Eskê mo “hinga lege” ti duti na ngia na ye so mo yeke na ni?

1. Ti zia bê ti mo gï na ndö ti ye so mo yeke na ni aye ti tene nyen? A ye ti tene nyen ape?

ESKÊ mo yeke zia ka bê ti mo gï na ndö ti ye so mo yeke na ni? Zo so asara tongaso ayeke na ngia nga na siriri ndali ti so lo zia li ti lo na ndö ti atufa so lo yeke na ni na ndembe so. Bê ti lo ason ape wala ngonzo asara lo ape ndali ti aye so amanke lo. Me ti zia bê ti e gï na ndö ti ye so e yeke na ni aye ti tene ape so e sara sanka ti aye. Na tapande, a yeke sioni ape ti tene e gi ti sara akua ti Jéhovah mingi (aRom. 12:1; 1 Tim. 3:1). Me tongana e zia bê ti e na ndö ti ye so e yeke na ni, même tongana ade a mû na e ape mbeni kua so e ye ti sara, e yeke perdre ngia ti e ape.

2. Asioni ye wa la apeut ti si tongana e zia bê ti e pëpe na ndö ti ye so e yeke na ni?

² Tongana e zia bê ti e pëpe na ndö ti ye so e yeke na ni, e peut ti komanse ti mû asioni desizion. Azo so ye ayeke lingbi ala ape apeut ti sara kua al’heure mingi ti wara aye ti sese so ala yeke nga na bezoin ni ape. Mawa ni ayeke so ambeni Chrétien anzi même nginza nga na ambeni ye so ala sara nzara ni. Peut-être ala pensé ala tene: ‘Ye so alingbi na mbi,’ ‘Depuis la mbi yeke gi ti wara ni so’ wala ‘Mbi yeke payé ni ande.’ Me nzi kue anzere na Jéhovah ape nga aga na zonga na ndö ti iri ti lo (aProv. 30:9). Vundu asara ambeni ita mingi ndali ti so ala wara ape kua ti Jéhovah so ala ye, na ala zia ti sara na lo (aGal. 6:9). Ngbanga ti nyen la mbeni wakua ti Jéhovah apeut même ti pensé ti sara tongaso? Peut-être a yeke ndali ti so lo yeke na ngia encore ape na ye so lo yeke na ni.

3. Nyen la e manda na lege ti aPhilippien 4:​11, 12 so apeut ti kpengba e?

³ E kue e peut ti duti na ngia na ye so e yeke na ni. Bazengele Paul atene so ‘na angoi kue, lo manda ti zia bê ti lo gï na ndö ti ye so lo yeke na ni.’ (Diko aPhilippien 4:​11, 12.) Lo sû lani atënë so na ngoi so lo yeke na kanga. Atâa so kue, lo perdre ngia ti lo ape. Lo “hinga lege” ti duti na ngia na ye so lo yeke lani na ni. Tongana a yeke ngangu na e ti duti na ngia na ye so e yeke na ni, atënë ti Paul nga na aye so lo vivre ni afa na e so e peut ti sara ni. A yeke nzoni ape ti tene e pensé so ti duti na ngia na ye so e yeke na ni ayeke kete ye. E doit ti manda ni mandango. E yeke sara ni tongana nyen? Zia e bâ asarango ye so ayeke aidé e ti hinga lege ti duti na ngia na ye so e yeke na ni.

MANDA TI KIRI SINGILA NDALI TI AYE SO MO YEKE NA NI

4. Tongana nyen la bibe ti kiringo singila ayeke aidé e ti duti na ngia na ye so e yeke na ni? (1 aThessalonicien 5:18).

⁴ A yeke ngangu ape na zo so ayeke kiri singila ti duti na ngia na ye so lo yeke na ni. (Diko 1 aThessalonicien 5:18.) Na tapande, tongana e kiri singila biani ndali ti aye so e bezoin ni so e yeke na ni, e yeke gi bê ti e ahon ndö ni ape ndali ti aye so e ye ni me so e yeke na ni ape. Tongana e gbu li na ndö ti akua so e yeke sara laso ti voro Jéhovah nga e kiri singila ndali ni, e yeke pensé ti sara kue ti sara akua ni so nzoni ahon ti pensé gï ti wara mbeni fini kua. Ndani la Bible awa e ti zia atënë ti singila na yâ ti sambela ti e. Tongana e hinga ti kiri singila, e yeke duti na “siriri ti Nzapa so ahon ndö ti bibe kue”.—aPhil. 4:​6, 7.

