“Bira ni ayeke ti Jéhovah”

Na ngu 1999, gouvernement ti France atene so filiale ti France adoit ti payé taxe na ndö ti a-offrande so a wara ti londo na ngu 1993 ti si na ngu 1996. E gue na tënë ni na gbele ngbanga na France, me a fâ ngbanga ni na lege ni ape. E sara appel me desizion ni achangé ape na gouvernement ti France amû nginza ahon kutu osio na ndambo ti euro na ndö ti compte ti filiale so ayeke na banque. Oko ye so angbâ na e ti sara ayeke ti gue na tënë ni na Kota da-ngbanga ti Europe. Me kozo si a mä tënë ti e, Kota da-ngbanga ni ahunda na e ti wara terê na a-avocat ti gouvernement ti France nga na azo so aga na iri ti Kota da-ngbanga ni ti bâ wala a peut ti leke tënë ni.

E bâ so greffier ni ayeke hunda na e ti payé mbeni kete wungo ti nginza na gouvernement ti France. Me e comprendre so tongana e payé même gï euro oko andâ e gue nde na amama-ndia ti Bible awe. Aita amû a-offrande ti mû maboko na kua ti Royaume, me ala mû ni na gouvernement ape (Mat. 22:21). Me e wara terê na ala ti fa so e ne andia ti Kota da-ngbanga ni.

A mä e na yâ ti mbeni pendere salle ti conférence. Lisoro ni akomanse nzoni ape. Na yâ ti tënë ti tongo nda ni ti greffier ni, lo tene so lo yeda so aTémoin ti Jéhovah ti France adoit ti payé ambeni taxe so gouvernement ti France ahunda. Yingo ti Jéhovah apusu e ti hunda na lo tënë so: “Eskê mo hinga so gouvernement ti France amû nginza ahon kutu osio na ndambo ti euro na ndö ti compte ti e awe?”

Bê ti lo ason. Na ngoi so azo so aga na iri ti gouvernement ayeda so ala sara ni, bango ndo ti lo achangé kue. Lo suku na ala na lo kaï lisoro ni gï hio tongaso. E bâ so na mbeni lege so e ku terê ti e na ni ape, Jéhovah achangé ye kue tongaso si e sö benda. Terê ti e anzere mingi na ngoi so e sigi na li ti e akpe kue na ye so asi so.

Na lango 30 ti juin ti ngu 2011, Kota da-ngbanga ni amû mbeni nzoni desizion ndali ti e. A zi taxe ni na a mû yanga na gouvernement ti France ti kiri na e nginza so ala mû nga ti zia mbeni ye na ndö ni. Kota desizion so da-ngbanga so amû angbâ ti bata tâ vorongo Nzapa na France. Senge hunda so e pensé nga fade ti hunda ni ape so ayeke tongana tênë so afâ Goliath. A changé desizion ti da-ngbanga ni. E sö benda ngbanga ti nyen? Ngbanga ti so, tongana ti so David atene lani na Goliath, “bira ni ayeke ti Jéhovah.”—1 Sam. 17:​45-47.

Gï ngbanga so la e sö benda dä ape. Atâa so angangu gouvernement nga na abungbi ti vorongo nzapa ake e, e sö benda na yâ ti angbanga 1225 na devant ti akota da-ngbanga ti akodro 70 nga na ambeni kota da-ngbanga nde na yâ ti dunia. Asongo benda so abata droit ti e, na tapande droit ti vorongo Nzapa, ti fa tënë dandara, ti mû mbage pëpe na amatanga so a sara ndali ti kodro nga ti ke ti mû mênë.

Ngbanga ti nyen la mbi mû mbage na yâ ti angbanga na Europe atâa so mbi yeke sara kua na Kota ndokua ti aTémoin ti Jéhovah na New York, na États-Unis?

