Ababâ na mama, ye nyen i ye teti kekereke ti amolenge ti i?

“Apendere koli na amasia, . . . Zia ala sepela iri ti L’Eternel.”​—PSAUME 148:​12, 13.

ABABÂ na mama wa si tënë ti kekereke ti amolenge ti ala agbu bê ti ala pëpe? A to nda ni na ngoi so a dü mbeni molenge, même kozo na ni, ala yeke gi bê ti ala na ndo nzoni duti ti lo. Fade lo yeke duti na nzoni seni? Fade lo yeke kono na nzoni tele? Tongana molenge ni ayeke ga kota, ambeni tënë ti gingo bê aga na ndo ni. Mingi ni, ababâ na mama aye gi ye so ayeke nzoni mingi teti amolenge ti ala.​—1 Samuel 1:​11, 27, 28; Psaume 127:​3-5.

² Ye oko, na yâ sese ti laso, a yeke ngangu na ababâ na mama ti mû ye ti nzoni mingi na amolenge ti ala. Mingi ti ababâ na mama ahon na yâ ti aye ti ngangu tongana abira, awusuwusu ti poroso, akpale ti nginza, ambeni sioye so azia akä na bê wala na tele ti ala nga na ambeni ye tongaso. Biani, na bê ti ala kue ala ye pëpe si aye tongaso asi na amolenge ti ala. Na yâ akodoro ti mosoro, ababâ na mama alingbi ti bâ amolenge ti asongo ti ala so aga zo na awara akota kua ti nginza. Tongaso, ala bâ so a yeke ngbanga ti ala ti sala kue si amolenge ti ala awara mbeni nzoni gigi na nzoni dutingo na ngoi so ala ga kota.​—Zo-ti-fa-tene 3:13.

Ti soro nzoni ye ti sala

³ Ndali ti so ala yeke adisciple ti Jésus Christ, aChrétien asoro awe ti mû fini ti ala na Jéhovah. Ala yeda na bê kue na tënë ti Jésus so: “Tongana mbeni zo aye ti ga na peko ti Mbi, a lingbi lo ke tele ti lo mveni, lo yö keke ti [pasi, NW ] ti lo lâ na lâ, na lo ga na peko ti Mbi.” (Luc 9:​23; 14:​27). Tâ tënë, fini ti Chrétien ahunda ti gbanzi ye na tele. Me, a yeke pëpe mbeni dutingo ti nzinga na ti mawa. Nde na so, a yeke mbeni dutingo so amû ngia mingi na zo, mbeni nzoni dutingo teti a ndu mungo ye, na tongana ti so Jésus atene lani, “ngia ayeke na zo so amû ye, ahon ngia ti lo so akamata ye.”​—Kusala 20:35.

⁴ Na ngoi ti Jésus, gigi akpengba lani mingi. Azo ayeke gi kobe ti yanga ti ala, nga na ndo ni, a lingbi ala kanga bê na gbe ti ngangu komandema ti aRomain nga na anengo kungba so azo ti nzapa ti ngoi ni azia senge senge na ndo ala (Matthieu 23:​2-4). Ye oko, azo mingi so amä lani Jésus ayeda na ngia ti zia yamba aye ti bê ti ala, même anzoni kua ti nginza ti ala, na ti ga adisciple ti lo (Matthieu 4:​18-​22; 9:9; aColossien 4:​14). Adisciple so asala ye na ndara pëpe? Ala ye ti buba gigi ti ala? Bâ tënë so Jésus atene: “Azo kue so azia da, wala aita ti ala ti koli, wala aita ti ala ti wali, wala babâ, wala mama, wala amolenge, wala yaka, teti iri ti Mbi, fade A mû ye so kue na ala lege ngbangbo oko, na fade ala wara fini ti lakue lakue.” (Matthieu 19:​29). Jésus azê na adisciple ti lo so Babâ ti yayu ahinga aye so atia ala. Tongaso lo wa ala: “Me i gi royaume ti Nzapa na mbilimbili ti Lo kozoni, na fade A mû ye so kue na i nga.”​—Matthieu 6:​31-​33.