5. Araison wa la ndali ni a yeke nzoni azo ti Israël akiri lani singila na Nzapa? (Bâ nga foto.)

⁵ Bâ ye so asi lani na azo ti Israël. Fani mingi, ala dema terê na Jéhovah ndali ti so akobe so ala yeke te lani na Égypte amanke ala (Nom. 11:​4-6). Ti vrai ni, ti vivre lani na yâ ti benyama ayeke kete ye ape. Nyen la apeut lani ti aidé ala ti duti na ngia na ye so ala yeke na ni? Ala doit lani ti gbu li na ndö ti aye kue so Jéhovah asara ndali ti ala nga ti kiri singila ndali ni. Lani na Égypte, so ala yeke angbâa a yeke sara ye ti ngangu na ala, me Jéhovah aga na aye ti ngangu bale-oko na ndö ti azo so ayeke sara ala pasi. Na peko ti so a zi azo ti Israël, ala ‘ro aye na terê ti azo ti Égypte,’ argent, lor nga na bongo (Ex. 12:​35, 36). Na ngoi so azo ti Égypte atomba peko ti azo ti Israël juska na yanga ti Kota Ngu-Bengba, Jéhovah asara miracle, yâ ti ngu ni akangbi use. Na ngoi so ala yeke tambela lani na yâ ti benyama, lo mû nga na ala manne ti te lango oko oko. Me kpale ni ayeke lani nyen? Atâa so Jéhovah amû lani na ala kobe ti te alingbi na ala, ala kiri singila na lo ndali ni ape.

6. Aye wa la apeut ti aidé e ti manda ti kiri singila ndali ti aye so e yeke na ni?

⁶ Aye wa la apeut ti aidé mo ti kiri singila ndali ti aye so mo yeke na ni? Kozoni, mû ngoi lango oko oko ti gbu li na ndö ti anzoni ye so mo yeke na ni. Mo peut même ti sû na mbeti aye use wala ota so mo ye ti kiri singila ndali ni (Toto ti Jér. 3:​22, 23). Use ni, fa singila ti bê ti mo. Mû li ni ti kiri singila na azo ndali ti aye so ala sara ndali ti mo. Kota ye ni ayeke ti kiri singila na Jéhovah lakue (Ps. 75:1). Ota ni, sara kamarade na azo so ayeke kiri singila. Tongana akamarade ti e ayeke kiri singila ape wala ala yeke dema ka terê, e peut ti ga tongana ala. Me tongana ala yeke kiri singila, nzoni bango ndo ti ala apeut ti pusu e ti kiri nga singila (Deut. 1:​26-28; 2 Tim. 3:​1, 2, 5). Tongana e gi alege ti kiri singila, e yeke pensé mingi ape na ndö ti aye so e ye me so amanke e.

7. Nyen la a-aidé lani Aci ti duti na ngia na ye so lo yeke na ni? Ye ti peko ni ayeke nyen?

⁷ Bâ ye so asi lani na Ita-wali Aci, so ayeke na Indonésie. Lo tene: “Na ngoi ti COVID-19, mbi komanse ti haka dutingo ti mbi na ti ambeni ita. A sara si mbi yeke na ngia encore ape na aye so mbi yeke na ni.” (aGal. 6:4). Nyen la a-aidé lo ti changé bango ndo ti lo? Lo tene: “Mbi komanse ti diko anzoni ye so Jéhovah amû na mbi lâ oko oko. Nga mbi gbu li na ndö ti gbâ ti anzoni ye so mbi wara ndali ti so mbi yeke na yâ ti bungbi ti lo. Na pekoni, mbi kiri singila na lo ndali ti aye so kue. A aidé mbi ti duti na ngia na ye so mbi yeke na ni.” Tongana dutingo ti mo asara si mo yeke na ngia ape, eskê mo peut ti sara mara ti ye so Aci asara tongaso si mo kiri mo duti na ngia na ye so mo yeke na ni?

