Mo hinga?
Na ngoi ti akozo Chrétien, nyen la aprêtre so asara kua na temple na Jérusalem asara na mênë ti anyama so a fâ ala ti yâa na sandaga?
NGU oko oko, aprêtre na Israël ti ândö ayeke yâa lani anyama saki mingi na sandaga na ndö ti gbalaka ti temple. Mbeni zo ti sungo mbaï ti aJuif, so iri ti lo Josèphe, atene so a yeke yâa lani akete taba ahon 250000 tongana asandaga na lango ti Pâque. Tongaso mênë ayeke sua lani mingi na sese na terê ti gbalaka (Lév. 1:10, 11; Nom. 28:16, 19). Mênë so kue ague na ndö wa?
Awandara ti gingo ye na gbe ti sese awara mbeni kota canal so a zi ni na ndo so temple ti Hérode ayeke lani dä na ngoi ti Jésus. Na bango ni, a zi canal so ti tene mênë ahon dä ague yongoro na temple ni.
Bâ aye use so asara si gbalaka ni angbâ lani propre:
Adû so a kôro ni na gbe ti gbalaka ni: A wara nga mara ti tënë so na yâ ti Mishna, mbeni mbeti ti andia ti aJuif so a fa ni gï na yanga nga so afa angobo ti ala. A sû ni na peko ti ngu 200. Mbeti ni atene so a zi adû use na mbeni coin ti gbalaka ni. Mênë ti anyama so a mû ni na sandaga nga na ngu so asara kua na ni ti sukula na gbalaka ni ayeke hon na yâ ti adû ni so na adescend juska asi na canal so ague na yâ ti Popo-hoto ti Cédron.
Awandara so agi ye na gbe ti sese ayeda so adû ayeke lani dä so mênë ayeke hon na yâ ni. Mbeni buku (Cambridge History of Judaism) atene so a wara “mbeni kota canal” nduru na temple ni. A tene: “Peut-être ngu so amélangé na mênë ti anyama so a mû na sandaga na temple ahon na yâ ni.”
Ngu ayeke gbani: Aprêtre ayeke lani na bezoin ti gbâ ti ngu ti sukula ndo so gbalaka ni ayeke dä nga ti hon na mênë so ayeke tuku na terê ti gbalaka ni. Aprêtre awara ngu so ala bezoin ni na yâ ti gbata ni. Ngu ti gbata ni ayeke ga na gbalaka ni na lege ti acanal nga na adû ti batango ngu. Wandara Joseph Patrich atene so na bango ni mbeni temple ti ngoi ni so, so ayeke na aye so a leke ti ga na ngu na yâ ti temple ni nga ti hon na saleté ngu ayeke dä ape.