BABÂ NA MAMA TI MBI AYAPU LANI NA FANGO TËNË

Babâ na mama ti mbi, George na Lucille, awara lani diplôme ti klase 12 ti Galaad na a tokua ala na Éthiopie, a yeke kâ la a dû mbi na ngu 1956. Ala mû na mbi iri ti Philippe, wafango nzoni tënë na ngoi ti akozo Chrétien (Kus. 21:8). Na ngu ti peko, gouvernement akanga lege na vorongo Nzapa ti e. Atâa so mbi ngbâ lani kete, mbi rappelé nzoni so sewa ti e ayeke voro lani Nzapa na hondengo ni. So mbi yeke kete, mbi pensé so pendere ye la. Mawa ni ayeke so akota zo ti kodro ahunda na e ti quitté kodro ni na ngu 1960.

E quitté e gue na Wichita, na Kansas, na États-Unis, me babâ na mama ti mbi angbâ lakue ti ye fango tënë tongana ti ngoi so ala yeke lani amissionnaire. Ala fa na mbi, na yaya ti mbi ti wali Judy nga na ngambe ti mbi ti koli Leslie, so a dû e kue na Éthiopie, ti ye Jéhovah nga ti sara na lo na bê ti e kue. Mbi wara batême na ngu 13. Ngu ota na pekoni, sewa ti e ague na ndo so a bezoin awafango tënë mingi dä na Arequipa, na Pérou.

Na ngu 1974, na ngoi so mbi yeke na ngu 18, filiale ti Pérou atokua mbi na aita-koli osio ti sara kua ti pionnier spécial. E doit lani ti fa tënë na ando so ade a fa tënë lâ oko dä ape na yâ ti ahoto ti Andes. E fa tënë na azo ti ndo ni so atene Quechua nga na Aymara. E voyagé lani na yâ ti mbeni oto so ayeke tongana da so e iri ni Arche ti Noé ndali ti so akpa ni. A nzere na mbi mingi ti pensé na angoi so e sara kua na Bible ti fa na azo ti kodro ni so fafadeso Jéhovah ayeke zi yere, kobela nga na kuâ (Apoc. 21:​3, 4). Azo mingi ayeda na tënë ti Royaume.

A TOKUA MBI NA KOTA NDOKUA TI E

Na ngoi so Albert Schroeder, so ayeke lani membre ti Bebungbi ti aTémoin ti Jéhovah, aga ti sara vizite na Pérou na ngu 1977, lo wa mbi ti sû demande ti sara kua na Béthel na kota ndokua ti e. Na mbi sara ni. Kete na pekoni, na lango 17 ti juin 1977, mbi komanse ti sara kua na Béthel ti Brooklyn. Na yâ ti ngu osio na pekoni, mbi sara kua na Ndokua ti ménage nga na ti maintenance.

Na juin 1978, mbi wara terê na Elizabeth Avallone na ngoi ti mbeni assemblée internationale so a sara ni na Nouvelle-Orléans, na Louisiana. Tongana ti mbi, babâ na mama ti Elizabeth ayeke aTémoin, ala sara na Jéhovah na bê ti ala kue. Na ngoi so mbi wara terê na Elizabeth, lo sara kua ti pionnier a sara ngu osio awe na lo ye ti sara na Jéhovah na yâ ti kua ti ngoi kue na yâ ti tanga ti gigi ti lo kue. E gi ti hinga mba nzoni na e tï mba. E sara mariage na lango 20 ti octobre 1979 na e komanse ti sara kua na Béthel.

Aita ti kozo congrégation ti e ti Brooklyn Spanish aye e mingi. Tongana angu ayeke hon, e sara kua na yâ ti ambeni congrégation ota, aita ni aye e na ala wa e ti ngbâ ti sara kua na Béthel. E kiri singila na aita so, na akamarade nga na afami ti e so a-aidé e ti bâ lege ti ababâ na amama ti e na ngoi so ala ga mbakoro.