ZIA BÊ TI MO NA YE SO MO YEKE NA NI NGA SARA TERÊ TI MO KETE

8. Nyen la asi lani na Baruch?

⁸ Dutingo ti Baruch, wakuasu ti prophète Jérémie, asara lani si lo yeke na ngia ape. Baruch ayeke lani na mbeni kua so ayeke ngangu. Lo doit ti aidé Jérémie ti fa na azo ti Israël so akiri singila ape ye so ayeke si na ala ndali ti so ala mä yanga ti Jéhovah ape. A si na mbeni ngoi, mbeni ye agboto lê ti Baruch. Ahon ti zia li ti lo gï na ndö ti ye so Jéhovah aye ti tene lo sara, na bango ni, lo komanse ti pensé mingi na ndö ti lo wani nga na ye so lo ye ti sara. Na lege ti Jérémie, Jéhovah atene na Baruch, atene: “Mo yeke gi ti wara akota ye ndali ti mo wani. Mo zia lege ti gingo aye so.” (Jér. 45:​3-5). Tënë so Jéhovah ayeke tene lani na lo ayeke so: “Duti na ngia na ye so mo yeke na ni na ndembe so.” Baruch ayeda lani na wango ni na lo ngbâ ti zia ngia na bê ti Jéhovah.

9. Tongana ti so 1 aCorinthien 4:​6, 7 afa, tongana e sara terê ti e kete ayeke pusu e ti hinga nyen? (Bâ nga afoto.)

⁹ Na ambeni ngoi, mbeni wakua ti Jéhovah apeut ti pensé so a doit ti mû na lo mbeni kua. Lo peut ti pensé tongaso ndali ti so lo yeke na akode mingi, lo yeke sara kua ngangu wala ndali ti so lo sara na Jéhovah a sara angu mingi awe. Me peut-être a mû na ambeni zo kua so lo ye fade ti wara. Nyen la apeut ti aidé lo ti tene bê ti lo ason ape? Lo peut ti gbu li na ndö ti atënë ti bazengele Paul so ayeke na 1 aCorinthien 4:​6, 7. (Diko ni.) Akua kue so e wara nga akode kue so e yeke na ni alondo na Jéhovah. Jéhovah adoit gï ti mû na e aye so ape nga lo mû ni na e ape ndali ti so e lingbi na ni. Kota nzobe ti Nzapa la apusu lo ti mû ni na e.—aRom. 12:​3, 6; aÉph. 2:​8, 9.

10. Tongana nyen la e peut ti manda ti sara terê ti e kete?

¹⁰ E peut ti manda ti sara terê ti e kete tongana e gbu li na ndö ti tapande ti Jésus nga e sara ye tongana lo. Jésus asukula gere ti abazengele ti lo atâa so lo hinga so lo yeke Molenge ti Nzapa nga lo yeke na kota komandema. Bazengele Jean atene: ‘So Jésus ahinga so Babâ ni azia aye kue na maboko ti lo awe na so lo londo na Nzapa si lo ga, na lo yeke kiri na Nzapa, lo komanse ti sukula gere ti adisciple ni.’ (Jean 13:​3-5). Jésus apeut lani ti bâ so abazengele ti lo la adoit ti sukula gere ti lo. Me na ngoi so Jésus ayeke lani na sese, lo pensé lâ oko ape so lo doit ti duti na gbâ ti mosoro nga gigi adoit ti kpengba na lo ape (Luc 9:58). Jésus asara lani terê ti lo kete, lo yeke na ngia na ye so lo yeke na ni. Lo zia na e nzoni tapande ti mû peko ni.—Jean 13:15.

