Mo leke tere ti mo awe ndali ti pumba ti yingo?
1. Aye wa a hunda ti sara ndali ti mbeni pumba?
1 Ti sara mbeni pumba ahunda aye mingi. A lingbi a wara aye ti tongo na kobe, a to ni nzoni nga na pekoni a mû ni na azo. Kangbingo kobe ni ahunda ti leke aye nzoni. Na ndo ni, a lingbi a leke kozoni ndo so azo ayeke te kobe ni dä. A lingbi azo so a tisa ala aleke nga tere ti ala, mbilimbili tongana ala yeke londo na yongoro ndo ti ga. Atâa so a hunda ti sara akua mingi, a yeke nzoni ndali ti so a yeke mû lege ti te legeoko na akamarade nga na afami ti mo mbeni pendere kobe so amû ngangu na zo. Na yâ ti ngoi kete, aTémoin ti Jéhovah ti ndo ti sese kue ayeke bungbi tere na kete groupe wala gbâ ni ndali ti mbeni pumba ti yingo so ala yeke ku ni kungo na Kota Bungbi ti District “Ala lango pëpe!” A sara akua mingi ti leke kapa ni nga ti wara aye kue kozoni. A tisa e kue. Ti duti dä na ti wara aye ti nzoni mingi dä, a lingbi zo oko oko aleke tere ti lo.—aProv. 21:5.
2. Ye wa a hunda ti sara ti duti dä na alango kue ti kota bungbi?
2 Wara aye ti nzoni mingi dä: Mo leke aye awe ti mû lege na mo ti duti dä na alango kue ti kota bungbi ni? Tongana a hunda ti sara ni, bâ patron ti mo ti tene na lo so mo yeke gue na alango kue ti kota bungbi ni, ye so a ndu nga kozo lango ni. Mo leke aye awe ndali ti futango lege nga na ndo ti lango? A yeke nzoni a-ancien abâ si a mû maboko na ambakoro, aita so mbeni mbage ti tere ti ala abuba nga na ambeni zo so ayeke na bezoin ti mungo maboko.—Jér. 23:4; aGal. 6:10.
3. Ngbanga ti nyen a yeke nzoni pëpe ti gue na mbeni assemblée internationale so a tisa e dä pëpe?
3 Na ambeni ndo, a yeke sara a-assemblée internationale. Girisa pëpe so a tisa gi ambeni congrégation nga na ambeni ita ti kodoro wande ti gue dä. Na lekengo aye so, filiale agbu li nzoni na ndo ti wungo ti azo so a tisa ala na bingo bê na ndo ti wungo ti aye ti duti nga na ando ti lango so ayeke dä. Wungo ti azo ni alingbi ti hon ndo ni tongana azo so a tisa ala pëpe na a-assemblée internationale ni ague.
4. Adango bê wa ayeke mû ande maboko na e ti leke tere ti e ndali ti tongo nda ti alango oko oko kue ti kapa ni?
4 Leke ti si hio na alango oko oko kue ti kota bungbi ni na ti wara ndo ti duti kozoni si kapa ni ato nda ni. Mû akete penze-ngbonga so aga kozo na tongo nda ti kapa ni ti bi lê na ndo ti mbeti-kapa ni. Ye so ayeke mû maboko na mo ti leke bê ti mo ndali ti aye so a yeke fa ni (Esdras 7:10). Na ngoi so président ni azi yanga ti kapa ni na lege ti mbeni kete mozoko, mä ni na leke tere ti mo ti mû mbage na bia nga na sambela ti tongo nda ni.
5. Tongana nyen sewa ti e alingbi ti wara ye ti nzoni mingi na lege ti kapa ni?
5 Tongana azo ti sewa kue aduti ndo oko na ngoi ti kota bungbi ni, ye so ayeke sara si ababâ na amama ayeke bâ wala amolenge ti ala ayeke dengi mê nzoni na kapa ni (Deut. 31:12). A wa azo kue ti diko legeoko na yâ ti Bible ti ala aversê so a yeke diko ni. Mungo akete note alingbi ti mû maboko na mo ti dengi mê nzoni. Anote so ayeke mû ande maboko na mo mbeni lâ ti dabe ti mo na akota tënë ti yâ ti adiskur ni. Kpe ti sara lisoro senge senge wala ti zia place ti mo ti londo na ngoi ti kapa ni. Tongana mo yeke na téléphone ti maboko, zia si a gboto lê ti mo wala ti ambeni zo na ngoi ti kapa ni pëpe. Na peko ti akapa ti lango oko oko, sara lisoro na ambeni zo na ndo ti ye so anzere na mo na yâ ti kapa ni.