⁵ Aye ayeke nga legeoko laso. Jéhovah ahinga aye so atia e, na ala so azia akusala ti Royaume na kozo ndo na yâ fini ti ala, mbilimbili ala so ayeke sala kua ti fango tënë na ngoi kue, ayeke na oko zendo so fade lo yeke bata ala nga (Malachie 3:​6, 16; 1 Pierre 5:7). Ye oko, ti ambeni babâ na mama, bê ti ala ayeke use use na ndo tënë so. Na mbage, ala ye si amolenge ti ala ague na li ni na yâ kusala ti Jéhovah, na peut-être même mbeni lâ ti sala kusala ti ngoi kue. Na mbeni mbage, tongana ala bâ akpale ti konomi na ti warango kua ti nginza laso, ala bâ ti ala atene a yeke nzoni ti tene amolenge ti ala awara nzoni fango ye kozoni. Ala tene tongana amolenge ti ala awara akode tongaso a lingbi ti mû lege na ala ti sala mbeni pendere kua wala tongana ala wara kpale, hio ala lingbi ti mû ni ti gi na kua. Na lê ti ababâ na mama tongaso, nzoni fango ye aye ti tene mandango mbeti ayo.

I leke amolenge teti kekereke

⁶ Na yâ ti akodoro oko oko, aye so a leke teti mandango mbeti ayeke nde nde. Na tapande, na Amerika, ada-mbeti ti letäa ayeke mû akota gere ti fango ye teti ngu 12. Na pekoni, a-élève alingbi ti soro ti gue na senda-gi wala mbeni kota ekole teti ngu osio wala ahon so ti wara licence wala ambeni diplôme na pekoni ti sala kua ti docteur, ti ndia, ti wakode-kua na ambeni tongaso. Na yâ article so, tënë ti “mandango mbeti ayo” aye ti sala tënë ti aye so zo ayeke manda na senda-gi. Na mbage, ambeni ekole ti akode-kua ayeke dä, so gi na peko ti akete ngu ti fango ye a mû diplôme so amû lege ti wara mbeni kua.

⁷ Laso, akota da-mbeti ayeke gi ti leke a-élève ti ala ti lï na senda-gi. Ti si dä, mingi ti akota da-mbeti aluti ngangu na ndo ambeti so alingbi ti mû lege na a-élève ni ti wara anzoni note ti linda na senda-gi, ahon ti fa na ala aye so ayeke leke ala ti wara kua. Laso, awafango mbeti, awawango na a-élève ayeke sala ngangu na ndo ambeni élève ti tene ala lï na yâ akpengba senda-gi, ndo so kâ ala yeke na beku ti wara adiplôme so alingbi ti zi lege na ala ti wara apendere kua ti nginza.

⁸ Tongaso, a lingbi ababâ na mama Chrétien asala nyen? Tâ tënë, ala ye si amolenge ti ala awara kizama ti ala na ekole na ala manda akode so alingbi ti mû maboko na ala teti gigi ti ala ti kekereke (aProverbe 22:​29). Me, a lingbi ala zia amolenge ti ala gi tongaso na gbe ti nzara ti hon amba ti ala ti tene ala wara mosoro na nzoni dutingo? Amara ti ye wa ala zia na gbele amolenge ti ala ti wara ni atâa a yeke na lege ti tene ti yanga ti ala wala na salango ye ti ala? Ambeni babâ na mama ayeke sala kua ngangu ti bata nginza ti tene ala tokua amolenge ti ala na akota senda-gi tongana ngoi ni asi. Ambeni même ayeke ndulu ti sala bon ndali ni. Ye oko, mara ti desizion tongaso ngele ni andu gi tënë ti nginza so mo yeke futa pëpe. Me ngele wala aye ti peko ti salango akota ekole laso ayeke so wa?​—Luc 14:​28-​33.

Ngele ti mandango mbeti ayo

⁹ Tongana e sala tënë ti ngele, mingi ni e yeke sala tënë ti futango nginza. Na ambeni kodoro, a yeke ngorogbia si ayeke mû nginza, na anzoni élève ayeke futa ye oko pëpe na senda-gi. Ye oko, na ando mingi, mandango mbeti na senda-gi ahunda nginza mingi na a ngbâ ti gue gi na li ni. Mbeni mbeti-sango (New York Times) atene ye so: “Giriri a bâ mandango mbeti na senda-gi tongana mbeni ye so azi lege na azo ti sala ye mingi. Na ngoi ti e, a yeke ye so afa polele kangbi so ayeke na popo ti awamosoro na awanzinga.” So ti tene, nzoni mandango ye ayeke ga hio fadeso ndo ti awamosoro na ti azo so ayeke na kota ndo. Ala ye si amolenge ti ala amanda mbeti ayo si ala ga nga awamosoro na azo so ayeke na kota ndo na sese so. A lingbi ababâ na mama Chrétien asoro mara ti ye tongaso ti tene amolenge ti ala atomba pekoni?​—aPhilippien 3:​7, 8; Jacques 4:⁠4.