11. Tongana nyen la sarango terê kete a-aidé Dennis ti duti na ngia na ye so lo yeke na ni?

¹¹ Dennis, so ayeke na Pays-Bas, agi ti sara terê ti lo kete tongana Jésus, me a yeke kete ye ape. Lo tene: “Tongana mbeni ita awara mbeni kua so mbi ye fade ti wara, na ambeni ngoi bê ti mbi ason ndali ti so mbi pensé so mbi la mbi doit fade ti wara ni. Tongana a si tongaso, mbi yeke manda ye na ndö ti sarango terê kete. Na yâ ti JW Library^®, mbi sû ambeni versê so asara tënë na ndö ti sarango terê kete tongaso si mbi peut ti wara ni hio na ti diko ni. Mbi téléchargé nga na yâ ti téléphone ti mbi ambeni diskur so asara tënë na ndö ti sarango terê kete na mbi yeke mä ni fani mingi.a Mbi manda so kua kue so e yeke sara ayeke ti mû gloire na Jéhovah me na e wani ape. Na nzoni bê, Jéhovah amû lege na e oko oko kue ti sara mbeni ye na yâ ti kua ti lo, me lo la lo yeke sara si kua ni atambela nzoni.” Tongana mo bâ so mo yeke na ngia ape ndali ti so a mû na mo ape kua so mo ye ti sara, gi ti sara terê ti mo kete. A yeke sara si mo kpengba songo ti mo na Jéhovah nga a yeke aidé mo ti duti na ngia.—Jacq. 4:​6, 8.

GBU LI NA NDÖ TI AZENDO TI JÉHOVAH

12. Beku wa ti kekereke la ayeke aidé e ti duti na ngia na ye so e yeke na ni? (Ésaïe 65:​21-25).

¹² Tongana e gbu li na ndö ti pendere beku ti kekereke, e yeke duti na ngia mingi na ye so e yeke na ni. Na yâ ti mbeti ti Ésaïe, Jéhovah atene na e so lo comprendre so e yeke na akpale mingi, me lo mû nga zendo ti zi akpale so kue. (Diko Ésaïe 65:​21-25.) E yeke wara ande apendere da. E yeke sara ande kua so e ye nga e yeke te anzoni kobe so anzere. E yeke gi ande bê ti e encore ape so sioni ye ayeke si na e wala na amolenge ti e (És. 32:​17, 18; Ézéch. 34:25). Kekereke ti e ayeke duti pendere mingi nga e yeke duti nzoni.

13. Na yâ ti aye wa la e bezoin mbilimbili ti zia li ti e na ndö ti beku ti e?

¹³ Laso, e bezoin mingi ti zia li ti e na ndö ti beku ti e. Ngbanga ti nyen? Ngbanga ti so e yeke na “lâ ti nda ni” na e kue e yeke na akpale so ayeke ‘ngangu na e ti kanga bê na yâ ni’. (2 Tim. 3:1). Lâ oko oko, Jéhovah ayeke aidé e ti gbu ngangu na lege so lo fa lege na e, lo kpengba e nga lo mû na e aye so e bezoin ni (Ps. 145:14). Na ndö ni, beku ti e apeut ti aidé e ti gbu ngangu na ngoi ti akpale. Peut-être mo yeke tiri ti mû na azo ti sewa ti mo aye so ala bezoin ni. Eskê a ye ti tene so mo yeke ngbâ ande gï ti tiri tiringo si mo mû ye na azo ti sewa mo? Ên-ën! Jéhovah amû zendo ti mû na mo aye so mo bezoin ni mingi mingi na yâ ti Paradis (Ps. 9:18; 72:​12-14). Peut-être yâ ti terê ti mo ayeke son gï songo, vundu asara mo mingi wala mo yeke na mbeni ngangu kpale ti seni. Eskê mo yeke bâ ande gï pasi tongaso me mo yeke duti nzoni lâ oko ape? Ên-ën! Na yâ ti fini dunia ti Nzapa, kobela nga na kuâ ayeke duti ande dä ape (Apoc. 21:​3, 4). Beku so a-aidé e ti tene bê ti e ason ape ndali ti aye so ayeke passé laso. E peut ti duti na ngia atâa a sara ye na e na lege ni ape wala e perdre mbeni zo so e ye lo mingi, e yeke na kobela wala mbeni kpale nde. Ngbanga ti nyen? Ngbanga ti so atâa akpale so e wara ayeke ngangu tongana nyen, e hinga so “pasi ni ayeke ye so aninga pëpe” nga na yâ ti fini dunia e yeke bâ pasi encore ape.—2 aCor. 4:​17, 18.