6. Mbeni ye wa ayeke kota mingi na ngoi ti akota bungbi ti e? Tongana nyen e lingbi ti wara nzoni dä mingi?
6 Na ngoi ti kota bungbi ti district, lege azi na e ti lê kpengba songo na aita ti e ti koli na ti wali; ye so azo ti dunia so ayeke na mara ni pëpe (Ps. 133:1-3; Marc 10:29, 30). Ngbanga ti nyen ti gi pëpe ti fa tere ti mo na azo so aduti nduru na mo nga ti sara lisoro na ala na ngoi ti wungo tere? So ayeke mbeni ndani so ayeke nzoni ti tene zo aga na mbeni ye ti tengo ni na ti ngbâ na ndo ti kota bungbi ni ahon ti sigigi ti gue ti gi kobe. Sara kue ti gbu alege tongaso, so azi na mo, ti kpengba tere na popo ti mba.—aRom. 1:11, 12.
7. Ye wa a yeke nzoni e bâ na ndo ti bongo so e yeke yü ni ande?
7 Yungo bongo: A yeke kota ye ti bâ so Jéhovah ahunda lani na amolenge ti Israël ti sara mbeni ye ti pendere so a sara na kamba mingi na ti kanga ni na yanga ti bongo ti ala na kamba ti bleu (Nom. 15:37-41). Tongana ala yeke bâ ye so lani, a dabe ti ala so a zia ala nde ti voro Jéhovah. Laso, yungo bongo ti e nzoni na so ane zo na ngoi ti akota bungbi asara si e yeke nde na azo ti dunia so. A duti mbeni kpengba tënë ti témoin na lê ti azo so ayeke bâ e, même na ngoi so e sigigi ti te kobe na peko ti kapa ni. Tongaso, gbu li nzoni na ndo ti bongo so mo yeke yü ni ande.
8. Tongana nyen e lingbi ti fa tënë na ambeni zo ti gbata so a sara kota bungbi ni dä?
8 Fa tënë: Tongana e leke tere kozoni, e lingbi ti fa tënë na azo ti gbata so a sara kota bungbi ni dä. Mbeni ita-koli na wali ti lo ague na restaurant ti te kobe na peko ti kapa ni. Ita-koli ni afa badge ti lo na zo ti yambango azo ni, na lo tene: “Mo bâ badge so na kate ti azo mingi?” Zo ti yambango azo ni atene so ni bâ ni nga ni yeke hunda tere ti ni ngbanga ti nyen si azo mingi ayü gi mara ni? Ye so amû lege ti sara lisoro nga ita-koli ni atisa lo ti ga na kota bungbi ni.
9. Tongana nyen e lingbi ti fa so e kiri singila na Jéhovah, Zo so atisa e?
9 Atâa so aita ti e la ayeke sara adiskur ni kue, adémonstration ni kue nga na ahundango tënë na azo, a yeke Babâ ti e ti yayu, Jéhovah, la na ndoye amû na e kobe ti yingo so ngu oko oko (És. 65:13, 14). E yeke fa so e kiri singila na Zo so atisa e na dutingo dä na alango ni oko oko kue na ti te kobe ti yingo so lo mû ni na e. Mo leke tere ti mo awe ti sara tongaso?
[Akëtë tënë na lembeti 3]
Adango bê teti kota bungbi ti district
◼ Angbonga ni: Na yâ ti alango ota ni kue, kapa ni ayeke to nda ni na 8:20 ti ndapre. Na ngoi so mozoko ato nda ni, a yeke nzoni e kue e duti tongaso si kapa ni alingbi ti to nda ni na lege so ayeke nzoni. Kapa ni ayeke hunzi na 15:55 na lango ti vendredi na samedi. Ti dimanche, a yeke hunzi na 15:00.
◼ Ndo ti lutingo ti akutukutu: Na ndo ti akota bungbi kue so a yeke bata ndo ti ziango akutukutu dä, zo alingbi ti zia kutukutu ti lo kâ senge, na a yeke fa place ti ziango ni alingbi na molongo ti gango ti akutukutu ni oko na oko. Teti so ndo ti lutingo ti akutukutu ni akono mingi pëpe, a yeke nzoni aita amä tere ti mû kutukutu oko.
◼ Ndo ti duti: A yeke nzoni ti bata ndo ti duti gi teti azo so mo na ala aga legeoko na kutukutu wala so mo na ala alango da oko.
◼ Kobe ti bekombite: A yeke nzoni mo ga na kobe ti te ahon ti zia ndo ti kota bungbi ni na ngoi ti wungo tere ti gue ti gi kobe na mbeni ndo nde. Mo lingbi ti ga na mbeni kete ye ti batango kobe so mo lingbi ti zia na gbe ti ye ti duti. A yeda pëpe ti tene zo aga na asakpa so akono mingi nga na averre na ando so a yeke sara kota bungbi dä.