¹⁰ Même na ndo so mandango mbeti na senda-gi ayeke senge senge, a hunda nga ambeni ye na zo. Na tapande, mbeni mbeti-sango (The Wall Street Journal ) atene na yâ mbeni kodoro ti Asie ti mbongo-to, ngorogbia ni “na kamene oko pëpe aleke ye na ekole ti tene apusu anzoni élève ti gue gi na li ni.” Na nda ni, singo na “li ni” aye ti tene ti lï na yâ mbeni kpengba senda-gi tongana Oxford na Cambridge (na Angleterre), wala oko ti akpengba senda-gi miombe ti Amerika nga na ambeni nde. Ngbanga ti nyen ngorogbia ni azia na sese mara ti yongoro kapa tongaso? Mbeti-sango ni atene a yeke “ti pusu konomi ti kodoro ni na nduzu.” E lingbi ti tene so atâa a mû nginza gi kete teti mandango mbeti ni, ye so awamandango mbeti ni ayeke futa na pekoni ayeke fini ti ala so ala yeke yôro ni kue na yâ aye ti sese so. Azo mingi ayeke tomba peko ti mara ti fini tongaso; me ti ababâ na mama Chrétien, a yeke ye so si ala ye teti amolenge ti ala?​—Jean 15:​19; 1 Jean 2:​15-​17.

¹¹ Mbeni tënë ayeke nga dä. A hinga so yâ ti agbagba ti asenda-gi asi singo na asioni salango ye, tongana nyongo mbangi, nyongo sämba ahon ndo ni, pitan, nzi nde nde, salango ye ti ngangu nde nde na ndo afini zo kozo si amba ti ala ayeda na ala, na aye ni angbâ ti gue. Zia e bâ tënë ti nyongo sämba ahon ndo ni. Mbeni mbeti-sango (New Scientist ) atene na ndo nyongo sämba mingi gi ti tene a hon ndo ti zo, a tene: “Ndulu na ndambo ti [awamandango mbeti na senda-gi na Amerika] ayeke nyon tongaso fani oko na yâ ti yenga use.” Oko kpale so ayeke na popo ti amaseka mingi ti Australie, Grande-Bretagne, Russie nga na ambeni kodoro. Tongana a ndu tënë ti pitan, lisoro na popo ti awamandango mbeti laso ayeke na ndo “awarango tele”, so mbeni mbeti-sango (Newsweek ) atene “a yeke azo so atingbi tele gi fani oko ti su yanga ti mba wala ti bungbi koli na wali, nga na ambeni ye tongaso. Ala yeke na nzara ti kiri ti bâ tele wala ti sala lisoro na pekoni oko pëpe.” Aye so azo amanda afa so na popo ti a-élève 100 ala 60 ti si na 80 ayeke sala mara ti ye tongaso. Mbeni wagingo nda ti ye atene: “Tongana mo yeke tâ wamandango mbeti na senda-gi, mo yeke sala aye so.”​—1 aCorinthien 5:​11; 6:​9, 10.

¹² Na ndo ti aye ti sioni so, a wara nga gbâ ti adevoir na mbito ti akizama. Biani, a-élève aye ti manda na ti sala adevoir ti ala ti wara akizama ni. Ti ambeni, a lingbi ala mû ngoi ti ala ti sala na kua nga ti gue na ekole. Aye so kue ahunda ngoi na ngangu ti ala mingi. Me ngoi na ngangu ti sala aye ti yingo ayeke na ndo wa? Tongana ye aga ngangu fade ye wa ala yeke dö ti zia? Fade akusala ti Royaume ayeke ngbâ lakue na kozo ndo, wala fade ala yeke pusu ni yamba? (Matthieu 6:​33). Mbeti ti Nzapa awa aChrétien: “I bata nzoni si i tambela na lege ni, i tambela tongana awabuba pëpe, me tongana awandara; i zia l’heure ti i ahon senge pëpe, teti ngoi so ayeke sioni.” (aEphésien 5:​15, 16). Mawa ni ayeke so ambeni azia mabe ngbanga ti so ala woko na gbe ti aye so ahunda ngoi na ngangu ti ala wala ala tï na yâ asioni tambela na senda-gi so Bible ake!