14. Tongana nyen la e peut ti duti na kpengba beku?

¹⁴ So beku ti e ti kekereke ayeke aidé e ti duti na ngia, nyen la apeut ti aidé e ti duti sûr so azendo ti Jéhovah ayeke ga ande tâ tënë? Gï tongana ti so mbeni zo adoit ti yü lunette si lo bâ polele aye so ayo na lo, e doit ti sara aye so ayeke aidé e ti duti na kpengba beku tongaso si e peut ti bâ Paradis polele. Na tapande, tongana e gi bê ti e ahon ndö ni ndali ti so a yeke ngangu na e ti wara nginza so alingbi ti vivre na ni, e peut ti imaginé gigi ayeke duti ande tongana nyen na ngoi so e bezoin nginza ape nga zo oko ayeke duti ande wayere ape. Tongana e gi bê ti e ndali ti so e ye ti sara mbeni kua na yâ ti kua ti Jéhovah me a mû ni na e ape, e peut ti gbu li ti bâ tongana nyen la agingo bê ni so ayeke ye oko ape tongana e ga mbilimbili-kue nga e yeke sara na Jéhovah teti angu saki mingi (1 Tim. 6:19). Laso e yeke gi bê ti e na ndö ti gbâ ti aye, a sara si a peut ti duti ngangu na e ti gbu li na ndö ti azendo ti kekereke. Me tongana e gbu li mingi na ndö ti pendere gigi ti kekereke so Jéhovah amû zendo ni, a yeke duti ngangu na e ape ti zia li ti e na ndö ni ahon ti gi bê ti e na ndö ti akpale ti e.

15. Atënë ti Christa afa na mo nyen?

¹⁵ Bâ tongana nyen la beku a-aidé lani Christa so asara mariage na Dennis so e sara tënë ti lo fade. Lo tene: “Mbi yeke na mbeni kobela so asara si mbi fatigué mingi. Mbi peut ti tambela ape nga mbi bezoin puse ti azo so ayeke na kpale ti seni, mingi ni mbi yeke gï na gbogbo. Lâ na lâ, yâ ti terê ti mbi ayeke son gï songo. Ade ti ninga ape, docteur ti mbi atene na mbi so mbi yeke wara sava ape. Me hio mbi pensé mbi tene: ‘Bango ndo ti lo na ndö ti kekereke ayeke nde.’ Mbi zia li ti mbi gï na ndö ti beku ti mbi asara si mbi yeke na siriri ti bê. Laso, mbi doit ti gbu ngangu, me gigi ayeke nzere ande na mbi mingi na yâ ti fini dunia.”

‘AZO SO AKPE MBETO TI JÉHOVAH, YE OKO AMANKE ALA APE’

16. Ngbanga ti nyen la Gbia David atene so azo so akpe mbeto ti Jéhovah “ye oko amanke ala pëpe”?

¹⁶ Mbeni wakua ti Jéhovah so ayeke na ngia na ye so lo yeke na ni ayeke wara akpale. Gbia David aperdre lani amolenge ti lo ota tongaso. A bi lani tënë ti mvene na li ti lo, a kä lo nga mbeni gbia agi ti fâ lo asara si lo yeke kpe gï na nduzu nduzu teti angu mingi. Me na ngoi so lo yeke gbu ngangu na yâ ti mbeni ngangu kpale, lo tene tënë so na ndö ti Jéhovah, lo tene: “Azo so akpe mbeto ti lo, ye oko amanke ala pëpe.” (Ps. 34:​9, 10). Lo tene tongaso ngbanga ti nyen? Lo tene tongaso ngbanga ti so lo hinga lani so atâa so Jéhovah ayeke kanga lege pëpe na akpale ti si na lo, lo yeke mû na lo lakue aye so lo bezoin ni (Ps. 145:16). E peut nga ti zia bê ti e na Jéhovah ti aidé e na yâ ti akpale ti e kue. E peut ti duti na ngia na ye so e yeke na ni.

17. Ngbanga ti nyen la mo leke na bê ti mo ti hinga lege ti duti na ngia na ye so mo yeke na ni?

¹⁷ Jéhovah aye ti tene mo duti na ngia na ye so mo yeke na ni (Ps. 131:​1, 2). Tongaso, sara kue ti duti na ngia na ye so mo yeke na ni. Tongana mo sara ngangu ti manda ti kiri singila ndali ti ye so mo yeke na ni, ti zia bê ti mo na ye so mo yeke na ni nga ti sara terê ti mo kete nga mo gi ti duti na kpengba beku, mo peut ti tene: “Ti tâ tënë ni, [ye so mbi yeke na ni] anzere na mbi.”—Ps. 16:​5, 6.