Gi ti duti na siriri atâa so bira nga na sarango ye ti ngangu na zo amû ndo
Gary, so asara lani kua ti turugu, atene: “Kozo ti tene mbi komanse ti manda Bible, mbi hinga lani ape ndani so sarango ye ti ngangu na zo, injustice nga na wusuwusu amû yâ ti dunia kue. Me, fadeso mbi yeke na siriri ti bê. Mbi hinga so Jéhovah ayeke sara ande si siriri amû ndö ti sese kue.”
Gary oko la ayeke na mara ti pensé ni so ape. Bâ tongana nyen la Bible a-aidé ambeni zo.
YE SO BIBLE AFA: “Jéhovah, mo yeke nzoni nga mo yeke nduru ti pardonné zo.”—Psaume 86:5.
TONGANA NYEN LA VERSÊ SO A-AIDÉ AMBENI ZO?: “Versê so afa biani na mbi so, Jéhovah ayeke sara nzoni bê na zo. Mbi hinga so lo yeke nduru ti pardonné mbi ndali ti aye kue so mbi sara na ngoi so mbi mû mbage lani na yâ ti bira.”—Wilmar, na Colombie.
YE SO BIBLE AFA: “Bâ, mbi yeke créé afini yayu na fini sese; azo ayeke dabe ti ala na angbene ye encore ape, nga azo ayeke bi bê ti ala na ni pëpe.”—Ésaïe 65:17.
TONGANA NYEN LA VERSÊ SO A-AIDÉ AMBENI ZO?: “Mbi yeke bâ pasi na traumatisme, mbi yeke gi bê ti mbi nga mbi yeke na kpale ti kobela ti li ndali ti aye so mbi vivre ni lani na temps so mbi sara kua ti turugu. Me, versê so adabe ti mbi so, fafadeso, Jéhovah ayeke sara ande si aye ti sioni kue so ayeke kiri na yâ ti li mbi so ahon. Aye ni so ayeke kiri ande na yâ ti li ti mbi encore ape. So tâ pendere ye!”—Zafirah, na États-Unis.
YE SO BIBLE AFA: “Na ngoi ti lo, azo ti mbilimbili ayeke maï nga siriri ayeke duti dä mingi juska nze ayeke dä encore ape.”—Psaume 72:7.
TONGANA NYEN LA VERSÊ SO A-AIDÉ AMBENI ZO?: “Mbi yeke gbu ka li na ndö ti atënë so. Na yâ ti kete ngoi, asioni ye kue so bira aga na ni ayeke duti ande dä ape nga e bezoin ape ti gi bê ti e na ndö ti nzoni duti ti amba ti e.”—Oleksandra, na Ukraine.
YE SO BIBLE AFA: “Azo ti mo so akui ayeke kiri ande na fini. . . . Ala azo so alango na yâ ti fuku ti sese, ala zingo, ala dekongo na ngia!”—Ésaïe 26:19.
TONGANA NYEN LA VERSÊ SO A-AIDÉ AMBENI ZO?: “A fâ presque azo ti sewa ti mbi kue na yâ ti aye ti ngangu so a sara lani na azo ti mara ti Tutsi. Me, versê so adë bê ti mbi so mbi yeke kiri encore ti bâ ala. Mbi imaginé tongana nyen la mbi yeke mä ande go ti ala na ngoi so a yeke zingo ande ala na kuâ.”—Marie, na Rwanda.
YE SO BIBLE AFA: “Na yâ ti kete ngoi, azo ti sioni ayeke duti dä encore ape . . . Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.”—Psaume 37:10, 11.
TONGANA NYEN LA VERSÊ SO A-AIDÉ AMBENI ZO?: “Atâa so bira ni ahunzi lani, injustice nga na azo ti sioni angbâ. Aversê so a-aidé mbi lani mingi. Jéhovah abâ ye kue nga lo comprendre situation ti mbi. Lo mû zendo so, na yâ ti kete ngoi, apasi kue ayeke hunzi ande nga e yeke girisa na ndö ni.”—Daler, na Tadjikistan.
Azo so a sara tënë ti ala na yâ ti mbeti so ayeke na popo ti aTémoin ti Jéhovah kutu mingi so Bible a-aidé ala ti duti na siriri. Ala manda tongana nyen ti hon ndö ti tënë ti mara, ti kodro, ti kete mara nga na tënë ti kengo zo senge senge (aÉphésien 4:31, 32). A-Témoin ti Jéhovah ayeke sara politique ape nga ala yeke mû mbage na sarango ye ti ngangu na zo ape.—Jean 18:36.
A-Témoin ti Jéhovah aye nga sewa ti ala ti aita kue (Jean 13:35). Na tapande, mbeni ita-wali so iri ti lo ayeke Oleksandra, so a sara tënë ti lo fade, lo na ita ti lo ti wali akpe lani ague na kodro-wande ndali ti bira. Lo tene: “Na temps so e fâ frontière, hio e bâ aTémoin ti ndo ni so aga lani ti yamba e. Mungo maboko ti ala a-aidé e ti adapté terê ti e na fini kodro ni tongana aréfugié.”
Anzere na e aTémoin ti Jéhovah ti tisa mo ti ga ti sara bungbi legeoko na e ti hinga ye na ndö ti tënë ti siriri so Bible afa nga tongana nyen ti sara ye alingbi na ni. Gue na ndö ti jw.org ti wara mbeni ndo ti bungbi ni so ayeke nduru na mo wala hunda ti tene mbeni Témoin ti Jéhovah aga amanda Bible na mo senge senge na lege ti brochure Ngbâ na fini lakue lakue!.