MBI AIDÉ BUNGBI TI JÉHOVAH TI TIRI NDALI TI ADROIT TI E

Na janvier 1982, li ti mbi akpe so a tokua mbi ti sara kua na Ndokua so ayeke bâ lege ti atënë ti ndia so ayeke na Béthel. Ngu ota na pekoni, a hunda na mbi ti gue na université ti manda mbeti ti ga avocat. Mbi ga ti hinga so azo na États-Unis nga na ambeni kodro nde awara liberté ti sara ambeni ye grâce na songo benda ti aTémoin ti Jéhovah na yâ ti atënë so a gue na ni na ngbanga. E sara tënë na ndö ti akota tënë so fani mingi na klase.

Na ngu 1986 na ngoi so mbi yeke na ngu 30, mbi ga surveillant ti Ndokua so ayeke bâ lege ti atënë ti ndia. Mbi yeke na ngia so aita ti Béthel asara confiance na mbi mingi atâa so mbi ngbâ maseka. Me mbi bâ nga so kua ni ahon ndö ti mbi ndali ti so aye mingi ayeke lani dä so ade mbi hinga ape, nga mbi hinga so a yeke duti ande kete kua ape.

Mbi ga avocat na ngu 1988, me mbi comprendre lani ape so guengo na université asara si mbi changé nga asara si songo ti mbi na Jéhovah ayeke tongana ti kozo ape. Mandango mbeti ayo apeut ti sara si zo agi ti wara kota ndo nga lo bâ so lo yeke nzoni ahon azo so amanda mbeti tongana lo ape. Elizabeth a-aidé mbi ti kiri ti zia li ti mbi na ndö ti aye so mbi yeke sara ti duti na kpengba songo na Jéhovah kozo ti gue na université. Na peko ti ambeni ngoi, mbi bâ so mbi kiri mbi ga nduru mingi na Jéhovah. Ye so mbi vivre ni afa so hingango gbâ ti aye ayeke ye so ayeke kota mingi na yâ ti fini ti zo ape. Ye so asara si gigi ti zo ayeke nzoni mingi ayeke ti duti na kpengba songo na Jéhovah nga ti ye lo na awakua ti lo mingi.

GBUNGO KOKO TI NZONI TËNË NA SARANGO SI GERE NI ALUTI NGANGU NA LEGE TI NDIA

Na peko ti so mbi hunzi mandango mbeti, mbi zia li ti mbi mingi na ndö ti mungo maboko na ndokua ni ti bâ lege ti atënë so andu ndia so a doit ti bâ lege ni na Béthel nga ti bata bungbi ti Jéhovah na lege ti ndia nga na droit so e yeke na ni ti fa nzoni tënë. Kua ti mbi anzere na mbi mingi me ayeke kete ye ape ndali ti so aye achangé hio mingi na yâ ti bungbi ti e. Na tapande, e yeke hunda lani offrande na maboko ti azo ndali ti ambeti ti e, me ti londo na ngu 1991, a hunda na Ndokua so ayeke bâ lege ti atënë ti ndia ti fa aye so e peut ti sara ti zia ti hunda ni. Na pekoni, e aTémoin ti Jéhovah e yeke mû ambeti ti e na azo senge senge. Ye so ayapu kua ti Béthel nga na ti territoire nga asara si e wara kpale ti payé taxe ape. Ambeni zo apensé so changement so ayeke sara si nginza so e wara ayeke lingbi ape ti sigi na ambeti ti mû na azo so aye ti hinga tâ tënë na azo mingi ayeke manda ye na ndö ti Jéhovah ape. Me ye so asi la ape. Wungo ti azo so ayeke sara na Jéhovah depuis 1990 ti ga na ni ague na li ni ahon fani use nga laso azo apeut ti wara ambeti ti e senge senge. Mbi bâ so akota changement so bungbi ti e asara aga na anzoni ye gï grâce na mungo maboko ti Jéhovah nga na fango lege ti ngbâa be-ta-zo.—Ex. 15:2; Mat. 24:45.