¹³ Tâ tënë, pitan, sioni tambela na aye so asala ngangu na ndo zo angbâ gi pëpe na yâ gbagba ti senda-gi. Me, mingi ti amaseka ti sese abâ aye so kue gi tongana mbage ti mandango ye na ala bâ mbeni ye ti sioni dä pëpe. A lingbi ababâ na mama Chrétien so ahinga aye so ayeke si kâ azia amolenge ti ala na yâ ti mara ti ndo tongaso teti ngu osio wala même ahon ni? (aProverbe 22:3; 2 Timothée 2:​22). A yeke na lege ni ti kanga lê na ndo akpale so alingbi ti si na amaseka ndali ti anzoni ye so ala lingbi ti wara na pekoni? Na kota ye ni ayeke so, amaseka ayeke manda nyen na ndo ti aye so alingbi ti duti na kozo ndo na yâ fini ti ala?a (aPhilippien 1:​10; 1 aThessalonicien 5:​21). A lingbi ababâ na mama abâ atënë so nzoni na yâ sambela, legeoko na kpale ti tokuango amolenge ti ala na mbeni gbata nde wala kodoro wande ti sala ekole.

Ambeni ye ti sala nde na senda-gi ayeke so wa?

¹⁴ Laso, mingi ti azo abâ so ti tene amaseka aga zo, a lingbi ala gue gi na senda-gi. Ye oko, ahon ti mû peko ti atënë so azo mingi ayeke tene, aChrétien amä gbotongo mê ti Mbeti ti Nzapa so: “I tambela na lege ti sese so pëpe, me i changé lege ti i na lege ti bibe ti fini, si i lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:⁠2). Ye wa si Nzapa aye teti azo ti lo, amaseka na akota zo, na hunzingo ti ngoi ti nda ni so? Paul awa mingi Timothée, lo tene: “Mo duti na donzi na yâ ye kue, hu pono ti ye ti ngangu, sala kusala ti évangéliste, na mo sala kusala ti mo kue.” Atënë so andu e kue biani laso.​—2 Timothée 4:⁠5.

¹⁵ Ahon ti yôro tele ti e na yâ bibe ti sese so ti gi mosoro, a lingbi e kue e “duti na donzi”, e bata lê ti e gi na ndo aye so e yeke sala na lege ti yingo. Tongana mo yeke mbeni maseka, hunda tele ti mo: ‘Mbi yeke mû ngangu ti mbi kue ti “sala kusala ti mbi “ ti tene mbi ga mbeni wakua so alingbi kue ti Mbeti ti Nzapa? Aye wa mbi leke ti sala ti tene mbi ngbâ ti sala kusala ti mbi “kue”? Mbi gbu li ti mbi ti sala kusala ti fango tënë na ngoi ti mbi kue?’ So ayeke akpengba hundango tënë, mbilimbili tongana mo yeke bâ ambeni maseka so ayeke gi peko ti aye ti kion, ala “yeke gi kota ye” so ala bâ atene fade a yeke gue na ala ti wara mosoro kekereke (Jérémie 45:⁠5). Tongaso, na lege ti ndara ababâ na mama Chrétien ayeke mû na amolenge ti ala, ngbele ye so ala ngbâ kete, wango na fango ye ti yingo so ayeke nzoni.​—aProverbe 22:6; Zo-ti-fa-tene 12:3; 2 Timothée 3:​14, 15.

¹⁶ Yaya ti amolenge-koli ota ti mbeni sewa so mama ni asala kua ti pionnier teti angu mingi atene: “Lê ti mama akpengba ândö mingi na ndo akamarade ti e. E yeke tambela lani pëpe na akamarade ti e ti ekole, me gi na ala ti kongregation so salango ye ti ala ayeke nzoni na lege ti yingo. Lakue mama ayeke tisa amissionnaire, asurveillant so ayeke gue na ndo nde nde, aita ti Béthel na apionnier na da ti tene e na ala e duti. Ti mä ye so asi na ala na ti bâ ngia ti ala amû maboko na e si bê ti e aduti na nzara ti sala kusala ti ngoi kue nga.” So ye ti ngia ti bâ so laso amolenge-koli ota so ayeke na yâ kusala ti ngoi kue: oko na Béthel, oko asala Ekole ti formation ministérielle, na oko ayeke pionnier!

