Atënë so azo ahunda

Zo so asû aProverbe 30:​18, 19 atene so “lege ti mbeni koli tongana lo yeke na terê ti mbeni maseka-wali” ‘ahon gbungo li ti lo.’ Lo ye ti tene nyen la?

Azo mingi aye ti hinga nda ti aversê so, même awandara. Na yâ ti Mbeti ti Nzapa ti fini dunia, versê ni atene: “Aye ota ayeke dä so ahon gbungo li ti mbi [wala, “akara mbi,” kete tënë na gbe ni], aye osio ayeke dä so mbi mä yâ ni pëpe: Lege ti aigle na lê ti nduzu, lege ti ngbo na ndö ti kota tênë, lege ti bateau na lê ti ngu-ingo nga na lege ti mbeni koli tongana lo yeke na terê ti mbeni maseka-wali.”—aProv. 30:​18, 19.

Kozoni, e tene so tënë “lege ti mbeni koli tongana lo yeke na terê ti mbeni maseka-wali” aye ti sara tënë ti mbeni ye so ayeke sioni. Ngbanga ti nyen? Ambeni versê ti chapitre so asara tënë ti aye so ayeke sara sioni na azo me so atene lâ oko ape, atene: “A lingbi awe!” (aProv. 30:​15, 16). Nga versê 20 asara tënë ti mbeni “wali so agi koli nde” so atene ni sara sioni ye ape. Ndani la e pensé lani so tongana ti so mbeni aigle ahuru na lê ti nduzu, mbeni ngbo ahon na ndö ti kota tênë wala mbeni bateau ahon na lê ti ngu-ingo sân ti tene zo abâ peko ni, mbeni koli apeut ti sara mbeni ye sân ti tene mbeni zo ahinga. Tongaso, e pensé lani e tene tënë “lege ti mbeni koli tongana lo yeke na terê ti mbeni maseka-wali” aye ti sara tënë ti mbeni maseka-koli so ahanda mbeni maseka-wali so lê ti lo ahan ape.

Me mbeni nzoni raison ayeke dä ti bâ so versê ni aye ti sara tënë ti mbeni nzoni ye. Zo so asû tënë ni aye gï ti sara tënë ti aye so asara si li ti lo akpe.

Tënë ti Hébreu ni afa nga so versê ni aye ti sara tënë ti mbeni ye so ayeke sioni ape. Mbeni buku (Theological Lexicon of the Old Testament) atene so tënë ti Hébreu so a kiri peko ni na tënë “ahon gbungo li ti mbi” na aProverbe 30:18 “afa mbeni ye so asi. . . so asara si li ti zo akpe kue, so apeut ti si ape wala ye so ayeke même pendere mingi.”

Crawford Toy, so ayeke professeur na université ti Harvard na États-Unis, atene nga so versê so aye ti sara tënë ti mbeni sioni ye ape. Lo tene: “Versê ni aye ti sara tënë ti aye so apika bê ti zo mingi.”

Tongaso na bango ni, a yeke na lege ni ti tene so atënë so ayeke na aProverbe 30:​18, 19 aye ti sara tënë ti aye so apika bê ti zo mingi wala so ahon même gbungo li ti zo. Tongana ti zo so asû atënë so, tongana e bâ mbeni aigle so ayeke huru na lê ti nduzu, mbeni ngbo so ayeke hon hio na ndö ti kota tênë atâa so lo yeke na gere ape wala mbeni kota bateau so apeut ti hon na lê ti ngu-ingo nga tongana nyen la mbeni maseka-koli na mbeni maseka-wali ayeke tï mba nga ala vivre na ngia, li ti e ayeke kpe.