Adango bê teti kota bungbi ti district

◼ Angbonga ni: Na yâ ti alango ota ni kue, kapa ni ayeke to nda ni na 7:50 ti ndapre. Na ngoi so mozoko ato nda ni, a yeke nzoni e kue e duti tongaso si kapa ni alingbi ti to nda ni na lege so ayeke nzoni. Fade kapa ni ahunzi na 15:05 na lango ti vendredi na samedi. Ti dimanche, a yeke hunzi na 14:10.

◼ Ndo ti lutingo ti akutukutu: Na ndo ti akota bungbi kue so a yeke bata ndo ti ziango kutukutu dä, zo alingbi ti zia kutukutu ti lo kâ senge, na a yeke fa place ti ziango ni alingbi na molongo ti gango ti akutukutu ni oko na oko. Fade abadge ti kota bungbi ni la ayeke zi lege na kutukutu kue ti lï. Teti so ndo ti lutingo ti akutukutu akono mingi pëpe, a yeke nzoni aita amä tere ti mû kutukutu oko. A yeke nzoni ti sara kusala maboko na maboko na aita so abâ lege ti ndo ti lutingo ti akutukutu si ndao asi pëpe.

◼ Ndo ti duti: A yeke nzoni ti bata ndo ti duti gi teti azo so mo na ala aga legeoko na kutukutu wala so mo na ala alango da oko.

◼ Kobe ti bekombite: A yeke nzoni mo ga na kobe ti te ahon ti zia ndo ti kota bungbi ni na ngoi ti wungo tere ti gue ti gi kobe na mbeni ndo nde. Mo lingbi ti ga na mbeni kete ye ti batango kobe so mo lingbi ti zia na gbe ti ye ti duti. A yeda pëpe ti tene zo aga na sämba, asakpa so akono mingi nga na averre na ando so a yeke sara kota bungbi dä.

◼ A-offrande: E lingbi ti fa bê ti kiri singila ti e teti kusala so a sara na ndo ti sese kue na mungo na bê kue a-offrande na Da ti Royaume ti e wala na ndo ti kota bungbi ni. A yeke nzoni a zia iri ti bungbi ti e so ndia ahinga ni na yâ ti kodoro so e yeke dä na ndo ti chèque wala mbeti ti nginza kue so e ye ti mû. Na tapande, na Centrafrique, a lingbi ti sara mbeti ti nginza ni na iri ti Association “Les Témoins de Jéhovah.”

◼ Andao na akpale so ahunda ti mû yorö hio: Tongana tere ti mbeni zo aso hio tongaso na ngoi ti kota bungbi ni, sara tënë ni na mbeni ita ti ndokua ti yambango azo so ayeke nduru na mo. Fade ita ni ayeke gue hio ti sara tënë ni na ndokua ti mungo yorö. Aita ti ndokua ni ayeke bâ ngangu ti kobela ni, na ala yeke mû maboko so alingbi. A yeke nzoni azo so ayeke na kpale ti seni agirisa pëpe ti ga na ayorö ti ala na kota bungbi ni.

◼ Apuse ti bébé na angende so a lingbi ti ngongbi ni: A lingbi a ga na apuse nga na angende so a lingbi ti ngongbi ni na place ti kota bungbi pëpe. Ye oko, a yeda na aye ti duti ti akete molenge so babâ na mama alingbi ti zia ni na tere ti ala.

◼ Yombo: A yeke sara ambeni kota bungbi na ando so gbagba ayeke na tere ni kue na a lingbi a ga na pupu na yâ ti da ni na lege ti amasini. Tongaso, a yeke nzoni nzobe apusu e ti pete angangu yombo mingi pëpe, si aga na kpale na ambeni zo so ayeke na kpale ti wungo pupu wala so aye fion ti yombo pëpe.​—1 aCor. 10:24.

◼ Kete mbeti Veuillez suivre l’intérêt (S-43): A yeke nzoni ti sara kusala na kete mbeti so ti mû asango na ndo ti mbeni zo so asara nzara ti tënë ni na peko ti so a fa na lo tënë na ngoi ti kota bungbi ni. A yeke nzoni awafango tënë aga na mbeti so oko wala use na ngoi ti kota bungbi ni. Tongana mo sû ye na lê ti mbeti so awe, mo lingbi ti zia ni na Ndokua ti ambeti wala ti mû ni na secrétaire ti kongregation ti mo tongana mo kiri na kongregation ti mo.​—Bâ Kusala ti Royaume ti février 2005, l. 8.

◼ Ndo ti tengo kobe: Gonda iri ti Jéhovah na lege ti nzoni tambela ti mo na ando ti tengo kobe. Na ando mingi, a yeke na yâ ti ngobo ti azo ti zia na awakua ni mbeni kete matabisi ndali ti kusala so ala sara.

◼ Ahôtel: (1) Mû azo mingi pëpe ahon ti so hôtel ni afa teti chambre oko oko. (2) Tongana mo ye ti tene hôtel ni abata na mo ndo ti lango mbeni pëpe, sara tënë ni na ala hio. (3) Tö kobe na yâ ti chambre pëpe tongana a yeda pëpe. (4) Tongana lege ayeke dä, zia lakue mbeni kete matabisi teti zo ti kua ti chambre ni. (5) Sara ye na lege ni na aye so a hunda ti te gi na hôtel (aye tongana dutëe, café wala a-glason). (6) Fa na gigi na ngoi kue lengo ti yingo na mbage ti awakua ti hôtel ni.

◼ Ambeni ndo ti lango: Na ando kue so mo lango dä, sara ye na nzobe, ndoye nga na nengo zo. Tongana mo lango na da ti mbeni zo, mû mbage na akua ti da ni nga futa ambeni ye. Na ndangba lango ni kozo ti tene mo kiri na ndo ti mo, gi ti bâ wala ndo ti lango so a mû na mo ayeke nzoni.