¹⁷ Na ndo ti ngorongo amolenge na anzoni zo na lege ti yingo, a lingbi ababâ na mama asala hio ti mû nzoni fango lege na amolenge ti ala na ndo aye so ala soro ti manda na ekole nga akua so ala ye ti sala ande. Mbeni maseka-koli so ayeke fadeso na Béthel atene: “Kozo nga na peko ti mariage ti ala, ababâ na mama ti mbi kue ayeke apionnier. Ala sala kue si bibe ti sala tongana apionnier alï na yâ sewa ni kue. Na ngoi so e yeke soro ândö aye ti manda na ekole wala e mû adesizion so ayeke ndu kekereke ti e, lakue ala yeke wa e ti soro ye so fade ayeke zi lege na e nzoni ti sala kua ti nginza so amû ngoi kete nga ti sala kua ti pionnier.” Ahon ti soro ti manda aye so ayeke hunzi ni gi na senda-gi, a yeke nzoni ababâ na mama na amolenge agbu li na ndo aye so ayeke duti ande nzoni ti tene ala wara lege ti sala kusala ti Jéhovah na ngoi kue.b

¹⁸ Aye so azo amanda afa so na yâ ti gbâ ti akodoro, ye so atia mingi ayeke azo so asigigi na senda-gi pëpe, me azo so ahinga akua ti maboko nde nde. Mbeni mbeti-sango ( USA Today) atene so “na yâ ti angu so ayeke ga, na popo ti awakua 100 a yeke hunda na ala 70 ti wara mbeni diplôme ti senda-gi pëpe, me mbeni diplôme ti a-ekole so afa akua ti kode.” Mingi ti a-ekole tongaso ayeke fa ye teti angu mingi pëpe na ndo akua ti biröo, lekengo oto, ordinateur, atuyau ti ngu, salango li, na ambeni ye. So tâ anzoni kua la? Biani! Peut-être na bango ni akua so agboto lê pëpe, me ala ga na nginza nga a yapu ye teti ala so tâ kua ti ala ayeke ti sala na Jéhovah.​—2 aThessalonicien 3:8.

¹⁹ Mbeti ti Nzapa awa mingi amaseka: “Apendere koli na amasia, . . . Zia ala sepela iri ti L’Eternel, teti gi iri ti Lo oko alingbi na yango-iri. Gloire ti Lo ahon sese na ayayu.” (Psaume 148:​12, 13). Ti haka akota ndo na aye ti pekoni so sese ayeke mû, kite ayeke pëpe so a yeke kusala ti ngoi kue teti Jéhovah si aga na fini so ayeke na tâ ngia biani. Bata na li ti mo zendo ti Mbeti ti Nzapa so: “Tënë nzoni ti L’Eternel asala si zo awara mosoro, na Lo zia vundu dä pëpe.”​—aProverbe 10:22.

[Akete tënë na gbe ni]

Mo lingbi ti fa nda ni?

• A-Chrétien azia bê ti ala na nyen ti wara nzoni duti ti kekereke?

• Akpale wa ayeke na gbele ababâ na mama Chrétien na ndo gigi ti kekereke ti amolenge ti ala?

• Aye wa a lingbi e gbu li dä tongana e yeke bâ aye ti peko ti mandango mbeti ayo?

• Tongana nyen ababâ na mama alingbi ti mû maboko na amolenge ti ala ti duti na nzara ti sala na Jéhovah na ngoi kue?

[Ahundango tënë ti manda na ye]

1. Aye wa ababâ na mama ayeke gi bê ti ala dä teti amolenge ti ala?

2. Ngbanga ti nyen ababâ na mama ayeke na nzara mingi ti tene amolenge ti ala aduti nzoni tongana ala ga kota?

3. Ye wa aChrétien asoro ti sala?

4. Jésus awa adisciple ti lo ti gi peko ti nyen?

5. Tongana nyen ambeni babâ na mama abâ ti ala zendo ti Jésus so fade Nzapa ayeke bata awakua ti lo?

6. Na yâ article so, tënë ti “mandango mbeti ayo” aye ti sala tënë ti nyen?

7. Ngangu wa ayeke sala na ndo ti a-élève na kota da-mbeti?

8. Aye wa ayeke na gbe ti ababâ na mama Chrétien ti soro ni?

9. Ye wa e lingbi ti tene na ndo nginza so azo ayeke futa laso ndali ti mandango mbeti ayo?

10. Na lege wa mandango mbeti ayo ague oko mingi na maïngo ti aye ti sese so?

11. Atondo afa nyen na ndo nyongo sämba mingi nga na pitan na popo ti awamandango mbeti na senda-gi?

12. Aye wa ayeke sala ngangu na ndo ti awamandango mbeti na senda-gi?

13. Ahundango tënë wa a lingbi ababâ na mama Chrétien agbu li na ndo ni?

14, 15. (a) Atâa atene so azo mingi ayeke tene, wango ti Bible wa abâ e laso? (b) Ahundango tënë wa amaseka alingbi ti hunda na tele ti ala?