◼ A-offrande: E lingbi ti fa singila ti e teti kusala so a sara na ndo ti sese kue na mungo na bê kue a-offrande na Da ti Royaume ti e wala na ndo ti kota bungbi ni. A yeke nzoni a zia iri ti bungbi ti e so ndia ahinga ni na yâ ti kodoro so e yeke dä na ndo ti chèque wala mbeti ti nginza kue so e ye ti mû. Na tapande, na Centrafrique, a lingbi ti sara mbeti ti nginza ni na iri ti Association “Les Témoins de Jéhovah.”
◼ Andao na akpale so ahunda ti mû yorö hio: Tongana tere ti mbeni zo ason hio tongaso na ngoi ti kota bungbi ni, sara tënë ni na mbeni ita ti ndokua ti yambango azo so ayeke nduru na mo. Fade ita ni ayeke gue hio ti sara tënë ni na ndokua ti mungo yorö. Aita ti ndokua ni ayeke bâ wala kobela ni ayeke ngangu, na ala yeke mû maboko so alingbi.
◼ Camera na radio: A yeke nzoni e sara kusala pëpe na kuran wala aye ti sonorisation ti kota bungbi ni ndali ti aye tongana camera wala radio ti e. A yeke nga nzoni ti sara kusala na agbakuru so na mbeni lege so agboto lê ti zo pëpe.
◼ Apuse ti bébé na angende so a lingbi ti ngongbi ni: A lingbi a ga na apuse ti bébé nga na angende so a lingbi ti ngongbi ni na place ti kota bungbi pëpe. Ye oko, a yeda na aye ti duti ti akete molenge so babâ na mama alingbi ti zia ni na tere ti ala.
◼ Yombo: A yeke sara ambeni kota bungbi na ando so gbagba ayeke na tere ni kue na a lingbi a ga na pupu na yâ ti da ni na lege ti amasini. Tongaso na nzoni bê, a yeke nzoni e pete angangu yombo mingi pëpe si aga na kpale na ambeni zo so ayeke na kpale ti wungo pupu wala so aye fion ti yombo pëpe.—1 aCor. 10: 24.
◼ Kete mbeti Veuillez suivre l’intérêt (S-43): A yeke nzoni ti sara kusala na kete mbeti so ti mû asango na ndo ti mbeni zo so asara nzara ti tënë ni na peko ti so a fa tënë na lo na ngoi ti kota bungbi ni. A yeke nzoni awafango tënë aga na mbeti so oko wala use na ngoi ti kota bungbi ni. Tongana mo sû ye na lê ti mbeti so awe, mo lingbi ti zia ni na ndokua ti ambeti wala ti mû ni na secrétaire ti congrégation ti mo tongana mo kiri na congrégation ti mo.—Bâ Kusala ti Royaume ti février 2005, l. 8.
◼ Ahôtel: (1) Bata gi wungo ti achambre so mo ye, na mû azo mingi pëpe ahon ti so hôtel ni afa teti chambre oko oko. (2) Tongana mo ye ti tene hôtel ni abata na mo ndo ti lango mbeni pëpe, sara tënë ni na ala hio. (3) Mû puse ti yongo na akungba gi tongana mo yeke nduru ti sara kua na ni, na kiri na ni hio ti tene ambeni zo nga asara na kua. (4) Tö kobe na yâ ti chambre pëpe tongana a yeda na ni pëpe. (5) Zia lakue mbeni kete matabisi teti zo ti kua ti chambre ni. (6) Sara ye na lege ni na aye so a hunda ti te gi na hôtel, aye tongana dutëe, café wala a-glason. (7) Fa na gigi lengo ti yingo na yâ ti sarango ye ti mo na mbage ti awakua ti hôtel ni na ngoi kue. Ala yeke bâ lege ti gbâ ti azo so aga. Tongaso sarango ye ti e na lege ni, na nzoni bê nga na kangango bê ti ku anzere na ala mingi. (8) Ngere ti achambre so a zia na yâ ti molongo ti ahôtel so a fa ayeke ngere ti lango oko oko, taxe ayeke na ndo ni pëpe. Tongana ala hunda na mo ti futa mbeni ye nde so mo hunda pëpe wala mo sara pëpe, ke ti futa ni na gi ti sara tënë ni hio na ndokua ti kota bungbi ni so abâ tënë ti ando ti lango. (9) Tongana mo wara kpale na chambre ti hôtel ni, ku pëpe ti sara tënë ni na ndokua ti ndo ti lango ti kota bungbi ni tongana mo si kâ.
◼ Ambeni ndo ti lango: Na ando kue so mo lango dä, sara ye na nzoni bê, ndoye nga na nengo zo. Tongana mo lango na da ti mbeni zo, mû mbage na akua ti da ni nga futa ambeni ye. Na ndangba lango ni kozo ti tene mo kiri na ndo ti mo, gi ti bâ wala ndo ti lango so a mû na mo ayeke nzoni.