Afini membre use ti Bebungbi
NA NGOI ti réunion annuelle so a sara na lango 5 ti octobre 2024, a tene lani mbeni tokua so ayeke nde, atene: Aita-koli Jody Jedele nga na Jacob Rumph aga amembre ti Bebungbi ti aTémoin ti Jéhovah. Ala use kue asara na Jéhovah be-ta-zo teti angu mingi.
Jody Jedele na wali ti lo Damaris
A dü Ita Jedele na Missouri, na États-Unis nga lo kono na yâ ti tâ tënë. Sewa ti lo alango na ndo so aTémoin ti Jéhovah ayeke dä mingi ape. Tongaso, lo wara terê na aita mingi so alondo na ando nde nde na yâ ti kodro ni aga ti fa nzoni tënë. Ndoye so ala fa nga so ala yeke beoko andu bê ti lo mingi. Lo wara batême na lango 15 ti octobre 1983 na ngoi so lo de maseka mingi. Lo ye lani fango tënë mingi, na peko ti so lo hunzi ekole na lycée, lo ga pionnier permanent na septembre 1989.
Na ngoi so Ita Jedele ade maseka, babâ na mama ti lo ayeke gue ka na lo na ita ti lo ti wali ti sara vizite ti Béthel. Avizite so apusu amolenge ni ti leke na bê ti ala ti sara kua na Béthel, na a yeke ye so ala use kue asara. Ita Jedele asi na Béthel ti Wallkill na septembre 1990. Kozo ni, lo sara kua na ndokua so abâ tënë ti nettoyage, na pekoni na ndokua so abâ tënë ti seni.
Na ngoi ni so, acongrégation ti Espagnol so ayo na Béthel ape ayeke maï nga a bezoin aita-koli. Tongaso, Ita Jedele ague na yâ ti mbeni nga lo komanse ti manda Espagnol. Kete na pekoni, lo wara terê na Damaris, mbeni ita-wali so ayeke pionnier na yâ ti oko circonscription ni. Na pekoni, ala sara mariage na Damaris kue akomanse ti sara kua na Béthel.
Na ngu 2005, ala quitté Béthel ti bâ lege ti ababâ na amama ti ala. Na ngoi ni so, ala sara kua ti pionnier permanent. Ita Jedele ayeke lani mbeni wafango ye na Ekole ti apionnier, lo sara nga kua na yâ ti Komite so abâ lege ti songo na ada-nganga nga na Komite so abâ lege ti lekengo aDa ti Royaume.
Na ngu 2013, a tisa ala ti kiri na Béthel ti sara kua na yâ ti construction ti Warwick. Ngbene ye na ngoi so ti ga na ni, ala sara nga kua na Patterson nga na Wallkill. Ita Jedele asara nga kua na LDC nga na Ndokua so abâ lege ti songo na ada-nganga. Na mars 2023, lo ga mbeni wamungo maboko na Komite ti kusala. Tongana lo gbu li na ndö ti akua kue so lo sara, lo tene: “Tongana a mû na mo afini kua, na ambeni ngoi mo peut ti bâ so mo peut ti sara ni ape. Me a yeke na ngoi ni so la mo doit ti girisa ape ti sara confiance na Jéhovah ndali ti so lo la lo yeke sara si e peut ti sara kua kue so lo mû na e.”
Jacob Rumph na wali ti lo Inga
A dü Ita Rumph na Californie, na États-Unis. Na kete ti lo, mama ti lo ayeke fa tënë encore ape nga lo yeke gue na bungbi encore ape, me lo sara effort ti fa na lo atâ tënë ti Bible. Ngu oko oko, lo yeke gue nga ti bâ âta ti lo ti wali so ayeke mbeni Témoin so ayeke be-ta-zo. Âta ti lo ni a-aidé lo ti sara nzara ti hinga tâ tënë na lo hunda ti tene a manda Bible na lo na ngoi so lo yeke na ngu 13. Na lango 27 ti septembre 1992, lo wara batême. Ye so ayeke pendere mingi ayeke so mama ti lo akiri akomanse ti fa tënë na ti ga na abungbi nga babâ ti lo nga na aita ti lo ague na li ni na awara batême.
Na ngoi so Ita Rumph ade maseka, lo bâ tongana nyen la apionnier ayeke na ngia. Tongaso, na peko ti so lo hunzi mandango mbeti na lycée, lo komanse kua ti pionnier na septembre 1995. Na ngu 2000, lo gue na Équateur ti fa tënë na ndo so a bezoin awafango tënë dä mingi. Kâ, lo wara terê na Ita-wali Inga so ayeke mbeni pionnier so alondo na Canada, na ala sara mariage. Na peko ti so ala sara mariage, ala fa tënë na yâ ti mbeni kete gbata na Équateur so mbeni kete groupe ti awafango tënë ayeke dä. Laso, mbeni kota congrégation ayeke na yâ ti gbata so.
A si na mbeni ngoi, ala ga apionnier spécial na pekoni ala sara kua ti circonscription. Na ngu 2011 a tisa ala na klase 132 ti Galaad. Na peko ti ekole ni, ala sara kua na yâ ti akodro nde nde na yâ ti dunia nga ala sara akua nde nde, na tapande ala sara kua na Béthel, ala sara kua ti missionnaire nga na kua ti circonscription. Ita-koli Rumph ayeke nga lani na pasa ti fa ye na Ekole ti awafango nzoni tënë ti Royaume.
So kobela ti COVID-19 ayeke mû lani ndo, ala kiri na États-Unis. A tisa ala ti sara kua na Béthel ti Wallkill, kâ a fa ye na Ita-koli Rumph ti sara kua na Ndokua ti kusala. Na nda ni, a kiri na ala na filiale ti Équateur. Kâ, Ita Rumph asara kua tongana membre ti Komite ti filiale. Na ngu 2023 a tokua ala na Warwick. Na janvier 2024, Ita Rumph aga mbeni wamungo maboko na Komite ti kusala. Tongana lo gbu li na ndö ti kua so lo sara, lo tene: “Ye so ayeke sara si mbeni kua so mo yeke sara ayeke nde ayeke pëpe ndo so mo sara kua ni dä, me azo so mo na ala asara kua ni.”
E bâ na nene ni mingi ngangu kua so aita-koli so ayeke sara nga e ‘ngbâ ti bâ mara ti azo tongana ala so na nene ni mingi’.—aPhil. 2:29.