16. Tongana nyen na ndara ababâ na mama Chrétien alingbi ti ngoro amolenge ti ala na anzoni zo na lege ti yingo?

17. Fango lege wa ababâ na mama alingbi ti mû na amolenge na yâ ye so ala soro ti manda na ekole nga na kua so ala ye ti sala ande? (Bâ encadré na lembeti 29.)

18. Akusala wa amaseka alingbi ti gbu li ti ala na ndo ni?

19. Ye wa ayeke ga na zo fini so ayeke na tâ ngia biani?

[Encadré na lembeti 29]

Nzoni ti mandango mbeti ayo ayeke so wa?

Mingi ti azo so alï na senda-gi aku ti wara mbeni diplôme so fade a zi lege na ala ti wara nzoni kua ti nginza nga so abata ala. Ye oko, atondo ti angorogbia afa so gi awamandango mbeti 25 na ndo ti 100 si ayeke wara kota diplôme na yâ ngu omene. So ayeke ye ti vundu! Même ala so awara ni, ala yeke wara nzoni kua biani na pekoni? Bâ ye so mbeni gingo nda ti ye atene.

“Ti gue na senda-gi ti Harvard wala ti Duke aga na zo lakue pëpe nzoni kua ti nginza. . . . Akota ndokua ahinga ye mingi pëpe na ndo amaseka so aga ti gi kua na mbage ti ala. Mbeni kpengba diplôme ti kota senda-gi alingbi ti pika bê. Ye oko, na pekoni a yeke ye so zo alingbi ti sala wala pëpe si ayeke tâ kota ye.”​—Mbeti-sango Newsweek, 1 novembre 1999.

“Atâa so akua ti laso ahunda angangu kode ahon ti giriri . . . , akode so a hunda ndali ni ayeke aye so zo amanda nzoni na kota da-mbeti tongana acalcul, dikongo na sungo mbeti na klase ti troisième . . . , me pëpe akode so amanda na senda-gi. . . . A hunda pëpe na awamandango mbeti ti gue na senda-gi ti wara nzoni kua, me ti hinga mbilimbili akode so ala manda na kota da-mbeti.”​—Mbeti-sango American Educator, ti avril na mai 2004.

“Mingi ti asenda-gi ayeke leke awamandango mbeti nde na ye so ayeke tambela biani na sese so ala gue ti sala kua dä. Fadeso, azo aye mingi a-ekole so ayeke fa akua ti kode. Ti londo na ngu 1996 ti si na 2000, wungo ti azo so asala ekole so akiri ague na li ni ngangu mingi; fadeso a yeke azo 48 na ndo ti 100 si asala ni. . . . Na oko ngoi ni, adiplôme ti senda-gi so ahunda nginza na ngoi mingi ti wara ni, nengo ti ala akiri gi kiringo na peko.”​—Mbeti-sango Time, 24 janvier 2005.

“Ndokua ti Gbenyongbia ti Amerika so abâ tënë ti kua adiko so ti si na nda ti ngu 2005, fade zo oko na ndo ti ota so awara diplôme ti senda-gi na peko ti ngu osio ayeke wara ande kua pëpe alingbi na diplôme ti lo.”​—Mbeti-sango The Futurist, ti juillet na août 2000.

Ndali ti aye so kue, mingi ti awafango mbeti ayeke na kite mingi na ndo nene ti mandango mbeti ayo. Tondo ti mbeni mbeti-sango (Futurist ) atene tënë ti vundu so: “E yeke leke azo ti sala ye so alingbi na kekereke ti ala pëpe.” Nde na so, bâ ye so Bible atene na ndo Nzapa: “Mbi yeke L’Eternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä. O, tongana mo mä komandema ti Mbi giriri! ka siriri ti mo aga tongana ngu so asua, na mbilimbili ti mo aga tongana mapo ti kota ngu ti ingo.”​—Esaïe 48:​17, 18.

[Foto na lembeti 26]

Ala zia yamba aye so ala gi pekoni ti gue na peko ti Jésus

[Foto na lembeti 31]

Na ndara ababâ na mama Chrétien angoro amolenge ti ala ngbele ye so ala de kete na anzoni zo na lege ti yingo