mingi. E yeke ne nga azo tongana ti Jéhovah. Nga girisa ape so tongana e sara kue ti sara terê ti e kete mingi tongana Nzapa ti e, a yeke sara si e ga ye ti ngangu ngere mingi na lê ti lo.—És. 43:4.