Mbeni ngoi ti tengo kobe ti yingo na ti sara ngia
1. Tongana nyen Jéhovah ayeke bata awakua ti lo na lege ti yingo?
1 Na ndoye, Jéhovah abata awakua ti lo na lege ti yingo. Na ngoi so mingi ti azo ti sese so ayeke kui na nzara na lege ti yingo, e yeke te ti e kobe nzoni na lege ti yingo (Es. 65:13). Mbeni oko lege so Jéhovah ayeke mû na e kobe ti yingo ayeke akota bungbi ti district so e yeke sara ngu oko oko. Mo yeke leke tere ti mo ti gue na abungbi kue ti kota bungbi ti district “Yingo ti Nzapa afa lege na e” so ayeke ga? A leke mbeni tâ nzoni kobe ti mû na e ngangu na lege ti yingo.
2. Ti leke tere kozo ndali ti kota bungbi ni ahunda ti sara nyen?
2 Leke tere kozoni: “Zo so abi bê ti lo ti sara kusala biani, awara ye mingi”. (aProv. 21:5). Tongaso, tongana mo yeke bâ tënë ti lekengo tere ti mo ti gue na alango ota kue ti kota bungbi so, sara tënë ni na patron ti mo tongana mo ye ti wara congé ti gue na kota bungbi ni. Tongana mo ye ndo ti lango, mo bâ lege ni awe? Pensé nga na kobe ti mo ti bekombite tongaso si mo lingbi ti te ni legeoko na aita ti mo na ndo ti kota bungbi ni. Lâ oko oko leke ti si na ndo ti kota bungbi ni hio tongaso si mo wara ndo ti duti na ti mû mbage na bia nga na sambela ti tongo nda ni.
3. Mara ti bongo wa ayeke nzoni e yü ande ni?
3 E ye biani si bongo so e yeke yü ni ayeke bongo so alingbi na ayeke nzoni (1 Tim. 2:9, 10). Kota bungbi ti district amû na e pendere lege ti fa tënë na azo so angoro e. Na lekengo tere nzoni na ngoi ti kota bungbi ni nga na yungo abadge ti e, e yeke duti nde na azo so mabe ti e na ti ala ayeke oko pëpe nga a yeke sara nzoni mingi na ndo ti azo so ayeke bâ e.
4. Fade ye wa amû maboko na e nga na sewa ti e ti wara ye ti nzoni mingi na lege ti kapa so?
4 Dengi mê nzoni: Biani, e ye ti girisa kete ye oko pëpe ti kobe so a mû na e na ngoi ti kota pumba ti yingo so! (aProv. 22:17, 18). Ti diko legeoko na yâ ti Bible ti e aversê so a yeke diko ni na ti mû anduru note ayeke mû ande maboko na e ti zia li ti e kpô na ndo ti kapa ni na ti zia si ye agboto lê ti e kirikiri pëpe. Na lakui, e lingbi ti sara kusala na anote ti e ti sara lisoro na amba ti e na ndo ti angbongboro tënë ti kapa ni. Na yâ ti angu so ahon, a bâ so ambeni maseka so aduti place oko na ndo ti kota bungbi ayeke sara lisoro na ngoi ti kapa ni wala ala yeke tokua mbeti na mba na lege ti asinga ti maboko ti ala. Tongana e yeke na amolenge, so amaseka ayeke na popo ni, a yeke nzoni ala duti legeoko na e na sewa ti dengi mê na kapa ni ahon ti zia si ala duti na amba ti ala amaseka, nde na tere ti e.
5. Tongana nyen ti sara si kota bungbi ni anzere na e mingi?
5 E duti na tere ti amba ti e: Mbeni pendere kobe ayeke nzere mingi tongana a te ni legeoko na akamarade (aProv. 15:17). Tongaso nga, ti duti oko na aita ti e ayeke sara si kota bungbi ni anzere na e. Ni la, na ngoi ti wungo tere, a yeke nzoni mingi ti mû li ni ti bara azo so alondo na ndo nde nde si aga, na ti duti na tere ti ala! (Ps. 133:1). Na ngoi so président ti kapa ni atisa e ti duti kozo si mozoko ato nda ni, a yeke nzoni ti kaï lisoro ti e na ti duti teti tongo nda ti kapa ni.
6. Fa peko ti mbeni ye so asi na mo so afa tongana nyen e lingbi ti fa tënë na azo ti kodoro so a sara kota bungbi ni dä.
6 Gbu alege kue so azi ti fa tënë: Akota bungbi ayeke zi na e lakue apendere lege ti fa tënë. Mingi ti azo ayeke hunda aita so aga na akota bungbi ni na ndo ti mama-tene so ayeke na ndo ti badge ti ala na ngoi so aita ni ague na ando ti tengo kobe wala ala yeke na yâ ti kutukutu ti yongo azo. Ye so azi lege ti sara lisoro nga ti fa tâ tënë. Ambeni zo so ahunda atënë so a tisa ala na ala ga na kota bungbi ni.
7. Ngbanga ti nyen a yeke nzoni e gue na kota bungbi ti district so ayeke ga?
7 A mû angbonga mingi ti leke kapa, ti leke ndo na andokua nde nde ti kota bungbi ni nga ti leke adiskur nde nde. Ndoye so ayeke na gunda ti akusala kue so a sara ndali pumba ti yingo so afa so Jéhovah ayeke bâ lege ti azo ti lo nzoni mingi. Zia e kue e duti dä ti manda ye mingi! Nde na sese so, tongana e sara tongaso, fade e ‘sara bia teti ngia ayeke na bê ti e’.—Es. 65:14.