So e sö benda na yâ ti angbanga ayeke gï pëpe ndali ti so e yeke na anzoni avocat. Fani mingi, ye so apusu akota zo ti aidé e ayeke nzoni sarango ye ti awakua ti Jéhovah. Mbi bâ tapande ni na ngu 1998 na ngoi so amembre ota ti Bebungbi na awali ti ala ague na akota bungbi so ayeke nde na Cuba. Ala sara ye na nzoni bê nga na nengo zo na a yeke kota ye so afa na akota zo ti gouvernement so e yeke sara poroso ape.

Me na ambeni ngoi, tongana a sara ye na e na lege ni ape, e doit ti ‘gbu koko ti nzoni tënë na ti sara si gere ni aluti ngangu na lege ti ndia’ na gbele ngbanga (aPhil. 1:7). Na tapande, teti angu mingi, agouvernement ti Europe na ti Corée du Sud ayeda pëpe na droit so e yeke na ni ti ke ti sara kua ti turugu. A sara si a kanga aita-koli 18000 tongaso na Europe nga na ambeni ahon 19000 na Corée du Sud ndali ti so ala ke ti sara kua ti turugu.

A si na lango 7 ti juillet 2011, na ndö ti tënë ti Bayatyan na Arménie, Kota da-ngbanga ti Europe amû desizion ti tene akodro kue ti Europe ayeda ti tene aita asara mbeni kua nde na place ti kua ti turugu. Na pekoni, Kota da-ngbanga ti Corée du Sud amû mara ti desizion so na lango 28 ti juin 2018. Tongana même gï mbeni kete wungo ti aita aduti nde ape, a yeke mû akota desizion so ape.

Ndokua so ayeke bâ lege ti atënë ti ndia so ayeke na kota ndokua ti e nga na ati so ayeke na yâ ti afiliale ti dunia kue ayeke sara kua ngangu ti tene e wara droit ti voro Jéhovah nga ti fa tënë ti Royaume. E yeke na pasa ti sara tënë na iri ti aita ti e so akota zo ti kodro ayeke sara ye ti ngangu na ala. Même tongana e sö benda na yâ ti ngbanga ape, e yeke sara tënë ti témoin na agouverneur, agbia nga na amara (Mat. 10:18). Ajuge, azo so aga na iri ti agouvernement, ajournaliste nga na azo kue adoit ti bâ aversê so e zia na yâ ti ambeti kue so e gue na ni na gbele ngbanga nga na ati so e fa na yâ ti atënë ti e. Azo so bê ti ala ayeke nzoni ayeke hinga e aTémoin ti Jéhovah nga na ye so ayeke na gunda ti aye so e mä na bê na ni. Ambeni zo so aga aita ti e.

MERCI JÉHOVAH!

Na yâ ti angu 40 so ahon, mbi yeke na pasa ti sara kua maboko na maboko na afiliale na yâ ti dunia kue na ndö ti atënë ti ndia nga ti gue na devant ti akota da-ngbanga nga na gbâ ti akota zo. Mbi ye mingi aita so mbi na ala e yeke sara kua na yâ ti Ndokua so ayeke bâ lege ti atënë ti ndia na kota ndokua ti e nga na ati so ayeke na yâ ti dunia kue nga mbi bâ ala na nene ni. Mbi wara gbâ ti anzoni ye nga gigi ti mbi anzere na mbi mingi.

Na yâ ti angu 45 so ahon, Elizabeth so aye mbi amû maboko na mbi na anzoni ngoi nga na angoi ti ngangu. Mbi ye lo mingi ndali ti so lo sara ni atâa so lo yeke na mbeni kobela so asara si lo yeke na ngangu mingi ape.

E wani e bâ so e peut ti sö benda na ngangu ti e wani ape. Tongana ti so David atene: “Jéhovah ayeke ngangu ti azo ti lo.” (Ps. 28:8). Biani, “bira ni ayeke ti Jéhovah”.